Natawo ko sa Montreal, ang kinadak-ang siyudad sa probinsiya sa Quebec, Canada. Ako ug ang akong tulo ka igsoon gipadako sa among mahigugmaong mga ginikanan sa Rosemont. Nindot to nga lugar, ug malipayon ang among pamilya.

 Sa bata pa ko interesado kog Bibliya. Niadtong 12 anyos ko, nahinumdom ko nga nagbasa ko sa Bag-ong Tugon bahin sa kinabuhi ni Jesus, ug ganahan kaayo ko adto. Natandog ko sa iyang gugma ug kaluoy sa uban, maong gusto kong maparehas niya. Pero ikasubo nga nawala to nga tinguha samtang nagdako ko ug nakig-uban sa dili maayong mga tawo.

 Ang akong amahan tigtugtog ug saxophone, ug gihatag niya nako ang iyang saxophone. Tungod niya nahilig pod kog musika, ug nahimo ning sentro sa akong kinabuhi. Ganahan kaayo kog musika maong nakakat-on kong mogitara. Sa ulahi nagporma kog rock band uban sa akong mga amigo, ug nag-perform mi sa ubay-ubayng mga show. Namatikdan mi sa pipila ka iladong producer sa industriya sa musika, ug gitanyagan ko nga ipromot ang akong musika. Mipirma kog kontrata sa usa ka dako nga recording company. Misikat ang akong musika ug pirme ning ipatokar sa mga radyo sa Quebec.

 Morag naa na nako ang tanan nakong gipangandoy. Batan-on ko ug sikat, ug nakakuwarta kog dako sa trabaho nga malingaw ko. Sa adlaw, mag-ensayo ko sa gym, mohatag ug interbiyo, mopirmag mga autograph, ug makita sa telebisyon. Sa gabii, naa miy mga show ug dayon magparti. Aron mawala ang akong stress tungod sa mga fans, misugod kog inom adtong batabata pa ko ug sa ulahi nagdroga. Mapatuyangon pod ko ug imoral.

 Daghan ang naibog sa akong kinabuhi kay malipayon kong tan-awon. Pero ang tinuod, dili ko malipayon ilabina kon mag-inusara. Magul-anon ko ug mabalak-on. Adtong sikat na kaayo ko, duha sa akong mga producer ang namatay sa AIDS. Nakurat ko! Bisag ganahan kaayo kog musika, gingil-aran ko sa pagkinabuhi nga konektado niini.

 Bisan pa sa akong mga nalampos, nahibalo ko nga dunay sayop sa kalibotan. Nganong daghan kaayog inhustisya? Naglibog ko kon nganong walay gihimo ang Diyos. Gani pirme kong mag-ampo alang sa tubag. Samtang walay show, mibalik kog basag Bibliya. Bisag wala ko kasabot sa kadaghanan sa akong gibasa, nakaingon ko nga duol na gyod matapos ang kalibotan.

 Samtang nagbasa kog Bibliya, akong nahibaloan nga dihay higayon nga nagpuasa si Jesus sa desyerto sulod sa 40 ka adlaw. (Mateo 4:1, 2) Naghunahuna ko nga kon magpuasa pod ko, basin makig-estorya nako ang Diyos. Busa nag-eskedyul ko nga magpuasa. Duha ka semana una nako sugdan ang pagpuasa, duha ka Saksi ni Jehova ang nanuktok sa pultahan ug gipasulod dayon nako sila. Gitan-aw nako sa mata ang usa nila nga ginganlag Jacques ug gipangutana, “Unsaon man nato pagkahibalo nga nagkinabuhi na ta sa kataposang mga adlaw sa kalibotan?” Agig tubag, gibasa niya sa iyang Bibliya ang 2 Timoteo 3:1-5. Gipaulanan nako silag pangutana, ug mibilib ko sa ilang makataronganon ug makatagbawng mga tubag, nga pirmeng gibase sa Bibliya. Human sa pipila ka pagduaw, akong naamgohan nga dili na ko kinahanglang magpuasa.

 Nagpa-Bible study ko nga regular uban sa mga Saksi. Ngadtongadto, gipaputlan nako ang akong taas nga buhok ug mitambong sa tanang tigom sa Kingdom Hall. Ang pag-abiabi kanako sa mga Saksi mas nakakombinsir nako nga nakita na gyod nako ang kamatuoran.

 Siyempre, kinahanglan kong mohimog dagkong kausaban sa kinabuhi aron mapadapat ang akong nakat-onan sa Bibliya. Pananglitan, kinahanglan kong moundang sa pagdroga ug biyaan ang imoral nga pagkinabuhi. Kinahanglan pod nakong usbon ang akong kinaiya nga kaugalingon ray gihunahuna ug magpakitag dakong pagtagad sa uban. Kay nag-inusarang ginikanan, kinahanglang atimanon nako ang emosyonal ug espirituwal nga panginahanglan sa akong duha ka anak. Busa gibiyaan nako ang akong karera sa musika ug nagtrabaho sa pabrika nga gamayg suweldo.

 Dili sayon ang paghimo niini nga mga kausaban. Samtang naningkamot nga moundang sa pagdroga, nag-antos ko sa mga withdrawal symptom ug usahay makabalik sa pagdroga. (Roma 7:19, 21-24) Ilabinang lisod biyaan ang imoral nga kinabuhi. Kapoy pod kaayo ang akong bag-ong trabaho, ug makaluya ang gamay nga suweldo. Ang akong tulo ka bulan nga suweldo karon kitaon ra nakog duha ka oras adtong musikero pa ko.

 Ang pag-ampo nakatabang nako nga padayong himoon kining lisod nga mga kausaban. Importante sab ang regular nga pagbasa sa Bibliya. Naay mga teksto nga nakadasig kaayo nako. Usa niana ang 2 Corinto 7:1, nga nagdasig sa mga Kristohanon nga ‘hinloan ang kaugalingon sa tanang kahugawan.’ Ang laing teksto nga nagpalig-on nako nga posible ang pag-undang sa daotang mga bisyo mao ang Filipos 4:13, nga nag-ingon: “Sa tanang butang ako adunay kusog pinaagi kaniya nga naghatag ug gahom kanako.” Gitubag ni Jehova ang akong mga pag-ampo ug gitabangan ko nga masabtan ug mapadapat ang kamatuoran sa Bibliya. Kini ang nagpalihok nako nga idedikar ang akong kinabuhi kaniya. (1 Pedro 4:1, 2) Nabawtismohan ko niadtong 1997 ingong Saksi ni Jehova.

 Segurado ko nga kon nagpadayon ko sa akong kanhing pagkinabuhi, patay na ko ron. Apan malipayon kaayo ko karon sa akong kinabuhi! Panalangin kaayo ang akong buotang asawa nga si Elvie. Nag-alagad mi nga bug-os panahon ug nalingaw ming duha sa pagtudlog Bibliya ngadto sa uban. Kini nakahatag nakog dakong kalipay ug pagkakontento. Mapasalamaton kaayo ko kang Jehova nga iya kong gikabig.​—Juan 6:44.