1-2. Ni ziha mbera ezi abahereza ba Yehova abingi bari kurabamu, kandi nizituma bayehurira bata?

YETEGEREZE ebi byokureberaho bishatu: Mwenetata ocari muto yarwara endwara eri kutinisa. Mwenetata ori kukora n’amani yaferwa omurimo, kandi n’obu yatamu amani ari kuronda ogundi tiyagubona. Munyanyazi okuzire munonga nashasha ahabw’okugira ngu takibasa kukora byingi omu murimo gwa Yehova nk’oku yabire nabikora.

² Mbehi n’iwe warahikirweho embera nk’ezi aba benetata na banyanyazi babugine? Yaba n’iwe wazibugine nobasa kwereba nk’otine mugasho. Embera nk’ezo nizituma wabura okushemererwa, zituma otayeyesiga, kandi zishisha obunywani bwawe n’abandi.

3. Ni bata oku Sitaane n’abahereza beye bari kutwara amagara?

³ Ensi egi neyereka oku Sitaane ari kureba amagara g’abantu. Burijo Sitaane naba nayenda ngu abantu behurire nk’abatine mugasho. Akatuma Eva yabanganisa, n’obu yabire ari kumanya ku ekihano c’okugomera Ruhanga kiri okufa. Sitaane ni we ori kwebembera obushubuzi, obutegeki n’amadini by’omuri egi nsi. Obwe rero tikiri kututangaza kureba oku abashubuzi, abategeki n’abebembezi b’amadini bari kumutoreza bari kutwara amagara nk’agatine mugasho.

4. Ni enki eki twaza kushwijuma omuri eki kicweka?

⁴ Konka Yehova we nayenda ngu twehurire ge kandi natukwasa twabugana embera eziri kutuma twayehurira nk’abatine mugasho. (Zab 136:23; Rom 12:3) Omuri eki kicweka  twaza kushwijuma oku Yehova ari kutukwasa omuri ezi mbera: (1) Twarwara endwara eri kutinisa, (2) twabugana ekizibu c’obworo, na (3) twaba turi omu myaka ya za bukuru tukahurira tutakine byingi by’okukorera Yehova. Ec’okubanza, twaza kureba enshonga eziri kutuma twayesiga ku turi ab’omugasho ahari Yehova.

5. Ni enki ekiri kutuma wayikiriza ku turi ab’omugasho ahari Yehova?

⁵ N’obu twahangirwe omu mucucu gw’aha nsi, turi ab’omugasho munonga ahari Yehova. (Kut 2:7) Tekateka aha nshonga zimwe eziri kutuma twayikiriza ku turi ab’omugasho ahari Yehova. Akatuhanga turi kubasa kutoreza emitwarize yeye. (Kut 1:27) Ni yo nshonga yatuhangire tutari nk’ebindi bintu ebi yahangire omu nsi, kandi yatuha obushoborozi bw’okureberera ensi n’okutegeka enyamishwa.—Zab 8:4-8.

6. Ni eha nshonga endijo eri kwereka ku Yehova ari kureba abantu abatahikirire nk’ab’omugasho?

⁶ Na bwanyima y’okucumura kwa Adamu, Yehova akaguma ari kureba abantu nk’ab’omugasho. Akatwereka ku turi ab’omugasho ari kutuha omwana weye Yesu owu ari kukunda munonga ngu atufire. (1 Yoh 4:9, 10) Ahabw’ekitambo, Yehova nayija kuzora abantu bona ‘abahikirire n’abatahikirire’ abafire ahabw’ekicumuro ca Adamu. (Byak 24:15) Ekigambo ceye nicereka ku turi ab’omugasho omu mbera zona ezi twakuba turimu, yaba turwire, twine ekizibu c’eby’akasente ninga turi omu myaka ya za bukuru.—Byak 10:34, 35.

7. Ni ziha nshonga ezindi eziri kwereka ku Yehova nareba abahereza beye nk’ab’omugasho?

⁷ Hine endijo nshonga eri kwereka ku Yehova ari kutureba nk’ab’omugasho. Natwehisa hihi kandi nareba oku turi kwakira obutumwa burungi. (Yoh 6:44) Twagira obunywani burungi na Yehova natuhika hihi. (Yak 4:8) Nambwenu Yehova natwereka ku natureba nk’ab’omugasho ari kutwegesa. Namanya abu turi bo hati kandi namanya oku turi kubasa kuba abantu barungi omu biro by’omu misho. Kandi natuhana ahabw’okuba natukunda. (Enf 3:11, 12) Ebi ku ni ebihamya ebiri kwereka ku turi ab’omugasho ahari Yehova!

