Juba aha, Yehova tarije kugumizamu kwehanganira egi nsi. Amadini g’ekishuba nigija kucwecerezibwa, amahanga ageterine nigija kutahirira abahereza ba Ruhanga, kandi Yehova nayija kucwecereza ababi ahari Haramagedoni. Abakristo bategerize n’ekihika kureba ebyo bintu biri kuhikirira.

Ni amazima, tituri kumanya buri kantu kona akakwatirine n’okubonabona kwingi. Ecokureberaho: Tituri kumanya obwire obu okubonabona kwingi kurije kutandikiraho. Tituri kumanya enshonga ezi abategeki barije kugamba bari kutahirira amadini. Tituri kumanya obwire obu amahanga garimara gatahirire abahereza ba Ruhanga, n’oku ebintu biriba byekwasire. Nambwenu tituri kumanya oburyo obu Yehova arije kukoresa ari kucwecereza ababi ahari Haramagedoni.

Konka, ebyahandikirwe nibituha amakuru gona agu turi kwetenga kugira ngu tutegereze twine obumanzi n’obwesige. Ecokureberaho: Nitumanya ku twahika aha muheru gw’‘ebiro by’aha mperu’ (2Tim 3:1). Nitumanya ku okutahirira amadini kurije ‘kucubwaho’ kugira ngu edini ey’amazima na yo etacwecerezibwa (Mat 24:22). Nitumanya ku Yehova arije kukiza abahereza beye (2Pet 2:9). Kandi nitumanya ku owu Yehova yatorine ngu ayije kucwecereza ababi kandi arinde omutwe muhango gw’abantu ahari Haramagedoni, ari ohikirire kandi ow’amani.​—Kush 19:11, 15, 16.

Hatariho okubanganisa, ebintu ebirije kubaho omu biro by’omu misho nibyija kutuma abantu ‘bahahaza emitima ahabw’obwoba.’ Konka, twashoma enkuru z’ebikorwa bya Yehova by’omu bwire bwa kare by’okukiza kandi tukabitecerezaho, nikituma ‘twareba ah’iguru twimusya emitwe yitu,’ ahakuba okucungurwa kwitu kuri hihi.’​—Luk 21:26, 28.