1. Ni enki eki Yesu yagambire aha butungi bw’omu iguru?

EBICONCO byona tibiri kurebwa. Ahobwe, ebiconco ebiri kukira ebindi tibiri kurebwa. Yesu ari aha rushozi, akagamba aha butungi bw’omu iguru oburi kukirira kimwe obutungi bw’omu nsi. Bwanyima akongeraho ati: ‘Ahi itungo ryawe riri, n’omutima gwawe niho guba.’ (Mat 6:19-21) Twareba ekintu c’obuguzi bwingi, nikituma twayenda kukitunga. Nitwebikira ‘itungo omu iguru’ turi kutunga izina rirungi ninga shi okugira obunywani burungi na Ruhanga. Yesu akashoborora ku obutungi nk’obwo, butari kubasa kuhwaho ninga shi kwibwa.

2. (a) Tukuratize ebiri omu 2 Bakorinso 4:17, 18, ni enki eki entumwa Paulo ari kutwehanangiriza kukora? (b) Ni enki eki twaza kushwijuma omuri eki kicweka?

² Entumwa Paulo natwehanangiriza ‘kuhanga amisho ebitari kurebwa.’ (Shoma omu 2 Bakorinso 4:17, 18.) Ebi bintu ebitari kurebwa birimu emigisha eyi turije kutunga omu nsi ensya. Omuri eki kicweka, twaza kushwijuma obutungi buna obu turi kutunga omuri obu bwire: Kugira obunywani na Ruhanga, ekiconco c’okushaba, obuyambi bw’omwika oguri kwera, n’obushagiki bw’omu iguru obu turi kutunga omu murimo g’okuburira. Twaza n’okureba oku turi kubasa kwereka ku nitusima ahabw’obu butungi obutari kurebwa.

3. Obutungi oburi kukira obundi ni buha, kandi shi ni enki ekiri kutukwasa kubutunga?

³ Obutungi obutari kurebwa oburi kukira obundi ni okugira obunywani na Yehova Ruhanga. (Zab 25:14) Mbwenu shi kikabasika Ruhanga kugira obunywani n’abantu abatahikire  akaguma ari ori kwera? Nikibasika ahabw’okuba ekitambo ca Yesu ‘nikihaho ekibi c’ensi’ y’abantu. (Yoh 1:29) Yehova akakimanya bucari kare ku Yesu yabire arije kuguma ari omwesigwa kuhisya aha kufa kugira ngu abantu bacungurwe. Ni yo nshonga Ruhanga yakunzire abantu ababireho Kristo atakafire.—Rom 3:25.

4. Gamba bamwe aha bantu ba kare ababire banywani ba Ruhanga.

⁴ Tekateka aha bantu ababire banywani ba Ruhanga. Abrahamu akaba ari omushija owabire ayine okwikiriza kuhamire. Hahwire emyaka eri kurenga 1,000 Abrahamu afire, Yehova akamweta ‘munywani weye.’ (Isa 41:8) Eco nikimanyisa ngu n’obu omuntu yakufa Yehova naguma ari kumureba nka munywani weye. Ahari Yehova, Abrahamu acahurire. (Luk 20:37, 38) Ondijo muntu owabire munywani wa Ruhanga ni Yobu. Obu ba marayika bayeterine hamwe, Yehova akagamba ebiri kukwata ahari Yobu. Yehova akamweta omushija ‘otine kabara kandi ohikirire, omushija orikutina Ruhanga, kandi orikwetantara ekibi.’ (Yob 1:6-8) Kandi shi ni bata oku Yehova yarebire Danieli, owamukorire omu bwesigwa omu ihanga ry’abantu ababire batari kuhereza Yehova omu myaka eri kuhika ahari 80? Ba marayika bakahamiza ogo mushija owabire akuzire ku ni ‘omushija owu Ruhanga ari kukunda.’ (Dan 9:23; 10:11, 19) Nitwesiga tutari kubanganisa ku Yehova ari kwendera kimwe kuzora banywani beye abafire.—Yob 14:15.

5. Kugira ngu tugire obunywani na Yehova ni enki eki tushemerire kukora?

⁵ Mbwenu shi ni abantu bangahe abatahikire abari banywani ba Yehova omuri obu bwire? Ni abantu abari kuhika omuri za miliyoni. Eco nitukimanya ahakuba abashija, abakazi, n’abana bingi omu nsi yona nibereka omu bikorwa ku bari kwenda kuba banywani ba Ruhanga. Yehova naba munywani w’abantu abine ‘omutima ogugororokire.’ (Enf 3:32) Nibaba banywani ba Yehova ahabw’okwikiriza ekitambo ca Yesu. Ahabw’eco kitambo, Yehova natwikiririza kumweha kandi tukabatizibwa. Twatera ezo ntambwe, nituza omu Bakristo bingi abayehire Yehova, bakabatizibwa kandi hati abine obunywani burungi n’Omuntu ori kukira byona omu iguru n’omu nsi!

