EKICWEKA C’OKWEGA 21
Mbehi noyereka okusima ahabw’ebiconco ebi Ruhanga yakuhire?
‘Ayi [Yehova] Ruhanga wange, eby’okutangaza ebi wakozire, n’ebitekateko ebi otutekatekaho ka ni byingi!’—ZAB 40:5.
ECESHONGORO CA 5 Emirimo ya Ruhanga Erikutangaaza
EMPINYE *
1-2. Tukuratize ebiri kugambwa omuri Zaaburi ya 40:5, ni biha biconco ebi Yehova yatuhire, kandi ahabw’enki tushemerire kubishwijuma kimwe aha kindi?
YEHOVA ni efura. Tekateka aha biconco ebi Yehova yatuhire: Ensi yitu ndungi y’omutano, obwonko, n’Ekigambo ca Ruhanga, Bibuli. Ahabw’okuba Yehova yatuhire ebyo biconco bishatu, twine omwanya murungi g’okuturamu, obushoborozi bw’okutekateka n’okuganira n’abandi, kandi natugarukamu ebibuzo ebi turi kwebuza.—Shoma omuri Zaaburi ya 40:5.
2 Omuri eki kicweka, twaza kushwijuma ebyo biconco bishatu kimwe aha kindi. Oku turi kukizaho kubitekatekaho ni ko turi kukizaho koreka okusima, kandi tukizaho kugira ecetengo c’okuhimbisa Omuhangi witu ori kutukunda, Yehova. (Kush 4:11) Nambwenu nituba twetegwire kukwasa abari kuhabisibwa enyegesa y’ekishuba y’oku ebintu biri kubaho biri kuruga omu bindi.
ENSI YITU NDUNGI Y’OMUTANO
3. Ahabw’enki ensi eri ey’omutano?
3 Obwenge bwa Ruhanga niburebekera omu ku yayombekire eka yitu, ni okugamba ensi. (Rom 1:20; Heb 3:4) Ensi tiyo yonka eri kwetorora izoba, konka ensi ni ey’omutano ahakuba ni yo yonka eri kubasa kubaho ebyine amagara.
4. Ahabw’enki turi kubasa kugamba ku ensi eri nungi kukira obwato obwakozirwe omuntu?
4 Ensi eri nk’obwato oburi omu nyanja mpango. Konka ensi yitu netanira kimwe n’obwato obwakozirwe omuntu. Ecokureberaho: Mbehi bikagenda bita abantu abari omu bwato babuzire okisigeni, ebyokurya, amizi ninga bakabura aho kwata ebisingwe? Abo bantu abari omu bwato bakahika bari kufa. Ekiri kutana n’eco, ensi eriho ebyine amagara byingi munonga. Erimu okisigeni, ebyokurya, n’amizi kandi nibitura biri kumara. N’obu bari kwata ebisingwe, ensi neguma eri ndungi kandi eri kuturwamu. Eco nikibasika kita? Yehova akahanga ensi omu buryo bw’oku ebisingwe biri kubasa kuhindurwamu ebindi bintu birungi. Reka tushwijume ebyokureberaho bibiri by’okwegarukamu: Okwegarukamu kwa okisigeni n’okwegarukamu kw’amizi.
5. Okwegarukamu kwa okisigeni ni enki, kandi ni enki eki kuri kutuhamiza?
5 Okisigeni ni omwika oguri kukwasa ebyine amagara bitari bimwe, harimu n’abantu. Okucondoza okwakozirwe kukereka ku ebyine amagara biri kukoresa okisigeni nyingi munonga omu mwaka. Ebyine amagara nibishohoza omwika gwa kaboni. N’obu kiri kisyo, ebyine amagara tibiri kubasa kukoresa okisigeni ngu ehwe, kandi n’omwika gwa kaboni ti guri kubasa kuba mwingi munonga ngu gugire ebi gwashisha. Ahabw’enki twagamba tusyo? Ahabw’okuba Yehova akahanga otukoko tuke, oturi kuruga omu biti hamwe n’omu rubobi, oturi kukwata omwika gwa kaboni tukaguhinduramu okisigeni. Ahabw’okuba oko kwegarukamu kuri kutuma habaho omwika ogu turi kuhumeka, nitwikirizana n’ebigambo ebiri omu Byakozorwe 17:24, 25 ebiri kugira ngu: ‘Ruhanga aha abantu bona amagara n’omwika.’
