“Makapalipay gyod ang pag-alagad sa lugar nga mas dako ang panginahanglan!” Kanay gibati ni Joshua nga taga-United States pero nakaalagad sa pipila ka panahon sa Guyana. Kana sab ang gibati sa daghang Saksi ni Jehova nga nag-alagad niining mabungahong nasod sa South America. a Unsay atong makat-onan sa mga need-greater, o mga igsoon nga nag-alagad sa lugar nga mas dako ang panginahanglan? Sa unsang paagi kini mag-andam nimo kon gusto kang moalagad sa laing lugar?

 Sa wala pa mobalhin sa Guyana, ang brader nga si Linel nakasangyaw sa teritoryo nga talagsa rang makobrehan sa ila mismong nasod sa United States. “Sa among grupo, 20 mi nga giasayn sa usa ka hilit nga lugar sa West Virginia,” siya miingon. “Nausab gyod ang akong kinabuhi tungod sa akong makapalipayng kasinatian sa pagsangyaw ug pagpakig-uban sa mga igsoon. Mas determinado na kong moalagad kang Jehova sa mas bug-os pa.”

 Ang magtiayong si Garth ug Erica nagplanong moalagad sa laing nasod, ug ilang gipili ang Guyana. Ang rason? “Naa miy nakaila sa akong bana nga magtiayong mibalhin didto,” si Erica miingon. “Ang ilang kadasig ug gugma sa ilang ginahimo nakadasig namo nga mobalhin sab didto.” Si Garth ug Erica malipayong nakaalagad didto sulod sa tulo ka tuig, nga giisip nila ingong “bililhong asaynment.” Si Garth miingon: “Gisulayan namo ang pag-alagad sa laing nasod ug nindot kaayo to nga kasinatian.” Sa ulahi, siya ug ang iyang asawa nakaeskuwela sa Gilead ug karon nag-alagad sa Bolivia.

 Ang Bibliya nagdasig nato nga magkinabuhing simple. (Hebreohanon 13:5) Gidasig sab ta niini nga mamalandong pag-ayo sa dili pa mohimog dagkong desisyon. (Lucas 14:26-33) Apil niana ang pagbalhin sa laing nasod. Si Garth misulat: “Unâ mi mobalhin sa Guyana, kinahanglang pasimplehon namo ni Erica ang among kinabuhi. Busa gibaligya namo ang among negosyo, balay, ug ubang gamit nga dili ra importante. Miabot pod tog pipila ka tuig. Aron dili mawala ang among tinguha nga moalagad sa Guyana, kanunay namong gihunahuna ang among tumong ug kada tuig ming mobisita sa maong nasod.”

 Importante pod nga konsiderahon ang bahin sa panginabuhian. Naay mga need-greater nga makatrabaho ra sa laing nasod kon tugtan sila sa gobyerno didto. Ang uban makapadayon ra sa ilang trabaho online gamit ang kompiyuter. Ang uban pod mouli kadali sa ilang nasod aron manarbaho. Ang magtiayong si Paul ug Sinead mouli sa Ireland kas-a sa usa ka tuig aron manarbaho. Ang ilang rutina nakatabang nila nga malipayong makaalagad sa Guyana sulod sa 18 ka tuig, apil na ang pito ka tuig human matawo ang ilang anak nga babaye.

 Ang Salmo 37:5 nag-ingon: “Itugyan kang Jehova ang imong dalan; salig kaniya, ug siya molihok alang kanimo.” Si Christopher ug Lorissa nga taga-United States kanunayng nag-ampo bahin sa ilang tumong nga moalagad sa laing nasod. Ginahisgotan sab nila sa ilang pamilyahanong pagsimba kon unsay buhaton aron molampos sa pagbalhin; ilang gilista ang mga bentaha ug disbentaha kon mobalhin sila. Kay lisod para nila ang pagkat-og bag-ong pinulongan, ilang gipili ang Guyana kay English ang opisyal nga pinulongan didto.

