1. Ni enki eki ori kubasa kukora ngu ogire obunywani n’ondijo muntu?

TWENA nitumanya ku entambwe y’okubanza kugira ngu omuntu agirane obunywani n’ondijo eri okumara na we obwire. Oku muri kukizaho kuganira, muri kugambirana ebyababireho nikituma mwaba banywani. Konka obumwe hine obu kiri kutugumira kuba abanywani ba Yesu. Ahabw’enki?

2. Ni kiha kizibu c’okubanza eki turi kubugana?

² Ekizibu c’okubanza ni oku tutarabugineho Yesu. Abingi omu Bakristo b’omu kinyigana c’okubanza na bo bakaba bine eco kibuzo. Konka Petero akabagambira ati: ‘Ogo mumukunda, mutakamurebaga; kandi n’obu murabe mutari kumureba hati, nimumwikiriza.’ (1 Pet 1:8) Obwe rero kugira obunywani na Yesu n’obu tutakamureba nikibasika.

3. Ni kiha kizibu ca kabiri eki turi kubugana?

³ Ekizibu ca kabiri n’oku tutari kubasa kugamba na Yesu. Twashaba, Yehova ni we turi kugambira ebituri aha mutima byona. Ni amazima, nitushaba omu izina rya Yesu konka tituri kugamba na we. Kandi nitumanyira kimwe ku Yesu atari kwenda ngu tumushabe. Ahabw’enki? Ahabw’okuba eshara ni oburyo bw’okuramya, kandi Yehova ni we wenka owu tushemerire kuramya. (Mat 4:10) N’obu kiri kisyo, tushemerire kwereka ku nitukunda Yesu.

4. Ni kiha kizibu ca kashatu eki turi kubugana, kandi shi ni enki eki twaza kushwijuma omuri eki kicweka?

⁴ Ekizibu ca kashatu ni oku Yesu ari kuba omu iguru, obwe rero tituri kubasa kumara na we obwire. Konka nabwe nitubasa kumumanyaho byingi n’obu tutari kutura hamwe. Twaza kushwijuma ebintu bina ebi turi kubasa kukora kugira ngu tugumye obunywani bwitu na Yesu. Ecokubanza: Reka turebe enshonga ahabw’enki kiri kikuru kugumya obunywani bwitu na Kristo.

5. Ahabw’enki tushemerire kuba banywani ba Yesu? (Nambwenu reba akashanduku akari kugira ngu “ Twaba banywani ba Yesu nikituma twaba banywani ba Yehova,” n’akari kugira ngu “ Turebe Yesu omu buryo buhikire.”)

⁵ Twaba turi kwenda kuba banywani ba Yehova tushemerire kubanza twaba banywani ba Yesu. Ahabw’enki? Ni ahabw’enshonga nk’ibiri. Ey’okubanza: Yesu akagambira abegi beye ngu: ‘Ahakuba Ishebona na we abakunda, ahabw’okuba mukankunda.’ (Yoh 16:27) Nambwenu akagira ngu: ‘Tihariho oyija ahari Ishebona, atarabire ahari inye.’ (Yoh 14:6) Kugezaho kuba munywani wa Yehova otabandize kuba munywani wa Yesu, ni nk’okwenda kutaha omu nju otarabire omu muryango. Yesu akakoresa ecokureberaho nk’eco, obu yabire ari kwegambaho ku ari ‘irembo ry’entama.’ (Yoh 10:7) Eya kabiri: Yesu akereka emitwarize nk’ey’Ishe. Akagambira abegi beye ngu: ‘Ondebire, buri arebire Ishebona.’ (Yoh 14:9) Obwe rero twaba turi kwenda kumanya Yehova tushemerire kwega ebiri kukwata ahari Yesu. Ku turikizaho kumanya Yesu turyakizaho  kumukunda. Kandi ku turikizaho kukunda Yesu, turyakizaho kukunda Yehova.

6. Ni eha nshonga endijo eshemerire kutuma twaba banywani ba Yesu? Shoborora.

⁶ Tushemerire kuba banywani ba Yesu kugira ngu Yehova agarukemu eshara zitu. Eco nikikira kugamba ngu ‘omu izina rya Yesu’ aha muheru gw’eshara. Tushemerire kumanya oku Yehova ari kukoresa Yesu omu kugarukamu eshara zitu. Yesu akagambira entumwa zeye ngu: ‘Cona eki murishaba omu izina ryange, ndyakikora.’ (Yoh 14:13) N’obu Yehova ari iwe ori kuhurira kandi akagarukamu eshara zitu, konka akaha Yesu obushoborozi bwo kuhikiriza ensharamu zeye. (Mat 28:18) Ruhanga yaza kutusasira, nabanza yareba yaba turi kukuratiza obuhabuzi bwa Yesu. Ecokureberaho: Yesu akagira ati: ‘Ku murisasira abantu eby’okushisha byabo, n’imwe Sho ow’omu iguru aryabasasira; konka ku muriba mutari kusasira abantu eby’okushisha byabo, n’imwe Sho taribasasira eby’okushisha byanyu.’ (Mat 6:14, 15) Ka ni ec’omugasho munonga, twatwariza abandi nk’oku Yehova na Yesu bari kututwariza!

