Nkazarirwa omu rurembo rwa Quebec omu kacweka akari kukoresa Orufurenki, omuri Kanada. Abazire bange, Louis na Zélia, bakankuriza omu ka eyine rukundo. Tata akaba nagira enshoni konka akaba nakunda kushoma. Nkaba ninkunda kuhandika kandi nkaba nyine ecetengo c’okwija kuba omunyamakuru.

Obu nabire nyine emyaka 12 y’obukuru, Rodolphe Soucy, owabire nakora hamwe na tata akatutayayira ari hamwe n’ondijo munywani weye. Bakaba bari Abahamya ba Yehova. Nkaba ntari kumanya byingi aha bikwatirine n’Abahamya ba Yehova kandi nkaba ntari kwenda kubimanya. Konka, kureba oku babire nibagarukamu ebibuzo bakoresize Bibuli kikanshemeza. Abazire bange na bo kikabashemeza, rero twayikiriza kwega Bibuli.

Omuri obwo bwire nkaba ndi kwegera omu ishomero ry’Abakatoliki. Hine obu nabire ninganira n’abegi bagenzi bange aha bi nabire ninyega omuri Bibuli. Bwanyima, abegesa bitu, ababire bari abapadiri bakabihurira. Omupadiri omwe, omu mwanya g’okukoresa Bibuli ngu ayereke ku ebi nabire ndi kugamba biri ebishuba, akanshwariza omu misho g’abana bona kandi yagamba ku ndi omugomi! N’obu eco cabire kiri kushasha, kikarugamu ebirungi ahakuba kikankwasa kumanya ku enyegesa z’amashomero g’edini, ziri kuhakanisa Bibuli. Nkareba ku nshemerire kuruga ahari eryo ishomero. Abazire bakampa orusya, rero naza omu rindi ishomero.

Nkagumizamu kwega Bibuli, konka nkatinda kugira entunguka ahakuba nkaba nintina kuburira aha nju n’enju. Edini y’Abakatoliki ekaba yayekwatire abantu bingi kandi eri kuhiganisa  omurimo g’okuburira. Maurice Duplessis, owabire ari omwebembezi wa Quebec, akaba ari munywani w’Abakatoliki. Ahabw’amani geye, akatuma abantu bingi bahiganisa Abahamya. Omuri obwo bwire, kukora omurimo g’okuburira kikaba nicetenga obumanzi bwingi.

Mwenetata ori kwetwa John Rae akankwasa kuhwa obwona, kandi akaba yayegire Ishomero rya Gilead rya mwenda. John, akaba ari mwenetata omanyirire, ari omucurezi kandi ari kwehisya abantu. Akaba atari kukunda kumpa obuhabuzi butunu, konka nkegera byingi aha cokureberaho ceye. John akaba atari kugamba ge Orufurenki, obwe rero nkaba ningenda na we omu murimo g’okuburira kugira ngu mukwase kurumanya ge. Obwire obu namazire na John bukatuma nasharamu kuba Omuhamya wa Yehova. Ku hahwire emyaka eri kukira ikumi ndi kumanya Abahamya ba Yehova, nkabatizibwa aha biro 26 Okwakatano, 1951.

Ekibina kitu c’omu rurembo rwa Quebec kikaba kirimu ababurizi bake, konka abingi bakaba bari abapayoniya. Oku babire nibakunda omurimo kikampiga nanye kuba omupayoniya. Obwo bwire tukaba nituburira aha nju n’enju twine Bibuli zonka. Tukaba nitukoresa ebyahandikirwe tutine ebitabo. Obwe rero, kikatuma namanyira kukoresa ebyahandikirwe omu kwegesa amazima. Konka, abantu bingi bakaba batari kwenda kushoma Bibuli n’ebitabo ebi edini y’Abakatoliki etari kwikiririza.

Omu mwaka gwa 1952, nkatasya munyanyazi Simone Patry owu twabire tutwire omu kacweka kamwe. Tukafurukira Montreal, bwanyima y’omwaka gumwe, twazara muhara witu, Lise. Obu nabire naza kutaha omu bushwere nkemerezaho obupayoniya obwire buce, haza nyowe na Simone twayorobya embera kugira ngu tubase kukora byingi omu kibina.

Bwanyima y’emyaka ikumi ntahire omu bushwere nkashuba natekateka aha kukora obupayoniya. Omu mwaka gwa 1962, obu natungire omugisha g’okuza kwega Ishomero ry’Obukama ry’Abazehe ahari Beteli ya Kanada, nkaba nimba omu kishenge na mwenetata Camille Ouellette. Oku Camille yabire nakoresa amani omu murimo g’okuburira n’obu yabire ayine eka, kikampiga. Omuri obwo bwire omuri Quebec kukora obupayoniya ori kurera n’abana kikaba kitari kwikirizibwa; konka Camille akaba ayine eyo ntego. Obwire obu twamazire turi hamwe, akampiga kutekateka aha mbera zange.  Bwanyima y’amezi make, nkareba ku ndi kubasa kushuba kukora obupayoniya bw’obwire bwona. Abantu bamwe tibaranshagikire, konka nkagumizamu kwesiga ku Yehova yabire arije kumpa emigisha ahabw’okukora n’amani omurimo g’okuburira.

