EKICWEKA C’OKWEGA 8
Rwanisa ihari, oreteho obusinge
‘Ni ahabw’eco tukuratire ebiri kureta obusinge n’okombekana.’—ROM 14:19.
ECESHONGORO CA 113 Itwe Twine Obusingye
EMPINYE *
1. Ni enki ecabireho omu ka ya Yosefu ahabw’ihari?
YAKOBO akaba nakunda batabani beye bona, konka akaba nakunda munonga Yosefu. Konka shi benishe ba Yosefu bakehurira bata? Bakamugirira ihari, kandi eryo ihari rikatuma baba babi munonga. Tihine ekintu na kimwe eki Yosefu yabire akozire ecatumire benishe bamwanga. Eco kikatuma bamuguza kandi babeha ishe ngu enyamishwa emurire. Ihari rikatuma bashisha obusinge bw’eka yabo, kandi kikatuma ishe yashasha munonga.—Kut 37:3, 4, 27-34.
2. Tukuratize ebiri kugambwa omu Bagatia 5:19-21, ahabw’enki ihari riri ribi munonga?
2 Ebyahandikirwe nibitwereka ku ihari * riri omu ‘mirimo y’obuzarwa’ eri kubasa kutuma omuntu yaferwa amagara agatahahwo. (Shoma omu Bagalatia 5:19-21.) Ihari niribasa kutuma omuntu yaba ensharizi, aba otari kukwatanisa n’abandi, kandi agira ekiniga kingi.
3. Ni enki eki twaza kushwijuma omuri eki kicweka?
3 Ecokureberaho ca benishe ba Yosefu, nicoreka ku ihari riri kubasa kushisha obunywani kandi rikatuma obusinge bwabura omu ka. N’obu tutari kubasa kukora nk’ebi benishe ba Yosefu bakozire, twena tituhikire kandi twine omutima oguri kutuhabya. (Yer 17:9) Ni yo nshonga obumwe turi kubasa kugirira abandi ihari. Reka turebe ebyokureberaho by’omuri Bibuli ebiri kubasa kutukwasa kumanya enshonga ihari riri kubasa kusinga emizi omu mitima yitu. Nituza n’okureba eki turi kubasa kukora ngu turwanise ihari, kandi tureteho obusinge.
EBIRI KURETA IHARI
4. Ahabw’enki Abafilistia bagirire Isaaka ihari?
4 Obugiga. Isaaka akaba ari omugiga, rero Abafilistia bamugirira ihari. (Kut 26:12-14) Nambwenu bakataba amaziba geye agu yabire afukwire kugira ngu abone amizi g’obusyo bweye. (Kut 26:15, 16,27) Nk’eki Abafilistita bakozire, abantu abamwe omuri obu bwire nibagirira abandi ihari ahabw’obugiga bwabo. Tibari kwetenga eby’abandi kusha, ahobwe nibaba bari kwenda n’okubibatwara.
5. Ahabw’enki abakuru b’amadini bagirire Yesu ihari?
5 Okusimwa. Abebembezi b’edini y’Abayudaya bakagirira Yesu ihari ahabw’okuba rubanda bakaba nibamukunda. (Mat 7:28, 29) Yesu akaba ayemererire Ruhanga, kandi akaba nayegesa amazima. Nambwenu bakajanjaza ebishuba ahari Yesu ngu bashishe izina ryeye rirungi. (Mak 15:10; Yoh 11:47, 48; 12:12, 13, 19) Ni enki eki turi kwebyegeraho? Tushemerire kurwanisa kugirira ihari abine emitwarize mirungi. Ahobwe tutoreze emitwarize yabo.—1 Kor 11:1; 3 Yoh 11.
6. Ni bata oku Diotorefe yayerekire ihari?
6 Emirimo omu kibina. Omu kinyigana c’okubanza, Diotorefe akagirira ihari ababire bebembire ekibina. Akaba ari kwenda kutunga omwanya g’okubanza omu kibina, ni yo nshonga yagambire ebintu bibi aha ntumwa n’aha bandi ababire bebembire ekibina kugira ngu ab’omu kibina bareke kuborobera. (3 Yoh 9, 10) N’obu tutari kubasa kuba nka Diotorefe, n’itwe nitubasa kugirira ihari Abakristo bagenzi bitu abatunga emirimo eyi twaba nitwenda, na munonga twaba nituhurira turi kubasa kugikora kubakiza.
