“Nagdako ko sa Saksi nga pamilya,” miingon si Rachel, nga nagpuyo na karon sa Dominican Republic. “Pero dihang siyete anyos ko, ang akong papa wala na makig-uban sa mga Saksi ni Jehova ug nahimong opposer. Nangita gyod siyag paagi aron dili ko makaalagad kang Jehova. Pananglitan, mag-offer siya nakog mga butang aron lang moundang ko sa pag-alagad kang Jehova—cellphone, trip to Disneyland, o credit card pa gani! Usahay, kulatahon pod ko niya kay kon dili na daw ko makasulti o makalakaw, dili na ko makatambong sa mga tigom. Wala gyod to makapugong nako. Determinado gihapon ko nga motambong sa mga tigom.

 “Dili ko kulatahon ni Papa kon naa si Mama. Miingon siya nga kon motug-an ko, iyang pasakitan si Mama. Kon naa koy mga bun-og, morason siya nga resulta to sa pagtudlo niyag martial arts nako.

 “Kay bata pa man ko adto ug nahadlok kaayo ko sa akong papa, dili nako masulti kang Mama ang nahitabo. Maong si Jehova akong sultihan. Maglakawlakaw ko sa kakahoyan luyo sa among balay sa Maryland, U.S.A. Didto, naay nindot kaayo nga oak tree. Mokatkat ko sa sanga ug moampo kang Jehova. Akong gisulti ang akong gibati ug kon unsay akong himoon para niya inigdako nako. Nag-ampo ko nga unta iya kong tabangan nga makalahutay aron mahimo nako na. Gisulti pod nako niya kon unsay gusto nakong himoon sa bag-ong kalibotan, bahin sa mahimo unya nakong pamilya, ug sa kalinaw ug kalipay nga akong bation dihang wala nay kasakit ug wala nay angayng kahadlokan.

 “Dihang suholan o kulatahon ko ni Papa aron dili na ko moalagad sa Diyos, naa kanunay si Jehova nga mohupay ug mopalig-on nako. Gitabangan ko sa Diyos nga magpabiling maunongon ug lig-on.

 “Nabawtismohan ko niadtong 10 anyos ko. Ug paglabayg duha ka tuig, nagpayunir ko. Sa primero, wala kahibalo si Papa ani. Pero pagkahibalo niya, iya kong gisumbag ug na-dislocate akong apapangig.

 “Ang uban miingon nga bata pa kaayo ko nga nagpayunir, ug nabalaka sila nga basig wala ko mahibalo kon unsa ka seryoso ang akong desisyon. Paglabay sa panahon, nakita nako nga daghang batan-ong Saksi sa among lugar ang dili seryoso sa ilang pag-alagad. Sige silag party ug lingaw kaayo sila. Makaibog ang ilang ginahimo! Maong usahay, gusto nako silang sundogon. Naghunahuna ko, ‘Unsa kahag maglingawlingaw na lang ko parehas sa ubang batan-on kay sa magsigeg sangyaw?’ Pero dihang mobati ko ana, isulti nako na kang Jehova.

 “Niadtong mga 15 anyos ko, gikontak ko sa usa ka sikat nga modeling agency. Nag-offer silag kontrata nga dakog suweldo aron motrabaho ko uban nila sa Milan, Italy. Ganahan baya ko dihang giingnan ko nga puwede kong mag-model, mogawas sa mga magasin, ug makasul-ob ug mahalong mga sinina diha sa mga fashion show. Halos tulo ka tuig na kong nagpayunir, ug nakahunahuna ko, ‘Kon dawaton nako ni nga trabaho, makapadayon kog payunir sa taastaas nga panahon!’ Gibiyaan na mi ni Papa, maong naghunahuna pod ko nga makatabang ni nga trabaho sa mga galastohan namo ni Mama.

 “Ako ning giampo. Nakig-estorya ko kang Mama, nga dugay nang payunir. Nakig-estorya pod ko sa among buotan ug tinahod nga ansiyano. Sa gihapon, niadto ko sa akong paboritong kahoy ug nag-ampo pag dugang. Gitubag ni Jehova ang akong mga pag-ampo dihang gibasa sa ansiyano ang Ecclesiastes 5:4. Kini nag-ingon: ‘Kon manaad ka sa Diyos, tumana kana. Kon unsay imong gipanaad, tumana.’ Nanaad ko kang Jehova nga bug-os kong moalagad niya. Kon akong dawaton ang trabaho, basig madaot ang akong relasyon kang Jehova. Maong nakadesisyon ko nga balibaran ang offer.

 “Bisan pa sa akong mga naagian, nakapadayon ko sa pag-alagad! Karon malipayon kaayo ko uban sa akong bana nga si Jaser ug sa among anak nga si Connor, nga nuybe anyos. Ansiyano si Jaser ug unbaptized publisher si Connor. Halos 27 ka tuig na pod ko nga nagpayunir.

 “Kanunay nakong hinumdoman ang mga panahon nga dugay kong nakig-estorya kang Jehova samtang naa ko sa oak tree. Mihangyo ko kang Jehova nga tabangan ko, ug gihimo gyod na niya. Iya kong gipalig-on, gihupay, ug gigiyahan. Sa tibuok nakong kinabuhi, balikbalik niyang gipakita kon unsa siya ka maayong amahan. Wala gyod ko magmahay nga gipili nako nga alagaran si Jehova sa tibuok nakong kasingkasing. Kadto ang pinakamaalamong desisyon nga akong nahimo sukad.”