Nagdako ko sa malinawon ug nindot nga lugar sa Tampere, Finland. Dili kaayo relihiyoso ang among pamilya pero importante namo ang edukasyon ug maayong pamatasan. German akong inahan, ug sa bata pa ko, mobakasyon ko panagsa sa West Germany diin nagpuyo ang akong lolo ug lola.

 Sukad sa akong pagkabata, ganahan kog sports. Lainlaing sports ang akong gidula, pero pag-edad nakog 14, nagpokus ko sa tennis. Sa 16 anyos ko, kaduha o katulo ko magpraktis kada adlaw​—duha ka sesyon sa propesyonal nga training, dayon sa gabii ako na lay magpraktis. Nalingaw ko sa lainlaing bahin sa maong dula; ang pagdulag tennis maoy usa ka paagi nga masulayan ang akong mental ug pisikal nga abilidad. Bisag enjoy kong makig-uban sa akong mga higala ug mag-inom panagsa, wala ko magkaproblema tungod sa droga o alkoholikong ilimnon. Ang akong kinabuhi napokus sa tennis​—kini ang akong prayoridad.

 Nagsugod kog dula sa mga tournament sa ATP dihang 17 anyos ko. a Human makadaog sa daghang tournament, misikat ko sa among nasod. Sa edad nga 22, usa ko sa 50 sa pinakahawod nga tennis player sa kalibotan.

 Sa daghang katuigan, magsige kog biyahe sa lainlaing nasod aron magdulag tennis. Daghang nindot nga lugar ang akong naadtoan, pero nakita sab nako ang daghang problema sa kalibotan, apil ang krimen, pag-abuso sa droga, ug pagkadaot sa palibot. Pananglitan, samtang didto mi sa United States, gidid-an mi nga moadto sa pipila ka dapit sa mga siyudad nga daghag krimen. Natugaw ko niini. Ug bisag ganahan ko sa akong propesyon, wala ko mobatig katagbawan.

 Ang akong uyab nga si Sanna nagsugod ug tuon sa Bibliya uban sa mga Saksi ni Jehova. Medyo makatawa ko nga interesado diay siyag Bibliya, pero wala nako siya pugngi sa iyang pagtuon. Naminyo mi niadtong 1990, ug nabawtismohan siya ingong Saksi ni Jehova pagkasunod tuig. Bisag dili ko relihiyoso, motuo ko nga naay Diyos. Mahinumdom ko nga himasag Bibliya ang akong lola nga German, ug gitudloan pa gani ko niya sa pag-ampo.

 Usa ka adlaw, kauban namo ni Sanna ang usa ka magtiayong Saksi. Gipakita sa akoa sa bana nga si Kari ang tagna sa Bibliya bahin sa “kataposang mga adlaw.” (2 Timoteo 3:1-5) Nainteres gyod ko niini, kay nasabtan nako kon nganong nagakahitabo sa kalibotan ang daotan kaayong mga butang. Niadtong adlawa, wala kaayo namo hisgoti ang bahin sa relihiyon. Pero sukad niadto maghisgot mi ni Kari bahin sa Bibliya, ug nakita nako nga sakto ang tanan nakong nakat-onan. Tungod sa akong ka-busy ug pagsigeg biyahe, dili mi regular nga magkita ni Kari, pero wala siya mohunong. Tubagon niya pinaagig sulat ang akong mga pangutana sa miagi namong mga pagtuon. Makataronganon ang tubag sa Bibliya sa tanang lawom nga pangutana bahin sa kinabuhi, ug anam-anam nakong nasabtan ang katibuk-ang tema niini​—nga pinaagi sa Gingharian sa Diyos, matuman ang iyang katuyoan. Dihang nakat-onan nako nga Jehova ang ngalan sa Diyos ug kon unsay iyang gihimo para nato, natandog ko ini. (Salmo 83:18) Ang nakapatandog nako pag-ayo mao ang halad lukat​—kini dili lang basta kahikayan o pagtagana sa gikinahanglan kondili pagpakita sa gugma sa Diyos. (Juan 3:16) Nakat-onan sab nako nga naa koy kahigayonan nga mahimong higala sa Diyos ug mabuhi sa malinawong paraiso hangtod sa hangtod. (Santiago 4:8) Nakapangutana ko sa akong kaugalingon, “Unsaon nako pagpakita sa akong pasalamat”?

