1. Nk’oku biri kugambwa omu Muburizi 7:20, ni gaha mazima agu Omugabe Solomoni yagambireho?

 OMUGABE Solomoni akahandika ati: “Tihariho ohikirire omu nsi okora ge atashishe na kace.” (Mub 7:20) Ago ni amazima gijwire! Twena turi abasiisi. (1 Yoh 1:8) Obwe rero, nitwenda ngu Ruhanga n’Abakristo bagenzi bitu batusaasire.

2. Noyehurira ota munywani wawe ku ari kukusaasira?

² Hatariho okubanganisa, nobasa kuba ori kwijuka obu washobize munywani wawe. Okaba ori kwenda ngu obunywani bwanyu bugumeho, rero wamushaba embabazi oyihire aha mutima. Okehurira ota obu munywani wawe yakusaasire ayihire aha mutima? Mbehi okehurira ge? Yego. Kandi okashemererwa!

3. Ni enki eki twaza kushwijuma omuri eki kicweka?

³ Nitwenda kuba banywani ba Yehova, konka hine obu turi kugamba ninga shi tukakora ebintu ebiri kumugwisa kubi. Ahabw’enki turi kubasa kwesiga ku Yehova ari kwenda kutusaasira? Ni eha ntanisa eri ahagati y’oku Yehova ari kutusaasira n’oku itwe turi kusaasirana? Kandi shi ni baha abu Ruhanga ari kubasa kusaasira?

4. Ahabw’eki turi kumanya ku Yehova ari kuba ayetegwire kutusaasira?

⁴ Ekigambo ca Ruhanga nikituhamiza ku Yehova ayetegwire kutusaasira. Obu Yehova yayeyerekire Musa aha mushozi Sinayi, akagambira marayika ngu: “Yehova Yehova, Ruhanga w’okusaasira n’embabazi, otarahuka kugira ekiniga, oyijwire embabazi n’amazima, ogirira embabazi abantu enkumi n’enkumi, osaasira okutahikirira n’okushisha  n’ekibi.” (Kur 34:6, 7) Yehova ni Ruhanga w’embabazi nyingi kandi ori kusaasira omusiisi ori kuba oyehanire abyihire aha mutima.​—Neh 9:17; Zab 86:15.

5. Tukuratize ebiri omuri Zaburi ya 103:13, 14, ni enki eki Yehova ari kukora ahakuba ari kumanya ebintu byona ebiri aha bantu?

⁵ Ahabw’okuba Yehova ari Omuhangi witu, natumanya ge. N’iwe kitekatekeho! Namanya buri kintu ekiri ahari buri muntu wena ori omu nsi. (Zab 139:15-17) Obwe rero nabasa kureba okutahikirira kona oku abazire bitu baturagire. Nambwenu namanya ebintu byona ebyatubireho ebyatumire twaba nk’oku tuhangirwe. Mbwenu shi Yehova nakora ki ahakuba ari kumanya ebyo bintu byona aha bantu? Eco nikituma yatugirira embabazi.​—Zab 78:39; shoma omuri Zaburi ya 103:13, 14.

6. Ni bata oku Yehova yayerekire ku nayenda kutusaasira?

⁶ Yehova akereka ku nayenda kutusaasira. Namanya ku ebikorwa by’omuntu w’okubanza, ari we Adamu, byatumire twena twaba abasiisi kandi twaba ab’okufa. (Rom 5:12) Tihine oburyo obu ari bwo bwona obu twabire turi kubasa kukoresa ngu tweyihe omuri ogo muceno. (Zab 49:7-9) Konka, Ruhanga witu ori kutukunda akatugirira embabazi kandi yatuteraho entebekanisa y’okutucungura. Ni enki eki yakozire? Nk’oku biri kugambwa omuri Yohana 3:16, Yehova akatuha Omwana weye omwe wenka kugira ngu atufere. (Mat 20:28; Rom 5:19) Yesu akatufera kugira ngu oramwikireze aruge omu kicumuro n’orufu. (Heb 2:9) Yehova akashasha munonga ahabw’okureba Omwana weye owu ari kukunda ari kufa orufu rw’ekishwaro! Mazima, Yehova akaba atarayikirize ngu Omwana weye afe, kuri yabire atari kwenda kutusaasira.