Omutima gwitu ni nk’itaka, kandi emitwarize yitu mirungi ni nk’ebimuri bibonire. Konka ihari ni nk’ekirare. Niribasa kutuma tutagira emitwarize mirungi harimu rukundo, esaasi n’embabazi (Reba paragurafu ya 7)
7. Ni enki ekiri kubasa kuruga omu kugira ihari?
7 Ihari ni nk’ekirare. Twayikiriza ngu kisinge emizi omu mitima yitu, kukihamu nikitugumira. Obusharizi, kweta ah’iguru, n’okwekunda ni byo biri kutuma omuntu yagira ihari. Ihari nirituma tutagira emitwarize mirungi, erimu rukundo, esaasi n’embabazi. Twahurira twatandika kugira ihari, nituba tushemerire kurirwanisa. Ni bata oku tushemerire kurwanisa ihari?
BA OMUCUREZI KANDI OMARWE N’EBI OYINE
Ni bata oku turi kubasa kurwanisa ihari eriri nk’ekirare? Ahabw’obuyambi bw’omwika gwa Ruhanga oguri kwera, nitubasa kurwanisa ihari, tugira omutwarize g’obucurezi n’okumarwa (Reba paragurafu ya 8-9)
8. Ni eha micwe eri kubasa kutukwasa kurwanisa ihari?
8 Nitubasa kurwanisa ihari turi kwega kuba abacurezi kandi tukaba abantu abari kumarwa. Omutima gwitu ku gurayijure eyo micwe mirungi, ihari tirirabone ah’okufumurira. Obucurezi nibwija kutukwasa kutetekatekaho ekirenga. Omucurezi tari kutekateka ngu ashemerire kutunga ebiri kukira eby’abandi. (Gal 6:3, 4) Omuntu ori kumarwa ni ori kushemerererwa ebi ayine kandi ategeranise n’abandi. (1 Tim 6:7, 8) Omuntu w’omucurezi kandi ori kumarwa yareba abandi batunga ebirungi nashemererwa na bo.
9. Tukuratize ebiri kugambwa omu Bagalatia 5:16 n’omu Bafilipi 2:3, ni enki eki omwika gwa Ruhanga guratukwase kukora?
9 Nitwetenga omwika oguri kwera gwa Ruhanga kugira ngu gutukwase kurwanisa omuze g’okugira ihari, rero twege kuba abacurezi n’abari kumarwa. (Shoma omu Bagalatia 5:16; Abafilipi 2:3, 4.) Omwika oguri kwera gwa Yehova nigubasa kutukwasa kushwijuma emitekatekere yitu n’entego zitu. Ruhanga nabasa kutukwasa tweyihamu ebitekateko n’enyehurira mbi, tugira ebitekateko n’enyehurira ebiri kombeka. (Zab 26:2; 51:10) Yetegereze ecokureberaho ca Musa na Paulo abarwanisize ihari kandi bakarisingura.
Omuisraeli ocari muto yayiruka yashanga Musa na Yoshua, yabagambira ku hine abashija babiri bari omuri kampu abari kwetwara nk’abahanuzi. Yoshua yagambira Musa ngu abazibire, konka Musa yayanga. Ahobwe, yagambira Yoshua ku yashemererwa kuba Yehova yashuka omwika gweye oguri kwera ahari abo bashija babiri (Reba paragurafu ya 10)
10. Ni ziha mbera ezagerize Musa? (Reba ekishushani c’aha kishembeso.)
10 Musa akaba ayine obushoborozi aha bantu ba Ruhanga, konka taragirire ihari abandi abu Yehova yahire obushoborozi. Ecokureberaho: Izoba rimwe, Yehova akakwata aha mwika oguri kwera gwa Musa yaguha omutwe gw’abakuru ababire bashitami hihi y’ihema ry’okubuganiramu. Ku hahwireho akire kace, Musa akahurira ngu hariho abakuru babiri abatari omu ihema ry’okubuganiramu abatunga omwika oguri kwera, kandi bari kwetwara nk’abahanuzi. Ni enki eki yakozire Yoshua ku yamugambire ngu azibire abo bashija babiri? Musa taragirire ihari abo bashija abu Yehova yabire ahire omwika oguri kwera. Ahobwe, omu bucurezi, akashemererwa na bo ahabw’omurimo musya ogu babire batunga. (Kub 11:24-29) Ni enki eki twayegera ahari Musa?
