ISHOMO RYA 15
Yesu ni oha?
Yesu ni omwe omu bantu ba ruranganwa ababireho. Noshanga abantu bari kumanya izina ryeye, konka batari kumanya ebiri kumukwataho kandi abingi nibamugambaho ebintu ebitari kushushana. Ni enki eki Bibuli eri kumugambaho?
1. Yesu ni oha?
Yesu ni ekihangirwe c’omwika kandi atwire omu iguru. Yehova Ruhanga akamuhanga mbere y’okuhanga ebindi bintu byona. Ni yo nshonga, ari kwetwa ‘omujigijo omu byahangirwe byona.’ (Abakolosai 1:15) Bibuli negamba ku Yesu ari Omwana wa Ruhanga ‘omwe nyamunegere’ ahakuba ni we Yehova yayehangire. (Yohaana 3:16) Yesu akakora n’Ishe, Yehova ari kumukwasa omu kuhanga ebindi bintu byona. (Shoma omu Nfumu 8:30.) Yesu acagumizemu kugira obunywani bwa hihi na Yehova. Ni “Kigambo” ahakuba natwara obutumwa n’obuhabuzi bwa Ruhanga.—Yohaana 1:14.
2. Ahabw’enki Yesu yayijire omu nsi?
Omu myaka nka 2,000 ehwire, Yehova akakora ec’okutangaza yafurura amagara ga Yesu yagata omu nda ya Mariya owabire atakanyamagaho n’omushija. Omuri obwo buryo, Yesu akazarwa ari omuntu. (Shoma omuri Luka 1:34, 35.) Yesu akija omu nsi ngu abe Mesiya owaraganisibwe ninga Kristo, kandi ngu acungure abantu. * Obuhanuzi bwona bw’omuri Bibuli obwabire bwahanwirwe ahari Mesiya bukahikirira ahari we, catuma abantu bamanya ku Yesu ari ‘Kristo, Omwana wa Ruhanga ohurire.’—Matayo 16:16.
3. Yesu ari nkahe hati?
Yesu ku yafire, akazoka ari omwika yagaruka omu iguru. Ku yahikireyo, ‘Ruhanga akamukuza munonga.’ (Abafilipi 2:9) Hati Yesu ayine omwanya mukuru omu iguru, ni okugamba ku ni owa kabiri ahari Yehova.
YEGA BYINGI
Manya ahari Yesu kandi omanye n’oku kiri ec’omugasho munonga kwega ebiri kumukwataho.
4. Yesu ti we Ruhanga Rukirabona
N’obu Bibuli eri kwegesa ku Yesu ari ekihangirwe c’omwika, nayorobera Ishe Ruhanga, Yehova. Ahabw’enki turi kubasa kugamba basyoya? Zana VIDIYO orebe oku Bibuli eri kwereka ku Yesu ari kutana na Ruhanga Rukirabona.
Ebi byahandikirwe nibitukwasa kumanya entanisa eri ahagati ya Yehova na Yesu. Shoma buri cahandikirwe, rero muganire aha kibuzo ekiri ahaasi yaco.
Shoma omuri Luka 1:30-32.
-
Ni bata oku marayika yayerekire entanisa eri ahagati ya Yesu na Yehova Ruhanga ‘Rukirabona’?
Shoma omu Matayo 3:16, 17.
-
Ni enki eki iraka eryarugire omu iguru ryagambire obu Yesu yabire ari kubatizibwa?
-
Mbehi notekateka ngu eryo iraka rikaba riri eryoha?
Shoma omuri Yohaana 14:28.
-
Ni oha mukuru kandi ni oha oyine obushoborozi? Ni Omwana ninga ni Ishe?
-
Ni enki eki Yesu yabire ari kumanyisa obu yayesire Yehova Ishe?
Shoma omuri Yohaana 12:49.
-
Mbehi Yesu nayereba we n’Ishe nk’owomuntu omwe? Nokigambaho enki?
5. Ebihamya ebiri kwereka ku Yesu ari we owabire ari Mesiya
Omuri Bibuli harimu obuhanuzi bwingi obwabire burije kwereka abantu ku Yesu ari Mesiya, ni okugamba owu Ruhanga yatorine ngu acungure abantu. Zana VIDIYO orebe obuhanuzi bumwe obwahikirire ahari Yesu obu yabire ari omu nsi.
Shoma obu buhanuzi bw’omuri Bibuli, rero muganire ahari ebi bibuzo:
Shoma omuri Miika 5:2, omanye ahu Mesiya yabire arije kuzarirwa. *
-
Mbehi obuhanuzi oburi kukwata aha kuzarwa kwa Yesu bukahikirira?—Matayo 2:1.
Shoma omuri Zaaburi ya 34:20 na Zekaria 12:10, orebe obuhanuzi oburi kugamba aha kufa kwa Mesiya.
-
Mbehi obwo buhanuzi bukahikirira?—Yohaana 19:33-37.
-
Mbehi notekateka ngu Yesu ni we yatumire obwo buhanuzi bwahikirira?
-
Ni enki eki biri kukwereka ahari Yesu?
6. Okwega ebiri kukwata ahari Yesu nibitugasira
Bibuli negamba omugasho oguri omu kwega ebiri kukwata ahari Yesu n’omurimo gweye. Shoma omuri Yohaana 14:6 na 17:3, rero muganire ahari eki kibuzo:
-
Ni guha mugasho oguri omu kwega ebiri kukwata ahari Yesu?
Yesu akatwigurira omuhanda g’okuba banywani ba Ruhanga. Akegesa amazima agari kukwata ahari Yehova, kandi birabire omuri we nitubasa kutunga amagara agatahwaho
ABANTU ABAMWE NIBAGAMBA NGU: “Abahamya ba Yehova tibari kwikiriza Yesu.”
-
Nobasa kubagarukamu ota?
EMPINYE
Yesu ni ekihangirwe c’omwika ekine amani. Ni Omwana wa Ruhanga kandi ni Mesiya.
Wayega ki?
-
Ahabw’enki Yesu ari kwetwa ‘omujigijo omu byahangirwe byona’?
-
Ni enki Yesu yabire ari kukora mbere y’okwija omu nsi?
-
Nitumanya tuta ku Yesu ari we Mesiya?
CONDOZA
Manya byingi abiri kwereka ku Yesu ari we Mesiya.
“Mbehi obuhanuzi nibwereka ku Yesu yabire ari we Mesiya?” (Enkuru y’ahari intaneti)
Manya yaba Bibuli eri kwegesa ku Ruhanga yabire Ishe wa Yesu omu buryo bw’oku abantu bari kuzara abana.
“Ahabw’enki Yesu ari kwetwa Omwana wa Ruhanga?” (Enkuru y’ahari intaneti)
Manya enshonga ahabw’enki obushatu etari enyegesa y’omuri Bibuli.
“Mbehi Yesu ni Ruhanga?” (Omunara g’Omurinzi, gw’aha kiro ca 1 Okwakana, 2009)
Reba oku amagara g’omukazi omwe gahindukire, ku yamanyire eki Bibuli eri kugamba ahari Yesu.
^ Omu ishomo rya 26 na 27 turyashwijuma enshonga ahabw’enki twabire nitwetenga kucungurwa n’oku Yesu yatucungwire.
^ Reba Enyongezo ya 2 omanye obwire obu Yesu yabire arije kurebecera omu nsi.
