Si Danielle, nga usa sa mga Saksi ni Jehova sa South Africa, nakakitag bag nga nabilin sa kustomer sa usa ka coffee shop. Ang bag naay sulod nga pitaka nga may kuwarta ug mga credit card. Kay determinado siyang iuli kini sa tag-iya, nangita si Danielle ug adres o phone number sulod sa bag, pero wala siyay nakita gawas sa ngalan sa usa ka lalaki. Gisulayan niyag pangutana ang bangko sa lalaki aron makontak siya, pero pakyas siya. Pero wala mohunong si Danielle aron makontak ang maong lalaki. Busa gitawgan niya ang phone number nga naa sa doctor’s receipt nga iyang nakita sulod sa bag. Ang receptionist nga mitubag sa tawag misugot nga ihatag ang telephone number ni Danielle ngadto sa lalaki.

 Ang lalaki nakurat nga nakadawat siyag tawag gikan sa opisina sa iyang doktor, nga nagpahibalo kaniya nga nakita ni Danielle ang iyang bag ug gusto niya kining iuli. Pag-abot sa lalaki aron kuhaon ang bag, gitimbaya siya ni Danielle ug sa iyang papa. Gigamit nila ang maong kahigayonan aron sultihan ang lalaki sa rason kon nganong naningkamot sila pag-ayo nga makit-an siya. Ilang gisaysay nga ingong mga Saksi ni Jehova, naningkamot sila sa pagkinabuhi uyon sa mga prinsipyo sa Bibliya. Busa kanunay silang naningkamot nga magmatinud-anon.​—Hebreohanon 13:18.

 Paglabayg pipila ka oras, ang lalaki nagpadalag mensahe kang Danielle ug sa iyang papa, nga nagpasalamat pag-usab kanila sa pag-uli sa iyang bag ug pitaka. Siya misulat: “Salamat kaayo kay naningkamot gyod mo nga inyo kong makontak. Nalipay ko nga nailaila mo ug ang inyong pamilya ug dili nako malimtan ang inyong pagkabuotan ug pagkamahigalaon. Agig pagpasalamat, gusto kong mohatag ug donasyon para ninyo. Nahibalo ko nga nagsakripisyo mo aron alagaran ang Diyos. Ang pagkamatinud-anon ug integridad ni Danielle nagpamatuod nga dalayegon mo nga mga tawo. Busa sa makausa pa, salamat ug hinaot panalanginan sa Diyos ang inyong ministeryo.”

 Paglabayg pipila ka bulan, naestorya pag-usab sa papa ni Danielle ang lalaki. Miingon ang lalaki nga di pa dugay, nakakita siyag nahulog nga pitaka samtang nag-shopping. Dihang nakit-an niya ang babaye nga tag-iya sa pitaka ug giuli kini kaniya, iyang gisulti ang rason kon nganong iya kadtong gihimo. Bag-o lang pod siyang gipakitaan ug buhat sa pagkamatinud-anon. Siya miingon: “Ang usa ka simpleng buhat sa pagkamatinud-anon ug pagkamaayo makatakod, ug makapalipay sa tanan.”