7. Ni biha byokureberaho bimwe by’omuri Bibuli by’abantu abu Yehova yasaasire?

⁷ Omuri Bibuli harimu ebyokureberaho by’abantu bingi abu Yehova yasaasire. (Efe 4:32) Mbehi hariho owu ori kwijuka? Nobasa kutekateka aha Mugabe Manase. Ogo mushija mubi akakorera Yehova ebibi byingi. Akaramya ba ruhanga b’ebishuba kandi yahiga n’abandi kubaramya. Akita abana beye, yabatambira ba ruhanga b’ebishuba.  Kandi akahika n’aha kuta ekishushani ca ruhanga w’ebishuba omuri hekalu ya Yehova. Bibuli nebigambaho eti: “Yakora ebiri kwangwa Yehova, kugira ngu amugwise kubi.” (2 Bus 33:2-7) Konka Manase ku yayehanire abyihire aha mutima, Yehova akamusaasirira kimwe. Nambwenu akamwikiririza n’okushuba kuba omugabe. (2 Bus 33:12, 13) Nobasa n’okutekateka aha Mugabe Dawudi, owakorire Yehova ebibi by’amani, harimu obushambani n’obwisi. Konka Dawudi ku yayikirize enshobi yeye kandi akehana abyihire aha mutima, na we Yehova akamusaasira. (2 Sam 12:9, 10, 13, 14) Mazima, nitubasa kwesiga tutari kubanganisa ku Yehova ari kwenda kutusaasira. Kandi nk’oku twaza kukireba, oku ari kutusaasira nikitana n’oku turi kusaasira abandi.

8. Ni bata oku omwanya ogu Yehova ayine nk’omuramuzi guri kutuma yasaasira?

⁸ Yehova ni “omucwi w’emanja z’ensi yona.” (Kut 18:25) Omuramuzi murungi naba ashemerire kushoborocerwa ge ebiragiro. Yehova ni omuramuzi murungi ahabw’okuba ni we ori kututeraho ebiragiro. (Isa 33:22) Tihariho omuntu n’omwe ori kumanya ekirungi n’ekibi okukira Yehova. Ni enki ekindi eki omuramuzi murungi ari kuba ashemerire kukora? Naba ashemerire kushwijuma ebihamya byona mbere y’okucwa orubanja. Obwe rero Yehova ni omuramuzi murungi.

9. Ni biha bintu ebi Yehova ari kubanza yamanya mbere y’okusaasira omuntu?

⁹ Yehova we tari nk’abaramuzi b’abantu ahakuba burijo naba ari kumanya ebihamya byona, kandi ashorocerwa n’orubanja oru bari kumuretera. (Kut 18:20, 21; Zab 90:8) Yehova nareba kandi ahurira ebintu ebi abantu bona batari kubasa kureba ninga kuhurira. Namanya ge ku oku omuntu ari kutwaza biri kuba byarugire aha bazire beye, ahu yakurire, n’amashomero agu yayegire kandi amanya ge n’enyehurira zeye. Yehova nareba omu mutima. Namanya entego za buri muntu, n’ebyetengo byeye. Tihariho ekintu na kimwe ekiri kubasa kweshereka omu misho ga Yehova. (Heb 4:13) Obwe rero, Yehova nasaasira omuntu ahabw’okuba ari kumanya ebihamya byona.

10. Ahabw’enki turi kubasa kugamba ku Yehova ari kucwa emanja omu buringaniza? (Ebiragiro 32:4)

¹⁰ Yehova burijo nacwa emanja omu buringaniza. Tari kushorora. Yehova tari kusaasira agendire aha ku omuntu ari kurebeka, obugiga, okuranganwa oku ayine, ninga shi obushoborozi. (1 Sam 16:7; Yak 2:1-4) Tihariho ori kubasa kugema Yehova kukora ekintu ninga shi kumuha bituga. (2 Bus 19:7) Tari kukora ensharamu ayine ekiniga ninga shi ngu agendere aha nyehurira zeye. (Kur 34:7) Hatariho okubanganisa, ni omuramuzi murungi ahabw’okuba namanya byona ebiri kutukwataho.​—Shoma omu Biragiro 32:4.

