Niining milabay nga mga tuig, ang Venezuela nakaeksperyensiyag grabeng krisis sa ekonomiya ug kagubot. Ang Saksi nga si Edgar miingon, “Sulod lang sa pipila ka tuig, mius-os pag-ayo ang bili sa kuwarta ug lisod kaayo ang kinabuhi. Mora mig namalhin sa laing nasod, bisag naa ra mi dinhi sa Venezuela!”

 Unsay nakatabang kang Edgar? Siya miingon: “Gihunahuna namo sa akong asawa nga si Carmen ang ehemplo sa mga misyonaryo nga mibalhin sa pobreng mga nasod. Nakakat-on sila sa pagkinabuhi sa kon unsa ray naa didto. Kini nakadasig namo nga pasimplehon ang among kinabuhi ug sulayan ang bag-ong mga pamaagi, sama sa pagtanom sa kaugalingon namong pagkaon.”

 Pero naa pay gihimo si Edgar ug Carmen. Ilang gitabangan ug gihupay ang ubang igsoon, apil na ang mga na-depress. (1 Tesalonica 5:11) Si Edgar miingon, “Gawas sa paghupay kanila, gidasig pod namo sila nga tabangan ang mga nanginahanglan aron bation nila ang kalipay sa pagtabang sa uban.”—Buhat 20:35.

 Pagsugod sa COVID-19 nga pandemic, naningkamot si Argenis nga sangyawan ang iyang mga paryente. Ang uban misugot nga mag-Bible study pinaagig telepono.

 Gusto pod ni Argenis nga makakita ang iyang mga paryente, nga walay Internet, sa 2020 rehiyonal nga kombensiyon. Naay Saksi sa duol nga lungsod ang naghatag nilag mga rekording sa programa. Dayon, nanghulam ang mga paryente ni Argenis ug dako nga TV ug mga speaker. Sa wala pa magsugod ang programa, gitawgan sila ni Argenis aron mag-ampo. Tungod sa mga paningkamot ni Argenis, 4 sa iyang mga paryente ug may 15 pa ang nakatambong sa kombensiyon.

 Ang magtiayong si Jairo ug Johana mao lang ang naay sakyanan sa ilang kongregasyon, ug gigamit nila ni sa pagtabang sa uban. Pero ang problema kay kulang ang suplay sa gasolina sa Venezuela. Si Jairo miingon, “Pila ka oras mi nga maglinya, ug usahay gabii na kaayo mi makapagasolina.”

 Wala gyod magmahay si Jairo sa ilang mga paningkamot. Siya miingon: “Dihang maghatod mig suplay para sa mga igsoon, lipay kaayo mi dihang magpasalamat sila, dili sa amoa, kondili kang Jehova, kinsa naghatag sa tanang panginahanglan sa iyang katawhan.”—2 Corinto 9:11, 14.

 Bisag 28 anyos na ang sister nga si Norianni, gibati niya nga basig isipon siya nga bata pa kaayo para makatabang sa uban. Pero nabasa niya ang 1 Timoteo 4:12: “Ayawg tugoti nga may motamay sa imong pagkabatan-on. Hinuon magpakita kag maayong ehemplo sa mga matinumanon.”

 Ang teksto nakadasig kang Norianni nga tabangan ang mga edaran sa kongregasyon, sama sa pag-letter writing ug sa pag-uban kanila sa iyang mga Bible study. Iya sab silang tawgan ug padad-an ug makapadasig nga mga text message. Si Norianni miingon, “Gipakita ni Jehova nako nga daghan kog mahimo para makatabang sa uban.”

 Ang atong mga igsoon sa Venezuela daghag giatubang nga kalisdanan. Pero dasig gihapon sila sa ministeryo ug “nakahupay pag-ayo” sa uban.—Colosas 4:11; 2 Timoteo 4:2.