Si Marta, usa sa mga Saksi ni Jehova sa Guatemala, nagtuon ug Kekchi nga pinulongan aron mapaambit ang mensahe sa Bibliya sa mga tawo nga nagsultig Kekchi. Usa ka adlaw niana, nakakita siyag lalaki nga migawas sa ospital. Base sa hitsura sa lalaki, naghunahuna si Marta nga naggikan siya sa baryo sa mga Kekchi, sa kabukiran diin talagsa rang masangyawan sa mga Saksi ni Jehova. Bisag dili kaayo siya hanas sa pinulongang Kekchi, iyang giduol ang lalaki ug nakig-estorya kaniya.

 Gitanyagan niya ang lalaki ug pagtuon sa Bibliya. Gidawat sa lalaki ang iyang tanyag pero miingon siya nga wala siyay kuwarta nga pangbayad. Gipatin-aw ni Marta nga walay bayad ang pagtuon sa Bibliya uban sa mga Saksi ni Jehova. Giingnan sab siya ni Marta nga puwede siyang magtuon sa Bibliya pinaagig cellphone ug puwedeng moapil ang iyang pamilya. Misugot ang lalaki. Kay ang lalaki makasulti ug makabasa man ug Spanish, gihatagan siya ni Marta ug Spanish nga kopya sa Bag-ong Kalibotang Hubad sa Balaang Kasulatan. Gihatagan sab niya ang lalaki ug librong Unsay Tinuod nga Gitudlo sa Bibliya? sa Kekchi nga pinulongan. Pagkasunod semana, ang lalaki, iyang asawa, ug ang ilang duha ka anak nagtuon nag Bibliya uban kang Marta pinaagig cellphone. Kaduha sila magtuon sa usa ka semana. “Kay dili kaayo ko hanas sa pagsultig Kekchi,” miingon si Marta, “nagtuon mi gamit ang Spanish, ug hubaron kini sa lalaki ngadto sa iyang asawa. Ang mga bata makasabot rag Spanish.”

 Ang lalaki usa ka Pentekostal nga pastor. Gitudlo dayon niya sa iyang mga membro ang iyang nakat-onan sa pagtuon sa Bibliya. Giganahan sila sa ilang nakat-onan ug nangutana kon diin niya nakat-oni kining bag-ong mga pagtulon-an. Dihang gisulti niya nga nagtuon siyag Bibliya uban sa Saksi ni Jehova, sila pod miapil sa pagtuon. Sa ngadtongadto, mga 15 ka tawo ang magtapok kada semana aron magtuon sa Bibliya uban ni Marta gamit ang cellphone. Sa ulahi, magbutang silag mikropono duol sa cellphone aron ang tanan makadungog.

 Dihang gisulti ni Marta sa mga ansiyano sa kongregasyon nga nagdumala siyag pagtuon sa Bibliya sa layong baryo gamit ang cellphone, usa ka ansiyano ang miadto sa maong baryo. Iyang gidapit sila nga motambong sa pakigpulong publiko nga ihatag sa tigdumala sa sirkito a sa usa ka baryo nga usa ka oras biyaheon sa sakyanan ug dayon magbaktas ug duha ka oras. Misugot sila, ug 17 kanila ang mitambong.

 Paglabayg pipila ka semana, ang tigdumala sa sirkito ug ang ubang Saksi miadto sa baryo sa mga Kekchi ug miestar didto ug upat ka adlaw uban sa mga Bible study. Kada buntag, manan-aw silag binase sa Bibliya nga mga video sa Kekchi nga pinulongan sa jw.org ug magtuon sa brosyur nga Kinsay Nagabuhat sa Kabubut-on ni Jehova Karon? Kada hapon, manan-aw silag mga video sa JW Broadcasting. Giorganisar sab sa tigdumala sa sirkito nga naay personal nga magdumalag pagtuon sa Bibliya sa matag Bible study.

 Sulod sa upat ka adlaw, ang mga Saksi nanangyaw pod sa silingang mga baryo nga Kekchi ug pinulongan, ug gidapit ang mga tawo nga motambong sa espesyal nga tigom. Niana nga tigom, gidapit sa mga brader ang 47 nga nanambong nga mag-Bible study. Onse ka pamilya ang midawat ug pagtuon sa Bibliya.

 Pipila ka bulan sa ulahi, ang mga ansiyano nag-organisar ug tigom nga himoon sa orihinal nga baryo sa matag hinapos sa semana. Karon, mga 40 ang regular nga tigtambongan sa mga tigom. Ug dihang gipahigayon sa mga igsoon ang Memoryal sa kamatayon ni Jesus didto, nalipay sila nga 91 ang mitambong.

 Sa paghinumdom kon sa unsang paagi nagsugod kini nga eksperyensiya ug sa maayong resulta niini, si Marta miingon: “Mapasalamaton ko kang Jehova. Usahay, mobati ko nga limitado ra ang akong mahimo. Pero puwede tang gamiton sa Diyos aron tabangan ang uban. Nahibalo siya sa kasingkasing sa maong mga tawo, ug gitabangan niya sila nga mahimong sakop sa iyang katawhan. Gimahal sila ni Jehova.”