6. Ni bata oku turi kubasa kwereka ku nitureba obunywani bwitu na Ruhanga nk’obw’omuhendo?

⁶ Ni bata oku turi kubasa kwereka ku nitureba obunywani bwitu na Ruhanga nk’obw’omuhendo? Nka Abrahamu na Yobu, abamazire emyaka myingi bari abesigwa ahari Ruhanga, obwire bwona obu twakuba tumazire turi kuhereza Yehova, tushemerire kuguma twine okwikiriza kuhamire. Nka Danieli, tushemerire kureba obunywani bwitu na Ruhanga nk’obw’omuhendo kukira amagara gitu. (Dan 6:7, 10, 16, 22) Yehova nayija kutukwasa kwehanganira ebigezo byona ebi turi kubasa kubugana kandi tugume twine obunywani burungi na we.—Fil 4:13.

7. (a) Tukuratize ebiri omu Nfumu 15:8, ni bata oku Yehova ari kureba eshara zitu? (b) Ni bata oku Yehova ari kugarukamu eshara zitu?

⁷ Obundi butungi obutari kurebwa ni eshara. Abanywani ba hihi nibaganira bagambirana oku bari kwehurira. Mbwenu shi ni ko kiri aha bunywani bwitu na Yehova? Yego! Yehova nagamba n’itwe ari kukoresa Ekigambo ceye, atugambira ebitekateko byeye n’enyehurira zeye. Nitugamba na we kurabira omu kushaba, tumugambira ebitekateko byitu by’omu mutima n’enyehurira zitu. Yehova nashemerererwa kuhurira eshara zitu. (Shoma omu Nfumu 15:8.) Munywani witu Yehova tari kuhurira eshara zitu kusha, ahobwe nanazigarukamu.  Hine obu ari kugarukamu eshara zitu juba. Obundi hine obu turi kubasa kugumizamu kushaba ekintu emirundi myingi. Konka nabwo, nituba twine obwesige ku eshara zitu ziri kugarukwamu ge omu bwire obuhikire. Obumwe, Ruhanga nabasa kutugarukamu omu buryo obu tutari kutekateka. Ecokureberaho: Omu mwanya g’okwihaho ekigezo, nabasa kutuha obwenge n’amani by’okutukwasa kucehanganira.—1 Kor 10:13.

8. Ni bata oku turi kubasa kwereka ku nitusima ahabw’ekiconco c’eshara?

⁸ Ni bata oku turi kubasa kwereka ku nitusima ahabw’ekiconco c’eshara? Oburyo bumwe obu turi kubasa kwerekamu ku nitusima ni okorobera obuhabuzi bw’‘okushaba obutosha.’ (1 Tes 5:17) Yehova tari kutugema kumushaba. Omu mwanya gw’eco, natuha obugabe bw’okweshariramu kandi atwehanangiriza ngu ‘tugumizemu kushaba tuhamire.’ (Rom 12:12) Obwe rero nitubasa kwereka ku nitusima turi kushaba burizoba. Nambwenu, titushemerire kwebwa kusima n’okuhimbisa Yehova omu shara zitu.—Zab 145:2, 3.

9. Ni bata oku mwenetata omwe yagambire aha kushaba, kandi shi iwe noreba ota okushaba?

⁹ Oku turi kumara obwire turi kuhereza Yehova kandi tukareba oku ari kugarukamu eshara zitu, ni ko turi kukizaho kumusima ahabw’ekiconco c’eshara. Reka turebe ecokureberaho ca mwenetata ori kwetwa Chris owamazire emyaka 47 ari omu murimo g’obwire bwona. Akagamba ati: “Ninyimuka omu kasheshe kare munonga kugira ngu nshabe Yehova. Ku nikihumuriza kugamba na Yehova nk’oku izoba riri kwaka rikaboneza ebintu byona! Eco nikituma namusima ahabw’ebiconco byona ebi yatuhire harimu omugisha g’okumushaba. Ku ndi kumara kumushaba omu mwebazyo, ninyama nyine omuntuwomunda murungi.”

