Ang mga Saksi ni Jehova sa Bulgaria busy sa pagtudlo sa uban bahin sa Diyos ug sa iyang Pulong, ang Bibliya. Aron matabangan sila, gatosan ka Saksi gikan sa ubang nasod ang mibalhin sa Bulgaria sukad sa tuig 2000. Unsay mga hagit sa pagbalhin sa laing nasod aron motabang sa pagsangyaw? Nganong dili gyod ka magmahay sa imong mga paningkamot? Kini ang giingon sa pipila nga mibalhin sa Bulgaria.

 “Dugay na namong tumong nga moalagad sa laing nasod diin mas dako ang panginahanglan,” miingon si Darren nga nagpuyo kaniadto sa England. “Pagminyo namo ni Dawn, mibalhin mi sa London aron motabang sa pagtudlog Bibliya sa Russian nga pinulongan. Kapila pod mi nagplano nga mobalhin sa laing nasod, pero wa gyod mi madayon tungod sa lainlaing hinungdan. Abi namog di na gyod mi madayon sa among plano, pero gitabangan mi sa among higala nga makita nga nausab na ang among kahimtang, busa posible na namong makab-ot ang among tumong.” Nangita dayon si Darren ug Dawn ug nasod nga nanginahanglag dugang magtutudlo sa Bibliya, ug kon asa sila praktikal nga mobalhin. Niadtong 2011, mibalhin sila sa Bulgaria.

 Ang kalipay nga gibati niadtong mibalhin sa ubang nasod nakadasig niadtong walay plano sa sinugdan nga moalagad sa laing nasod. “Naa koy nailaila nga dasig nga mga sister nga malipayon kaayo sa ilang pag-alagad sa South America ug Africa,” miingon si Giada, nga nagpuyo kaniadto sa Italy uban sa iyang bana nga si Luca. “Nadasig kaayo ko sa ilang kalipay ug mga eksperyensiya. Nakatabang to nako nga i-adjust ang akong espirituwal nga mga tumong.”

 Si Tomasz ug Veronika, nga taga-Czech Republic, mibalhin sa Bulgaria niadtong 2015 uban sa ilang duha ka anak nga si Klara ug Mathias. Nganong nakadesisyon sila nga mobalhin? Si Tomasz mitubag: “Among gipamalandong ang ehemplo ug mga kasinatian niadtong mibalhin sa laing nasod, apil na sa among mga paryente. Natandog mi sa ilang kalipay, ug giestoryahan namo ni ingong pamilya.” Karon, kini nga pamilya malipayong nagsangyaw sa ilang bag-ong teritoryo sa Montana, nga siyudad sa Bulgaria.

 Mibalhin sab sa Bulgaria ang sister nga si Linda. Siya miingon: “Daghang tuig na ang milabay dihang mibisita ko sa Ecuador ug nahimamat ang pipila ka igsoon nga mibalhin didto aron mosangyaw. Sukad niadto, nakahunahuna ko nga basig sa umaabot makaalagad pod ko diin mas dako ang panginahanglan.” Si Petteri ug Nadja, magtiayon gikan sa Finland, namalandong pod sa ehemplo sa uban. Sila miingon: “Sa among kongregasyon sa una, naay mga igsoon nga nakasulay na sa pag-alagad sa laing lugar aron makatabang sa mga tawo nga makakat-on sa Bibliya. Dasig kaayo silang maghisgot sa ilang mga eksperyensiya sa pag-alagad didto. Miingon sila nga kadto ang pinakamalipayong mga tuig sa ilang kinabuhi.”

 Kon gusto kang moalagad sa laing nasod, importante ang maayong pagplano. (Lucas 14:28-30) Si Nele, nga gikan sa Belgium, miingon: “Dihang seryoso na kong naghunahuna bahin sa pag-alagad sa laing nasod, nag-ampo ko ug nangitag mga artikulo sa atong mga publikasyon bahin sa pag-alagad sa laing nasod. Gitun-an nako ni aron mahibal-an kon unsa pay kinahanglan nakong himoon aron maandam ko sa pagbalhin.”

 Si Kristian ug Irmina, nga gikan sa Poland, kapin nag siyam ka tuig nga nagpuyo sa Bulgaria. Ilang naamgohan nga dako kaayog tabang ang pagtambong ug Bulgarian nga pinulongan nga grupo sa Poland sa wala pa sila mamalhin. Gidasig sila sa mga igsoon didto ug gitabangan sila sa pagkat-on sa pinulongan. Si Kristian ug Irmina miingon: “Naeksperyensiyahan namo kon unsa ka makapalipay ang pagboluntaryo ug makita kon giunsa pagtagana ni Jehova nga Diyos ang among mga panginahanglan. Kon kinabubut-on kang moingon kang Jehova, ‘Ania ko! Ipadala ko!’ mahimo nimo ang mga butang nga abi nimog imposible.”​—Isaias 6:8.

