Si Osman uban sa iyang asawa ug anak nga babaye nag-cart witnessing sa gawas sa usa ka sementeryo sa Chile. Kalit lang nga may miabot nga prosesyon sa lubong nga nagpatugtog ug kusog nga musika. Naalaan sa uban nga si Osman ang ilang pastor, busa ilang giduol siya, gigakos, ug giingnan, “Salamat kay sayo kang miabot Pastor, nagdahom gyod mi nimo!”

 Miingon si Osman nga dili siya ang ilang pastor, pero dili siya madungog sa mga tawo tungod sa kabanha. Pipila ka minuto sa ulahi, human makasulod sa sementeryo ang mga tawo, gibalikan siya sa uban ug giingnan, “Pastor, naghulat mi nimo sa sementeryo.”

 Dihang di na kaayo banha, gipatin-aw ni Osman kon kinsa siya ug nganong naa siya didto. Naglagot ang mga tawo sa ilang pastor kay wala kini moabot, ug ilang gihangyo si Osman, “Puwede ba kang magpaambit ug mensahe gikan sa Bibliya?” Misugot si Osman.

 Samtang nagpaingon sila sa lubnganan, nangayog impormasyon si Osman bahin sa namatay ug naghunahunag pipila ka teksto nga puwede niyang ipaambit. Pag-abot nila, nagpaila siya ug miingon nga ingong Saksi ni Jehova nakigbahin siya sa pagsangyaw sa maayong balita.

 Dayon, gigamit niya ang Pinadayag 21:3, 4 ug Juan 5:28, 29 sa pagsaysay nga dili katuyoan sa Diyos nga mamatay ang mga tawo. Siya miingon nga sa umaabot banhawon sa Diyos ang mga patay, ug naa silay paglaom nga mabuhi sa walay kataposan sa yuta. Pagkahuman ni Osman, daghan ang migakos niya ug nagpasalamat tungod sa “maayong balita gikan kang Jehova.” Dayon si Osman mibalik sa cart.

 Human sa lubong, ubay-ubay sa mga miadto sa lubong ang miduol sa cart ug nangutana kang Osman ug sa iyang pamilya bahin sa Bibliya. Taas ang ilang panaghisgot, ug sa pagpanguli sa mga tawo, halos nahurot ang mga publikasyon sa cart.