EKICWEKA C’OKWEGA 7
Nitukundira kimwe Tata w’omu iguru, Yehova
‘Itwe nitukunda, ahakuba we akabanza kutukunda.’—1 YOHAANA 4:19.
ECESHONGORO CA 3 Amaani gaitu, amasiko gaitu, obwesigye bwaitu
EMPINYE *
1-2. Ni bata oku Yehova yatwigurire omuhanda g’okuza omu ka yeye, kandi ahabw’enki?
YEHOVA akatweta omu ka yeye y’abari kumuramya. Ogo ku ni omugisha gw’amani! Eka yitu erimu abayehireyo Ruhanga bekundire kandi bari kwikiriza ekitambo c’Omwana weye. Turi omu ka erimu okushemererwa. Nitushemerererwa amagara marungi hati, kandi nitwija kushemerererwa kutunga amagara agatahwaho, omu iguru ninga omuri paradiso omu nsi.
2 Ahabw’okuba Yehova ari kutukunda munonga, akatwigurira omuhanda g’okuza omu ka yeye. (Yoh 3:16) ‘Tukagurwa n’obuguzi bwingi.’ (1 Kor 6:20) Ahabw’ekitambo, Yehova akatwikiriza kuba banywani beye. Twine omugisha g’okugamba na Tata ori kukirira kimwe abandi bona omu iguru n’omu nsi. Nk’oku twarebire omu kicweka ec’enyima, Yehova ni Tata ori kutukunda.
3. Ni biha bibuzo ebi turi kubasa kwebuza? (Nambwenu reba akashanduku akari kugira ngu: “ Mbehi Yehova nanyijuka?”)
3 Tushemerire kwebuza nk’oku omuhandiki wa Bibuli yayeburize nagira ati: ‘N’enki eki ndizimurira Yehova ahabw’ebirungi bye byona ebi yankorire?’ (Zab 116:12) Buzima tihariho eki turi kubasa kushashura Tata w’omu iguru. Konka nabwo, tushemerire kwereka ku nitumukunda. Entumwa Yohaana akahandika ati: ‘Itwe nitukunda, ahakuba we akabanza kutukunda.’ (1 Yoh 4:19) Ni bata oku turi kubasa kwereka Tata w’omu iguru ku nitumukunda?
GUMA HIHI YA YEHOVA
Nitwereka ku nitukundira kimwe Tata witu w’omu iguru, Yehova, turi kugumizamu kumuhika hihi omu kushaba, turi kumworobera, kandi turi kukwasa abandi ngu na bo babe banywani beye (Reba paragurafu ya 4-14)
4. Tukuratize ebiri kugambwa omuri Yakobo 4:8, ahabw’enki tushemerire kugezaho kuhika hihi Yehova?
4 Yehova nayenda ngu tumuhike hihi kandi tuganire na we. (Shoma omuri Yakobo 4:8.) Natugambira ‘kugumizamu kushaba tuhamire,’ kandi naba ayetegwire kutuhurira obwire bwona. (Rom 12:12) Tahugire ninga shi ngu abe aruhire aremwe kutuhurira. N’itwe nitumuhurira, turi kushoma ekigambo ceye, Bibuli, n’ebitabo ebiri kutukwasa kugishoborocerwa. Nambwenu nitumuhurira turi kuhurikiza ge omu nterane. Nk’oku omwana n’ishe bari kuganira burijo kikatuma baba abanywani, ni ko n’itwe turi kuganira na Yehova burijo kikatuma twamuhika hihi.
Reba paragurafu ya 5
5. Ni enki eki turi kubasa kukora ngu Yehova ayikirize eshara zitu?
5 Tekateka aha ku ori kushaba Ruhanga. Yehova nayenda ngu tumugambire ebituri aha mutima. (Zab 62:8) Tushemerire kwebuza ngu: ‘Mbehi eshara zange ni ezi nakwasire omu mutwe, nguma ninzigarukamu, ninga ni eziri kuruga aha mutima?’ Hatariho okubanganisa nokundira kimwe Yehova kandi noyenda ngu mukizeho kugira obunywani bugumire. Kuganira na we burijo nikija kukukwasa. Mugambire oku ari kwehurira otari kumushereka. Mugambire ebiri kukushemeza n’ebiri kukushasha byona. Yesige ku wamushaba obuyambi obu ori kwetenga ari kubukuha.
