“Kon gusto gyod kang makakat-on bahin sa Diyos, padayon sa pagtuon uban sa mga Saksi ni Jehova.” Di ko katuo nga iya tong isulti. Niadtong panahona, taudtaod na kong nagtuon uban sa mga Saksi ni Jehova. Kon nganong kadto ang akong reaksiyon, hatagan ta mog ideya bahin sa akong kinabuhi.

 Natawo ko sa Quezaltepeque, usa ka lungsod sa El Salvador. Ikaunom ko sa 15 nga magsoon. Gipaningkamotan sa akong ginikanan nga mapadako ko nga matinud-anon ug mosunod sa balaod. Usahay tudloan ko ni Leonardo ug sa ubang Saksi ni Jehova bahin sa Bibliya. Pero gibalewala ra nako ang ilang gitudlo, ug sunodsunod nga sayop nga desisyon ang akong nahimo. Sa 14 ànyos ko, nakakat-on na kong moinom ug magdroga uban sa akong mga amigo sa eskuylahan. Nangundang silag eskuyla aron moapil sa gang, ug misunod pod ko sa ilang daotang ehemplo. Pirme ming naa sa kadalanan aron pugson ang mga tawo sa paghatag namog kuwarta ug mangawat sab mi aron masuportahan ang among mga bisyo.

 Ang gang ang nahimo nakong pamilya, ug nagtuo ko nga angay kong mounong nila. Pananglitan, usa ka adlaw dihang nakadroga ang usa sa akong mga kauban sa gang, giatake niya ang usa sa akong mga silingan. Pero napildi siya sa akong silingan ug gitawgan niini ang polis. Sa akong kasuko, akong gibunalbunalan ang kotse sa akong silingan aron iyang buhian ang akong amigo. Sigeg hangyo ang akong silingan nga moundang ko, pero padayon gihapon nakong gibunalbunalan ang mga bentana sa iyang sakyanan ug giguba ang ubang parte niini.

 Dihang 18 anyos ko, nagkaengkuwentro ang among gang ug ang kapolisan. Dihang ilabay na nako ang hinimo namo nga bomba, mibuto ni sa akong kamot—ambot nganong nahitabo to. Nakita na lang nako nga bungkag na ang akong kamot, dayon nakuyapan ko. Pagmata nako sa ospital, wala na koy tuong kamot ug dili na makadungog ang akong tuong dalunggan ug halos buta na ang akong tuong mata.

 Pero bisag mao toy nahitabo nako, mibalik ko sa gang paggawas nako sa ospital. Pero wala madugay gidakop ko sa mga polis, ug napriso ko. Samtang naa sa prisohan, mas milig-on ang panag-ubanay sa among gang. Tibuok adlaw ming magkauban—gikan sa pamahaw, dihang magyupyop sa unang likit sa marijuana, hangtod sa among pagtulog.

 Gibisita ko ni Leonardo sa prisohan. Samtang nag-estorya mi, iyang gitudlo ang tattoo sa akong tuong bukton. “Nahibalo ba kag unsay gipasabot anang imong tattoo?” nangutana siya. “Siyempre, sex, drugs, ug rock and roll,” mitubag ko. Pero si Leonardo miingon: “Morag ang gipasabot ana, ospital, prisohan, ug kamatayon. Naospital ka, ug karon naa ka sa prisohan. Kabalo na kag unsay sunod.”

 Nakurat ko sa giingon ni Leonardo. Sakto siya. Samag ginakalot nako ang akong lubnganan. Gitanyagan ko ni Leonardo ug pagtuon sa Bibliya, ug misugot ko. Tungod sa akong mga nakat-onan sa Bibliya, naningkamot kong magbag-o. Pananglitan, giingon sa Bibliya nga “ang daotang pakig-uban makadaot sa mapuslanong pamatasan.” (1 Corinto 15:33) Busa ang usa sa kinahanglan nakong himoon mao ang pagpangitag bag-ong mga higala. Imbes moapil sa tapoktapok sa gang, mitambong na ko sa mga tigom sa mga Saksi ni Jehova sa prisohan. Didto nako nakaila si Andrés nga piniriso pod ug nabawtismohan ingong Saksi ni Jehova sulod sa prisohan. Gihagad ko niya nga magdungan mig pamahaw. Sukad adto, dili na magsugod ang akong adlaw sa pag-marijuana. Maghisgot na mi ni Andrés ug usa ka teksto sa Bibliya kada buntag.

