Obuhanuzi obwayerekwa omuri aka kashanduku nibugamba ebintu ebyabire birabeho omu bwire bumwe. Nibyereka omu buryo obutari kushushana ku turi ‘omu biro by’emperu.’​—Dan 12:4.

• Ebyahandikirwe: Kush 11:7; 12:13, 17;13:1-8, 12

  Obuhanuzi: ‘Enyamishwa’ emazire ebinyigana byingi eri kutegeka ensi. Omu biro by’emperu, omutwe gwayo gwa mushanju gukahutara. Bwanyima, ogo mutwe gukakira kandi ‘ab’ensi yona bagikurata.’ Sitaane nakoresa enyamishwa kugira ngu ‘arwanise oruzaro rw’omukazi orusigireho.’

  Oku bwahikirire: Bwanyima y’omwijuro, abategeki abari kuhakanisa Yehova bakatandika kutegeka abantu. Bwanyima y’ebinyigana byingi, omu rutaro rw’okubanza rw’ensi yona, obugabe bwa Bungereza bukahwa amani. Bukagaruka kugira amani obu bwayegisire na Amerika. Omuri ebi biro by’emperu, Sitaane nakoresa obutegeki bw’abantu kugira ngu ahiganise abahereza ba Ruhanga.

• Ecahahandikirwe: Dan 11:25-45

  Obuhanuzi: Omu biro by’emperu omugabe w’omu matemba n’ow’omu mashuma bakarwanira obugabe.

  Oku bwahikirire: Jamani n’obutegeki bwa Bungereza na Amerika bakarwana. Omu mwaka gwa 1945, amahanga geterine g’Abasoviyeti n’abayekwatanisize na go gakaba omugabe w’omu matemba. Omu mwaka gwa 1991, amahanga geterine g’Abasoviyeti gakagwa kandi ku hahwireho obwire, Burusiya n’abari kwekwatanisa na yo ekaba omugabe w’omu matemba.

• Ebyahandikirwe: Isa 61:1; Mal 3:1; Luk 4:18

  Obuhanuzi: Yehova akatuma “entumwa” yeye kugira ngu ‘etebekanise omuhanda’ mbere y’Obukama bwa Mesia. Ogo mutwe gukatandika kuburira abacurezi obutumwa burungi.

  Oku bwahikirire: Kuruga omu mwaka gwa 1870, C. T. Russell na bagenzi beye bakataho amani omu kugaruraho amazima g’omuri Bibuli. Omu myaka ya 1880, bakatandika kuhiga abahereza ba Ruhanga kukora omurimo g’okuburira. Bakacapa ekicweka ekiri kugira ngu: “Nitwenda ababurizi 1,000” n’ekiri kugira ngu: “Bakatoranwa kukora omurimo g’okuburira.”

• Ecahandikirwe: Mat 13:24-30, 36-43

  Obuhanuzi: Omwangi akabiba encenzi omu musiri gw’engano kandi zayikirizibwa kukura n’engano okuhisya omu bwire bw’okugesha; bwanyima ezo ncenzi zatanisibwa omu ngano.

  Oku bwahikirire: Kuruga omu myaka ya za 1800, Abakristo ab’amazima bakatandika kutanisibwa aha Abakristo b’ebishuba. Omuri obu bwire bw’aha muheru, Abakristo ab’amazima bakatandika kuteranwa hamwe kugira ngu batanisibwe n’ab’ebishuba.

• Ecahandikirwe: Dan 2:31-33, 41-43

  Obuhanuzi: Ebigeri by’ecoma kijwangize n’ibumba by’ekishushani ekikozirwe omu coma.

  Oku bwahikirire: Ibumba nirigeranisa abaturage abari kutegekwa na Bungereza na Amerika konka bari kuhakanisa obwo butegeki. Abo baturage nibatuma obwo butegeki bwa nyinensi butakoresa amani gabwo gona agari nk’ecoma.

• Ecahandikirwe: Mat 13:30; 24:14, 45; 28:19, 20

  Obuhanuzi: “Engano” nizibikwa omu ‘bitara’ kandi omwambari omwesigwa kandi ow’omunywabwenge akatoranwa kugira ngu areberere ‘ab’omu ka.’ Omurimo g’okuburira ‘engiri y’Obukama bw’omu iguru’ gukatandika kukorwa ‘omu nsi yona.’

  Oku bwahikirire: Omu mwaka gwa 1919, omwambari omwesigwa akatoranwa kwebembera abahereza ba Yehova. Okuruga omuri obwo bwire, abegi ba Bibuli bakakora omurimo g’okuburira munonga. Omuri obu bwire, Abahamya ba Yehova nibaburira omu mahanga agari kukira ahari 200 kandi nibahandika ebitabo ebiri kwegesa Bibuli omu ndimi eziri kukira ahari 1,000.

