Layo gikan sa siyudad, daghang tawo nga lainlaig tribo ug pinulongan ang nagpuyo sa kalasangan sa Amazon sa South America. Busa niadtong Hulyo 2017, dunay grupo sa 13 ka Saksi ni Jehova nga mibiyahe sa Suba sa Maroni ug sa sidlakang bahin niini sa French Guiana. Ang ilang tumong? Ipaambit ang mensahe sa paglaom nga naa sa Bibliya.

 Usa ka bulan una pa sa 12 ka adlaw nga preaching tour, ang tanang partisipante mitambong sa miting para sa biyahe. “Gihatagan mig ideya bahin sa lugar ug sa kasaysayan niini, ug kon unsang mga pagpangandam ang among himoon,” miingon si Winsley. Ang matag usa dunay container nga dili masudlag tubig aron butangan sa duyan ug moskitero. Sa biyahe, kaduha mosakayg eroplano ug daghang oras nga mosakay sa gagmayng bangka.

 Unsay gibati niadtong napili alang niini nga pagsangyaw? Si Claude ug Lisette, mga 60 ang edad, midawat dayon sa imbitasyon. “Lipay kaayo ko, pero nahadlok pod gamay,” miingon si Claude. “Nakadungog ko bahin sa delikado nga mga sulog.” Si Lisette may laing gikabalak-an: “Naghunahuna ko kon unsaon nako pagsulti sa mga pinulongan sa Amerindian,” siya miingon.

 Mao pod nay gibati ni Mickaël. “Wala kaayo mi ideya bahin sa Wayana nga tribo,” siya miingon, “maong nag-research ko sa Internet aron makakat-on bisan gamay sa ilang pinulongan ug makasulti niana.”

 Si Shirley nga mibiyahe uban sa iyang bana, si Johann, naghimog listahan sa pinulongan sa mga tawo nga nagpuyo duol sa suba. “Nag-download mig mga video sa jw.org sa maong mga pinulongan ug nagdala pod mig libro nga nagtudlog simpleng mga pulong sa Wayana,” siya miingon.

 Sa Martes Hulyo 4, ang grupo misakayg eroplano sa Saint-Laurent du Maroni aron moadto sa Maripasoula, gamay ug hilit nga lungsod sa French Guiana.

 Sulod sa upat ka adlaw, ang grupo nagsangyaw sa mga baryo sa ibabawng bahin sa Maroni, sakay ang demotor nga mga bangka nga gitawag ug pirogue. “Interesado kaayo ang mga Amerindian sa Bibliya,” miingon si Roland, nga apil sa grupo. “Daghan silag pangutana, ug ang uban gustong magpa-Bible study.”

 Sa usa ka baryo, naestorya ni Johann ug Shirley ang batan-ong magtiayon nga may paryente nga bag-o lang naghikog. “Gipatan-aw namo sila sa video nga A Native American Finds His Creator,” sa JW Broadcasting, miingon si Johann. “Ang batan-ong magtiayon natandog pag-ayo sa video. Gihatag nila ang ilang e-mail address kay gusto nilang magkontakay mi.”

 Ang kinalayoan nga nabisita paibabaw sa suba mao ang Antécume Pata. Ang pangulo sa baryo didto misugot nga itaod sa gikapoyng mga Saksi ang ilang mga duyan sa usa ka publikong lugar. Nangaligo sab sila sa sapa, sama sa ginahimo sa mga tawo didto.

 Gikan sa Antécume Pata, ang grupo mibiyahe paingon sa baryo sa Twenké. Ang mga namuyo didto naguol sa pagkamatay sa ilang mga minahal. “Ang pangulo sa tribo misugot nga bisitahon namo ang mga namatyan,” miingon si Éric, usa sa mga nag-organisar sa biyahe. “Ang pangulo ug ang iyang pamilya ganahan kaayo sa mga teksto nga among gibasa sa Wayana nga Bibliya. Nagpasalida sab mig mga video nga naghisgot sa saad sa Bibliya bahin sa pagkabanhaw.”

 Ang sunod nga biyahe maoy tunga sa oras, paubos sa suba gikan sa Maripasoula hangtod sa gamayng lungsod sa Grand-Santi. Sa Martes ug Miyerkoles, ang grupo nagpaambit sa mensahe sa Bibliya sa mga namuyo didto. Pagka-Huwebes, mibiyahe na pod ang mga Saksi ug lima ka oras ug tunga paubos sa Suba sa Maroni, paingon sa baryo sa Apatou.

 Una pa ang kataposang adlaw sa preaching tour, ang grupo mibisita sa mga lasang diin naay mga baryo; didto nagpuyo ang mga Maroon, kaliwat sa Aprikanong mga ulipon nga gidala sa South America niadtong dili pa independenteng nasod ang Suriname. Giimbitar sa mga Saksi ang tanan para sa tigom nga himoon sa lasang, diin dunay dakong tent nga gihimo para sa tigom. “Lipay kaayo mi kay daghan kaayo ang mitambong,” miingon si Claude. “Anang buntaga lang namo sila giimbitar!” Si Karsten, nga karon pa nakaabot niining hilit nga lugar, maoy naghatag sa pakigpulong sa Aukan nga pinulongan. Ang iyang ulohan, “Mao ba Lamang Kini ang Kinabuhi?” Dihay 91 nga mitambong gikan sa lainlaing baryo.

 Sa kataposan, ang grupo mibalik sa Saint-Laurent du Maroni. Ang tanan nalipay pag-ayo sa positibong sanong sa mga tawo, nga midawat ug daghang basahon ug nakatan-aw sa daghang video nga gihimo sa mga Saksi ni Jehova.

 “Dili mahubit ang akong kalipay nga nakauban ko ani nga biyahe,” miingon si Lisette. Si Cindy miuyon: “Kon naa na poy kahigayonan, mouban gyod ko pag-usab. Masabtan lang nimo ni nga kalipay kon imo ning maeksperyensiyahan!”

 Tungod ani nga biyahe, ang uban sa grupo gustong mobalik. “Andam mi nga himoon kini pag-usab!” miingon si Mickaël. Si Winsley mibalhin sa Saint-Laurent du Maroni. Si Claude ug Lisette, nga mga 60 ang edad, midesisyon nga mobalhin sa Apatou.