ISHOMO RYA 01

Ni bata oku Bibuli eri kubasa kukukwasa?

ZAANA

Abantu bingi nibebuza ebibuzo ebiri kukwata aha magara, okubonabona, okufa n’ebirije kutuhikaho omu biro eby’omu misho. Nambwenu nitwemereza omutima aha mbera zitu za birijo, nk’okugira ebiri kubasa kutubisaho n’okugira eka eshemerirwe. Abantu bingi bakareba ku Bibuli eri kubasa kugarukamu ebibuzo byabo bikuru, konka nambwenu ku eri kubasa kubaha obuhabuzi bw’omu mbera zabo za burijo. Mbehi notekateka ngu Bibuli nebasa kukwasa buri omwe?

1. Ni biha bibuzo ebi Bibuli eri kugarukamu?

Bibuli negarukamu ebibuzo ebiri kugira ngu: Amagara gakatandika gata? Ahabw’enki turiho? Ahabw’enki abantu barungi bari kubonabona? Ni enki ekiri kubaho omuntu yafa? Yaba abantu bari kwenda obusinge, ahabw’enki hariho entaro nyingi? Ni enki ekirije kubaho omu biro eby’omu misho? Bibuli netuhiga kuronda ebyokugarukamu by’ebyo bibuzo kandi abantu bingi bakatunga ebyokugarukamu byabyo ebiri kubamara.

2. Ni bata oku Bibuli eri kubasa kutukwasa kubaho tushemerirwe?

Bibuli netuha obuhabuzi burungi. Ecokureberaho: Neyegesa oku amaka gari kubasa kubamu okushemererwa okwa buzima. Netuhabura oku turi kubasa kwehanganira ebiri kutwemereza omutima n’oku turi kubasa kutunga okushemererwa aha murimo gwitu. Noyija kwega eki Bibuli eri kwegesa ahari ebyo bintu hamwe n’ebindi oku turagende turi kwega. Kandi noyija kwikiriza ku ‘ebyahandikirwe byona [ebiri omuri Bibuli] byine omugasho.’—2 Timoseo 3:16.

Eki kitabo tikiri kwihaho Bibuli. Ahobwe, nikikukwasa kweyegesa Bibuli. Obwe rero, nitukuhiga kushoma ebyahandikirwe byona ebiri omuri aga mashomo kandi obigeranise n’ebi ori kwega.

YEGA BYINGI

Manya oku Bibuli yakwasize abantu, oku ori kubasa kunurirwa waba ori kuyishoma n’oku kiri kukugasira wayishoborocerwa.

3. Bibuli nebasa kutuhabura

Bibuli ni nk’omushana. Netwereka oku turi kubasa kukora ensharamu ndungi, kandi etukwasa kumanya ebirije kubaho omu biro eby’omu misho.

Shoma omuri Zaaburi ya 119:105, rero muganire ahari ebi bibuzo:

Ni bata oku omuhandiki w’eyi zaaburi yabire nareba Bibuli?
Ni bata oku ori kureba Bibuli?

4. Bibuli nebasa kugarukamu ebibuzo byitu

Bibuli ekagarukamu ebibuzo ebi omukazi omwe yabire amazire emyaka myingi ari kwebuza. Zana VIDIYO, rero muganire ahari ebi bibuzo.

VIDIYO: Otarireka amasiko agu oyine! (1:48)

Nk’oku wabireba omuri vidiyo, ni biha bibuzo ebi ogu mukazi yabire ari kwebuza?
Ni bata oku Bibuli yamukwasize kutunga ebyokugarukamu?

Bibuli netuhiga kubuza ebibuzo. Shoma omuri Matayo 7:7, rero muganire ahari eki kibuzo:

Ni biha bibuzo ebi ori kwebuza ebi Bibuli eri kubasa kugarukamu?

5. Okushoma Bibuli nibibasa kukunurira

Abantu bingi nibakunda kushoma Bibuli kandi nebagasira. Zana VIDIYO, rero muganire ahari ebi bibuzo.

VIDIYO: Okushoma Bibuli (2:05)

Nk’oku wakireba, ni bata oku abacari bato bari kureba eby’okushoma Bibuli?
Ahabw’enki oku bari kureba eby’okushoma Bibuli hati biri kutaana n’oku babire bari kubireba kare?

Bibuli netugambira ku eri kubasa kutuha obuhabuzi oburi kutuhumuriza kandi ekatuha n’amasiko. Shoma omu Barooma 15:4, rero muganire ahari eki kibuzo:

Mbehi ebiraganiso ebiri kutuhumuriza kandi bikatuha n’amasiko nibikushemeza?

6. Abandi nibabasa kukukwasa kushoborocerwa Bibuli

Abantu bingi bakareba ku oyihireho kushoma Bibuli bari bonka, nambwenu nikibagasira bagiganiraho n’abandi. Shoma omu Byakozirwe 8:26-31, rero muganire ahari eki kibuzo:

Ni bata oku turi kubasa kushoborocerwa Bibuli?—Reba orunyiriri rwa 30, n’orwa 31.

Omunyesiyopiya akaba nayetenga obuyambi bw’okushoborocerwa Ebyahandikirwe. Omuri obu bwire abantu bingi bakareba ku kugambira abandi ebiri omuri Bibuli kiri kubakwasa.

ABANTU ABAMWE NIBAGAMBA NGU: “Okushoma Bibuli ni okushisha obwire.”