1. Ni enki eki oshemerire kwebuza obyihire aha mutima, waheza kwega eki kitabo?

HATI wamazire kwega amazima mingi aga Bibuli omuri eki kitabo, nk’ekiraganiso ca Ruhanga ec’okutuha amagara agatahwaho, embera z’abafire n’amasiko g’okuzoka. (Omubuurizi 9:5; Luka 23:43; Yohaana 5:28, 29; Okushuuruurwa 21:3, 4) Nobasa kuba watandikire kuza omu materaniro g’Abahamya ba Yehova kandi wayerebire ku ni bo abari kushaba omu mazima. (Yohaana 13:35) Nobasa n’okuba watandikire kugira obunywani  bugumire na Yehova, kandi nobasa n’okuba wamazire kusharamu kumukorera. Obwe rero, nobasa kwebuza ngu: ‘Nshemerire kukora ki ngu nkorere Ruhanga?’

2. Ni enki ecatumire Omunyesiyopiya yayenda kubatizibwa?

² Eco ni co Omunyesiyopiya owabireho omu bwire bwa Yesu yayeburize. Hahwire obwire buce Yesu azokire, omwegi wa Yesu ori kwetwa Filipo akaburira ogo mushija. Filipo akamushobororera ku Yesu ari we Mesia. Ogo Munyesiyopiya akahurira ebi yamara kwega byamuhika aha mutima ni ko kugamba ati: ‘Reba, amizi ngaga! Ekiri kunzibira kubatizibwa ni enki?’—Ebyakozirwe 8:26-36.

3. (a) Ni kiha kiragiro eki Yesu yahire abakurasi beye? (b) Ni bata oku omuntu ari kubatizibwa?

³ Bibuli neshoborora kurungi ngu waba ori kwenda kukorera Yehova, oshemerire kubatizibwa. Yesu akagambira abakurasi be ati: ‘Muhindure abantu abegi, nimubabatiza.’ (Matayo 28:19) Nambwenu, Yesu akatuha ecokureberaho ari kubatizibwa. Tibaramushukire otwizi aha busyo, ahobwe bakamuta omu mizi yayibira wena wena. (Matayo 3:16) Erizoba, Omukristo yayenda kubatizibwa, na we naba ashemerire kwibikwa omu mizi mingi.

4. Okubatizibwa kwawe nikwereka ki abandi?

⁴ Wabatizibwa, noba wayereka abandi ku mazima ori kwenda kuba munywani wa Ruhanga kandi okamukorera. (Zaaburi 40:7, 8) Konka nobasa kuba noyebuza ngu: ‘Ni enki eki nshemerire kukora ngu nanye mbatizibwe?’

5. (a) Ni enki eki oshemerire kubanza wakora waba noyenda kubatizibwa? (b) Ahabw’enki amateraniro g’Abahamya ba Yehova gine omugasho?

⁵ Mbere y’okubatizibwa, oshemerire kubanza wamanya Yehova na Yesu. Eco okatandika kukikora ori kwega  Bibuli. (Shoma omuri Yohaana 17:3.) Konka eco tikiri kumara. Bibuli negamba ku oshemerire ‘kwijuzibwa okumanya’ ebi Yehova ari kwenda. (Abakolosai 1:9) Amateraniro g’Abahamya ba Yehova nigija kukukwasa kukizaho kuba munywani wa Yehova. Eyo ni yo nshonga oshemerire kwija omuri ago materaniro burijo.—Abaheburaayo 10:24, 25.

6. Mbehi oshemerire kukwata Bibuli yona omu mutwe kugira ngu obone kubatizibwa?

⁶ Ni amazima, Yehova tari kwenda ngu omanye ebintu byona ebiri omuri Bibuli, rero obone kubatizibwa. Akaba atari kwenda ngu wa Munyesiyopiya abanze yamanya byona, abone kubatizibwa. (Ebyakozirwe 8:30, 31) Twena turyagumizamu kwega ebiri kugamba ahari Ruhanga kuhisya ebiro byona. (Omubuurizi 3:11) Konka kugira ngu obatizibwe, oshemerire kwega enyegesa za Bibuli ez’okubanza kandi okazikiriza.—Abaheburaayo 5:12.