• Ebyahandikirwe: Dan 12:11; Kush 13:11, 14, 15

  Obuhanuzi: Enyamishwa eyine amahembe abiri ekebembera omu kukora ekishushani c’enyamishwa, kandi yahereza ekishushani c’enyamishwa omwika ngu kigambe.

  Oku bwahikirire: Obugabe bwa nyinensi bwa Bungereza na Amerika bukebembera omu kutaho Ekitongore c’obumwe bw’amahanga (LN). Agandi mahanga gakashagika eco kitongore. Bwanyima, omugabe w’omu matemba akekwatanisa omuri eco kitongore kuruga omu mwaka gwa 1926-1933. Abantu bakatekateka ngu Ekitongore c’obumwe bw’amahanga (LN) nikibaretera obusinge nk’oku kiri hati aha Kitongore c’amahanga ageterine (UN), kandi Obukama bwa Ruhanga ari bwo bwonka oburi kubasa kukikora.

• Ecahandikirwe: Dan 8:23, 24

  Obuhanuzi: Omugabe ori kutinisa ‘nareta okucwecerera okuri kutinisa.’

  Oku bwahikirire: Obutegeki bwa Bungereza na Amerika bukita abantu bingi. Ecokureberaho: Omu rutaro rwa kabiri rw’ensi yona, Amerika ekita abantu bingi obu yaterire ebisasi bibiri bihango omu ihanga eryabire riri kurwanisa obutegeki bwa nyinensi.

• Ebyahandikirwe: Dan 11:31; Kush 17:3, 7-11

  Obuhanuzi: ‘Enyamishwa eri kutukura’ neruga omu kina kandi ni we mugabe wa munana. Amahembe gayo ikumi nigacwecereza ‘maraya’ kandi eyo nyamishwa na yo obwayo necwecerezibwa. Ekitabo ca Danieli nikigigambaho kuba eri ‘ekiri kuzira ekiri kuhwerecereza.’

  Oku bwahikirire: Ekitongore c’obumwe bw’amahanga (LN) kikarugaho omu rutaro rwa kabiri rw’ensi yona. Bwanyima y’orutaro, Ekitongore c’amahanga ageterine (UN) ‘kikatebwaho.’ Nk’oku abantu babire bari kutekateka ngu Ekitongore c’obumwe bw’amahanga (LN) nikibaretera obusinge, ni ko bari kwikiriza n’Ekitongore c’amahanga ageterine (UN), kandi Obukama bwa Ruhanga ari bwo bwonka oburi kubasa kukikora. Ekitongore c’amahanga ageterine (UN) nikija kutahirira amadini.

• Ebyahandikirwe: 1 Tes 5:3; Kush 17:16

  Obuhanuzi: Amahanga nigaranga ngu ni ‘obusinge, tihariho kabi,’ kandi ngu ‘amahembe ikumi’ n’‘enyamishwa baryayanga maraya.’ Bwanyima, ago mahanga na go garyacwerezibwa.

  Oku burihikira: Amahanga nigija kutekateka ngu garesireho obusinge omu nsi. Amahanga agari kushagika Ekitongore c’amahanga ageterine (UN) nigija kucwecereza amadini g’ekishuba. Eyo eryaba entandikiro y’okubonabona kwingi. Oko kubonabona nikwija kuhendera obu Yesu arije kucwecereza ensi ya Sitaane ahari Haramagedoni.

• Ebyahandikirwe: Ezk 38:11, 14-17; Mat 24:31

  Obuhanuzi: Googi natahirira abahereza ba Ruhanga. Bwanyima, ba marayika bateranize hamwe ‘entore.’

  Oku burihikirira: Omugabe w’omu matemba n’agandi mahanga agariba gasigireho omu nsi, baryatahirira abahereza ba Ruhanga. Bwanyima y’oko kutahirirwa, abatorinwe abariba basigireho baryatwarwa omu iguru.

• Ebyahandikirwe: Ezk 38:18-23; Dan 2:34, 35, 44, 45; Kush 6:2; 16:14, 16; 17:14; 19:20

  Obuhanuzi: “Oshutami” aha ‘mbarasi eri kwera nasingura omu kurwana ngu abone kusingurira kimwe’ Googi n’amahe geye. ‘Enyamishwa ‘eryanagwa omu nyanja eri kwakamu omuriro’ guri kugurumira kandi ibare niryija kwatagura ekishushani.

  Oku burihikirira: Yesu, Omugabe w’Obukama bwa Ruhanga nayija kucungura abahereza ba Ruhanga. Ari hamwe n’abantu 144,000 abaritegeka na we hamwe na ba marayika, baryacwereza ensi ya Sitaane.