Natawo ko sa La Ceiba, Honduras. Ako ang kinamanghoran sa lima ka magsoon ug ako ray lalaki. Ako ra pod ang amang sa among pamilya. Nagpuyo mi sa akong pamilya sa peligroso nga dapit, ug pobre kaayo mi. Mas migrabe ang among kahimtang dihang naaksidente ang akong amahan diha sa trabahoan ug namatay. Kuwatro anyos ko adtong tungora.

 Naningkamot pag-ayo si Mama aron maatiman mi sa akong mga igsoon, pero panalagsa rang may igo siyang kuwarta nga ikapalit niyag sinina para nako. Kon moulan, sagad tugnawon ko kay wala koy sinina nga pangtugnaw.

 Pagdako nako, nakakat-on kog Honduras Sign Language (LESHO). Pinaagi niana, makakomunikar ko sa ubang amang. Pero dili kahibalo ug LESHO sila Mama ug ang akong mga ate. Magmostra-mostra ra sila o kaha maghimohimog senyas sa pagpakigkomunikar nako. Pero gimahal ug giprotektahan ko ni Mama. Pinaagi sa pipila ka senyas nga iyang nahibaloan, ingnan ko niya nga likayan ang mga bisyo sama sa pagpanigarilyo ug paghuboghubog. Tungod niana, nagdako ko nga dili manigarilyo ug dili palahubog.

 Sa bata pa ko, ginadala ko ni Mama sa Simbahan sa Katoliko, pero wala koy nasabtan kay walay maghubad para nako gamit ang sign language. Laayan kaayo ko maong miundang kog simba pag-edad nakog 10. Pero gusto gihapon kong makakat-on ug dugang bahin sa Diyos.

 Niadtong 1999, sa 23 anyos ko, nakahimamat ko ug babaye gikan sa United States nga sakop sa usa ka evangelical church. Gitudloan ko niya bahin sa Bibliya ug sa American Sign Language (ASL). Giganahan ko sa akong nakat-onan sa Bibliya maong midesidir ko nga magpastor. Busa, mibalhin ko sa Puerto Rico aron motambong sa usa ka Christian training center para sa mga amang. Pagbalik nako sa La Ceiba niadtong 2002, nagtukod kog simbahan para sa mga amang sa tabang sa akong mga higala. Usa nila si Patricia, nga nahimo nakong asawa.

 Ingong pastor sa among simbahan, nagwali ko diha sa LESHO, nagpakitag mga hulagway sa mga estorya sa Bibliya, ug nagdramadrama niini aron masabtan kini sa mga amang. Giduaw sab nako ang mga amang sa duol nga mga lungsod aron dasigon sila ug tabangan sa ilang mga problema. Miadto gani ko ingong misyonaryo sa United States ug Zambia. Pero ang tinuod, wala kaayo koy nahibaloan sa Bibliya. Ang ako lang gisulti nila mao lang sab tong akong nahibaloan ug nasabtan sa mga hulagway. Sa pagkatinuod, mas daghan kog pangutana kay sa tubag.

 Diha toy higayon nga gibutangbutangan ko sa ubang membro sa akong simbahan. Miingon sila nga palahubog ko ug giluiban nako ang akong asawa. Nalain ko ug nasuko. Wala madugay human niadto, gibiyaan namo ni Patricia ang simbahan.

 Sagad kami ni Patricia duawon sa mga Saksi ni Jehova, pero dili mi mamati nila. Pero pagbiya namo sa among simbahan, misugot si Patricia nga magpa-Bible study sa magtiayong Saksi nga si Thomas ug Liccy. Mibilib ko kay bisag dili sila amang, makamao silag sign language. Tungod adto, nagpa-Bible study sab ko uban kang Patricia.

 Nagtuon mi sulod sa pipila ka bulan gamit ang mga video sa ASL. Pero pipila sa among mga higala miingon nga ang mga lider sa mga Saksi ni Jehova mga tawo ra, maong mihunong mi sa pag-Bible study. Bisan pag gipakita ni Thomas nako ang mga ebidensiya nga nagpamatuod nga ang mga Saksi ni Jehova wala magsunod ug tawhanong mga lider, wala ko motuo niya.

