WABA ori kushoma ebinyamakuru, ori kureba tivi, ninga shi ori kuhurikiza rediyo, noshanga byona biri kugamba aha bwitani, endwano n’ebiri kutinisa. N’iwe nobasa kuba ori kubonabona ahabw’oburwire ninga shi ahabw’okufisa omuntu wawe.

Yebuze oti:

• Mbehi ebi ni byo Ruhanga yabire ari kwenda ngu bimpikeho, nyowe n’ab’eka yange?

• Ni nkahe ahu ndi kubasa kwiha obuyambi bw’okwehanganira ebizibu ebi ndi kubugana?

• Mbwenu shi hariho obwire obu haribaho obusinge bwijwire?

Bibuli netuha ebyokugarukamu by’ebyo bibuzo.

• Abantu tibarishuba kushasha, kukura ninga kufa.—Okushuuruurwa 21:4

• ‘Ekirema kiryaguruka nk’empara.’​—Isaaya 35:6

• ‘Amisho g’empumi garyahumurwa.’​—Isaaya 35:5

•  Abafire baryazoka.​—Yohaana 5:28, 29

• Tihine origaruka kurwara.​—Isaaya 33:24

• Abantu bona omu nsi baryaba bine ebyokurya byingi.​—Zaaburi 72:16

Nobasa kutekateka ngu ebi oshomire omu ntandikiro y’eki kitabo ni ebiroto. Konka Ruhanga naturaganisa ngu juba aha nayija kubihikiriza omu nsi, kandi Bibuli neshoborora oku arije kukikora.

Hine n’ekindi eki Bibuli eri kushoborora. Netugambira eki tushemerire kukora twaba turi kwenda kugira okushemererwa n’okubaho kurungi omuri obu bwire. Tekateka aha bintu ebiri kutuma wayemereza omutima. Birimu nk’embera z’eby’akasente ninga okufa ah’ab’eka yawe, oburwire, ninga shi kufisa omukundwa wawe. Bibuli nebasa kukukwasa kwehanganira ebyo bizibu, kandi nebasa kukuhumuriza eri kukugarukamu ebi bibuzo:

• Ahabw’enki nitubonabona?

• Ni bata oku turi kubasa kwehanganira ebizibu?

• Mbehi eka yitu nebasa kubamu okushemererwa?

• Twafa nituza nkahe?

• Mbehi turyashuba turebe abakundwa bitu abafire?

• Ahabw’enki tushemerire kwesiga ku Ruhanga arihikiriza ebi yaraganisize byona?

 Obu ori kushoma eki kitabo, nicereka ku ori kwenda kumanya eki Bibuli eri kwegesa. Eki kitabo kiryakukwasa. Noyija kureba ku paragurafu zine ebibuzo ebirije kukukwasa kushoborocerwa Bibuli. Abantu bingi bakatandika kwega Bibuli n’Abahamya ba Yehova kandi kikabashemeza. Nitwesiga ngu n’iwe noyija kushemererwa. Nitukushabira omugisha gwa Ruhanga omu kwega Bibuli kwawe, n’okwenda kumanya eki Bibuli eri kwegesa!