Si Ong-Li usa ka Saksi ni Jehova sa Bulgaria. Nagdumala siyag pagtuon sa usa ka batan-ong babaye nga ginganlag Zlatka, nga ang bana dili ganahang magtuon ug Bibliya. Si Ong-Li miingon: “Samtang naghisgot bahin sa pamilyahanong kinabuhi, akong gipasiugda nga importante ang pagsulti nga gimahal nato ang atong kapikas ug mga anak. Naguol si Zlatka; gitan-aw ko niya ug miingon nga wala pa gyod siya sukad makaingon sa iyang bana o sa iyang nuybe anyos nga batang babaye nga gimahal niya sila.”

 Si Zlatka mipatin-aw, “Andam nakong buhaton ang tanan para nila, pero dili nako kaya isulti nga gimahal nako sila.” Ug siya midugang, “Wala ko sukad sultihi sa akong mama nga gimahal ko niya, ug wala pod siya sukad sultihi sa akong lola nga gimahal siya niini.” Gipakita ni Ong-Li kang Zlatka diha sa Bibliya nga gisulti mismo ni Jehova nga gimahal niya si Jesus. (Mateo 3:17) Gidasig niya si Zlatka nga iampo kini kang Jehova ug maningkamot nga masulti niya sa iyang bana ug anak nga gimahal niya sila.

 Si Ong-Li miingon: “Paglabayg duha ka adlaw, lipay kaayong miestorya nako si Zlatka nga nangayo siyag tabang kang Jehova. Pag-uli sa iyang bana, iya ning giingnan nga nakat-onan niya sa Bibliya kon unsa ka importante nga tahoron ug mahalon sa asawa ang iyang bana. Unya mihunong siya kadali, ug giingnan ang iyang bana nga gimahal gyod niya siya! Pag-uli sa iyang anak, iya ning gigakos ug giingnan pod niya nga gimahal niya siya! Si Zlatka miingon: ‘Karon, gaan na akong pamati. Sulod sa daghang tuig, dili nako masulti ang akong gibati, pero sa tabang ni Jehova, nasulti na gyod nako sa akong pamilya nga gimahal nako sila.’”

 Si Ong-Li mipadayon, “Pagkasunod semana nagkaestorya mi sa bana ni Zlatka ug iya kong giingnan: ‘Daghan ang miingon nako nga dili maayo nga mag-Bible study si Zlatka uban ninyo, pero akong nakita nga dakog tabang sa among pamilya ang iyang pagtuon sa Bibliya. Mas suod ug mas malipayon na mi sa akong asawa.’”