Ang akong pamilya taga-Tonga, usa ka nasod nga dunay mga 170 ka isla, nga nahimutang sa habagatan-kasadpang Pacific. Simple ra ang among kinabuhi sa Tonga, ug wala mi koryente o sakyanan. Pero ang among balay naay tubig sa gripo, ug namuhi mig pipila ka manok. Kon walay klase, kami sa akong duha ka igsoong lalaki motabang sa among papa sa pag-atiman sa among uma, diin nananom mi ug saging, kamote, gabi, ug balanghoy. Nakadugang ni sa gamayng kita ni Papa gikan sa ginagmayng trabaho. Sama sa kadaghanan nga nagpuyo sa mga isla sa Pacific, ang among pamilya dakog pagtahod sa Bibliya, ug regular ming mosimba. Pero nagtuo mi nga ang pagbalhin ngadto sa datong nasod mao lang ang paagi aron makabaton ug maayong kinabuhi.

 Pagka-16 anyos nako, gihikay sa akong uyoan nga makabalhin ang among pamilya sa California, U.S.A. Naglisod gyod mig adyas sa bag-ong kultura! Bisag miuswag ang kahimtang sa among kinabuhi, nagpuyo mi sa pobreng lugar diin kaylap ang krimen ug droga. Pirme ming makadungog ug pinusilay magabii, ug kadaghanan sa among silingan nahadlok sa mga gang. Daghan ang magdaladalag pusil ingong proteksiyon o ingong paagi sa pagsulbad sa mga away. Hangtod karon naa pa gihapon sa akong dughan ang bala sa pusil gikan sa usa sa maong mga away.

 Pagka-high school nako, gusto kong maparehas sa akong mga kaedad. Anam-anam kong miapil sa banha ug way pugong nga mga party, paghuboghubog, ug paggamit ug ilegal nga droga. Ug nahimo kong bayolente. Wala madugay, naadik ko sa cocaine. Aron makapalit ug droga, mangawat ko. Bisag hinimba ang akong pamilya, wala gyod ko makadawat ug giya nga motabang nako aron dili madala sa presyur sa akong mga kaedad sa pagbuhat ug daotan. Kadaghan kong nadakpan tungod sa akong pagkabayolente. Walay direksiyon ang akong kinabuhi! Sa ngadtongadto, napriso ko.

 Usa ka adlaw niadtong 1997, samtang naa ko sa prisohan, nakamatikod ang kauban nakong piniriso nga naggunit kog Bibliya. Pasko adtong panahona ug para sa kadaghanang Tongan, balaan kaayo ni nga adlaw. Gipangutana ko niya kon kabalo ba ko sa giingon sa Bibliya kon kanus-a natawo ang Kristo, pero wala koy ideya kon unsay giingon niini. Iyang gipakita nako ang asoy sa Bibliya bahin sa panahon dihang natawo si Jesus, ug akong nakita nga ang kadaghanang tradisyon sa Pasko wala gani hisgoti. (Mateo 2:1-12; Lucas 2:5-14) Nakurat gyod ko, ug naghunahuna kon unsa pa kahay giingon sa Bibliya. Ang maong tawo tigtambongan sa senemanang mga tigom sa mga Saksi ni Jehova diha sa prisohan, ug midesisyon ko nga mouban niya. Ilang gihisgotan ang basahon sa Bibliya nga Pinadayag. Bisag wala kaayo koy nasabtan sa gihisgotan, namatikdan nako nga ang tanan nilang gitudlo gikan sa Bibliya.

 Dihang gitanyagan ko sa mga Saksi ug pagtuon sa Bibliya, misugot dayon ko. Sa unang higayon, nakakat-on ko bahin sa saad sa Bibliya nga ang yuta mahimong paraiso sa umaabot. (Isaias 35:5-8) Nasabtan nako nga aron mapalipay ang Diyos, kinahanglan kong mohimog dagkong kausaban sa akong kinabuhi. Nakat-onan nako nga dili ko papuy-on ni Jehova nga Diyos sa gisaad nga Paraiso kon ipadayon nako ang akong dili maayong mga binuhatan. (1 Corinto 6:9, 10) Mao nga nakadesisyon ko nga maningkamot nga dili na mahimong masuk-anon, undangon ang pagpanigarilyo, ug dili na gyod maghuboghubog ug magdroga.