Omu mwaka gwa 1964, nyowe na Simone tuketwa ngu tuze kuhereza turi abapayoniya b’omutano omu tawuni ya Quebec eyi twazarirwemu, kandi tukahamara emyaka myingi. Omuri obwo bwire, omurimo g’okuburira gukaba gwatandikire kubonera, konka nabwo tukaba tucahiganisibwa.

Omu mwebazo gumwe buri Orwamukaga, nkakwatwa nasibirwa omu katawuni kake ka Sainte-Marie, hihi n’etawuni ya Quebec. Omupolisi akankwata yanta omu kihome ahabw’okuba ngu nkaba ndi kuburira aha nju n’enju ntine orusya. Bwanyima, nkatwarwa omu misho g’omuramuzi ori kwetwa Baillargeon, yampata ebibuzo. Akambuza omuntu owabire aranyemererere omu ishengero. Nkamugarukamu ku ni Omuhamya wa Yehova ori kwetwa Glen How, * rero yatina yangambira ngu: “Ingaha! ogwe tituri kumwenda!” Glen How akaba namanywa nk’omuyambi owakwasize munonga Abahamya ba Yehova basingura emanja nyingi. Ku hahwire obwire buke, abaramuzi bakangambira ku banyihireho emishango.

Nambwenu ababire nibarwanisa omurimo gwitu omuri Quebec bakatuma kutunga aho kukorera enterane caguma. Tukija kubona omwanya omu gareji ekuzire kandi eri kufukira. Kugira ngu tutunge obutagasi, benetata bakaba nibakoresa akoma akari kureta obutagasi akari kunywa amajuta. Enterane zitakandikire tukaba nitugambirana enkuru eziri kugaruramu amani.

Kureba oku omurimo g’okuburira gwahikire ahari byingi omu myaka ehwire nikishemeza. Omu myaka ya za 1960, tukaba twine ebibina bike omu tawuni yona ya Quebec, harimu n’eby’omu kacweka ka Côte-Nord na Gaspé Peninsula byeterine. Omuri obu bwire, nitukora ebiterane bibiri omuri ebyo bicweka, kandi benetata nibateranira omu Nju z’Obukama ndungi munonga.

Omu mwaka gwa 1970 nyowe na Simone, tuketwa ngu tuze kutayayira ebibina. Bwanyima omu mwaka gwa 1973, tukashabwa kuza kutayayira ihanga. Omuri eyo myaka, nkegera byingi ahari mwenetata Laurier Saumur * na David Splane, * bona ababire bari kutayayira ihanga. Bwanyima y’ekiterane, nyowe na David tukaba nituhana obuhabuzi kugira ngu tuboneze oburyo obu turi kwegesamu. Ninyijuka izoba rimwe obu David yangambire ngu: “Léonce, mazima nakunda toku yawe y’aha muheru. Ebire eri ndungi munonga, konka nyowe naba ndi kubasa kwihamu toku ishatu!” Nkaba ninkira kugamba  byingi omuri toku zange. Nkaba nshemerire kwega kukoresa ebigambo bike.

Abareberezi b’ihanga bakaba nibatoranwa kugira ngu bagaruremu amani abareberezi abari kutayayira ebibina. Konka, ababurizi b’omuri Quebec bakaba nibaamanya ge. Obwe rero, bakaba nibenda ngu tuze kuburira hamwe omu bwire obu nyizire kutayayira ihanga ryabo. N’obu kuburira na bo cabire kiri kunshemeza, nkaba ntari kumara obwire buringwa n’omureberezi ori kutayayira ebibina. Izoba rimwe omureberezi ori kutayayira ebibina akampa obuhabuzi omu bucurezi, yanyijusya ngu: “Ni kirungi kumara obwire na benetata, konka oyijuke ku eyi sande ari eyange. Nanye ninyenda ngu ongaruremu amani!” Obwo buhabuzi bukankwasa kugira ebi nahindura.

