Ruhanga nayeta abantu b’omu mahanga gona ngu bamuhike hihi birabire omu kushaba. (Zaaburi 65:2) Konka tari kuhurira eshara zona. Ecokureberaho, eshara y’omushija ori kukwata kubi omukazi weye Ruhanga tari kuyihurira. (1 Petero 3:7) Abisirayeli ku babire nibakora ebibi, Ruhanga akaba nayanga kuhurira okushaba kwabo. Nikirebeka ku eshara eri omugisha. Konka nambwenu, Ruhanga nayikiriza okushaba kw’abantu bakozire ebibi by’amani, bwanyima bakehana.​—Shoma omuri Isaaya 1:15; 55:7.

Kushaba ni kimwe omu kuramya kwitu, ni ahabw’eco tushemerire kushaba Yehova Ruhanga wenka. (Matayo 4:10; 6:9) Nambwenu tushemerire kushaba omu izina rya Yesu owatuferire, ahabw’okuba turi abasisi. (Yohaana 14:6) Yehova tari kwenda ngu tugambe amashara maringwa agu twakwasire omu mutwe ninga agahandikirwe. Nayenda ngu tumugambire ebituri aha mutima.​—Shoma omuri Matayo 6:7; Abafilipi 4:6, 7.

Ruhanga nabasa no kuhurira eshara yitu y’omu mutima. (1 Samueli 1:12, 13) Nayenda ngu tumushabe obwire bwona; omu kasheshe, omu mwebazyo, nyomushana ninga shi twabugana ebizibu.​—Shoma omuri Zaaburi 55:22; Matayo 15:36.

Kuhika hihi ya Ruhanga ticorobi ahabw’okuba tutwire n’abantu batine okwikiriza kandi batari kwesiga emigisha eyi Ruhanga yaturaganisize. (2 Timoseo 3:1, 4; 2 Petero 3:3, 13) Ni ahabw’eco tushemerire kuteranira hamwe na benetata, kugira ngu tugumyane.​—Shoma omu Baheburaayo 10:24, 25.

 Kuba hamwe n’abantu abari kukunda Ruhanga nikitukwasa kuhika hihi ya Ruhanga. Amateraniro g’Abahamya ba Yehova nigatuma twareba okwikiriza kw’abandi rero bitugaruramu amani.​—Shoma omu Barooma 1:11, 12.

Nobasa kuhika hihi ya Ruhanga ori kuteketeka munonga aha bi wayegire omu kigambo keye. Yegera aha bi yahangire, aha buhabuzi bweye, n’aha bi ari kuturaganisa. Okushaba n’okutekateka nibitukwasa kushemerererwa rukundo ya Ruhanga n’obwenge bweye.​—Shoma omuri Yoshua 1:8; Zaaburi 1:1-3.

Kuhika hihi ya Ruhanga tikikabasika waba otari kumwesiga. Konka okwikiriza ni nk’ekintu kine amagara ekishemerire kurisibwa. Niwe nobasa kurisa okwikiriza kwawe ori kutekateka munonga aha bi oyegire omuri Bibuli.​—Shoma omuri Matayo 4:4; Abaheburaayo 11:1, 6.

Yehova nafa munonga aha bantu abari kumukunda. Nabasa kubarinda ekintu cona ekiri kubasa kushisha okwikiriza kwabo kandi kikatuma bareka kutekereza aha migisha ey’omu biro by’omu misho. (Zaaburi 91:1, 2, 7-10) Naturabura ngu twerinde emitwarize eri kubasa kushisha amagara gitu kandi ekatuma twabura okushemererwa. Yehova natwegesa oburyo burungi bw’okubaho.​—Shoma omuri Zaaburi 73:27, 28; Yakobo 4:4, 8.