 Namatikdan dayon sa mga membro sa gang nga nagbag-o ko, maong gusto kong estoryahon sa usa sa mga lider sa gang. Nahadlok ko. Wala ko kabalo kon unsay iyang himoon nako kon mahibaw-an niya ang akong plano, kay halos walay ginatugotan nga mobiya sa gang. Siya miingon: “Wala na ka nagaapil sa atong mga tapoktapok kay didto na ka tigtambongan ug tigom sa mga Saksi ni Jehova. Unsay imong plano?” Giingnan nako siya nga gusto kong magpadayon ug tuon sa Bibliya ug magbag-o sa akong kinabuhi. Nakurat ko dihang giingnan ko niya nga tahoron sa gang ang akong desisyon basta pamatud-an nako nga gusto gyod ko nga mahimong Saksi ni Jehova. Dayon iya kong giingnan: “Kon gusto gyod kang makakat-on bahin sa Diyos, padayon sa pagtuon uban sa mga Saksi ni Jehova. Magdahom mi nga mohunong na ka sa paghimog daotan. Nalipay ko para nimo. Sakto ang imong gihimo. Matabangan gyod ka sa mga Saksi. Nag-Bible study ko sa una sa United States, ug Saksi ni Jehova ang uban nakong paryente. Ayawg kahadlok. Padayon lang.” Bisag hadlok gihapon ko, nalipay kaayo ko. Nagpasalamat ko kang Jehova. Mora kog langgam nga nakabuhi sa hawla, ug nasabtan nako ang giingon ni Jesus: “Kamo mahibalo sa kamatuoran, ug ang kamatuoran magpagawas kaninyo.”—Juan 8:32.

 Pero gisulayan ko sa akong kanhing mga amigo pinaagi sa pagtanyag kanakog droga. Usahay madala ko. Pero kadugayan, human sa daghang kinasingkasing nga pag-ampo, naundang ra gyod nako ang akong mga bisyo.—Salmo 51:10, 11.

 Paggawas nako sa prisohan, daghan ang nagtuo nga mobalik ko sa akong kanhing pagkinabuhi, pero wala na mahitabo. Hinuon, pirme kong mobalik sa prisohan aron ipaambit ang akong nakat-onan sa Bibliya. Sa kataposan, mituo na gyod ang akong kanhing mga amigo nga nagbag-o na ko. Pero ikasubo, nagtuo gihapon ang akong mga kaaway kaniadto nga apil pa ko sa gang.

 Usa ka adlaw dihang nagsangyaw ko, kami sa akong partner sa pagsangyaw kalit nga gipalibotan sa armadong mga membro sa kaaway nga gang, ug gusto ko nilang patyon. Matinahoron pero maisogong gipatin-aw sa akong partner nga dili na ko membro sa gang. Naningkamot ko nga magpabiling kalmado. Human ko nila bun-oga, gibaharan ko nila nga dili na mobalik sa maong lugar, dayon ilang gipaubos ang ilang mga armas ug gipalakaw mi. Nabag-o gyod sa Bibliya ang akong kinabuhi. Kaniadto, manimalos gyod ko. Pero karon nagsunod na ko sa tambag sa Bibliya sa 1 Tesalonica 5:15: “Tinoa nga walay usa nga mobalos ug kadaot sa kadaot kang bisan kinsa, hinunoa kanunayng tinguhaa ang maayo sa usag usa ug sa tanan.”

 Sukad nga nahimo kong Saksi ni Jehova, naningkamot ko nga magmatinud-anon. Dili ni sayon. Pero milampos ko tungod sa tabang ni Jehova nga Diyos, sa tambag sa Bibliya, ug sa suporta sa akong bag-ong mga higala. Dili na gyod ko mobalik sa akong kanhing binuhatan.—2 Pedro 2:22.

 Bayolente kaayo ko sa una. Kon nagpadayon ko sa akong bayolenteng kinabuhi, seguradong patay na ko ron. Tungod sa akong mga nakat-onan sa Bibliya, nabag-o ko. Giundang nako ang akong mga bisyo. Nakakat-on ko nga makigdait sa akong mga kaaway kaniadto. (Lucas 6:27) Ang akong mga higala karon nakatabang nako nga maugmad ang maayong mga hiyas. (Proverbio 13:20) Malipayon ug may katuyoan ang akong kinabuhi; nag-alagad ko sa Diyos nga kinabubut-ong nagpasaylo sa tanang daotan nga akong nahimo.—Isaias 1:18.

 Sa 2006, apil ko sa nakadawat ug espesyal nga pagbansay para sa mga Kristohanong ebanghelisador nga tagsaanon. Paglabayg pipila ka tuig, giminyoan nako ang akong pinangga nga asawa, ug nakabaton mig anak nga babaye. Karon pirme nakong itudlo sa uban ang mga prinsipyo sa Bibliya nga nakatabang nako. Ansiyano sab ko sa among kongregasyon, ug ginatabangan nako ang mga batan-on nga likayan ang mga sayop nakong nahimo niadtong batan-on pa ko. Imbes magkalot ug kaugalingong lubnganan, nagtukod kog pundasyon para sa walay kataposang kaugmaon nga gisaad sa Diyos diha sa Bibliya.