Omu kwezi Kwamwenda tuzatamu amani mingi kugira ngu tuhike ahari buri muntu wena, tutandike kumwegesa Bibuli tukoresize akatabo Shemerererwa amagara ebiro byona! Ababurizi nibabasa kusharamu kukora obupayoniya bw’amashaha 30. Ni bata oku turije kukora eyo kampeyini?

• Okuburira omurundi g’okubanza: Turyakoresa peji y’enyima y’akatabo Shemerererwa amagara, tutere amasiko nyineka kandi tumwereke oku turi kwegesa Bibuli. Guma oyijuke abashemererirwe amazima, harimu n’abu wagaruka kutayayira. N’obu bakuba bayangire kwega omu bwire bwa kare, hati nibabasa kwesimira oburyo busya bw’okwegesa n’akatabo akasya. Titushemerire kusiga otutabo omu maka agatarimu abantu, ninga shi ngu tuhandikire abantu turi kukabaha, kandi batarerekire ku nibakunda amazima. Komiti y’omurimo y’ekibina nebasa kutaho ezindi nterane z’okuburira omuri oko kwezi, ahabw’eyo kampeyini.

• Ogundi mugisha: Yaba omu kibina canyu muri kukoresa otugare, ogume oteho otutabo Shemerererwa amagara. Ogume ogambire omuntu owabishemererwa ku turi kukoresa ako katabo omu kwegesa Bibuli ahabwa busha. Hika ori kumwereka omu bugufu oku turi kwegesa Bibuli ninga shi mupange obundi bwire. Omureberezi w’omurimo nabasa kutaho ababurizi abamanyirire, baza kutandika kwegesa abantu ahari kukorerwa ebikorwa by’obushubuzi. Nambwenu nobasa kutandika kwegesa Bibuli abu muri kukora hamwe ninga abantu abu waburira omu buryo obukwatirweho.

Yesu akaturagira ‘kuhindura abantu abegi, nitubegesa.’ (Mat 28:19, 20) Nitushaba ngu eyi kampeyini eyije kutukwasa kuhika ahari eyo ntego, obu turabe turi kukoresa akatabo Shemerererwa amagara ebiro byona!