 Mga bulan sa ulahi, dihang na-depress pag-ayo si Patricia, miampo siya sa Diyos nga unta mobalik ang mga Saksi ni Jehova. Wala madugay human adto, ang among silingan nga Saksi ni Jehova miduaw kang Patricia ug miingon nga hangyoon niya si Liccy nga duawon si Patricia. Gipamatud-an gyod ni Liccy nga tinuod siyang higala. Ginaduaw niya si Patricia kada semana sa pagdasig ug pag-Bible study niya. Pero nagduhaduha gihapon ko sa mga Saksi.

 Niadtong 2012, dihay espesyal nga kampanya ang mga Saksi ni Jehova sa pagtanyag sa LESHO nga video nga Gusto Ka Bang Mahibalo sa Kamatuoran? Gidad-an mi ni Liccy ug kopya sa maong video. Dihang gitan-aw nako to, nakurat ko sa pagkahibalo nga daghan sa gitudlo nakong mga doktrina, sama sa impiyerno ug dili mamatay nga kalag, wala diay itudlo sa Bibliya.

 Pagkasunod semana, giadto nako si Thomas sa Kingdom Hall sa mga Saksi ni Jehova. Giingnan nako siya nga gusto nakong tudloan ang mga amang sa kamatuoran bahin sa Bibliya, pero dili ingong Saksi ni Jehova. Gusto nako nga magpormag bag-o ug lahi nga relihiyon para sa mga amang. Gikomendahan ko ni Thomas sa akong kadasig pero gipakita niya nako ang Efeso 4:5, nga nagpasiugda nga kinahanglang dunay panaghiusa sa matuod nga Kristohanong kongregasyon.

 Gihatagan sab ko ni Thomas ug video nga Jehovah’s Witnesses—Faith in Action, Part 1: Out of Darkness diha sa ASL. Kini nga video nagpakita kon sa unsang paagi gisusi pag-ayo sa usa ka grupo sa mga lalaki ang Bibliya aron masabtan ang kamatuoran bahin sa pangunang mga doktrina. Samtang nagtan-aw ko sa video, nasabtan nako ang gibati niadtong mga tawhana. Sama nila, nangita ko sa kamatuoran. Kadto nga video nagpakombinsir nako nga ang mga Saksi nagtudlo sa kamatuoran kay gibase nila sa Bibliya ang tanan nilang pagtulon-an. Busa nagpa-Bible study ko pag-usab, ug niadtong 2014, nabawtismohan mi ni Patricia ingong mga Saksi ni Jehova.

 Nakadayeg ko sa kongregasyon sa mga Saksi ni Jehova kay kini hinlo, sama nga ang Diyos hinlo. Ang mga magsisimba matinahoron sa ilang sinultihan ug buotan. Makigdaiton sila ug nagdinasigay sa usag usa. Ang mga Saksi nagkahiusa ug ang tanan nagtudlo sa samang mga kamatuoran sa Bibliya walay igsapayan sa ilang nasod nga gigikanan o pinulongan.

 Nalipay ko nga nagkat-on sa kon unsa gyoy gitudlo sa Bibliya. Pananglitan, nakat-onan nako nga si Jehova ang Labing Gamhanang Diyos, ang Soberano sa tibuok yuta. Gimahal niya ang mga amang ug kadtong mga dili amang. Gipabilhan gyod nako ang gugma sa Diyos kanako. Nakat-onan sab nako nga ang yuta mahimo unyang nindot nga paraiso ug kita may kahigayonan nga makabaton ug kinabuhing walay kataposan nga may hingpit nga panglawas. Naghinamhinam gyod ko nga matuman kana!

 Malipay mi ni Patricia nga makig-estorya sa ubang amang bahin sa Bibliya. Gidumalahan namo karon ug pagtuon sa Bibliya ang pipila ka membro sa among kanhing simbahan. Pero wala na ko magduhaduha sa akong gitudlo, dili sama niadtong pastor pa ko. Nakaplagan ra gyod nako ang mga tubag sa akong mga pangutana pinaagi sa pagtuon sa Bibliya uban sa mga Saksi ni Jehova.