7. Ni bata oku kwega Bibuli cakukwasize?

⁷ Bibuli negamba ngu: ‘Otari kwikiriza tari kubasa kushemeza Ruhanga.’ (Abaheburaayo 11:6) Obwe rero, oshemerire kugira okwikiriza mbere y’okubatizibwa. Bibuli netugambira ku abantu bamwe b’omu tawuni ya Korinso bahurire ebi abakurasi ba Yesu babire nibegesa, rero ‘bikiriza, babatizibwa.’ (Ebyakozirwe 18:8) Ni co kimwe n’iwe, okega Bibuli wayikiriza ebi Ruhanga ari kuturaganisa kandi wikiriza ekitambo ca Yesu ekiri kubasa kutucungura, kikatwiha omu kicumuro n’orufu.—Yoshua 23:14; Ebyakozirwe 4:12; 2 Timoseo 3:16, 17.

8. Ni enki ekirije kutuma wayenda kugambira abandi ebi orimu noyega?

⁸ Oku oragumizamu kwega Bibuli kandi okerebera  oku eri kuhindura amagara gawe, okwikiriza kwawe kuryakizaho kuhama. Oryahurira wayenda kugambira abandi ebi orimu noyega. (Yeremia 20:9; 2 Abakorinso 4:13) Konka shi ni oha owu ori kubasa kutandikiraho?

9, 10. (a) Ni baha abu oshemerire kutandikiraho kugambira ebi wamazire kwega? (b) Okakora ki waba noyenda kutandika kuburira hamwe n’ab’omu kibina?

⁹ Noyija kuhurira wagira ekihika c’okugambira ab’omu ka, abanywani, batahi bawe ninga abo muri kukora hamwe, ebi wamazire kumanya. Eco ni kirungi, konka oyijuke ku oshemerire kubibagambira oyine obucurezi kandi ori kubereka rukundo. Mpora mpora, oryabasa kuburira ori hamwe n’ab’omu kibina. Wahurira oyetegwire kuba omuburizi, ogambire Omuhamya ori kukwegesa Bibuli ku ori kwenda kwekwatanisa n’ekibina omu kuburira. Na we ku ararebe obwire bwahikire kandi oyine emitwarize mirungi eyi Bibuli eri kutushaba, mwembi muryashitama n’abazehe b’ekibina babiri rero mukiganireho.

¹⁰ Ahabw’enki mushemerire kuganira n’abazehe? Muryaganira kugira ngu barebe yaba oshoborokirwe ge enyegesa z’okubanza za Bibuli kandi ori kuzikiriza, yaba ori kuta omu bikorwa ebi Bibuli eri kukushaba omu kubaho kwawe, kandi yaba ori kwendera kimwe kuba Omuhamya wa Yehova. Yijuka ku abazehe bari kufa munonga ahari bona ab’omu kibina, n’iwe orimu; obwe rero otaritina kugamba na bo. (Ebyakozirwe 20:28; 1 Petero 5:2, 3) Bwanyima y’okubuganaho n’abo bazehe, baryakugambira yaba ori kubasa kutandika kuburira hamwe n’ab’omu kibina.

11. Ahabw’enki oshemerire kukora empinduka mbere y’okwekwatanisa n’ekibina omu kuburira?

 ¹¹ Abazehe nibabasa kukugambira ku hine ebi oshemerire kubanza wahindura kugira ngu oyikirizibwe kuburira hamwe n’ekibina. Ahabw’enki oshemerire kukora ebi bakushaba? Ni ahabw’okuba twaba nitugambira abandi ebya Ruhanga, nituba turi kugambirira Yehova kandi nituba tushemerire kubaho omu buryo buri kumuhisa ekitinisa.—1 Abakorinso 6:9, 10; Abagalatia 5:19-21.