10. Ahabw’enki tushemerire kureba omwika oguri kwera gwa Ruhanga nk’ekiconco?

¹⁰ Amani ga Ruhanga ni bumwe omu butungi obutari kurebwa obu tushemerire kureba nk’obw’omuhendo. Yesu akatwehanangiriza kuguma turi kushaba omwika oguri kwera.  (Luk 11:9, 13) Yehova natuha omwika gweye omu kutuha ‘amani agari kukirira kimwe.’ (2 Kor 4:7; Byak 1:8) Amani g’omwika gwa Ruhanga nigatukwasa kwehanganira ebigezo ebi turi kubugana.

11. Ni bata oku omwika oguri kwera guri kutukwasa?

¹¹ Omwika oguri kwera nigutukwasa kukora emirimo egumire omu buhereza bwa Ruhanga. Omwika gwa Ruhanga nigutukwasa kongera aha bushoborozi bwitu bw’okukora ekintu. Nigutukwasa kukora ge emirimo y’ekibina. Ebirungi byona ebi turi kutunga omu murimo gwa Yehova ni ahabw’obuyambi bw’omwika gwa Ruhanga.

12. Tukurarize ebiri omuri Zaaburi ya 139:23, 24, nitubasa kushaba omwika oguri kwera ngu gutukwase kukora ki?

¹² Obundi buryo obu turi kubasa kwerekamu ku nitureba omwika oguri kwera gwa Ruhanga nk’og’omuhendo ni okushaba Yehova ngu atukwase kumanya ebitekateko n’ebyetengo bibi byona ebiri omu mutima gwitu. (Shoma omuri Zaaburi ya 139:23, 24.) Twashaba Yehova omwika gweye, nigutukwasa kumanya ebetekateko bibi ebi twine. Kandi twamanya ku twine ebitekateko n’ebyetengo bibi, tushemerire kushaba Ruhanga ngu atukwase kubyeyihamu. Twakora eco nituba turi kwereka ku twamaririre kwerinda ekintu cona ekiri kubasa kutuma Yehova atatuha omwika gweye oguri kwera.—Efe 4:30.

13. Ni bata oku turi kubasa kwereka ku nitukizaho kusima ahabw’omwika oguri kwera?

¹³ Nitukizaho kwereka ku nitusima ahabw’omwika oguri kwera turi kutekateka aha bintu ebi guri kukora omuri obu bwire. Yesu atakagarukire omu iguru, akagambira abegi beye ati: ‘Muryahebwa amani, [omwika] oguri kwera ku guriheza kubijaho, kandi muryaba bakarebi bange okuhisya aha muheru gw’ensi.’ (Byak 1:8) Ebyo bigambo biri kuhikirira omuri obu bwire bwenyine. Ahabw’obuyambi bw’omwika oguri kwera, abari kuramya Yehova abari kurenga miliyoni munana n’ekicweka bakaruga omu mahanga gona. Nambwenu, nitushemerererwa paradiso y’eby’omwika ahakuba omwika gwa Ruhanga nigutukwasa  kugira emitwarize mirungi, nka rukundo, okushemererwa, obusinge, okwehangana, embabazi, oburungi, obwesigwa, obucurezi, n’okwerinda. Eyo mitwarize ni yo ‘byana by’[omwika].’ (Gal 5:22, 23) Omwika oguri kwera ku ni ekiconco c’omutano!

14. Ni buha buyambi obutari kurebwa obu turi kutunga twaba turi omu murimo g’okuburira?

¹⁴ Twine obundi butungi obutari kurebwa bw’‘okukora’ na Yehova hamwe n’ekibina ceye c’eby’omu iguru. (2 Kor 6:1) Nitukora na bo twaba turi omu murimo g’okuhindura abantu abegi. Paulo akegambaho n’abandi abari kwekwatanisa omuri ogu murimo ati: ‘Turi abakozi abakora hamwe, nitukorera Ruhanga.’ (1 Kor 3:9) Nambwenu twaba turi kwekwatanisa omu murimo g’okuburira, nituba turi kukora hamwe na Yesu. Yijuka ku obu Yesu yahire abakurasi beye ekiragiro c’‘okuhindura abantu abegi,’ akabagira ati: ‘Ndi hamwe n’imwe.’ (Mat 28:19, 20) Kandi shi ba marayika? Ku ni omugisha kuba turi kwebemberwa ba marayika twaba turi kuburira ‘engiri y’ebiro n’ebiro abatura omu nsi’!—Kush 14:6.

