Si Maud nagpuyo sa France ug nagtrabaho sa eskuwelahan ingong tig-assist sa mga baldadong estudyante panahon sa klase. Di pa dugay, ang mga estudyante sa usa ka klase gitudloan bahin sa Holocaust ug sa mga kampo konsentrasyon sa Nazi. Ang mga piniriso sa kampo magsul-ob ug uniform nga naay dekolor nga patch. Ang kolor ug porma sa patch magpaila kon nganong gipriso ang usa ka tawo.

 Dihang gihisgotan sa maestro ang patch nga purple triangle sa uniform sa ubang piniriso, siya miingon: “Basig mga homoseksuwal nâ sila.” Human sa klase, nakig-estorya si Maud sa maestro ug gipatin-aw niya nga gigamit sa mga Nazi ang purple triangle ingong ilhanan sa mga Saksi ni Jehova. a Iyang giingnan ang maestro nga naa siyay pipila ka impormasyon nga gustong i-share bahin sa maong topiko. Misugot ang maestro ug giingnan si Maud nga isulti sab ang maong impormasyon ngadto sa mga estudyante.

 Sa laing klase, usa ka maestra ang naghisgot sa mao ra gihapon nga topiko, ug migamit siyag chart nga nagpakita sa lainlaing simbolo sa mga uniform sa mga piniriso. Gipakita sa chart nga purple triangle gyod ang ilhanan para sa mga Saksi ni Jehova. Human sa klase, gisultihan ni Maud ang maestra nga naa siyay pipila ka impormasyon nga gustong i-share bahin sa maong topiko. Misugot ang maestra ug giingnan si Maud nga isulti sab kana ngadto sa mga estudyante.

 Si Maud nag-andam ug 15 minutos nga presentasyon para sa unang klase, pero dihang magsugod na siya, giingnan siya sa maestro: “Puwede kang mag-present sulod sa usa ka oras.” Gisugdan ni Maud ang presentasyon pinaagig video bahin sa paglutos sa Nazi ngadto sa mga Saksi ni Jehova. Dihang gihisgotan sa video nga gikuha sa mga Nazi ang 800 ka batang Saksi gikan sa ilang mga ginikanan, gi-pause ni Maud ang video ug gibasa ang mga eksperyensiya sa tulo sa maong mga bata. Human mapakita ang video, gitapos ni Maud ang iyang presentasyon pinaagi sa pagbasag sulat-panamilit niadtong 1940 nga gihimo ni Gerhard Steinacher, 19 anyos nga Saksi gikan sa Austria. Siya misulat sa iyang mga ginikanan pipila ka oras una siya patya sa mga Nazi. b

 Gipakita ni Maud ang parehong presentasyon sa sunod nga klase. Kay wala mahadlok si Maud, ang maong mga titser maghisgot na sa mga Saksi ni Jehova dihang magtudlo bahin sa mga biktima sa mga kampo konsentrasyon sa Nazi.