Si Virginia, nga usa ka Saksi ni Jehova, nag-antos sa sakit nga gitawag ug locked-in syndrome. Paralisado ang iyang lawas. Siya makakita ug makadungog, makabuka ug makapiyong sa iyang mata, ug makalihok gamay sa iyang ulo. Dili siya makasulti o makakaon. Kaniadto, himsog siya ug abtik. Pero usa ka buntag niadtong 1997, misakit pag-ayo ang luyo nga bahin sa iyang ulo. Gidala siya sa iyang bana sa ospital, ug nianang gabhiona siya na-coma. Paglabayg duha ka semana, nakamata siya sa intensive-care unit (ICU), nga paralisado ug naka-connect sa ventilator. Sulod sa pipila ka adlaw, wala siyay mahinumdoman, bisan ang iyang kaugalingon.

 Giestorya ni Virginia ang sunod nga nahitabo. “Anam-anam nga mibalik ang akong memorya. Nag-ampo ko pag-ayo. Dili ko gustong mamatay ug magdako ang akong anak nga walay inahan. Aron makabaton kog kaisog, naningkamot kong makahinumdom ug daghang teksto sa Bibliya kutob sa akong mahimo.

 “Sa ulahi, gipagawas na ko sa mga doktor gikan sa ICU. Human sa unom ka bulan diha sa lainlaing ospital ug sa rehabilitation center, nakauli na ko. Paralisado gihapon ang tibuok nakong lawas, ug nagkinahanglan kog tabang sa tanang butang. Naguol gyod ko pag-ayo! Mibati ko nga wala koy pulos sa uban ug kang Jehova. Nabalaka pod ko kay dili na nako maatiman ang akong anak.

 “Nagsugod kog basag mga eksperyensiya sa ubang Saksi nga nag-antos pod ug grabeng sakit parehas nako, ug nahingangha ko sa ilang mga nahimo para kang Jehova. Ingong resulta, naningkamot ko nga magmapositibo pinaagi sa pagpokus sa kon unsay puwede nakong mahimo. Sa wala pa ko masakit, limitado ra ang akong panahon sa espirituwal nga mga kalihokan. Karon, puwede nang tibuok adlaw, adlaw-adlaw pa gani. Busa imbes maluya, nagpokus ko sa akong debosyon kang Jehova.

 “Nakakat-on kong mogamit ug kompiyuter. Maka-type ko pinaagig software nga mo-react sa paglihok sa akong ulo. Kapoy kaayo ni, pero nakatabang ni nako nga makatuon sa Bibliya ug makapaambit sa akong paglaom pinaagig sulat ug e-mail. Aron makakomunikar ko sa uban, duna koy board nga naay alphabet. Itudlo sa akong kauban ang kada letra. Kon sayop nga letra ang matudlo, padak-on nako ang akong mata; kon sakto ang letra, mopiyong ko. Mao nay among ginahimo aron makapormag mga pulong ug sentence. Ang ubang sister nga pirme nakong makauban makatag-an na dayon sa akong gustong isulti. Usahay, sayop nga pulong ang ilang matag-an, ug mahimuot na lang mi.

 “Ganahan kong moapil sa mga kalihokan sa kongregasyon. Kanunay kong naka-tie in sa mga tigom, ug karon pinaagig videoconferencing. I-type nako ang akong mga komento, ug naay mobasa niini panahon sa pangutanag tubag nga mga bahin. Mo-tie in sab ko sa usa ka gamayng grupo sa mga Saksi aron motan-aw sa binulang mga programa sa JW Broadcasting. a

 “Karon, 23 ka tuig na kong dunay locked-in syndrome. Usahay, maguol ko. Pero masagubang ra nako ni pinaagi sa pag-ampo, pagpakig-uban sa mga igsoon, ug pagpabiling aktibo sa espirituwal nga mga kalihokan. Gani sa tabang sa kongregasyon, nakaoksilyare payunir ko sa kapig unom ka tuig. Naningkamot ko nga magpakitag maayong ehemplo sa akong anak nga si Alessandro, nga karon minyo na ug nag-alagad ingong ansiyano. Siya ug ang iyang asawa nag-alagad ingong regular payunir.

 “Pirme kong mamalandong sa mga butang nga gusto nakong himoon sa paraiso. Ang pinakauna nakong himoon mao ang paghisgot bahin kang Jehova pinaagi sa akong tingog. Gusto pod kong maglakawlakaw sa daplin sa sapa, ug i-enjoy ang nindot nga talan-awon sa kabukiran. Kay kapig 20 ka tuig na man nga ang akong pagkaon maoy liquid nga ipaagi sa tubo, eksayted na kong mokuhag mansanas gikan sa punoan ug ingkibon kini. Ug siyempre, kay Italian man ko, naghinamhinam na kong magluto ug mokaon sa akong paboritong Italian nga mga pagkaon, apil na ang pizza!

 “Ang ‘paglaom sa kaluwasan’ nakatabang nako nga dili sobrang maguol. (1 Tesalonica 5:8) Dihang mag-imadyin ko sa akong kaugalingon nga nagpuyo na sa paraiso, mobati kog kalipay bisan pa sa akong pisikal nga mga limitasyon, ug kombinsido ko nga hapit na ning mawala. Eksayted na gyod ko sa ‘tinuod nga kinabuhi’ nga gisaad ni Jehova kanato pinaagi sa iyang Gingharian.”—1 Timoteo 6:19; Mateo 6:9, 10.