6. Okwegarukamu kw’amizi ni enki, kandi shi ebyo ni enki eki biri kutuhamiza? (Nambwenu reba akashanduku akari kugira ngu: “ Ekiconco ca Yehova c’okwegarukamu kw’amizi.”)
6 Nitutunga amizi gari kushukika omu nsi ahabw’okuba eri omu mwanya guhikire aha gati yayo n’izoba. Ensi yahika izoba munonga amizi nigatagata munonga eco kituma abantu batabasa kuba omu nsi. Kandi ensi egire hare y’izoba ho kace, amizi nigafukirira kituma ensi yashwekwa n’orubare. Ahakuba Yehova yatire ensi omu mwanya oguhikire, okwegarukamu kw’amizi nikutuma okubaho omu nsi cabasika. Omushana nigutagasa amizi g’omu nyanja hamwe n’agandi rero garugamu omwika kandi ogo mwika gukora ebicu. Buri mwaka, omushana nigutagasa amizi garugamu omwika rero ogo mwika gukora ebicu na byo birugamu amizi mingi. Ago mizi nigamara hihi ebiro ikumi gatakagwire nk’enjura ninga shi orubare. Ago mizi nigagaruka gagwa omu nyanja ninga shi omu migera kandi oko ni ko okwegarukamu kuri kutura kubaho. Oko kwegarukamu nikutuhamiza ku Yehova ayine obwenge n’amani.—Yob 36:27, 28; Mub 1:7.
7. Ni buha buryo obu turi kubasa kwerekamu ku nitusima ahabw’ekiconco ekiri kugambwa omuri Zaaburi ya 115:16?
7 Ni bata oku turi kubasa kwereka ku nitusima ahabw’ensi ndungi n’ebintu ebiri kutangaza ebiyiriho? (Shoma omuri Zaaburi ya 115:16.) Oburyo bw’okubanza ni okutekateka aha bi Yehova yahangire. Eco nikituhiga kusima Yehova burizoba ahabw’ebirungi ebi ari kutuha. Kandi nitwereka ku nitwesimira ensi eyi yatuhire turi kuboneza ahu twakuba tutwire hona oku biri kubasika.
OBWONKO BWITU BW’OMUTANO
8. Ahabw’enki turi kubasa kugamba ku obwonko bwitu bukozirwe omu buryo oburi kutangaza?
8 Obwonko bw’omuntu bukozirwe omu buryo buri kutangaza. Obu wabire ori omu nda ya nyoko, obwonko bwawe bukagenda nibweyombeka kandi otucweka tuce tw’obwonko tusya tukaba nitwekora buri dakika! Abari kucondoza bakagamba ku obwonko bw’omuntu okuzire bwine otucweka tuce oturi kuhika ahari miliyoni 100 oturi kutwara amakuru. Otwo tucweka twona otukozire obwonko bwitu nitupima kilo eri kuhika ahari 1.5. Reka tushwijume bimwe omu bintu ebiri kutangaza ebi obwonko bwitu buri kutuma twakora.
9. Ni enki ekiri kukuhamiza ku obushoborozi bwitu bw’okugamba kiri ekiconco ekiri kuruga ahari Ruhanga?
9 Obushoborozi bwitu bw’okugamba ni ecokutangaza. Tekateka aha biri kubaho twaba turi kugamba. Twaba turi kugamba obwonko bwitu nibukorengana n’emisi eri kurenga 100 y’orurimi, enshaya, eminwa, amino n’ekifuba. Eyo misi yona nekorera hamwe kugira ngu ebigambo bihurirwe ninga shi obigambe ge. Tekateka aha bushoborozi bw’okugamba endimi; ekitabo ecahandikirwe omu mwaka gwa 2019 kikereka ku omwerere ari kubasa kukwata omu mutwe ebigambo byingi. Ebyo nibituhamiza ku omwana ari kuzarwa ayine obushoborozi bw’okumanya n’okwega endimi. Mazima, obushoborozi bwitu bw’okugamba ni ekiconco ekiri kuruga ahari Ruhanga.—Kur 4:11.