 Pagka-1999, una matapos ang akong sentensiya sa pagkapriso, gibalhin ko sa mga awtoridad ngadto sa immigration camp. Sulod sa kapig usa ka tuig, wala koy kontak sa mga Saksi. Pero determinado kong padayon nga magbag-o. Niadtong 2000, wala na ko tugoti sa gobyerno nga magpabilin sa United States, ug gideport ko sa Tonga.

 Sa Tonga, akong gipangita ang mga Saksi ni Jehova ug gipadayon ang akong pagtuon sa Bibliya. Giganahan gyod ko sa akong nakat-onan, ug nahingangha ko dihang akong nakita nga ang tanang gitudlo sa mga Saksi sa among lugar gibase sa Bibliya, sama sa mga Saksi sa United States.

 Ang akong papa ilado sa among komunidad kay taas siyag posisyon sa ilang simbahan. Busa sa sinugdan, ang akong pamilya nalibog ug nasuko kay nakig-uban ko sa mga Saksi ni Jehova. Pero sa ngadtongadto, ang akong mga ginikanan nalipay kay ang mga prinsipyo sa Bibliya nakatabang nako nga magbag-o.

 Ang usa sa kinalisdang kausaban nga kinahanglan nakong himoon maoy bahin sa ilimnon nga sagad gigamit sa sayop nga paagi sa among kultura. Daghang Tongan ang mogugol ug daghang oras kada semana sa pag-inom ug kava, makapakalma nga ilimnon nga gikan sa gipabukalang ugat sa pepper plant. Ug kay diri ko nagpuyo, nabatasan pod nako nga moadto sa kava club halos kada gabii ug moinom ug kava hangtod nga di na ko kabangon sa kahubog. Dakog impluwensiya nako ang mga higala nga wala magsunod sa mga sukdanan sa Bibliya. Sa ngadtongadto, natabangan ko nga makaamgo nga ang akong binuhatan nakapasuko sa Diyos. Mihimo kog mga kausaban aron panalanginan ko sa Diyos ug malipay siya nako.

 Nagtambongan na ko sa tanang tigom sa mga Saksi ni Jehova. Ang pagpakig-uban nako niadtong naningkamot nga mapalipay ang Diyos nakatabang nako nga masuklan ang mga tentasyon. Pagka-2002, nabawtismohan ko ingong Saksi ni Jehova.

 Nakabenepisyo ko sa pailob sa Diyos nga gihisgotan sa Bibliya: ‘Si Jehova nagpailob ninyo kay dili niya gusto nga naay malaglag kondili gusto niya nga ang tanan maghinulsol.’ (2 Pedro 3:9) Sa una pa unta niya puwedeng taposon kining daotan ug daang sistema, pero gitugotan niya nga molabay ang igong panahon aron ang mga tawo nga sama nako mahimo niyang higala. Nalipay ko sa pribilehiyo nga gamiton ni Jehova sa pagtabang sa uban nga makaila niya.

 Sa tabang ni Jehova, naa nay direksiyon ang akong kinabuhi. Wala na ko mangawat para sa akong makamatayng adiksiyon. Hinuon, naningkamot kong tabangan ang uban aron mahimo pod silang higala ni Jehova. Tungod sa akong pagpakig-uban sa mga Saksi ni Jehova, nahimamat nako ang akong buotan nga asawa, si Tea. Naa miy usa ka anak, ug malipayon kaayo ang among pamilya. Gitudloan namo ang uban kon unsay giingon sa Bibliya bahin sa paglaom nga mabuhi sa malinawong paraiso hangtod sa hangtod.