Niadtong 2005, si Sowbhagya nga taga-India namatyag bana. Giatiman siya pag-ayo sa iyang bana, apil ang ilang tres anyos nga anak nga si Meghana. Pero karon nga wala na iyang bana, nalisdan si Sowbhagya sa pagpangitag kuwarta aron mabuhi sila sa iyang anak.

 Ang nakapasamot pa gyod, si Sowbhagya gisalikway sa uban. Siya ug ang iyang anak giisip sa iyang pamilya nga makililimos, ug balikbalik siyang giingnan nga nagpabug-at siya kanila. Aron mahupayan, si Sowbhagya miadto sa simbahan. Pero ang mga tawo didto dili maayog pagtratar niya kay pobre siya. Si Sowbhagya nangitag trabaho aron masuportahan ang panginahanglan niya ug sa iyang anak. Pero bisag unsaon pa niyag paningkamot, wala siya makakitag trabaho.

 Si Sowbhagya miingon: “Gibati nako nga wala koy paglaom, maong nakadesisyon ko nga maghikog. Pero nahibalo ko nga kon wala na ko, magkalisodlisod gyod ang akong anak. Maong nakahunahuna ko nga taposon ang among kinabuhi.” Kay gibati ni Sowbhagya nga wala siyay pulos ug walay nagmahal niya, milakaw siya aron mopalit ug hilo.

 Dihang pauli na si Sowbhagya nga nagsakay ug tren, mitapad niya si Elizabeth nga usa ka Saksi ni Jehova ug nakig-estorya niya. Si Sowbhagya miingon nga wala siyay trabaho, maong giingnan siya ni Elizabeth nga iya siyang tabangan nga makakitag trabaho. Giingnan pod siya ni Elizabeth nga padulong siya sa iyang Bible study. Nakurat si Sowbhagya kay bisag daghan na siyag naadtoan nga simbahan, karon pa niya nadunggan nga naay mga tawo nga nagtuon ug Bibliya. Giimbitar ni Elizabeth si Sowbhagya nga moadto sa iyang balay aron mahibalog dugang bahin sa pag-Bible study.

 Dihang nakauli na si Sowbhagya sa balay, nagplano gihapon siyang maghikog. Pero giuban sa iyang paryente si Meghana sa laing lugar. Maong midesisyon si Sowbhagya nga himoon ang iyang plano pagbalik sa iyang anak.

 Samtang naghulat, mibisita siya kang Elizabeth. Giabiabi siya ni Elizabeth, ug gipakita kaniya ang librong Unsay Tinuod nga Gitudlo sa Bibliya? Nainteres siya sa kapitulo nga “Hain ang mga Patay?” kay bag-o lang namatay ang iyang bana. Anang adlawa mismo, misugot si Sowbhagya nga mag-Bible study.

 Giimbitar ni Elizabeth si Sowbhagya sa kombensiyon nga himoon pagkasunod semana. Si Sowbhagya mitambong ug nadasig pag-ayo sa programa. Gani, gusto niya nga mahimong Saksi ni Jehova. Pag-uli niya gikan sa kombensiyon, nakadawat siyag trabaho.

 Padayong nag-Bible study si Sowbhagya. Imbes taposon ang iyang kinabuhi, naa na siyay rason nga mabuhi. Nabawtismohan siya, ug sa ulahi nabawtismohan pod ang iyang anak nga si Meghana. Regular payunir silang duha karon. Ug si Meghana remote volunteer sa usa sa mga translation office sa India.

 Mapasalamaton kaayo si Sowbhagya ug Meghana nga miduol si Elizabeth kang Sowbhagya sa tren, nagpakitag personal nga interes niya, ug gisultihan siya bahin sa kamatuoran! Mapasalamaton pod kaayo sila kang Jehova. Si Meghana miingon: “Dugay ra unta ming gilubong kon wala pa mi makakat-on sa kamatuoran adtong adlawa. Karon, malipayon na kaayo mi. Eksayted pod mi ni Mama sa panahon nga magakos namo pag-usab si Papa. Matudloan namo siya bahin kang Jehova ug masultihan kon sa unsang paagi giluwas ni Jehova ang among kinabuhi.”