“Wa gyod ko magdahom nga mas makaalagad pa kog dugang kang Jehova.” Kanay giingon ni Gwen, nga gikan sa England, bahin sa iyang pag-alagad ingong need-greater sa Albania. a

 Usa si Gwen sa daghang Saksi nga mibalhin sa Albania aron motabang sa pagtigom sa “bililhong mga butang sa tanang kanasoran.” (Haggeo 2:7) Nganong ila ning gihimo? Unsang mga kausaban ang ilang gihimo aron makabalhin sila? Ug unsang mga kalipay ang nakatabang nila nga molahutay bisan pa sa mga kalisdanan?

 Ang tanang magmamantala nga mibalhin sa Albania parehas ug rason sa pagboluntaryo: Gimahal nila si Jehova ug gusto nilang tabangan ang uban nga makaila niya.

 Sa wala pa sila mobalhin, nagpalapad na sila sa ilang ministeryo, ug nakatabang ni nila sa pag-atubang sa mga kalisdanan sa pag-alagad sa laing nasod. Si Gwen miingon: “Miapil sa ko sa Albanian ug pinulongan nga grupo sa among lugar. Dayon mitambong kog kombensiyon sa Albania. Sa ulahi, mibalik ko didto kadiyot aron mas makakat-on pa sa ilang pinulongan.”

 Dihang 23 anyos si Manuela, nga taga-Italy, mibalhin siyag laing lugar sa ilang nasod aron motabang sa usa ka gamayng kongregasyon. Siya miingon: “Upat ka tuig kong nag-alagad didto. Dayon akong nahibal-an nga naay dakong panginahanglan sa Albania. Maong nagpayunir ko didto sulod sa pipila ka bulan.”

 Si Federica siyete anyos lang dihang nakadungog siyag report bahin sa Albania sa usa ka kombensiyon. Siya miingon: “Ang brader nga naghatag sa report miingon nga ang mga magmamantala sa Albania daghag Bible study ug manambong sa tigom ang mga interesado. Giingnan nako ang akong mga ginikanan nga gusto kong moadtog Albania. Nakurat sila sa akong gusto, pero miingon si Papa, ‘Iampo na, ug kon kabubut-on na ni Jehova, tubagon ka niya.’ Paglabayg pipila ka bulan, gidapit ang among pamilya nga mag-alagad sa Albania!” Daghang tuig na ang milabay, ug si Federica minyo na karon kang Orges. Nag-alagad sila ingong bug-os panahong mga ministro sa Albania.

 Human moretiro si Gianpiero, mibalhin siya sa Albania uban sa iyang asawa, si Gloria. Siya miingon: “Gipadako namo ang among lima ka anak nga lalaki sa Italy. Tulo nila ang mibalhin sa laing nasod aron mag-alagad sa lugar nga dakog panginahanglan. Nadasig mi sa usa ka artikulo sa Bantayanang Torre nga nag-ulohang ‘Makaadto Ka ba sa Macedonia?’ Dayon, giplano namo kon unsaon pagbadyet ang akong pensiyon aron makaalagad mi sa Albania.”

 Sa dili pa mobalhin, ang mga need-greater kinahanglang magplanog maayo ug mohimog mga kausaban aron makabalhin. (Lucas 14:28) Apil ana ang pagpangitag mga paagi nga makasuportar sa ilang kaugalingon. Samtang naa pa sa England si Gwen, nga gihisgotan ganina, miipon siyag puyo sa iyang igsoon aron makadaginot ug kuwarta. Si Sophia ug Christopher, nga gikan sab sa England, miingon: “Gibaligya namo ang among kotse ug ang pipila ka gamit, kay gusto namong mopuyo sa Albania bisag usa lang ka tuig.” Ug makapalipay kay nakapuyo silag mas dugay didto.