10. Ni bata oku turi kubasa kwereka ku nitusima Ruhanga ahabw’ekiconco c’okugamba?
10 Oburyo bumwe obu turi kubasa kwerekamu ku nitusima Yehova ahabw’ekiconco c’okugamba, ni okuburira abari kwikiriza ku ebintu byabireho biri kuruga omu bindi. (Zab 9:1; 1 Pet 3:15) Abo abari kwegesa eyo nyegesa y’ekishuba nibagamba ku ensi n’ebiyiriho byona bitarahangirwe ahobwe ngu bikabaho aha bwa butandu. Twakoresa Bibuli ninga shi enshonga nkuru eziri omuri eki kicweka, nitubasa kutonganirira Tata witu w’omwiguru kandi tushobororera abari kuba betegwire kumanya ahabw’enki turi kwikiriza ku Yehova ari Omuhangi w’iguru n’ensi.—Zab 102:25; Isa 40:25, 26.
11. Ni eha nshonga eri kutuma obwonko bwitu bwaba obw’omutano?
11 Obushoborozi bwitu bw’okwijuka nibutangaza. Omu myaka eyahwire, omushija omwe akagamba ku obwonko bw’omuntu buri kubasa kwijuka amakuru agari kubasa kwijuza ebitabo ebiri kurenga miliyoni 20. Obwe rero, nitwikiriza ku obwonko bwitu bwine obushoborozi bw’okwijuka ebintu byingi munonga. Buzima obushoborozi obu abantu bine ku ni obw’omutano!
12. Ni bata oku obushoborozi bwitu bw’okumanya ebintu buri kututanisa n’enyamishwa?
12 Omu byahangirwe byona ebiri omu nsi, omuntu wenka ni we oyine obushoborozi bw’okumanya kandi akijuka ebyabireho kare. Ebyo nibituma twayongera obumanyi, tumanya ebintu birungi, kandi tugira ebi twahindura omu ku turi kutekateka n’omu kubaho kwitu. (1 Kor 6:9-11; Kol 3:9, 10) Mazima, nitubasa kumanyiza omuntuwomunda witu kugira ngu atukwase kumanya kutanisa ekirungi n’ekibi. (Heb 5:14) Nitubasa kwega koreka rukundo, kutwaza ge n’okoreka embabazi. Nambwenu nitubasa kutoreza Yehova turi koreka oburinganiza.
13. Tukuratize ebiri kugambwa omuri Zaaburi ya 77:11, 12, ni bata oku tushemerire kukoresa ekiconco kitu c’okwijuka?
13 Oburyo bumwe obu turi kwerekamu ku nitusima Yehova ahabw’ekiconco c’okwijuka, ni okwijuka ebi yatukorire n’oku yatuhumurize. Eco nikituma twakizaho kwesiga ku arije n’okutukwasa omu biro by’omu misho. (Shoma omuri Zaaburi ya 77:11, 12; 78:4, 7) Obundi buryo ni okwijuka ebintu birungi ebi abandi bari kutukorera kandi tukabasima. Abari kucondoza bakashanga ku omuntu ori kusima ari kutura ashemerirwe. Nambwenu ni kirungi kutoreza Yehova tukagira ebi twayebwa. Ecokureberaho: N’obu Yehova ahikirire konka twayehana by’amazima nayebwa enshobe zitu ezi twakozire. (Zab 25:7; 130:3, 4) Kandi n’itwe ni co eki tushemerire kukorera abandi batushaba embabazi ahabw’enshobe ezi bari kutukorera.—Mat 6:14; Luk 17:3, 4.