11. Ni mu buha buryo oku Yehova ari kutusaasira biri kutana n’oku itwe turi kusaasirana?

¹¹ Abahandiki b’Ebyahandikirwe by’Oruheburayo bakerebera ku embabazi za Yehova ziri ez’omutano. Hine ahu bakoresize ekigambo c’Oruheburayo ekiri kushobororwa omu kitabo kimwe ngu: “Eco kigambo nikikoresibwa aha ku Ruhanga ari kusaasira abasiisi, konka tikiri kubasa kukoresibwa kiri kugamba aha ku itwe turi kusaasirana.” Yehova ni we wenka oyine obushoborozi bw’okusaasira omu bwijwire omusiisi oyehanire.  Ni enki ekiri kurugamu Yehova ku ari kutusaasira?

12-13. (a) Nitwehurira tuta Yehova ku ari kutusaasira? (b) Emigisha eyi turi kutunga ahabw’embabazazi za Yehova nemara obwire oburi kwingana ki?

¹² Ku turi kwikiriza ku Yehova yatusaasire, nitushemerererwa “ebiro by’okugarurwa busya,” harimu obusinge bw’omu mutima, n’omuntuwomunda murungi. Ezo mbabazi tiziri kugirwa n’omuntu, “kureka Yehova wenka.” (Byak 3:19) Yehova ku ari kutusaasira, nitushuba tugira obunywani burungi na we oshusha ngu titukamushobezagaho.

¹³ Yehova ku ari kutusaasira nagaruraho obunywani obu twabire twine na we nk’ahu tutaramukorire ekibi cona. (Isa 43:25; Yer 31:34) Yehova ku ari kutusaasira tari kutunyiza ninga shi ngu atuhane ahabw’ebibi ebi twakozire kare. Yehova nata hare ebibi byitu “nk’oku oburugwizoba eri hare y’oburengerwizoba.” * (Zab 103:12) Ku turi kutekateka aha buhangu bw’embabazi za Yehova, nituhurira twashemererwa kandi twagarurwamu amani. (Zab 130:4) Konka shi ni baha abu Yehova ari kusaasira?

14. Ni enki eki twamara kwega aha bikwatirine n’oku Yehova ari kusaasira?

¹⁴ Nk’oku twamara kubireba, Yehova tari kusaasira omuntu agendire aha buhangu bw’ekibi ceye. Nambwenu twayega ku Yehova ari kukoresa obumanyi bweye nk’omuhangi kandi omucwamanja, yasharamu kutusaasira. Konka shi ni biha bintu ebi Yehova ari kubanza yatekatekaho mbere y’okusaasira omuntu?

15. Tukuratize ebiri omuri Luka 12:47, 48, ni eha nshonga eyi Yehova ari kushwijuma?

¹⁵ Ekintu eki Yehova ari kurebaho, ni okureba yaba omusisi yabire ari kumanya ku eki yakozire cabire kiri kibi. Ebyo Yesu akabishoborora ge omuri Luka 12:47, 48. (Hashome.) Omuntu yakora ekintu eki ari kumanya ku Ruhanga atari kwikiriza, naba yakora ekibi c’amani. Ogo muntu nabasa kutasaasirwa. (Mak 3:29; Yoh 9:41) Konka, tushemerire kwikiriza ku hine obu turi kubasa  kukora ekintu eki turi kumanya ngu ni kibi. Mbwenu shi nihaba hariho amasiko gona g’okusaasirwa? Yego. Hariho ekindi eki Yehova ari kutekatekaho.

