1. Ni enki eki twena tushemerire kukora?

MBEHI waba oruhire kandi orwire, nobasa kuza omu mpaka ezi ori kumanya ngu zigumire? Ingaha. Entumwa Paulo akagamba ku Abakristo bona ab’amazima bari omu kwiruka kw’empaka. (Heb 12:1) Twena, abato n’abakuru, abine amani n’abaruhire tushemerire kwehangana kugira ngu tuhike aha muheru rero tutunge ekihembo eki Yehova arituha.—Mat 24:13.

2. Tukuratize ebiri kugambwa omuri 2 Timoseo 4:7, 8, ahabw’enki Paulo yabire ahikire kugamba ayine obumanzi aha mpaka z’okwiruka?

² Paulo akaba ahikire kugamba ayine obumanzi aha mpaka z’okwiruka ahabw’okuba ‘akaheza [empaka] zeye.’ (Shoma omuri 2 Timoseo 4:7, 8.) Konka shi empaka ezi Paulo yagambireho nizimanyisa ki?

3. Ni ziha mpaka ezi Paulo yagambireho?

³ Obumwe Paulo akaba nakoresa ebyokureberaho by’emizano y’omuri Bugriika ya kare kugira ngu ayegese ishomo ry’omugasho. (1 Kor 9:25-27; 2 Tim 2:5) Emirundi myingi, akageranisa empaka z’okwiruka n’okubaho kw’Abakristo. (1 Kor 9:24; Gal 2:2; Fil 2:16) Omuntu natandika ezo mpaka yayeha Yehova kandi akabatizibwa. (1 Pet 3:21) Nahika aha muheru gw’empaka Yehova ku ari kumuha ekiconco c’amagara agatahwaho.—Mat 25:31-34, 46; 2 Tim 4:8.

4. Ni enki eki twaza kushwijuma omuri eki kicweka?

⁴ Ni bata oku empaka z’okwiruka ziri kushushana n’embera z’Abakristo? Hariho byingi ebi biri kubuganiraho. Reka turebe bishatu omuri ebyo. Ec’okubanza: Tushemerire kutora omuhanda ogu turi kwirukamu. Eca kabiri: Tushemerire kuta omutima aha kuhika aha muheru gw’empaka. Eca kashatu:  Tushemerire kwehanganira ebizibu ebiri kubasa kuturemesa.

5. Ni guha muhanda ogu tushemerire kutoramu, kandi ahabw’enki?

⁵ Omwiruki yaba ari kwenda ngu atunge ekihembo, naba ashemerire kutora omu muhanda ogu bari kwirukamu. Ni co kimwe, twaba turi kwenda ngu tuhebwe ekihembo c’amagara agatwaho, tushemerire kutora omu muhanda gw’amagara. (Byak 20:24; 1 Pet 2:21) Konka, Sitaane n’abari kumutoreza nibaba bari kwenda ngu tubakurate; nibenda ngu ‘tukwatanise na bo.’ (1 Pet 4:4) Nibajumirira omuhanda gw’amagara ogu turi kutoramu, bagamba ku omuhanda gwabo guri go murungi, kandi guri kubahisa obusinge. Konka ebi bari kugamba ni ebishuba.—2 Pet 2:19.

6. Ni enki eki wayegera omu cokureberaho ca Brian?

⁶ Abantu abari kutoreza ensi ya Sitaane, ku hari kuhwa obwire nibamanya ku ogo muhanda ogu bashaziremu gutaribahisa aha businge, ahobwe ku guri kutuma baba abagaragwa ba Sitaane. (Rom 6:16) Tekateka aha cokureberaho ca Brian. Abazire beye bakamuhiga kukuratira omuhanda gw’Abakristo. Konka obu yabire ari omunyeto, akabanganisa yaba ogo muhanda guramuretere okushemererwa. Brian akasharamu kutoreza abari kugendera aha misinge ya Sitaane. Akagamba ati: “Nkaba ntari kumanya ngu obwo bugabe bukaba nibubasa kutuma nakora ebintu bibi. Ku hahwire obwire, nkatandika kukoresa ebitaburabwonko, natandika kunywa amarwa mingi kandi natandika kuza omu bikorwa by’obushambani. Hakahwa emyaka myingi ndi omu mbera mbi kandi bwanyima nkatandika kushubura ebitaburabwonko kugira ngu mbase kubaho.” Bwanyima, Brian akasharamu kubaho ari kukuratiza emisinge ya Yehova. Brian akakora empinduka, yabatizibwa omu mwaka gwa 2001. Hati ayine okushemererwa kwingi ahabw’okugendera omu muhanda gw’Abakristo. *

