Benetata na banyanyanyazi abakundwa:

Rukundo eyi turi kukunda Ruhanga n’abantu netuma ‘twagenda omu mahanga gona, tuhindura abantu abegi nitubabatiza.’ (Mat 28:19, 20; Mar 12:28-31) Rukundo etarimu okwekunda eyine amani. Nebasa kukora aha mutima gwa ‘bona abatoranirwe amagara agatahwaho.’—Byak 13:48.

Omu myaka eyahwire, tukaba tutire omutima aha kukoresa ebyokureberaho n’okuha abantu ebitabo. Hati nitwenda kuta omutima aha ku turi kubasa kumanya kuganira. Nitwenda kwereka abandi rukundo turi kubagambira ebi bari kukunda. Eco nikimanyisa ku tushemerire kubuganisa n’embera kandi tukafa aha biri kwemereza omutima gwa buri muntu n’ebi ari kukunda. Ni bata oku aka katabo karije kubitukwasamu?

Aka katabo kine amashomo 12 agari kugamba aha micwe eyi tushemerire kugira ngu twereke rukundo kandi tuhindure abantu abegi. Buri ishomo nirigamba aha nkuru y’omuri Bibuli eri kwereka oku Yesu ninga ondijo muburizi w’omu kinyigana c’okubanza yayerekire gumwe omu mitwarize omu murimo g’okuburira. Entego tokukwata omu mutwe ebyokureberaho, ahobwe n’okurondesa oburyo bw’okwerekamu abantu rukundo. N’obu buri mutwarize guri kwetengwa omu murimo g’okuburira, twaza kushwijuma oku emwe omuri yo eri kwetengwa munonga twaba turi kutandikisa ebiganiro, turi kushuba kutayaya, ninga shi twaba turi kwegesa Bibuli.

Waba ori kushwijuma buri ishomo, otecereze oyetonzire oku ori kubasa kwereka ogo mutwarize waba ori kuganira n’abantu b’omu kacweka kanyu. Gezaho kongera rukundo eyi ori kukunda Yehova n’abantu. Eyo rukundo neyija kukukwasa kuhika aha ntego yawe y’okuhindura abantu abegi.

Nitwesima munonga ahabw’omugisha ogu twine g’okukorana n’imwe tukwatanisize. (Zef 3:9) Yehova agumizemu kubaha emigisha mwaba muri kugumizamu kukunda abantu kandi muri kuhindura abantu abegi!