7. Ni baha abu ekitambo ca Yesu kiri kugasira?

⁷ Banywani ba Yesu bonka ni bo ekitambo ceye kiri kugasira. Nitukimanya tuta? Yesu akagira ngu akaba nayija ‘kufera banywani beye.’ (Yoh 15:13) Abantu b’abesigwa ababireho Yesu atakizire omu nsi, nibija kwega ebiri kumukwataho kugira ngu bamukunde. Abo bashija n’abakazi barimu Abramu, Saara, Musa, na Rahabu baryazoka, konka abo bahereza ba Yehova nibija kugira obunywani na we kugira ngu bije kutunga amagara agatahwaho.—Yoh 17:3; Byak 24:15; Heb 11:8-12, 24-26, 31.

8-9. Tukuratize ebiri kugambwa omuri Yohaana 15:4, 5, kugira obunywani na Yesu nikituma twakora ki, kandi ahabw’enki kiri ec’omugasho?

⁸ Nikitushemeza munonga kuburira n’okwegesa ebiri kukwata aha Bukama bwa Ruhanga turi hamwe na Yesu. Obu Yesu yabire ari omu nsi, akaba ari omwegesa. Kandi kuruga obu Yesu yagarukire omu iguru, nk’omutwe gw’ekibina, agumizemu kwebembera omurimo g’okuburira n’okwegesa. Natureba kandi natusima ahabw’amani agu turi kutaho turi kuyamba abandi kugira ngu bamumanye kandi bamanye n’Ishe. Ekiri kutukwasa ngu tuhikirize ogo murimo ni obuyambi obu Yehova na Yesu bari kutuha.—Shoma omuri Yohaana 15:4, 5.

⁹ Ekigambo ca Ruhanga nikitwegesa ku tushemerire kukunda Yesu kugira ngu tuhimbise Yehova. Obwe rero reka turebe ebintu bina ebiratukwase kuba banywani ba Yesu.

10. Ni kiha kintu c’okubanza eki tushemerire kukora kugira ngu tugire obunywani na Yesu?

¹⁰ (1) Manya Yesu. Nitumanya Yesu twashoma ekitabo ca Matayo, Mako, Luka, na Yohaana. Twatekateka aha nkuru eziri omuri Bibuli eziri kugamba aha kubaho kwa Yesu, nikituma twamukunda kandi tumworobera ahabw’oburyo obu yabire ari kutwarizamu abantu. Ecokureberaho: N’obu yabire ayine obushoborozi, tarakwasire abegi beye nk’abahuku. Ahobwe, akaba ari kumanya ebi bari kutekateka n’ebibari aha mutima. (Yoh 15:15) Yesu akaba nashasha na bo kandi arira na bo. (Yoh 11:32-36) N’ababire bari kumuhiganisa bakaba nibamanya ku yabire ari munywani w’abari kumuhurikiza. (Mat  11:19) Twatoreza oku Yesu yabire ari kutwarizamu abegi beye, obunywani bwitu n’abandi nibukizaho kuhama, tuhurira tumazirwe kandi tushemerirwe, kandi nikituma twakizaho kumukunda n’okumuha ekitinisa.

11. Ni kiha kintu ca kabiri eki ori kubasa kukora ngu obe munywani wa Yesu, kandi ahabw’enki kiri ec’omugasho?

¹¹ (2) Gira emitekatecere nk’eya Yesu kandi okore nka we. Oku turi kukizaho kugira emitekatecere nk’eya Yesu, ni ko n’obunywani bwitu na we buri kukizaho kuhama. (1 Kor 2:16) Konka shi, ni bata oku turi kutoreza Yesu? Tekateka ahari eki cokureberaho. Yesu akaba natekateka aha kuyamba abandi omu mwanya g’okwehimbisa. (Mat 20:28; Rom 15:1-3) Ahabw’okuba yabire ayine eyo mitekatecere akaba nayeferereza kandi asasira. Taratwarize kubi abantu ahabw’ebi babire nibamugambaho. (Yoh 1:46, 47) Kandi akaba atari kuta omutima aha nshobe ezi abantu bakozire kare ngu zitume yahindura oku yabire ari kubareba. (1 Tim 1:12-14) Yesu akagamba ati: ‘Ku muriguma nimukundana, nibwo abantu bona baribamanya ku muri abegi bange.’ (Yoh 13:35) Buri omwe nabasa kwebuza ati: “Mbehi nimbasa kukuratira ecokureberaho ca Yesu ndi kukora ekiri kubasika cona ngu ngumye obunywani bwange na benetata na banyanyazi?”