7. Tukuratize ebiri omuri Matayo 7:13, 14, ni eha mihanda ibiri eyi tushemerire kutoranamu gumwe?

⁷ Ku ni ec’omugasho munonga kutorana omuhanda oguhikire g’okutoramu! Sitaane nayenda ngu tureke kwirukira omu muhanda gufunzire ‘oguri kutasya omu magara agatahwaho’ kandi nayenda ngu tuze omu muhanda muhango ogu abantu bingi barimu. Ogo muhanda muhango abantu bingi nibagumanya kandi corobi kugurabamu. Konka nigutasya ‘omu kucwecerera.’  (Shoma omuri Matayo 7:13, 14.) Kugira ngu tugume omu muhanda murungi kandi tutabihabihwa, tushemerire kwesiga Yehova kandi tukamuhurikiza.

8. Omwiruki yatera ensibo akagwa aha nsi, ni enki eki ari kukora?

⁸ Abantu abari omu mpaka z’okwiruka nibaguma batire erisho ryabo aha muhanda ogu bari kurabamu kugira ngu batatera ensibo. Konka, abiruki bagenzi babo nibabasa kubateza ensibo ninga shi bagwa omu kina. Bagwa aha nsi, nibashuba bimuka bagumizamu bari kwiruka. Amisho gabo tibari kugata aha byabateza ensibo, ahobwe nibagata aha muheru gw’empaka n’aha kihembo eki barije kutunga.

9. Twatera ensibo, ni enki eki tushemerire kukora?

⁹ Omu mpaka z’okwiruka ezi turimu, nitubugana ebiri kututeza ensibo byingi harimu okukora enshobe omu kugamba n’omu kukora. N’abiruki bagenzi bitu nibabasa kukora enshobe zituteze ensibo. Eco tikiri kututangaza. N’obu twena tutahikire, nitutora omu muhanda ogufunzire oguri kutasya omu magara agatahwaho. Obwe rero, hine obu turi kubasa kukora ebintu ebiri kubasa kuteza abandi ensibo. Paulo akagamba ku hariho obu turi kugira eki ‘twafa na mugenzi witu.’ (Kol 3:13) Omu mwanya g’okuta omutima aha catuteza ensibo, tushemerire kuguta aha kihembo eki turije kuhebwa. Twatera ensibo tushemerire kushuba kwimuka kandi tugumizamu kwiruka. Ku turatere ensibo tukitwa ekiniga tukanga kwimuka, titurije kutunga ekihembo. Kandi, nikituma twateganisa abandi abari kugezaho kugumizamu bari kwirukira omu muhanda gufunzire oguri kutasya omu magara.

10. Ni bata oku turi kubasa kwerinda kuteza abandi ensibo

¹⁰ Obundi buryo obu turi kubasa kwerindamu ‘kuteza abandi ensibo’ ni okureka abandi bakakora ebintu nk’oku bari kubireba omu mwanya g’okwenda ngu bakore ebintu nk’oku itwe turi kubireba. (Rom 14:13, 19-21; 1 Kor 8:9, 13) Konka, tituri nk’abiruki abari omu mpaka za burijo. Nibahayahayana n’abandi biruki kandi buri omwe naba ari kwenda ngu abe ni we yayetungira  eco kihembo. Abo biruki nibaba bari kwekunda. Nibasindika abandi enyima kugira ngu babe ni bo baza omu misho. Konka itwe tituri kuhayahayana n’abandi. (Gal 5:26; 6:4) Entego eyi twine ni okukwasa benetata ngu na bo bamare empaka n’itwe batunge ekihembo. Nitukuratiza obuhabuzi bwa Paulo obu yagizire ati: ‘Omuntu wena omuri imwe areke kweta aha bye wenka, kureka ayete n’aha by’abandi.’—Fil 2:4.

11. Ni enki eki omwiruki ari kutaho omutima kandi ahabw’enki?

¹¹ Abiruki tibari kuta omutima aha muhanda ogu bari kurabamu kusha, ahobwe nibaguta ahu baramarire. N’obu batari kubasa kureba ahu baramarire nibaba bine ekihika c’okuhahika bakabona ekihembo. Ekiri kubaha amani ni oku bari kugumizamu kutekateka aha kihembo.

