ISHOMO RYA 16
Ni enki eki Yesu yakozire obu yabire ari omu nsi?
Abantu bingi nibatekateka ahari Yesu nk’omwana otine kiyambwa, omuhanuzi w’omunyabwenge ninga shi omushija owafire. Konka nitubasa kumanya byingi ebiri kumukwataho twashwijuma ebi yakozire obu yabire ari omu nsi. Omuri eri ishomo, twaza kushwijuma ebintu bimwe by’omugasho ebi Yesu yakozire n’oku biri kubasa kukukwasa.
1. Omurimo gwa Yesu mukuru gukaba guri guha?
Omurimo gwa Yesu mukuru gukaba guri ‘okuburira ebigambo birungi by’Obukama bwa Ruhanga.’ (Shoma omuri Luka 4:43.) Akaburira obutumwa burungi ku Ruhanga yabire arije kutaho obutegeki bweye ninga shi gavumenti eyabire erije kumaraho ebizibu byona by’abantu. * Yesu akaburira obwo butumwa emyaka ishatu n’ekicweka atireho amani.—Matayo 9:35.
2. Ahabw’enki Yesu yakozire eby’okutangaza?
Bibuli negamba ‘eby’okutangaza n’obumanyiso, ebi [Ruhanga] yakozire’ birabire ahari Yesu. (Ebyakozirwe 2:22) Ruhanga akaha Yesu amani g’okutegeka ihunga, kurisa abantu bingi, kukiza abarwire n’okuzora abafire. (Matayo 8:23-27; 14:15-21; Mako 6:56; Luka 7:11-17) Eby’okutangaza ebi Yesu yakozire bikereka ge ku Ruhanga ari we owamutumire. Nambwenu nibyereka ku Yehova ayine emani g’okwihiraho kimwe ebizibu byona by’abantu.
3. Ni enki eki turi kwegera aha ku Yesu yabireho?
Yesu akorobera Yehova omu mbera zona. (Shoma omuri Yohaana 8:29.) N’obu Yesu yabire ari kuhiganisibwa akagumizamu kukora ebi Ishe yabire namushaba kuhisya aha kufa. Akereka ku omuntu ari kubasa kuhereza Ruhanga n’obu yakuba ari kuraba omu bigezo. Omuri obwo buryo, Yesu akatusigira ‘ecokureberaho, ngu [tutore] omuhanda ogu yarabiremu.’—1 Petero 2:21.
YEGA BYINGI
Shwijuma oku Yesu yaburire obutumwa burungi kandi akakora eby’okutangaza.
4. Yesu akaburira obutumwa burungi
Yesu akatambura engendo ndingwa zirimu omucucu ari kuburira abantu bingi obutumwa burungi oku biri kubasika. Shoma omuri Luka 8:1, rero muganire ahari ebi bibuzo:
-
Mbehi Yesu akaba naburira abantu ababire nibabuganira hamwe kusha?
-
Ni enki eki Yesu yakozire ngu abone abantu bingi b’okuburira?
Ruhanga akaba yagambire ku Mesiya yabire arije kuburira obutumwa burungi. Shoma omuri Isaaya 61:1, 2, rero muganire ahari ebi bibuzo:
-
Ni bata oku Yesu yahikirize obwo buhanuzi?
-
Mbehi noreba abantu bari kwenda kuhurikiza obutumwa burungi omuri obu bwire?
5. Yesu akaha obuhabuzi bw’omugasho
Yesu akaburira abantu obutumwa burungi bw’Obukama bwa Ruhanga kandi yabaha obuhabuzi bw’omugasho. Reba gamwe omuri ago mashomo omuri toku yeye y’aha rushozi. Shoma omuri Matayo 6:14, 34, na 7:12, rero muganire ahari ebi bibuzo:
-
Ni buha buhabuzi obu yahire omuri ezi nyiriri?
-
Mbehi notekateka ngu obwo buhabuzi na hati bucayine omugasho?
6. Yesu akakora eby’okutangaza
Yehova akaha Yesu amani g’okukora eby’okutangaza. Kugira ngu omanye kimwe omuri byo, shoma omuri Mako 5:25-34 ninga shi zana VIDIYO. Bwanyima muganire ahari ebi bibuzo.
-
Nk’oku wakireba omuri vidiyo, ni enki eki omukazi w’omurwire yabire ari kwikiriza atari kubanganisa?
-
Ni enki eki ori kukunda omuri eki c’okutangaza?
Shoma omuri Yohaana 5:36, rero muganira ehari ebi bibuzo:
-
Ni bata oku eby’okutangaza bya Yesu ‘byamuhamize’ ninga shi byayerekire abandi owu ari we?
Waba nokimanya?
Byona ebi turi kumanya ahari Yesu biri omu bitabo bina by’engiri ari byo Matayo, Mako, Luka, na Yohana. Buri muhandiki w’engiri akahandika bimwe ebiri kutana n’eby’abandi ebiri kukwata ahari Yesu. Ku turi kubishoma byona, nikituma twamanya oku Yesu yabireho omu nsi.
-
MATAYO
ni we owahandikire engiri obw’okubanza. Engiri yeye negamba munonga aha nyegesa za Yesu na munonga ebi yayegesize aha Bukama bwa Ruhanga.
-
MAKO
akahandika ekitabo c’engiri kigufu. Nikigamba aha bikorwa ebiri kushemeza ebyabireho.
-
LUKA
nikigamba munonga aha kushaba n’oku Yesu yabire natwariza abakazi.
-
YOHAANA
nikigamba munonga aha mitwarize ya Yesu n’oku yabire nakunda kuganira na banywani beye n’abandi.
ABANTU ABAMWE NIBAGAMBA NGU: “Yesu akaba ari omuntu murungi kusha.”
-
Iwe nokigambaho enki?
EMPINYE
Yesu akaburira aha Bukama bwa Ruhanga, yakora eby’okutangaza kandi yayorobera Yehova omu mbera zona.
Wayega ki?
-
Omurimo gwa Yesu mukuru obu yabire ari omu nsi ni guha?
-
Eby’okutangaza ebi Yesu yakozire bikereka ki?
-
Ni buha buhabuzi obu Yesu yahire abantu?
CONDOZA
Ni kiha kintu eki Yesu yabire nakunda kugambaho?
“Obukama Bwa Ruhanga—Ni Bukuru Ahari Yesu” (Omunara g’Omurinzi gw’aha kiro ca 1, Okwikumi, 2014)
Shwijuma ekiri kutuhamiza ku Yesu yakozire eby’okutangaza.
“Eby’okutangaza bya Yesu nibikwegesa ki?” (Omunara g’Omurinzi, gw’aha kiro ca 15, Okwamushanju 2004)
Reba oku okweferereza kwa Yesu kwahindwire amagara g’omushija omwe.
“Nkaba ninyekunda munonga” (Omunara g’Omurinzi, gw’aha kiro ca 1, Okwikumi 2014)
Reba ebi Yesu yakozire omu murimo gweye oku biri kukuratana.
“Ebintu bikuru ebi Yesu yakozire obu yabire ari omu nsi” (Obuhinduzi bw’Ensi Ensya, Appendix A7)
^ Ishomo rya 31-33 garyagamba byingi aha Bukama bwa Ruhanga.