12. Ni kiha kintu ca kashatu eki tushemerire kukora ngu tube banywani ba Yesu, kandi ni bata oku turi kubasa kukikora?

¹² (3) Shagika benishe ba Kristo. Yesu nareba ebi turi kukorera benishe abashukirweho omwika nk’ahu ari we turi kubikorera. (Mat 25:34-40) Oburyo oburi kukirayo obundi obu turi kwereka ku nitushagika abashukirweho omwika, ni okukora omurimo g’okuburira n’okuhindura abantu abegi nk’oku Yesu yaragire abakurasi beye. (Mat 28:19, 20; Byak 10:42) Ab’omu ‘ntama ezindi’ nibakwasa benishe ba Kristo omu kuhikiriza omurimo g’okuburira oguri kukorwa omuri obu bwire. (Yoh 10:16) Waba ori ow’omu ntama ezindi, n’iwe nokora ogo murimo kandi noba ori kwereka ku nokwasa abashukirweho omwika na Yesu.

13. Ni bata oku turi kubasa kukuratiza obuhabuzi bwa Yesu oburi omuri Luka 16:9?

¹³ Nambwenu nitubasa kuba banywani ba Yehova na Yesu turi kukoresa obutungi kugira ngu tushagike omurimo g’okuburira. (Shoma omuri Luka 16:9.) Ecokureberaho: Nitubasa kushagika omurimo turi kuhayo ebiconco, harimu kuhayo akasente k’okuyamba omu tucweka twa hare, kombeka n’okureberera amaju g’okuramizamu n’okuyamba abahikirweho ebihikirizi omu nsi yona. Nambwenu nitubasa kushagika ekibina kitu kandi tukwasa buri omwe ori kwetenga obuyambi. (Enf 19:17) Obwo ni oburyo obu turi kubasa kushagikamu benishe ba Kristo.

14. Tukuratize ebiri kugambwa omu Baefeso 4:15, 16, ni kiha kintu ca kana eki turi kubasa kukora ngu tube banywani ba Yesu?

¹⁴ (4) Yereka ku noshagika entebekanisa z’ekitongore ca Yehova. Nituba banywani barungi ba Yesu, ari we mutwe gw’ekibina, turi kukwatanisa n’abu yatireho ngu batufeho. (Shoma omu Baefeso 4:15, 16.) Ecokureberaho: Nitutamu amani kugira ngu Amaju g’Obukama gona gakoresibwe ge. Ni yo nshonga ebibina bimwe byabuganisibwe n’ebindi kandi n’embibi za teritori zikahinduka. Eyo ntebenkanisa ekatuma ekitongore  cakoresa ge esente ezi benetata bari kuhayo bekundire. Eco kikatuma ababurizi bamwe batandika embera nsya. Abo baburizi abari kwesigwa bakaba bamazire emyaka myingi bari kuhereza omu bibina byabo, kandi catuma obunywani bwabo na benetata na banyanyazi bwakizaho kuhama. Konka hati bakashabwa kuhereza omu bindi bibina. Ku nikishemeza Yesu munonga, kureba abo begi b’abesigwa bari kwekwatanisa omuri eyo ntebekanisa!

15. Ni bata oku obunywani bwitu na Yesu burije kweyongera omu biro by’omu misho?

¹⁵ Abashukirweho omwika oguri kwera bine amasiko g’okwija kutura na Yesu ebiro byona, kandi baryategeka na we omu Bukama bwa Ruhanga. Nibija kutura na Yesu, bamurebe, bagambe na we kandi bagume na we ebiro byona. (Yoh 14:2, 3) Abine amasiko g’okutura omu nsi na bo nibija kutunga emigisha. N’obu batarije kureba Yesu, obunywani obu bamwinire nibwija kweyongera ku baritunga amagara agatahwaho agu Yehova na Yesu barije kubaha.—Isa 9:6, 7.

16. Ni eha migisha eyi turi kutunga ahabw’okuba turi banywani ba Yesu?

¹⁶ Ku turi kwikiriza tukaba banywani ba Yesu, nitutunga emigisha myingi. Ecokureberaho: Rukundo n’obushagiki ebi ari kutuha nibitugasira. Twine omugisha g’okwija kubaho ebiro byona. Kandi ekiri kukira byona, obunywani bwitu na Yesu nibwija kutuma twatunga itungo eriri kukira ebindi byona, ni okumanyisa obunywani n‘Ishe, Yehova. Ni omugisha kuba munywani wa Yesu.