8. Ni bata oku ebigambo biri omuri Zaaburi ya 18:27-29 biri kutugumya omu bizibu?

⁸ Abantu abamwe bakaba nibareba Daudi nk’otine mugasho, konka we akaba namanya ku Yehova yabire ari kumukunda kandi ku ari kumushagika. Kikakwasa Daudi kwehanganira embera ezi yabire arimu. (2 Sam 16:5-7) Ku turi kuhurira tuhwire amani ninga shi turi kuraba omu mbera zigumire, Yehova natukwasa kwereba ku turi ab’omugasho omu misho geye kandi atukwasa kwehangana. (Shoma omuri Zaaburi ya 18:27-29.) Yehova ku ari kuba ari aha rubaju rwitu, tihine ekintu na kimwe ekiri kubasa kutuzibira kumuhereza tushemerirwe. (Rom 8:31) Twaza kureba embera ishatu eziri kutukwasa kumanya ku Yehova ari kutukunda kandi ku ari kutureba nk’ab’omugasho.

9. Ni bata oku oburwire buri kukwata aha nyehurira zitu?

⁹ Oburwire nibutushasha kandi kituma twayehurira nk’abatine mugasho. Nitubasa kwehurira kubi abandi bantu ku bari kureba hine ekizibu eki twine ninga shi twareba tutari kubasa kweyamba. N’obu abandi bari kuba batari kumanya ku turwire, nabwo nituhurira twine enshoni ahabw’okugira ngu tituri kubasa kukora  ebintu ebi twabire tumanyirire kukora. Omuri ezo mbera zitanguhi, Yehova natugaruramu amani. Bata shi?

10. Tukuratize ebiri omu Nfumu 12:25, ni enki ekiri kubasa kutukwasa twaba turwire endwara eri kutinisa?

¹⁰ Twaba turwire, “ekigambo kirungi” nikitugaruramu amani. (Shoma omu Nfumu 12:25.) Omuri Bibuli, Yehova natugambira ebigambo birungi kandi atwijusya ku natufaho n’obu twakuba turwire endwara eri kutinisa. (Zab 31:19; 41:3) Ku turi kushoma ebyo bigambo, Yehova nayija kutukwasa kwehanganira enyehurira mbi eziri kuretwa oburwire.

11. Gamba ecokureberaho ca mwenetata ekiri kwereka ku Yehova ari kufa aha bahereza beye?

¹¹ Tekateka aha byahikire ahari Jorge. Obu yabire acari muto akakwatwa endwara yatuma yahurira atine mugasho. Akagira ngu: “Nkaba ntari kumanya ngu eyo ndwara neyija kutuma nayehurira kubi, kandi ekatuma nayitwa enshoni aha kuba abantu bakaba nibandeba munonga. Eyo ndwara ekakizaho kundembya natandika kutekateka aha ku amagara gange gabire garahinduke. Nkehurira kubi, nayeshengereza Yehova ngu anyambe.” Ni bata oku Yehova yamukwasize? Nagumizamu ari kugira ati: “Ahabw’okugira ngu nkaba nyine ekizibu c’amani, nkatandika kushoma ebicweka bimwe by’omuri Zaaburi ebiri kwereka ku Yehova ari kufa aha bahereza beye. Nkaba ninguma ndi kushoma ezo nyiriri burizoba kandi zikampumuriza. Ku hahwire obwire buce, abantu bakatandika kureba nyine amashemererwa. Bakangambira ku okureba nshemererwe cabire nikibagaruramu amani. Nkerebera ku Yehova yagarukiremu okushaba kwange! Akankwasa kuhindura oku nabire ndi kwereba. Nkatandika kuta omutima  gwange aha ki Bibuli eri kugamba aha ku ari kundeba n’obu ndabe ndwire.”

12. Ku orabe orwire, ni enki eki ori kubasa kukora kugira ngu Yehova akuyambe?

¹² Ku orabe orwire, oyesige otari kubanganisa ku Yehova ari kumanya ebi ori kurabamu. Mushabe akukwase kwegiraho emitekatekere mirungi. Kandi ogumizemu kushoma Bibuli kugira ngu obonemu obutumwa oburi kuhumuriza obu Yehova ari kutuha. Otekateke munonga aha byahandikirwe ebiri kwereka ku Yehova ari kufa aha bahereza beye. Ku orakore basyoya, noyija kwerebera ku Yehova ari murungi aha bari kumuhereza omu bwesigwa.—Zab 84:11.

13. Omushija ku ari kubura omurimo nayehurira ata?

¹³ Buri mushija wena naba ari kwenda kuha ab’omu ka yeye ebi bari kwetenga. Reka tugire ngu mwenetata yaferwa omurimo gweye kandi hatine eki ashobize. Yagezaho munonga kugira ngu abone ogundi murimo konka tiyagubona. Ebyo nibibasa kutuma yayehurira nk’otine mugasho. Ni bata oku okuta omutima aha biraganiso bya Yehova kiri kubasa kumuhumuriza?

14. Ni ziha nshonga eziri kutuma Yehova yahikiriza ebi ari kuturaganisa?

¹⁴ Ebi Yehova ari kuturaganisa byona nabihikiriza. (Yos 21:45; 23:14) Nakikora ahabw’enshonga nyingi. Ey’okubanza, nikija kukwata aha izina ryeye ninga shi ekitinisa ceye. Yehova naturaganisa ku ari kwija kufa aha bahereza beye, kandi ayetekatekire kuhikiriza ebyo biraganiso. (Zab 31:1-3) Kandi, Yehova namanya ku kiri kubasa kutushasha aturekire atatufeho kandi turi ab’omu ka yeye. Naturaganisa kutuha ebi turi kwetenga kugira ngu tugumizemu kumuhereza  omu bwesigwa!—Mat 6:30-33; 24:45.