Ni bata oku abazehe omu kibina bari kubasa kutoreza obucurezi bwa Musa? (Reba paragurafu ya 11-12) *
11. Ni bata oku abazehe bari kubasa kutoreza Musa?
11 Yaba ori omuzehe omu kibina, mbehi hine obu bakushabire kumanyiza ondijo kugira abe ni we owakora omurimo ogu waba okunzire munonga? Ecokureberaho: Nobasa kuba ori kwebembera Omunara g’Omurinzi buri sande. Konka waba ori omucurezi nka Musa, bakugambira ngu omanyize ondijo mwenetata ngu abe ni we owija kugwebembera tikiri kukushasha. Ahobwe, nomumanyiza oshemerirwe.
12. Ni bata oku benetata na banyanyazi b’omuri obu bwire bari kwereka ku bari abacurezi kandi ku bari kumarwa?
12 Yetegereze ezindi mbera ezi benetata abakuzire bari kubugana. Abingi bamazire emyaka myingi bari abazehe bakuru b’akakiko k’abazehe. Konka ku bari kuhisya emyaka 80, nibashabwa kwemereza ogo murimo. Abareberezi abari kutayayira ebibina, ku bari kuhisya emyaka 70 nibecureza bikiriza kureka ogo murimo, bakora endijo mirimo eyi bahebwa. Omu myaka ya juba, abakozi bingi b’ahari Beteli b’omu nsi yona bakashabwa kuza kukorera omurimo omuri teritori. Abo benetata na banyanyazi tibari kugirira ihari abahirwe emirimo eyi babire nibakora.
13. Ahabw’enki Paulo yabire ari kubasa kugirira ihari entumwa 12?
13 Entumwa Paulo na we akatusigira ecokureberaho kirungi omu kuba abacurezi n’okumarwa. Paulo tarikirize ngu ihari rikure. Akaba nakora n’amani omu murimo g’okuburira, konka akagamba ayecurerize ati: ‘Ndi muto aha zindi ntumwa, [kandi] tinshemerire kwetwa entumwa.’ (1 Kor 15:9, 10) Entumwa za Yesu 12 zikakora na we omurimo g’okuburira, konka Paulo we akaba entumwa bwanyima y’okuzoka kwa Yesu. N’obu bwanyima Paulo yabire ‘entumwa aha banyamahanga,’ taratungire omugisha g’okuba omwe omu ntumwa 12 za Yesu. (Rom 11:13; Byak 1:21-26) Omu mwanya g’okugirira ihari entumwa 12 kandi ngu ayetenge obunywani obu babire binine na Yesu, Paulo akaguma ari kumarwa n’ebi yabire ayine.
14. Ni enki eki turije kukora twaba turi abacurezi kandi turi kumarwa?
14 Ku turabe turi abacurezi kandi turi kumarwa, nitwija kutoreza Paulo kandi tuhe ekitinisa abu Yehova yatireho ngu bebembere abahereza beye. (Byak 21:20-26) Akataho entebekanisa y’okutorana abashija b’okwebembera ekibina c’Abakristo. N’obu abo bashija batahikire, Yehova akabagabira eco kiconco. (Efe 4:8, 11) Twaha ekitinisa abo bashija kandi tukorobera obuhabuzi obu bari kutuha, nikituma twaguma hihi ya Yehova kandi tugira obusinge n’Abakristo bagenzi bitu.
‘KURATIRA EBIRI KURETA OBUSINGE’
15. Ni enki eki tushemerire kukora?
15 Tituri kubasa kugira obusinge n’abandi twaba twine ihari. Tushemerire kwiha omu mutima gwitu ihari kandi twerinda enyehurira eziri kubasa kutuma twarigirira ihari abandi. Tushemerire kukora ebyo bintu by’omugasho twaba turi kwenda korobera ekiragiro ca Yehova ec’‘okukuratira ebiri kureta obusinge n’okombekana.’ (Rom 14:19) Ni enki eki turi kubasa kukora ngu tukwase abandi kurwanisa ihari, kandi shi ni bata oku turi kubasa kuretaho obusinge?