12. Ni enki eki Yehova yatuhire?

¹² Yehova akaha abahereza beye omugisha g’okutunga ekiconco c’amagara agatahwaho omu iguru ninga omuri paradiso omu nsi, ku barimara empaka. Bibuli netushobororera eco kiconco kugira ngu turebe oku amagara garije kuba gari marungi. Twaguma turi kutekateka ahari eco kiconco, turyagumizamu kwehangana omu mpaka ezi turimu.

13. Ni enki eki turi kukiza abiruki aba burijo?

¹³ Abiruki ababire bari kuzana emizano y’omuri Bugriika, bakaba nibehanganira ebizibu, harimu okuruha n’obusaasi. Konka bakaba nibakoresa obumanyi hamwe n’amani gabo. N’itwe turi nk’abo biruki ahabw’okuba nitwegesibwa oku tushemerire kwiruka omuri ezi mpaka ezi turimu. Konka hine eki turi kukiza abiruki ba burijo. Twine amani agari kuruga ahari Yehova kandi obuyambi obu ari kutuha tibwine obugarukiro. Yehova naturaganisa ku atarije kutwegesa kusha ahobwe ku nayija n’okutuha amani!—1 Pet 5:10.

14. Ni bata oku omu 2 Bakorinso 12:9, 10 hari kutukwasa twabugana ebizibu?

¹⁴ Paulo akabugana ebizibu byingi. Bakaba nibamujuma kandi bamuhiganisa, ahurira atine amani kandi ayehanganira ‘ihwa ry’omu mubiri.’ (2 Kor 12:7) Konka tararebire ebyo bizibu nk’eby’okumumaramu amani, ahobwe akabireba nk’omugisha g’okwereka ku nayesiga Yehova. (Shoma omu 2 Bakorinso 12:9, 10.) Ahabw’okugira ngu Paulo akaba ayine eyo mitekatekere, Yehova akamukwasa kwehangana kugira ngu arabe omuri ebyo bizibu.

15. Ni enki eki turije kureba ku turitoreza ecokureberaho ca Paulo?

¹⁵ N’itwe, abantu nibabasa kutujuma kandi batuhiganisa ahabw’okwikiriza kwitu. Nitubasa kuba twine oburwire ninga shi tuhurira tuhwiremu amani. Konka twatoreza ecokureberaho ca Paulo, nitwija kureba ebyo bizibu nk’omugisha g’okugumizamu turi kwereka ku nitwesigwa Yehova.

16. Ni enki eki ori kubasa kukora waba otine amagara marungi?

¹⁶ Nobasa kuba oyine oburwire, oyine obumuga, ninga shi amisho gawe gatari kureba. Yaba ni ko kiri, mbehi nobasa kuhereza Yehova ori hamwe n’abato kandi abacayine amani? Yego buzima! Abantu bingi abakuzire omu myaka n’abine obumuga, bari omu muhanda oguri kutasya omu magara. Tibari kubasa kugugumamu ahabw’amani gabo. Ahobwe, nibahika hihi ya Yehova bari kuhurikiza enterane aha simu ninga bazireba ahari vidiyo. Nambwenu nibekwatanisa omu murimo g’okuhindura abantu abegi bari kuburira ba dokita hamwe n’abanyabuzare babo.

17. Ni bata oku Yehova ari kureba abine amagara mabi?

¹⁷ Waba otari kubasa kukora byingi omu murimo gwa Yehova, otarihwa amani ori kutekateka ngu tori kubasa kugumizamu ori omu muhanda oguri kutasya omu magara. Yehova nakukunda ahabw’okugumizamu kumwesiga n’okwehangana. Noyetenga obuyambi bweye okukira kare hona kandi tarije kukusigaho. (Zab 9:10) Nayija kukizaho kukuhika hihi. Tekateka ebigambo ebi munyanyazi oyine amagara mabi yagambire: “Oku ndi kureba amagara gange gari kukizaho kuba mabi, ni ko ndi kukizaho kuhwa amani omu kuburira. Konka nimanya ngu bice ebi ndi kukora nibishemeza omutima gwa Yehova kandi nanye nibinshemeza.” Ku orahurire wahwamu amani, oyijuke ku otari wenka. Tekateka aha cokureberaho ca Paulo, kandi oyijuke ebigambo byeye ebiri kugaruramu amani ebiri kugira biti: ‘Ahabwa Kristo ninshemererwa ahabw’obweremwa, ahakuba ku mba omweremwa, nibwo ngira amani.’—2 Kor 12:10.