6. Ni enki eki tushemerire kukora ngu tuhike hihi ya Tata w’omu iguru ori kutukunda?
6 Kugira ngu tuhike hihi ya Tata witu ori kutukunda tushemerire kuguma twine omutwarize g’okusima. Nitwikirizana n’ebigambo by’omuhandiki wa Zaaburi, ebiri kugira ngu: ‘Ayi Yehova Ruhanga wange, ebyokutangaza ebi wakozire, n’ebitekateko ebi otutekatekaho ka ni byingi! Tihariho orikwingana n’iwe. Ku nakwenda kubigamba n’okubitondora, ni byingi, tibiri kubasa kubarwa!’ (Zab 40:5) Tituri kuhurira turi kwenda kusima Yehova kusha, ahobwe nitwereka ku nitumusima omu bigambo n’omu bikorwa. Eco nikituma twatana n’abandi bantu b’omuri obu bwire. Turi omu nsi y’abantu abatari kwereka ku nibasima Ruhanga ahabw’ebintu ebi ari kubakorera. Ekimanyiso kimwe ekiri kwereka ku turi omu ‘biro by’aha mperu’ ni oku abantu bari entasima. (2 Tim 3:1, 2) Nikikabure itwe kwereka eyo mitwarize!
7. Ni enki eki Yehova ari kwenda ngu tukore, kandi ahabw’enki?
7 Abazire tibari kwenda ngu abana babo barwane, ahobwe nibenda ngu bakundane. Omu buryo nk’obwe, Yehova nayenda ngu abahereza beye bakundane. Ku turi kukundana, nicereka ku turi Abakristo ab’amazima. (Yoh 13:35) Nitwikirizana n’omuhandiki wa Zaaburi owahandikire ati: ‘Ku kiri kirungi kandi ekiri kushemeza, abishemwe kutura hamwe nibakwatanisa!’ (Zab 133:1) Ku turi kukunda benetata na banyanyazi nituba nitwereka Yehova ku nitumukunda. (1 Yoh 4:20) Nikitushemeza munonga kuba omu ka erimu benetata na banyanyazi ‘abari kukorerane ge, bakagirirana embabazi’!—Efe 4:32.
YOROBERA YEHOVA
Reba paragurafu ya 8
8. Tukuratize ebiri kugambwa omuri 1 Yohaana 5:3, ni eha nshonga nkuru eri kutuma twayorobera Yehova?
8 Yehova nayenda ngu abana borobere abazire kandi nayenda ngu na we tumworobere. (Efe 6:1) Ni we owu tushemerire korobera ahakuba ni we owatuhangire; natuha ebi turi kwetenga ngu tubeho kandi ni omunyabwenge ori kukira abazire bona b’abantu. Enshonga eri kutuma twayorobera Yehova ni oku turi kumukunda. (Shoma omuri 1 Yohaana 5:3.) N’obu twine enshonga eziri kutuma twayorobera Yehova, tari kutugema kukikora. Yehova akatuha ekiconco c’okweshariramu. Obwe rero nashemererwa twasharamu kumworobera twekundire.
9-10. Ahabw’enki kiri ec’omugasho kumanya ebiragiro bya Yehova kandi tukabyorobera?
9 Abazire nibenda ngu abana babo babeho omu businge. Ni yo nshonga bari kutaho ebiragiro ebiri kugasira abana babo. Abana ku bari kurobera obwo buhabuzi, nikiba nicoreka ku nibaha ishe ekinisa kandi ku nibamwesiga. Obwe rero ni ec’omugasho munonga, kumanya ebiragiro bya Yehova kandi tukabigenderaho. Twakikora basyoya, nituba nitwereka ku nituha Yehova ekitinisa kandi ku nitumukunda kandi ni itwe abu kiri kugasira. (Isa 48:17, 18) Konka abari kwehuzya ebiragiro bya Yehova, nibatunga akabi kingi.—Gal 6:7, 8.
10 Ku turi kubaho turi korobera Yehova, nikiturinda aha mubiri, omu nyehurira, n’omu by’omwika. Yehova namanya ebirungi ebi turi kwetenga. Aurora, otwire omuri Amerika nagira ati: ‘Nimanya ku korobera Yehova burijo kiri kurugamu ebirungi.’ Ago ni amazima gijwire. Mbwenu shi ni bata oku iwe wagasirwe n’okurobera obuhabuzi bwa Yehova?
11. Eshara netukwasa eta?
11 Eshara netukwasa korobera Yehova n’omu bwire obu kiri kuba kitugumire. Hine obu korobera Yehova kiri kubasa kutugumira, konka tushemerire kugumizamu kurwanisa ekibi. Omuhandiki wa Zaaburi akeshengereza Ruhanga nagira ati: ‘Ompamyemu [omutima] oguri kukorobera.’ (Zab 51:12) Omupayoniya ori kwetwa Denise, akagamba ngu: “Ku kiri kungumira korobera ebiragiro bya Yehova, nimushaba amani g’okunkwasa kukora ebirungi.” Tushemerire kwesiga ku Yehova ari kugarukamu eshara nk’ezo.—Luk 11:9-13.