 Si Reto ug Cornelia, magtiayon gikan sa Switzerland, midesisyon nga magkinabuhing simple aron makapangandam ug makatigom ug kuwarta. “Usa ka tuig una mi mamalhin, mibisita mi sa Bulgaria aron masulayan ang pagpuyo didto. Naa mi naestorya nga magtiayong misyonaryo ug gihatagan mi nilag praktikal nga tambag.” Gipadapat gyod ni Reto ug Cornelia ang maong mga sugyot, ug karon kapin na sa 20 ka tuig silang nag-alagad sa Bulgaria.

 Kadtong mobalhin sa laing nasod kinahanglang mo-adjust sa bag-ong lugar ug tingali sa lisod nga mga situwasyon. (Buhat 16:9, 10; 1 Corinto 9:19-23) Para sa daghan, pinakalisod ang pagkat-on ug bag-ong pinulongan. “Naanad mi nga mokomento sa among kaugalingong pulong diha sa mga tigom,” miingon si Luca nga gihisgotan ganina. “Pero taudtaod pod nga nalisdan mi sa akong asawa sa pag-andam ug bisag simple ra kaayong komento sa Bulgarian. Morag mibalik mi sa pagkabata. Ang tinuod, mas nindot pag komento ang mga bata sa kongregasyon kay sa amoa.”

 Si Ravil, nga gikan sa Germany, miingon: “Hago ang pagkat-on ug bag-ong pinulongan. Pero pirme kong maghunahuna, ‘Ayaw rag sobra ka seryoso, ug kon masayop ka, katawa lang.’ Wala nako isipa ang mga hagit ingong problema, kondili ingong bahin sa akong sagradong pag-alagad kang Jehova.”

 Si Linda, nga gihisgotan ganina, miingon: “Dugay kong makakat-on ug bag-ong pinulongan. Lisod tun-an ang Bulgarian, ug kadaghan na ko nga gustong moundang. Makaguol gyod kon dili nimo maestorya ang mga tawo ug dili nimo masabtan ang ilang ginasulti. Aron magpabiling lig-on ang akong espirituwalidad, magtuon ko gamit ang Swedish nga pinulongan. Sa kataposan, uban sa tabang sa mahigugmaong mga igsoon, nakakat-on ra gyod ko sa pinulongan.”

 Hagit pod dihang mingawon ka sa imong pamilya ug mga higala. Si Eva, nga mibalhin sa Bulgaria uban sa iyang bana nga si Yannis, miingon: “Sa primero, gimingaw kaayo ko. Aron makaya ang kamingaw, regular ming mokontak sa among mga higala ug pamilya, ug nangita pod mig bag-ong mga higala dinhi.”

 Naa pay laing mga hagit. Si Robert ug Liana, nga gikan sa Switzerland, miingon: “Gawas nga nalisdan kaayo mi sa pinulongan ug kultura, nalisdan pod mi sa bugnaw nga klima dinhi.” Pero ang pagpabiling positibo ug malipayon nakatabang niini nga magtiayon sa pag-alagad nga matinumanon sa Bulgaria sa milabayng 14 ka tuig.

 Girekomendar gyod ni Lily ang pagsangyaw diin mas dako ang panginahanglan. “Mas nailhan nako si Jehova tungod sa among pagbalhin sa laing nasod,” siya miingon. “Kay mas busy ko sa pagtabang sa uban, nakatabang ni nako nga mas masuod kang Jehova, ug nakahatag nako nig kalipay ug katagbawan.” Kana poy gibati sa iyang bana nga si Ravil. Siya miingon: “Mao ni ang pinakamaayong kinabuhi. Talagsaon ni nga kahigayonan nga mailhan ang dasig nga mga Kristohanon gikan sa lainlaing nasod. Eksperyensiyado sila sa pagtudlo sa mga kamatuoran sa Bibliya. Daghan kaayo kog nakat-onan nila.”

 Ang pagkaandam nga mobalhin sa daghang igsoon sa mga lugar diin mas dako ang panginahanglan miresulta sa malamposong pagsangyaw sa “maayong balita sa Gingharian . . . sa tibuok yuta.” (Mateo 24:14) Tungod sa ilang pagkaandam nga moboluntaryo, naeksperyensiyahan niadtong mibalhin sa Bulgaria kon giunsa paghatag ni Jehova ang tinguha sa ilang kasingkasing ug kon giunsa pagpalampos ni Jehova ang tanan nilang mga plano.​—Salmo 20:1-4.