18. Ni kiha kizibu eki abantu abamwe bine?

¹⁸ Abamwe abari omu mpaka z’okwiruka omu muhanda oguri kuhisya omu magara agatahwaho nibabugana ekindi kizibu. Nibabugana ebizibu ebi abandi bantu batari kubasa kureba kandi batari n’okubasa kushoborokerwa. Ecokureberaho: Nibabasa kuba bine endwara y’okweheba n’okuhurira bemerize omutima munonga. Ahabw’enki abo bahereza ba Yehova abu ari kukunda bari kubugana ekizibu c’amani? Ni ahabw’okuba omuntu yahendeka omukono ninga akagira obumuga, abantu bona nibamureba kandi bahurira bayenda kumuyamba. Konka, abantu tibari kubasa kureba bagenzi babo ngu bamanye ku bine ebizibu by’omu nyehurira ninga omu bitekateko. Obusaasi obu bine ni nk’obu abine ebizibu ebiri kurebwa bine; konka abandi tibari kubagirira esaasi omu buryo oburi kushushana.

19. Ni enki eki turi kwegera aha cokureberaho ca Mefiboshesi?

¹⁹ Waba oyine obumuga kandi abandi batari kukwetegereza, ecokureberaho ca Mefiboshesi nikibasa kukukwasa. (2 Sam 4:4) Akaba nayehanganira ekizibu c’obumuga, kandi Omugabe Daudi akamutekatekaho kubi. Mefiboshesi akaba atine enshonga eshemerire kutuma ebyo byona byamuhikaho. Konka tarikirize ngu bitume yayitwa ekiniga, ahobwe akasima ahabw’ebintu byingi birungi ebi yatungire omu kubaho kweye. Akasima ahabw’ebintu birungi ebi Daudi yabire amukorire. (2 Sam 9:6-10) Obwe rero Daudi ku yamutekatekireho kubi, Mefiboshesi akareba embera zona. Tarikirize ngu enshobe ya Daudi etume yayitwa  ekiniga. Kandi taragizire Yehova orwekwaso ahabw’ebi Daudi yamukorire. Mefiboshesi akata omutima aha bi ari kubasa kukora kugira ngu ashagike omugabe owu Yehova yatorine. (2 Sam 16:1-4; 19:24-30) Yehova akahandikisa ecokureberaho kirungi ca Mefiboshesi omu Kigambo ceye kugira ngu tucegereho.—Rom 15:4.

20. Ni bata oku okwemereza omutima kuri kubasa kukwata ahari bamwe, konka shi ni enki eki bashemerire kwesiga?

²⁰ Ahabw’okugira ngu benetata na banyanyazi bamwe nibaba bemerize omutima, nibahurira bine obwoba kandi batari kweyesiga baba bari n’abandi bantu. Nibahurira kuba n’abantu bingi kiri kubagumira, konka nibagumizamu kwekwatanisa omu nterane, n’omu biterane. Nibahurira kuganira n’omuntu owu batari kumanya kiri kubagumira, konka nabwo baganira n’abantu omu murimo g’okuburira. Yaba n’iwe ari ko ori, yesige otari kubanganisa ku otari wenka. Abantu bingi bari omu mbera nk’ezi orimu. Yijuka ngu Yehova nayesima ahabw’amani agu ori kutamu. Obu otari kuhwa amani ni ekihamya ekiri kwereka ku ari kukuha emigisha kandi ku ari kukuha amani agu ori kwetenga. * (Fil 4:6, 7; 1 Pet 5:7) Waba ori kuhereza Yehova n’obu orabe ori kwehanganira amagara mabi n’enyehurira mbi, oyesige ku ori kumushemeza.

21. Ni enki eki twena turije kubasa kukora ahabw’obuyambi bwa Yehova?

²¹ Ni amazima, hariho entanisa eziri ahagati y’empaka z’okwiruka eza burijo, n’ezi Paulo yagambireho. Omu mpaka z’okwiruka z’omu bwire bwa Bibuli, omuntu omwe ni we owabire ari kutunga ekihembo. Konka omu mpaka z’Abakristo, abantu bona abari kuguma bari abesigwa nibatunga ekihembo c’amagara agatahwaho. (Yoh 3:16) Omu mpaka za burijo, abantu bona nibaba bashemerire kuba bine amagara marungi kugira ngu basingure. Ekiri kutana n’eco, abingi twine amagara mabi, konka nitugumizamu kwehangana. (2 Kor 4:16) Twena nitwija kuhika aha muheru gw’empaka ahabw’obuyambi bwa Yehova!