KWASA ABANDI BAKUNDE TATA W’OMU IGURU
12. Tukuratize ebiri omu Baefeso 5:1, ni enki eki tushemerire kukora?
12 Shoma omu Baefeso 5:1. Ahabw’okuba turi abana ba Yehova abu ari kukunda, nitwenda kumutoreza. Nitutoreza emitwarize yeye, erimu rukundo, embabazi n’okusasira abandi. Abantu abatari kumanya Yehova bareba emitwarize yitu mirungi, na bo nikituma bayenda kututoreza. (1 Pet 2:12) Abazire b’Abakristo nibagezaho kutwariza abana babo nk’oku Yehova ari kututwariza. Ku bari kukikora basyoya, abana babo nibahurira bayenda kuba banywani ba Tata witu w’omu iguru.
Reba paragurafu ya 13
13. Ni enki eki tushemerire kutaho omutima?
13 Abana nibashemerererwa abazire babo kandi nibakunda kubaratira abandi. Omu buryo nk’obwo nitushemerererwa Tata witu w’omu iguru,Yehova, kandi nitugambira abandi ebiri kumukwataho. Nitubasa kwehurira nk’Omugabe Daudi owagambire ngu: ‘Amagara gange garyayeratira omuri [Yehova].’ (Zab 34:2) Konka shi tubire twine obwoba bw’okugamba ebiri kukwata ahari Yehova? Ni enki ekiri kubasa kutuma twagira obumanzi? Twatekateka ku kirije kutuma Yehova yashemererwa kandi kikatuma n’abandi bamanya ebiri kumukwataho, nikituma twagira obumanzi. Yehova natuha obumanzi obu turi kwetenga. Akaha obumanzi benetata b’omu bwire bwa kare, kandi n’itwe nayija kutukwasa.—1 Tes 2:2.
14. Ni ziha nshonga zimwe eziri kutuma twakora omurimo g’okuhindura abantu abegi?
14 Yehova tari kushorora omu bantu, kandi yareba turi kukunda abantu bona nikimushemeza. (Byak 10:34, 35) Oburyo burungi obu turi kwereka abandi ku nitubakunda ni okubaburira obutumwa burungi. (Mat 28:19, 20) Ni biha birungi ebiri kuruga omu murimo g’okuburira? Abari kutuhurira nibagira amagara marungi hati kandi bagira n’amasiko g’amagara agatahwaho ag’omu biro by’omu misho.—1 Tim 4:16.
KUNDA TATA W’OMU IGURU RERO OSHEMERERWE
15-16. Ni ziha nshonga eziri kutuma twashemererwa?
15 Yehova ni omuzire oyine rukundo kandi nayenda ngu ab’omu ka yeye na bo bashemererwe. (Isa 65:14) Hariho enshonga eziri kutuma twashemererwa hati, n’obu twakuba turi omu mbera zigumire. Nitwesigira kimwe ku Tata witu w’omu iguru ari kutukunda munonga. Nitumanya amazima agari omu Kigambo ca Ruhanga, Bibuli. (Yer 15:16) Kandi turi omu ka y’omutano y’abantu abari kukunda Yehova, bakorobera ebiragiro byeye kandi abari kukundana by’amazima.—Zab 106:4, 5.
16 Nitutura tushemerirwe ahakuba twine amasiko g’amagara marungi ag’omu biro by’omu misho. Yehova nayenda kwihaho ebibi byona birabire aha Bukama bweye kandi ensi neyija kugaruka ebe Paradiso. Nabwenu twine amasiko agari kushemeza g’okuzoka kw’abafire, tukashuba tukababugana. (Yoh 5:28, 29) Mbehi tikiri kukushemeza? Kandi ekiri kukira ebindi byona, nitwesigira kimwe ku juba aha eby’omu iguru n’eby’omu nsi, birije kuha Tata witu ekitinisa, bikamuhimbisa kandi bikamuramya omu bwijwire.
ECESHONGORO CA 12 Yehova Ruhanga Orikukirayo
^ par. 5 Nitumanya ku Tata w’omu iguru Yehova, ari kutukunda munonga, kandi ku yaturesire omu ka yeye y’abari kumuramya. Eco nikituma twamukunda. Ni bata oku turi kwereka ku nitukunda Tata ori kutufaho? Eki kicweka caza kutwereka ebintu ebi turi kubasa kukora.