Nitwereka ku nitusima Yehova ahabw’okutuha ekiconco c’obwonko turi kubukoresa omu kumuhisa ekitinisa (Reba paragurafu ya 14) *
14. Ni bata oku turi kubasa kwereka ku nitusima ahabw’ekiconco c’omutano c’obwonko?
14 Nitubasa kwereka ku nitusima ahabw’ekoconco c’obwonko turi kubukoresa omu kuhisa ekitinisa owabutuhire. Abamwe nibakoresa obwonko bwabo omu kweyendeza bari kweteraho emisinge yabo y’okukora ebi bari kweyendera. Konka ahabw’okuba Yehova ari we owatuhangire, ni yo nshonga eri kutuma tweyesiga ku emisinge eyi ari kututeraho eri mirungi kukira eyi turi kubasa kweteraho. (Rom 12:1, 2) Twabaho turi kukuratiza emisinge ya Yehova nitugira obusinge. (Isa 48:17, 18) Kandi nikituma twabaho twine entego y’okuhimbisa Omuhangi witu n’okumushemeza.—Enf 27:11.
BIBULI NI EKICONCO C’OMUTANO
15. Ni bata oku Bibuli eri kwereka ku Yehova ari kutukunda?
15 Bibuli ni ekiconco ekiri kwereka ku Ruhanga ari kutukunda. Tata ow’omu iguru Yehova akakoresa abantu ngu bayihandike ahabw’okuba natukunda munonga. Birabire ahari Bibuli, Yehova natuha ebyokugarukamu by’ebibuzo by’omugasho ebi turi kubasa kwebuza, nka: Tukaruga nkahe? Ni kiha kigendererwa c’amagara? Ni enki ekiribaho omu biro by’omu misho? Ahabw’okuba Yehova ari kwenda ngu abantu bona batunge ebyokugarukamu by’ebyo bibuzo, niyo nshonga yayikirize ngu Bibuli ehindurwe omu ndimi nyingi. Omuri obu bwire, Bibuli yona ninga shi ebicweka byayo nibiboneka omu ndimi eziri kurenga 3,000! Bibuli ni co kitabo ecahindwirwe omu ndimi nyingi, kandi kikahika aha bantu bingi omu nsi kukira ebindi bitabo byona. Ahu abantu bakuba batwire hona ninga shi orurimi rwona oru bari kugamba, nibaba bashemerire kwega Ekigambo ca Ruhanga omu rurimi rwabo.—Reba akashanduku akine omutwe oguri kugamba ngu: “ Bibuli ekaboneka omu ndimi z’omuri Afurika.”
16. Tukuratize ebiri omuri Matayo 28:19, 20, ni bata oku turi kubasa kwereka ku nitusima Yehova ahabw’okutuha Bibuli?
16 Nitubasa kwereka ku nitusima Yehova ahabw’okutuha Bibuli, turi kuyishoma burizoba, tukatekateka aha bi twashoma kandi tukabita omu bikorwa. Nambwenu, nitwereka ku nitusima Ruhanga turi kukora cona ekiri kubasika ngu tuburire abantu obutumwa oburi omuri Bibuli.—Zab 1:1-3; Mat 24:14; Shoma omuri Matayo 28:19, 20.
17. Ni biha biconco ebi twashwijuma omuri eki kicweka, kandi shi ni biha ebi turishwijuma omu kicweka ekiri kukurataho?
17 Omuri eki kicweka twashwijuma ebiconco ebi Yehova yatuhire nk’eka yitu, ni okugamba ensi, obwonko bwitu bw’omutano n’Ekigambo ca Ruhanga Bibuli. Konka hariho ebindi biconco ebi Yehova yatuhire ebi tutari kubasa kureba. Ebyo biconco ebi tutari kubasa kureba turyabishwijuma omu kicweka ekiri kukurataho.
ECESHONGORO CA 12 Yehova Ruhanga, Orikukirayo
^ par. 5 Eki kicweka caza kutukwasa kukizaho kwereka ku nitusima Yehova ahw’ebiconco bishatu ebi yatuhire. Nambwenu caza kutukwasa kumanya oku turi kubasa kuganira n’abantu abatari kwikiriza ku Ruhanga ariho.
^ par. 64 EBISHUSHANI: Omunyanyazi ari kwega orundi rurimi kugira ngu ayegese abafuruki amazima g’omu Kigambo ca Ruhanga.
