Human mabawtismohi si Zarina ingong Saksi ni Jehova didto sa Russia, mipauli siya sa ilang lugar sa Central Asia. Determinado siya nga tudloan ang iyang duha ka anak nga babaye bahin sa iyang pagtuo. Tungod sa kalisod, miipon silag puyo sa iyang ginikanan ug sa iyang igsoong lalaki ug sa asawa niini diha sa usa ra ka kuwartong apartment. Gidid-an siya sa iyang ginikanan sa pagtudlo sa mga bata bahin sa Bibliya. Giingnan pod nila ang iyang mga anak nga dili makig-estorya niya bahin sa Bibliya.

Gihunahuna pag-ayo ni Zarina kon sa unsang paagi matudloan niya ang iyang mga anak bahin kang Jehova. (Proverbio 1:8) Busa sinsero siyang nag-ampo kaniya, nga nangayog giya ug kaalam. Dayon milihok si Zarina uyon sa iyang pag-ampo pinaagi sa pagpakig-estorya sa iyang mga anak bahin sa nindot nga kalalangan dihang maglakawlakaw uban nila. Nakatabang ni nga mainteres ang mga bata sa Maglalalang.

 Unya nakahunahuna si Zarina ug paagi aron maugmad pa ang ilang interes gamit ang librong Unsay Tinuod nga Gitudlo sa Bibliya? a Iyang gisulat pulong por pulong ang mga parapo ug pangutana gikan sa libro. Nagdugang pod siyag pipila ka sentence aron tabangan ang iyang mga anak nga mas masabtan ang maong impormasyon. Dayon gitago niya ang mga papel, nga giapilag lapis, ilalom sa washing machine sa ilang banyo. Dihang moadto sa banyo ang mga bata, ilang basahon ang mga parapo ug isulat ang ilang tubag.

 Pinaagi niana, naka-study silag duha ka kapitulo sa librong Gitudlo sa Bibliya ayha sila nakakitag laing kapuy-an. Didto, wala nay mopugong niya sa pagtudlo sa iyang mga anak. Niadtong Oktubre 2016, ang iyang duha ka anak nabawtismohan. Nalipay sila nga ang ilang mama nagmaalamon ug nangitag paagi nga matudloan sila bahin sa Bibliya nga dili ra mamatikdan.