 Akong gipamalandong ang akong kinabuhi. Nakat-onan nako sa Bibliya nga ang pagkamahinatagon moresultag dako kaayong kalipay, ug gusto nakong ipaambit sa uban ang akong mga nakat-onan. (Buhat 20:35) Kay propesyonal ko nga atleta, mga 200 ka adlaw kada tuig ko nga wala sa amoa tungod sa pag-apil ug mga tournament. Ang kinabuhi sa akong pamilya nasentro kanako​—sa akong pagbansay, rutina, ug karera. Naamgohan nako nga kinahanglan kong mohimog kausaban.

 Nahibalo ko nga daghan ang dili makasabot kon moundang ko sa akong maayong karera sa sports tungod sa relihiyon. Pero ang kahigayonan nga mas mailhan si Jehova ug makabatog kinabuhing walay kataposan mas bililhon kay sa bisan unsang premyo nga akong madawat sa pagdulag tennis, maong sayon ra ang pagdesisyon kon unsay akong himoon. Determinado ko nga dili tagdon ang posibleng isulti sa uban tungod kay akoa ning desisyon. Ang teksto sa Bibliya nga nakapalig-on kaayo nako sa pagsukol sa maong presyur mao ang Salmo 118:6: “Si Jehova dapig kanako; dili ako mahadlok. Unsay arang mabuhat sa . . . tawo kanako?”

 Niadtong mga panahona, nindot kaayo ang gitanyag nga kontrata sa pipila ka sponsor, gani makadula kog propesyonal nga tennis sulod sa daghang tuig nga walay kabalak-an. Pero nakadesisyon na ko, maong akong gibalibaran ang tanyag ug wala na moapil sa mga tournament sa ATP. Nagpadayon ko sa pagtuon sa Bibliya, ug niadtong Hulyo 2, 1994, nabawtismohan ko ingong Saksi ni Jehova.

 Sa akong bahin, wala ko makasinatig trahedya nga nakapahunahuna nako bahin sa Diyos ug wala pod ko mangita sa kamatuoran. Para nako, maayo ra man ang akong kinabuhi ug kontento na ko. Pero wa damha, akong nasayran nga ang kinabuhi dunay mas lalom nga katuyoan, nga samag ang kamatuoran sa Bibliya naghulat ra nako nga madiskobrehan kini. Gani mas malipayon ang akong kinabuhi karon! Ang among pamilya mas lig-on ug mas nagkahiusa. Ug lipay kaayo ko kay ang akong tulo ka anak nga lalaki misundog nako​—dili sa pagkahimong atleta, kondili sa pagkahimong Kristohanon.

 Ganahan gihapon kong mag-tennis. Sulod sa daghang tuig, ang akong trabaho konektado gihapon sa tennis. Pananglitan, nagtrabaho ko ingong coach ug manager sa usa ka tennis center. Pero ang akong kinabuhi wala na mapokus sa sports. Kaniadto magpraktis kog daghang oras kada semana aron mahimong hawod nga tennis player, usa ka champion. Karon, ingong bug-os panahong tigsangyaw, malipayon ko sa paggamit sa akong panahon sa pagtabang sa uban nga makakat-on ug mapadapat ang mga prinsipyo sa Bibliya nga nakabag-o sa akong kinabuhi. Malipayon kaayo ko nga akong giuna ang akong relasyon kang Jehova nga Diyos ug gipaambit sa uban ang malipayong kaugmaon nga akong gilaoman.​—1 Timoteo 6:19.