 Ang ubang magmamantala mopuyo sa Albania ug pipila ka bulan, mobalik sa ilang nasod aron magtrabaho ug magtigom ug kuwarta, ug dayon mobalik na pod sa Albania. Mao nay gihimo ni Eliseo ug Miriam. Si Eliseo miingon: “Si Miriam naggikan sa usa ka lugar sa Italy nga daghag turista, maong dali ra kaayong makakitag temporaryong mga trabaho didto. Moadto mi anang lugara ug magtrabahog tulo ka bulan sa ting-init, dayon mopuyo sa Albania sulod sa siyam ka bulan gamit ang among tinigom. Kanay among gihimo sulod sa lima ka tuig.”

 Dihang makabalhin na, ang mga need-greater kinahanglang mo-adjust sa bag-ong mga kahimtang, pero nakatabang nila ang mga sugyot ug ehemplo sa mga Saksi didto. Si Sophia, nga gihisgotan ganina, miingon: “Kon tingtugnaw sa Albania, ang mga balay mas tugnaw kay sa akong naandan sa amoa. Naniid pod ko sa ginasul-ob sa mga sister dinhi, ug gisundog nako ang ilang sininaan.” Si Grzegorz ug ang iyang asawa nga si Sona mibiya sa Poland aron motabang sa nindot nga lungsod sa Prizren, sa Kosovo. b Si Grzegorz miingon: “Ang mga igsoon dinhi mapainubsanon kaayo, buotan, ug mapailobon! Gitabangan mi nila sa pagkat-on sa ilang pinulongan ug sa daghan pang butang. Pananglitan, gitudloan mi nila kon asa nga mga tindahan ang mas ubos ug presyo ug kon unsaon pagpamalit diha sa merkado.”

 Nakatabang niadtong mibalhin sa laing nasod ang pagpakigsuod nila sa mga Saksi didto ug ang pagkahibalo bahin sa ilang kagikan. Si Sona miingon: “Nakita nako kon sa unsang paagi ang gugma ni Jehova nakapabag-o sa kinabuhi sa mga tawo. Nalig-on ang akong pagtuo kay nakita nako kon sa unsang paagi bug-os nga gibag-o sa mga igsoon ang ilang mga gituohan ug ang ilang kinabuhi dihang nakakat-on sila bahin kang Jehova. Sa kongregasyon, gibati namo nga gikinahanglan mi, ug nakita namo kon unsay among ikatabang. Nag-alagad mi uban sa mga igsoon nga nahimo namong mga higala.” (Marcos 10:29, 30) Si Gloria miingon: “Daghan kog nailhang sister nga milahutay sa grabeng pagsupak sa dili Saksing mga membro sa komunidad. Natandog gyod ko sa ilang gugma kang Jehova.”

 Ang mga need-greater makakat-on sab ug importanteng mga leksiyon nga tingali wala nila makat-oni dihang didto pa sila sa ilang lugar. Pananglitan, ilang nakita nga makapalipay diay ang pagbiya sa naandan nga kahimtang aron mas makaalagad pa kang Jehova. Si Stefano miingon: “Sa among lugar, kasagaran magsangyaw ko pinaagig intercom, maong mubo lang ang akong mga presentasyon. Pero ang mga Albanian ganahang makig-estoryag dugay ilabina dihang mangape. Kay maulawon kaayo ko, wala ko kabalo kon unsay akong isulti. Pero paglabay sa panahon, nakakat-on ko nga magpokus sa mga tawo, ug karon mas ganahan na kong makig-estorya nila. Mas nag-enjoy ko sa akong pagsangyaw.”