 Dayon, ilang gisunod ang prinsipyo sa Proverbio 15:22: “Mapakyas ang mga plano kon dili mangonsulta, apan naay kalamposan kon daghan ang magtatambag.” Misulat sila sa sangang buhatan nga nagdumala sa buluhaton sa Guyana b aron mohatag ug impormasyon bahin sa ilang kaugalingon ug kon kanus-a sila puwedeng moadto. Nangutana sab sila bahin sa medikal nga mga serbisyo, klima, ug kostumbre sa Guyana. Gitubag sa sangang buhatan ang ilang mga pangutana, ug gi-refer sila ngadto sa mga ansiyano sa lugar nga ilang balhinan.

 Si Linel, nga gihisgotan ganina, usa na ka nagapanawng tigdumala sa Guyana. Sa wala pa mobalhin didto, gisunod sab niya ang prinsipyo sa Proverbio 15:22. Siya miingon: “Gawas sa pagtigom ug kuwarta, nakig-estorya ko sa uban nga nakaalagad sa laing nasod. Gisultihan nako ang akong pamilya, mga ansiyano sa among kongregasyon, ug ang tigdumala sa sirkito bahin sa akong mga plano. Nag-research pod ko sa atong mga publikasyon bahin sa pag-alagad diin mas dako ang panginahanglan.”

 Daghan ang mibisita unâ sa lugar diin gusto nilang moalagad. Ang magtiayong si Joseph ug Christina miingon: “Sa una namong adto sa Guyana, nagpabilin mig tulo ka bulan. Igo na to aron mapamilyar mi sa lugar. Pag-uli namo, among giasikaso ang mga kinahanglanon ug mibalhin sa Guyana.”

 Aron molampos sa pag-alagad sa laing lugar o nasod, ang mga need-greater kinahanglang mosakripisyo ug andam mo-adjust sa mga kostumbre ug kahimtang sa lugar. Pananglitan, kadtong mibalhin gikan sa bugnaw nga lugar ngadto sa init nga lugar sagad mabag-ohan tungod sa lainlaing insekto nga naa sa ilang bag-ong puy-anan. “Dili ko anad ug daghang insekto,” miingon si Joshua nga gihisgotan ganina. “Ug dinhi sa Guyana, mas dagko ang mga insekto! Pero naanad ra ko kadugayan. Nakat-onan sab nako nga mamenosan ang mga insekto kon manglimpiyo pirme sa balay. Apil niana ang paghugas sa mga gamit sa kosina, paglabay sa basura, ug regular nga paglimpiyo sa balay.”

 Kon mopuyo ta sa laing nasod, kinahanglan pod tang mo-adjust sa dili pamilyar nga mga pagkaon ug mokat-on kon unsaon kini pag-andam. “Kami sa akong roommate nagpatudlo sa mga igsoon kon unsaon pagluto sa ilang lokal nga mga potahe,” miingon si Joshua. “Dihang nakahibalo na mi kon unsaon pagluto ang usa ka potahe, mangimbitar mig mga igsoon sa kongregasyon. Maayo sab ni nga paagi aron mailhan namo ang mga igsoon ug masuod kanila.”

 Bahin sa lokal nga mga kostumbre, si Paul ug Kathleen nahinumdom: “Kinahanglan namong mag-adjust sa ilang sukdanan sa maayong pamatasan ug kon unsay haom nga sininaan sa ilang lugar. Maong kinahanglan ming magpaubos ug mohimog kausaban, basta wala lay malapas nga prinsipyo sa Bibliya. Ang pagsundog sa lokal nga kultura mas nakapasuod namo sa kongregasyon ug dunay positibong epekto sa among ministeryo.”

 Sama sa uban, si Joseph ug Christina nakaingon: “Mas daghan ang panalangin kay sa mga hagit ug kalisdanan. Ang pagbuhat sa mga butang nga bag-o ug lisod para namo nakatabang namo nga unahon kon unsay mas importante. Ang mga butang nga giisip namong importante kaniadto dili na kaayo importante karon. Ang tanan namong naeksperyensiyahan nagdasig namo nga buhaton kanunay ang among maarangan para kang Jehova. Kontento ug malipayon kaayo mi.”

 Si Erica, nga gihisgotan ganina, miingon: “Tungod sa pag-alagad namong duha sa akong bana ingong mga need-greater, mas nasabtan namo kon nganong mosalig gyod kang Jehova. Nakita namo ang iyang tabang sa mga paagi nga wala pa namo maeksperyensiyahi sukad. Dihang naa miy bag-ong mga eksperyensiya, mas nasuod mi ingong magtiayon.”