12. Ahabw’enki abantu bona bashemerire kwehana?

¹² Hariho ekindi kintu eki oshemerire kukora mbere y’okubatizibwa. Entumwa Petero akagamba ngu: ‘Mwetise, muhinduke, ebibi byanyu biragazibwe.’ (Ebyakozirwe 3:19) Kwehana [okwetisa] nikimanyisa ki? Nikimanyisa okushasha munonga ahabw’ebibi ebi twakozire. Ecokureberaho: Yaba wabire ori kugendera omu bikorwa by’obushambani, noba oshemerire kwehana. Kandi nabwo waba otwire ori kugezaho kukora ebirungi, nabwo oshemerire kwehana, ahabw’okuba twena nitucumura kandi tushemerire kushaba Ruhanga ngu atusasire.—Abarooma 3:23; 5:12.

13. ‘Okuhinduka’ nikimanyisa ki?

¹³ Mbehi kuhurira washasha ahabw’ebibi ebi wakozire nikimara? Ingaha. Petero akagamba ku nambwenu oshemerire ‘kuhinduka.’ Eco nikimanyisa ku oshemerire kureka emitwarize mibi eyi obire oyine rero okatandika kukora ebirungi. Kugira ngu tukishoborore ge, reka tugire ngu ori kuza ahantu ahu otari kumanya. Konka ku wamara kugenda orugendo ruringwa, washanga ohabire.  Ni enki eki ori kubasa kukora? Nobanza wayemerera, ohinduka, rero otora ogundi muhanda oguhikire. Ni co kimwe, waba noyega Bibuli, nobasa kweshwijuma oshange oyine emitwarize mibi ninga shi ori kukora ebintu ebi oshemerire kureka. Mazima, oshemerire kubireka, ‘okahinduka,’ kandi okatandika kukora ebirungi.

14. Ni bata oku ori kubasa kweha Ruhanga?

¹⁴ Ekindi kintu c’omugasho eki oshemerire kukora otakabatizibwe ni okweha Yehova. Wayeha Yehova, nomuraganisa omu kushaba ku noyenda kumuramya wenka n’okukora ebi ari kukunda omu kubaho kwawe.—Eky’Ebiragiro 6:15.

15, 16. Ni enki ekiri kutuma omuntu yayenda kweha Ruhanga?

¹⁵ Okuraganisa kuhereza Yehova wenka ni nk’okuraganisa kuba n’omuntu owu ori kukunda munonga ebiro byona. Ka tugire ngu omusigazi n’omuhara bari kusigurana. Omusigazi ku ari kukizaho kumanya omuhara, namukunda munonga kandi ahurira yayenda ngu amutase. N’obu eco kintu kitorobi, omusigazi naba ayetegwire kwikiriza ekintu cona ekiramuhikeho aha kuba naba ari kumukunda munonga.

¹⁶ Oku ori kukizaho kwega ebya Yehova, ni ko ori kukizaho kumukunda kandi ohurira wayenda kumuhereza. Eco nikituma wamushaba ori kumuraganisa ku waza kumuhereza. Bibuli negamba ku omuntu wena ori kwenda kukuratira Yesu ashemerire ‘kweyanga.’ (Mako 8:34) Eco nikimanyisa ki? Nikimanyisa ku omu kubaho kwawe, oshemerire kukora ebi Yehova ari kwenda omu mwanya g’okubanza.—Shoma omuri 1 Petero 4:2.

17. Ahabw’enki abantu bamwe bari kutina kweha Yehova?

¹⁷ Abantu bamwe nibanga kweha Yehova, aha kuba nibatina ngu nibija kuremwa kuhikiriza ebi bamuraganisize. Nibatina kukora kubi Yehova, kandi batekateka ngu baba batamwehire tihine eki arije kubabuza.

18. Ni enki ekirije kukukwasa kutatina ngu noyija kuremwa kugumizamu kukora ebi Yehova ari kukunda?

¹⁸ Rukundo eyi oyinire Yehova neyija kutuma otatina kumweha. Ahabw’okuba ori kumukunda, oryatamu amani kugira ngu ohikirize ebi wamuraganisize. (Omubuurizi 5:4; Abakolosai 1:10) Torije kutekateka ngu kigumire kukora ebi Yehova ari kukunda. Entumwa Yohaana akahandika ngu: ‘Oku ni ko kukunda Ruhanga, itwe okorobera ebiragiro bye; kandi ebiragiro bye tibirusya.’—1 Yohaana 5:3.