16. Okwehana nikimanyisa ki, kandi shi ahabw’enki tushemerire kwehana kugira ngu Yehova atusaasire?

¹⁶ Endijo nshonga eyi Yehova ari kushwijuma, ni okureba yaba ogo musiisi ayehanire abyihire aha mutima. Mbwenu shi okwehana nikimanyisa ki? Okwehana nikimanyisa “okuhindura emitekatecere, ebikorwa, ninga shi entego.” Okwehana nikitwariramu okushasha ahabw’ebibi ebi wakora, ninga shi ahabw’okuremwa kukora ebirungi ebi waba oshemerire kukora. Omusiisi oyehanire tari kushasha ahabw’ebibi ebi yakora byonka, ahobwe nambwenu nashasha ahabw’okuba yayikirize kufa omu by’omwika kikatuma yakora ebibi. N’obu omugabe Manase na Dawudi bakozire ebibi by’amani, Yehova akabasaasira ahabw’okwehana babyihire aha mutima. Obwe rero, Yehova nareba ebihamya ebiri kwereka ku twehanire tubyihire aha mutima kugira ngu atusaasire. (1 Bag 14:8) Konka okuhurira twashasha ahabw’ekibi eki twakora, tikiri kumara. Tushemerire kuba twetegwire kugira eki twakora. * Kandi eco ni co kintu eki Yehova ari kutekatekaho yaza kusaasira omuntu.

17. Okuhinduka nikimanyisa ki, kandi shi ni ahabw’enki kiri ec’omugasho twaba tutari kwenda kugaruka kukora ebibi ebi twakozire kare? (Isaya 55:7)

¹⁷ Okuhinduka ni ekindi kintu c’omugasho eki Yehova ari kutekatekaho. Omu bindi bigambo, omuntu naba ashemerire kureka kukora ebibi kandi amarira kugendera omu muhanda gwa Yehova. (Shoma omuri Isaya 55:7.) Ogo muntu naba ashemerire kuhindura emitekatecere yeye kugira ngu agire emitekatecere nk’eya Yehova. (Rom 12:2; Efe 4:23) Naba ashemerire kumaririra kureka emitekatecere mibi n’ebikorwa bibi ebi yabire ayine. (Kol 3:7-10) Twayikiriza ekitambo ca Kristo, nibwo Yehova ari kutusaasira kandi akatwihaho ekibi. Konka Yehova  nayija kutusaasira birabire ahari eco kitambo, yareba oku turi kutaho amani kugira ngu tuhindure emitekatecere yitu.​—1 Yoh 1:7.

18. Ni enki eki twamara kushwijuma aha bikwatirine n’okusaasira kwa Yehova?

¹⁸ Reka tushwijume omu bugufu enshonga nkuru ezi twamara kwegaho. Yehova ni wenka omu iguru n’omu nsi ori kusaasira abyihire aha mutima. Ahabw’enki turi kubasa kugamba tusyoya? Ec’okubanza: Burijo naba ayetegwire kusaasira. Eca kabiri: Namanya byona ebiri kutukwataho. Namanya ge oku tuhangirwe, kandi ni we muntu wenka ori kubasa kumanya yaba twehanire tubyihire aha mutima. Kandi eca kashatu: Yehova yatusaasira nituba nk’abatakakoragaho ekibi, eco kituma twagira omuntuwomunda murungi kandi atwikiriza.

19. N’obu tutahikirire kandi turije kugumizamu kucumura, ahabw’enki turi kubasa kutunga okushemererwa?

¹⁹ Ahakuba tutahikirire, nitwija kuguma kukora ebibi. Konka ebigambo ebiri omu kitabo ekiri kushoborora Bibuli, ekitabo ca 2, ahari peji ya 771, nibibasa kutuhumuriza. (Insight on the Scriptures) Nibigira ngu: “Obu Yehova ayine embabazi kandi ari kumanya obweremwa bw’abahereza beye, tibashemerire kuguma kwemereza omutima ahabw’ebibi ebi bari kukora ahabw’okutahikirira oku baragirwe. (Zab 103:8-14; 130:3) Ku bari kugumizamu kugendera omu mihanda ya Ruhanga, nibatunga okushemererwa. (Fil 4:4-6; 1Yoh 3:19-22)” Ebyo bigambo ka nibihumuriza!

20. Ni enki eki turije kushwijuma omu kicweka ekiri kukurataho?

²⁰ Nitwesiima munonga ahabw’okuba Yehova ari kuba ayetegwire kutusaasira ebibi ebi tukozire abyihire aha mutima. Konka shi, ni bata oku turi kubasa kutoreza okusaasira kwa Yehova? Ni bata oku okusaasira kwitu kuri kushushana n’okwa Yehova kandi shi ni bata oku kuri kutana? Ahabw’enki oku kumanya eco kiri ec’omugasho munonga? Ekicweka ekiri kukurataho kiryagarukamu ebyo bibuzo.