15. (a) Ni kiha kigezo eki Abakristo b’omu kinyigana c’okubanza babugine? (b) Ni enki eki ebigambo ebiri omuri Zaaburi ya 37:18, 19 biri kutuhamiza?

¹⁵ Ku turi kwijuka ngu Yehova nahikiriza ebi ari kuraganisa, nikitukwasa twahikwaho embera mbi z’eby’akasente. Tekateka aha cokureberaho c’Abakristo b’omu kinyigana c’okubanza. Ab’omu kibina c’omuri Yerusaalemu ku batandikire kuhiganisibwa, ‘bona bakatatana okwihaho entumwa zonka.’ (Byak 8:1) Tekateka aha byarugiremu. Hakabaho embera mbi z’eby’akasente! Abakristo bakaferwa amaju gabo n’eby’obushubuzi ebi babire bine. Konka tarabarekire bonka, ninga shi ngu babure okushemererwa. (Byak 8:4; Heb 13:5, 6; Yak 1:2, 3) Nk’oku Yehova yafire aha bahereza beye, n’itwe nayija kutufaho.—Shoma omuri Zaaburi ya 37:18, 19.

16. Ni ziha mbera eziri kutuhikaho zikatuma twareba tutakine mani g’okukorera Yehova byingi?

¹⁶ Ku turi kukura nitutandika kuhurira tutakine mani g’okukorera Yehova byingi. Omugabe Daudi na we akehurira basyoya ku yahikire omu myaka ya za bukuru. (Zab 71:9) Ni bata oku Yehova ari kutukwasa?

17. Ni enki eki turi kwegera aha byahikire ahari munyanyazi Jheri?

¹⁷ Tekateka aha cokureberaho ca munyanyazi ori kwetwa Jheri. Akatumirwa kuza aha mushomo g’okureberera Enju y’obukama, konka akaba atari kwenda kuzayo. Akagamba ngu: “Nkuzire, ndi omufakazi, kandi tihine eki ndi kumanya aha kureberera Enju ya Yehova. Tinyine mugasho.” Omu kiro eco akagambira Yehova byona ebimuri aha mutima. Ku yahikire  aha Nju ya Yehova akaba acabanganisa yaba ashemerire kuba aryaho. Ku batandikire kwega, omwe omu babire bari kwegesa akagamba ku obumanyi bw’okubanza ari okwikiriza ngu Yehova abegese. Jheri akagamba ati: “‘Obwo bumanyi mbwine!’ Ku narebire oku Yehova yagarukiremu okushaba kwange, nkatandika kurira. Akaba namanya ku nyine ekintu c’omugasho eki ndi kubasa kumukorera, kandi buzima nayenda kunyegesa!” Jheri nagumizamu ari kugira ati: “Nkataha omu mushomo nyine obwoba, ntine amani kandi ndi kwereba nk’otine mugasho. Konka nkarugayo nyine obwesige n’amani kandi ndi kuhurira nyine omugasho!”

18. Ni bata oku Bibuli eri kwegesa ku n’obu twakuba tukuzire Yehova ari kutureba nk’ab’omugasho?

¹⁸ Ku turi kukura, nitukizaho kumanya ku Yehova acayine emirimo myingi y’okumukorera. (Zab 92:12-15) Yesu akatwegesa ku ekintu cona eki turi kubasa kukora tukakireba nk’ekitine mugasho, Yehova we nakireba nk’ec’omugasho munonga. (Luk 21:2-4) Obwe rero, ote omutima aha bi ori kubasa kukora. Ecokureberaho: Nobasa kugamba ebiri kukwata ahari Yehova, kushabira benetata, n’okugambira abandi ebigambo ebiri kubahumuriza kugira ngu bagume bahamire omu kwikiriza. Yehova nakureba nk’omukozi ori kukora na we; ti ahabw’ebi ori kubasa ahobwe ni ahabw’okumworobera.—1 Kor. 3:5-9.

19. Ni enki eki tushemerire kwesiga nk’oku biri kugambwa omu Barooma 8:38, 39?

¹⁹ Ku ni ec’omugasho kuhereza Yehova, Ruhanga ori kureba abari kumuhereza nk’ab’omugasho! Akatuhanga ngu tukore ebi ari kukunda, aha kuba ni co ekiri kutuma twatunga okushemererwa okwa buzima. (Kush 4:11) Ensi nebasa kutureba nk’abatine mugasho, konka Yehova we nareba ku turi ab’omugasho. (Heb 11:16, 38) Twahurira tuhwire amani ahabw’oburwire, ahabw’embera mbi z’eby’akasente, n’ahabw’eza bukuru, reka tugume turi kwijuka ku hatine ekintu na kimwe ekiri kubasa kuturemesa kuhamira ahari rukundo eyi twinire Tata ow’omu iguru.—Shoma omu Barooma 8:38, 39.