19. Ahabw’enki otashemerire kutina kweha Yehova?

¹⁹ Toshemerire kuba omuntu ohikirire kugira ngu obone kweha Yehova. Tari kutushaba kukora ebintu ebi tutari kubasa. (Zaaburi 103:14) Nayija kukukwasa kukora ebirungi. (Isaaya 41:10) Yesige Yehova n’omutima gwawe gona kandi ‘aryaguma natebekanisa emihanda yawe yona.’—Enfumu 3:5, 6.

20. Wamara kweha Ruhanga, ni enki ekindi eki oshemerire kukora?

²⁰ Mbehi notecereza ngu wahikize obwire bw’okweha Yehova? Wamara kweha Yehova, nihaba hine ekindi eki oshemerire kukora. Oshemerire kubatizibwa.

21, 22. Ni bata oku ori kubasa ‘kwaturira’ abandi okwikiriza kwawe?

²¹ Gambira omuzehe mukuru omu kibina canyu ku wayehire Yehova kandi ku noyenda kubatizibwa. Na we  nayija kugambira abandi bazehe bakukwase kweyijusya enyegesa za Bibuli ez’okubandizaho bari n’iwe. Ku barishanga ohikize obwire bw’okubatizibwa, baryakugambira ku orije kubatizibwa habaho ekiterane c’Abahamya ba Yehova. Omu kiterane niharabaho toku eri kushoborora eki okubatizibwa kiri kumanyisa. Bwanyima ori kuha  toku nabuza abari kwenda kubatizibwa ebibuzo bibiri byorobi. Wagarukamu ebyo bibuzo byona, noba ‘wayaturira’ abandi okwikiriza kwawe.—Abarooma 10:10.

²² Bwanyima nobatizibwa. Noyibikwa omu mizi wena wena. Okubatizibwa kwawe nikwija kwereka abantu  bona ku wayehire Yehova kandi ku waba Omuhamya wa Yehova.

23. Okubatizibwa ‘omu izina ry’Ishebona n’ery’Omwana n’ery’[Omwika] oguri kwera nikimanyisa ki’?

²³ Yesu akagamba ku abegi beye babire barije kubatizibwa ‘omu izina ry’Ishebona, n’ery’Omwana [n’ery’omwika] oguri kwera.’ (Shoma omuri Matayo 28:19.) Eco nikimanyisa ki? Nikimanyisa ku noyikiriza obushoborozi bwa Yehova n’omwanya ogu Yesu ayine omu kuhikiriza ekigendererwa ca Ruhanga, n’oku Ruhanga ari kukoresa omwika gweye oguri kwera omu kuhikiriza ebi ari kwenda.—Zaaburi 83:18; Matayo 28:18; Abagalatia 5:22, 23; 2 Petero 1:21.

24, 25. (a) Okubatizibwa nikumanyisa ki? (b) Ni enki eki turije kwega omu kicweka ec’aha muheru?

²⁴ Okubatizibwa nikumanyisa ekintu c’omugasho munonga. Wayibira omu mizi, nikiba nikimanyisa ku wafa, ninga shi ku wareka omuhanda gwawe gwa kare. Waruga omu mizi, noba wayereka ku watandika kubaho bundi busya ori kukora ebi Ruhanga ari kwenda. Eco nikiba cayereka ku watandika kuhereza Yehova okuhisya ebiro byona. Yijuka ku noba otayeha omuntu, ekitongore, ninga omurimo. Noba waha Yehova amagara gawe.

²⁵ Kweha Yehova kiryakukwasa kugira na we obunywani buhamire. (Zaaburi 25:14) Eco tikiri kumanyisa ngu omuntu aryahonoka ahabw’okubatizibwa. Entumwa Paulo akahandika ngu: ‘Muhikirize okujunwa kwanyu mwine obwoba n’okutetema.’ (Abafilipi 2:12) Okubatizibwa ni entandikiro kusha. Konka shi okakora ki ngu ogume hihi ya Yehova? Ekicweka c’aha muheru c’eki kitabo nikija kugarukamu eco kibuzo.