Ku nikitushemeza munonga kuba twatunga akatabo n’ekitabo by’okwegesezamu Bibuli! Nitushaba Yehova ngu ayije kutuha omugisha ahabw’amani agu turi kutaho ngu tuhindure abantu abegi. (Mat 28:18-20; 1Kor 3:6-9) Ni bata oku turi kukoresa ebi bikoreso bisya?

Akatabo Shemerererwa amagara ebiro byona!, k’okutandikiramu kwega Bibuli, nikereka oburyo busya bw’okwegesa Bibuli; waba ori kutebekanisa ninga ori kwegesa kuratiza obu buhabuzi. *

• Mushome ahu murayege, rero muganire aha bibuzo

• Mushome enyiriri ezihandikireho ngu “shoma”, kandi okwase omwegi kumanya oku ari kubasa kubita omu bikorwa

• Muzane za vidiyo kandi muziganireho muri kukoresa ebibuzo ebi muhibwe

• Mwaba muri kwega mugezeho kuhendera ishomo ryona

Omu murimo g’okuburira, ha akatabo omuntu owayereka ku yashemerererwa amazima. (Reba akashanduku akari kugira ngu: “ Oku turi kugaba akatabo Shemerererwa amagara ebiro byona! omurundi g’okubanza.”) Mwamara kwega ako katabo kona muri hamwe kandi omwegi acayenda kugumizamu kwega, muhe ekitabo, rero mutandikire ah’ishomo rya 04. Yaba ori kwegesereza omwegi omu kitabo Bibuli netwegesa ki? ninga ekitabo Guma Omuri Rukundo ya Ruhanga, mutware omu kitabo Shemerererwa amagara ebiro byona! orebe ahu muri kubasa kutandikira.

MUREBE VIDIYO EYINE OMUTWE OGURI KUGIRA NGU NITUKWAKIRA OMU KWEGA BIBULI, BWANYIMA MUGARUKEMU EBI BUBUZO:

• Ni enki eki abegi ba Bibuli barije kwegera omu kitabo kisya?

• Ahabw’enki oshemerire kwereka omwegi musya egi vidiyo?

• Ni ziha ntego ezi ori kubasa kuhiga omwegi kweteraho kandi akazihikaho?—Reba akashanduku akine omutwe oguri kugira ngu “ Eby’okutaho omutima n’entego z’omwegi ahari buri mutwe.”