Ekiri kunshasha, ni oku omu mwaka gwa 1976 natungire ekizibu c’amani. Omukazi wange Simone, akarwara endwara egumire rero bwanyima yafa. Akaba ari omukazi murungi ahakuba akaba nakunda Yehova kandi ayine omutima g’okwehayo ayekundire. Ecankwasize kwehangana ni okuhugira omu murimo g’okuburira, kandi buzima ninsima Yehova ahabw’okuba yambire hihi omuri ebyo bizibu. Ku hahwire obwire, nkatasa munyanyazi w’omupayoniya ori kwetwa Carolyn Elliott, owabire ari kugamba Orungereza, owizire kuyamba omuri Quebec. Carolyn nayehisya abantu kandi nafa munonga aha bantu abine enshoni n’abari kwehurira nk’abari bonka. Akankwasa munonga omu murimo g’okutayayira ihanga.

Omu Kwokubanza 1978, nkashabwa kuza kwegesa ishomero ry’okubanza ry’abapayoniya, omuri Quebec. Nkagira obwoba, ahabw’okuba ebiri kwegerwamu bikaba biri bisya ahari inye, nk’oku byabire biri bisya aha begi. Konka ekirungi, ishomero ry’okubanza rikaba ririmu abapayoniya ababire bamanyirire. N’obu nabire ndi omwegesa, nkegera byingi aha begi!

Bwanyima omu mwaka gwa 1978, tukagira ekiterane c’ensi yona omu kishaha c’emizano c’omu kacweka ka Montreal, ecabire kine  omutwe oguri kugira ngu: “Okwikiriza kuri kusingura.” Ni co kiterane kihango ecabireho omuri Quebec, ahabw’okuba kikaba kirimu abantu abari kukira 80,000. Nkashabwa kuza kukora omu kishenge c’eby’amakuru. Nkagamba n’abanyamakuru bingi kandi kureba oku bagambire amakuru marungi ahari eco kiterane kikanshemeza. Za tivi na rediyo zikarabyaho amakuru gitu omu mashaha agari kukira 20, kandi ebinyamakuru ebihandikire na byo bikashohora enkuru zitu nyingi munonga. Mazima kikatanga obuhamya bugumire!

Omu mwaka gwa 1996 hakabaho empinduka y’amani. Kwiha nabatizibwa nkaba ninkorera omu kacweka k’omuri Quebec akari kugamba Orufurenki; konka obwo bwire nkashabwa kuza kukorera omu kacweka akari kugamba Orungereza, omu ishaza rya Toronto. Nkaba nimpurira ntari kukibasa, na munonga kuhereza za toku omu Rungereza. Nkaba nshemerire kugumizamu kushaba munonga kandi nkizaho kwesiga Yehova.

N’obu omu kutandika cangumire, emyaka ibiri eyi namazire ndi kuhereza omuri Toronto ekanshemeza munonga. Carolyn akagumizamu kunyamba omu kugamba Orungereza, kandi na benetata bakankwasa, bangaruramu amani. Tukarahuka kutunga abanywani bingi abasya.

Nkaba nyine emirimo myingi y’okutebekanisa ekiterane c’omuri wikendi, konka nabwo nkaba nimara eshaha yona ndi kuburira aha nju n’enju buri mwebazo Orwakatano. Abamwe bakaba nibebuza enshonga nabire ndi kuburira mbere y’ekiterane omuri wikendi. Konka nyowe nkaba nindeba kuganira n’abantu kiri kungaruramu amani. N’erizoba naba ndi kuburira nimpurira nagarurwamu amani.

Omu mwaka gwa 1998, nyowe na Carolyn tukashuba twaza kuhereza turi abapayoniya b’omutano omuri Montreal. Nkamara emyaka myingi ndi kutebekanisa okuburira omu misho ga bona n’okukorengana n’abanyamakuru kugira ngu batagamba ebintu ebitahikire aha Bahamya ba Yehova. Hati nyowe na Carolyn nituburira abafuruki abari kwija omuri Kanada bari kugamba ezindi ndimi kandi bari kwenda kwega Bibuli.

Ku ndi kugarura amisho enyima nkatekateka aha myaka 68 eyi namara mbatizibwe, nindeba Yehova yampire omugisha. Okukora omurimo g’okuburira kandi nkakwasa abantu bingi kwega amazima, hakarugamu ebirungi byingi. Muhara wange Lise n’omushija weye ku bamazire kuzara, bakatandika kuba abapayoniya b’obwire bwona. Ku ndi kureba oku yagumizemu kukora omurimo, nimpurira nashemererwa. Ninsima benetata abampire ecokureberaho kirungi n’obuhabuzi burungi, kandi bakankwasa kukura omu by’omwika n’okutunga emirimo omu kibina. Nkerebera ku kugira ngu omuntu abe omwesigwa aha murimo naba ashemerire kwesiga amani ga Yehova, ni okumanyisa omwika oguri kwera. (Zab 51:11) Burijo ninsima Yehova ahabw’okumpa omugisha g’okuhimbisa izina ryeye!—Zab 54:6.