 Si Leah mibalhin sa Albania gikan sa United States, uban sa iyang bana nga si William. Siya miingon: “Tungod sa among pag-alagad dinhi, daghan mig nakat-onan. Pananglitan, daghan kaayo mig nakat-onan bahin sa pagkamaabiabihon, pagtahod, ug pagpakighigala! Nakakat-on mig bag-ong mga paagi sa pagsangyaw, pagpangatarongan gamit ang Bibliya, ug pagpahayag sa among kaugalingon.” Si William miingon: “Kadaghanan sa mga tawo nga mobisita sa Albania ganahan kaayo sa nindot nga mga dagat dinhi. Sa akong bahin, ganahan kong mag-hiking sa Albanian Alps. Pero ang mga tawo gyod ang hinungdan kon nganong ganahan kaayo ko dinhi! Daghang baryo sa among teritoryo ang masangyawan lang panahon sa espesyal nga mga kampanya. Dihang moadto mi didto, usahay tibuok adlaw ming makig-estorya sa pipila lang ka pamilya.”

 Ang labaw gyod nga nakapalipay niini nga mga need-greater mao ang pagkakita nga gidawat sa mga tawo ang maayong balita. (1 Tesalonica 2:19, 20) Si Laura, nga mibalhin sa Albania ingong batan-ong sister, miingon: “Nakaalagad ko sa Fier. Sulod lang sa duha ug tunga ka tuig, 120 ang mikuwalipikar sa pagsangyaw! Ang 16 nila, Bible study nako!” Ang laing sister, si Sandra, miingon: “Nakasangyaw kog babaye nga nagtrabaho sa merkado. Nahimo siyang Saksi ug mibalik siya sa ilang lugar. Sa miagi namong panag-estorya, 15 na ang iyang Bible study!”

 Ang ubang need-greater nga dugay nang mibalhin sa Albania nagpabilin gihapon didto ug malipayon kaayo sa ilang pag-alagad. Usahay mahingangha sila kay ang ilang mga nasangyawan kaniadto, midawat diay sa kamatuoran sa ulahi. (Ecclesiastes 11:6) Si Christopher, nga gihisgotan ganina, miingon: “Naa koy nakatagbong lalaki nga Bible study nako adtong bag-o pa kong abot sa Albania. Natandog kaayo ko kay nahinumdom pa kaayo siya sa among mga panaghisgot kaniadto bahin sa Bibliya. Karon, siya ug ang iyang asawa bawtismado na nga mga alagad ni Jehova.” Si Federica, nga gihisgotan ganina, miingon: “Sa usa ka kongregasyon, giduol ko sa usa sister ug nangutana siya kon kahinumdom pa ko niya. Miingon siya nga nasangyawan nako siya siyam ka tuig na ang milabay. Wa madugay pagbalhin nako sa laing lungsod, nagpa-Bible study diay siya hangtod nga nabawtismohan. Abi nakog walay resulta ang among unang mga tuig nga pagsangyaw sa Albania. Naa diay!”

 Ang mga igsoon nga mibalhin sa Albania o Kosovo mapasalamaton kaayo kang Jehova kay gipanalanginan niya ang ilang mga paghago ug gihatagan silag malipayong kinabuhi. Human sa daghang tuig sa Albania, si Eliseo miingon bahin sa iyang eksperyensiya: “Ingong mga tawo, dali ra tang patuohon nga ang makahatag ug kasegurohan sa atong kinabuhi mao ang pagsalig sa giisip sa kalibotan nga makahatag ug kasegurohan. Pero dili na tinuod. Ang mga prinsipyo ni Jehova mao ang makahatag natog katuyoan sa kinabuhi ug kasegurohan. Ang akong pag-alagad ingong need-greater nakatabang nga dili ko malimot ana. Gibati nako nga naa koy pulos ug giapresyar ko. Naa koy tinuod nga mga higala nga parehas nakog mga tumong.” Mao pod nay gibati ni Sandra: “Pagbalhin nako sa lugar nga mas dakog panginahanglan, gibati nako nga gihatagan ko ni Jehova ug kahigayonan nga matuman ang akong dugay nang gipangandoy—nga mahimong misyonarya. Wa gyod ko magmahay nga mibalhin ko sa Albania. Malipayon kaayo ko.”