16. Ni bata oku turi kubasa kukwasa abandi kurwanisa ihari?
16 Emitwarize n’ebikorwa byitu nibibasa kukwata aha bandi. Ensi neyenda ngu ‘twehimbise’ ahabw’ebintu ebi twine. (1 Yoh 2:16) Konka nikibasa kureta ihari. Tushemerire kwerinda kutuma abandi batugirira ihari, turi kubagambira ebi twine, entebenkanisa ezi twine, ninga ebi turi kwenda kugura. Obundi buryo obu turi kubasa kwerindamu kugira ihari ni okwetwara ge twaba twine emirimo omu kibina. Twaguma turi kugamba aha mirimo eyi twine, nikibasa kutuma abandi batandika kutugirira ihari. Konka, ku turi kufa aha bandi kandi tukabasima ahabw’ebirungi ebi bari kukora, nikibakwasa kuhurira bamazirwe kandi kireta obusinge omu kibina.
17. Ni enki eki benishe ba Yosefu babasize kukora, kandi ahabw’enki?
17 Nitubasa kurwanisa ihari kandi turisingura! Nambwenu, tekateka ahari benishe ba Yosefu. Bwanyima y’emyaka myingi bakorire kubi Yosefu bakija kumushanga omuri Misri. Yosefu atakemanyisize benishe, akabageza ngu arebe yaba bahindukire. Akabarondera ebyokurya, kandi yaha mwenishe omuto, Benyamiini, ebiri kukira eby’abandi. (Kut 43:33, 34) Konka, tihine ekiri kwereka ku benishe ba Benyamiini bamugirire ihari. Ahobwe, bakereka ku nibamufaho kandi ku nibakunda n’ishe, Yakobo. (Kut 44:30-34) Ahabw’okuba benishe ba Yosefu babire bahindukire, kikatuma bagarura obusinge omu ka yabo. (Kut 45:4, 15) Omu buryo nk’obwo, twayiha ihari omu mutima gwitu, nitureta obusinge omu ka n’omu kibina.
18. Tukuratize ebiri omuri Yakobo 3:17, 18, ku turiretaho obusinge biryatugasire bita?
18 Yehova nayenda ngu turwanise ihari kandi tureteho obusinge. Tushemerire kutamu amani ngu tukore ebyo byona. Nk’oku twabireba omuri eki kicweka, ihari riturimu. (Yak 4:5) Kandi twehingurizibwe n’abantu abine ihari. Konka ku turayege kuba abacurezi, tukamarwa kandi tukereka ku nitusima, titurije kugira ihari. Ahobwe, nitwija kuretaho obusinge oburije kutukwasa kugira emitwarize mirungi.—Shoma omuri Yakobo 3:17, 18.
ECESHONGORO CA 130 Saasira Abandi
^ par. 5 Ekitongore ca Yehova ni ec’obusinge. Konka ihari niribasa kutuma obwo businge bwabura. Omuri eki kicweka, twaza kushwijuma ekiri kubasa kutuma twagira ihari. Twaza kushwijuma oku turi kubasa kurwanisa ihari n’oku turi kubasa kuretaho obusinge.
^ par. 2 EBIGAMBO EBISHOBORWIRWE: Nk’oku kiri kugambwa omuri Bibuli, ihari tiriri kutuma omuntu yayetenga eby’abandi kusha, ahobwe nahurira ari kwenda n’okubibihaho.
^ par. 61 EKISHUSHANI: Omu nama y’Akakiko k’abazehe, omuzehe okuzire ori kwebembera Omunara g’Omurinzi yashabwa kumanyiza omuzehe ocari muto ngu abe ni we oragume kukora ogo murimo. N’obu mwenetata okuzire abire ari kukunda ogo murimo, yashagika ensharamu y’abazehe, yaha mwenetata ocari muto obuyambi kandi yamusima abyihire aha mutima.