15. Gamba ecokureberaho c’omuri Bibuli ekiri kwereka ku Yehova ari kutukwasa omu murimo g’okuburira.

¹⁵ Ni enki eki twahikireho ahabw’obuyambi bw’omu iguru? Twabiba embibo z’Obukama, hine eziri kugwa aha mitima mirungi kandi zitandike kumera. (Mat 13:18, 23) Ni enki ekiri kutuma ezo mbibo z’amazima zamera kandi zikana ebyana? Yesu akagamba ati: ‘Tihariho orikubasa kwija ahari inye, Tata owantumire yaba atamwirize hihi.’ (Yoh 6:44) Bibuli negamba ebyokureberaho ebiri kukishoborora. Yijuka obwire obu Paulo yaburire abakazi ababire bari aheru y’orurembo rwa Filipi. Yetegereze oku Bibuli eri kugamba aha mukazi omwe omuri bo owabire ari kwetwa Ludia: ‘Yehova yigura omutima gwe okweta aha bigambo ebyagambwa Paulo.’ (Byak 16:13-15) Nka Ludia, abantu bingi bakirira hihi ya Yehova.

16. Ni oha oshemerire kuhimbisibwa ahabw’ebirungi ebi turi kutunga omu murimo g’okuburira?

¹⁶ Mbwenu shi ni oha oshemerire kuhimbisibwa ahabw’ebirungi ebi turi kutunga omu murimo g’okuburira? Paulo akagarukamu eco kibuzo obu yahandikire Abakristo b’omuri Korinso ati: ‘Nyowe nkabyara, Apolo yitirira amizi, konka Ruhanga ni we owabikurize. Ni ahabw’eco ori kubyara ti kintu, n’obu yakuba ori kwitirira amizi, kureka Ruhanga okuza.’ (1 Kor 3:6, 7) Nka Paulo, tushemerire kuhimbisa Yehova ahabw’ebirungi ebi turi kutunga omu murimo g’okuburira.

17. Ni bata oku turi kubasa kwereka ku nitusima ahabw’omugisha g’‘okukora’ na Ruhanga, Yesu na ba marayika?

¹⁷ Ni bata oku turi kubasa kwereka ku nitusima ahabw’omugisha g’‘okukora’ na Ruhanga, Yesu na ba marayika? Nitwereka ku nitusima turi kukora cona ekiri kubasika kugira ngu tugambire abandi obutumwa burungi. Hariho oburyo bwingi obu turi kubasa kukikoramu; nk’okuburira ‘omu misho ga bona n’aha nju n’enju.’ (Byak 20:20) Abandi nibakunda kuburira batakigenderire. Babugana omuntu owu batari kumanya nibamuramusa ge kandi batandika kuganira na we. Omuntu yayikiriza kugamba, nibatandika kumugambira obutumwa bw’Obukama omu bwenge.

18-19. (a) Ni bata oku turi kushucera amizi embibo z’amazima? (b) Gamba ecokureberaho ekiri kwereka oku Yehova yakwasize omwegi omwe wa Bibuli.

¹⁸ Nk’‘abakozi abari kukora na Ruhanga,’ titushemerire kubyara embibo z’amazima omu mitima y’abantu kusha, ahobwe tushemerire  n’okushucera amizi. Omuntu yayereka ku nayenda kwega, oshemerire kukora cona ekiri kubasika okore entebekanisa n’ondijo muburizi mugaruke kutayayira ogo muntu mwine entego y’okutandika kumwegesa Bibuli. Nitushemererwa twareba Yehova ari kukwasa omwegi wa Bibuli kukora empinduka.

¹⁹ Reba ecokureberaho ca Raphalalani, owabire ari omufumu omuri Afurika y’amashuma. Akakunda ebi yabire ari kwega omuri Bibuli. Konka kwikiriza eki Ruhanga ari kugamba aha kugamba n’abafire kikamugumira. (Bir 18:10-12) Mporampora, akikiriza ngu Ruhanga ahindure ebitekatebo byeye. Ku hahwire obwire akareka ebikorwa byona by’obufumu, n’obu ari go omurimo ogu yabire ayine kusha. Hati, Raphalalani oyine emyaka 60 y’obukuru, akagamba ati: “Ninsima munonga Abahamya ba Yehova ahabw’okunkwasa omu buryo bwingi, nk’okunkwasa kubona omurimo. Ekiri kukira byona, ninsima munonga Yehova ahabw’okunkwasa kuhindura amagara gange, nkatandika kwekwatanisa omu murimo g’okuburira ndi Omuhamya weye obatizibwe.”

20. Ni enki eki waza kumaririra kukora?

²⁰ Omuri eki kicweka, twareba obutungi buna obutari kurebwa. Oburi kukira obundi ni omugisha g’okugira obunywani bwa hihi na Yehova. Obwo bunywani nibutuma twagasirwa omu bundi butungi bwona obutari kurebwa; okumuhika hihi omu kushaba, okutunga obuyambi bw’omwika gweye oguri kwera, n’okutunga obuyambi bw’omu iguru omu murimo g’okuburira. Reka tumaririre kukizaho kwereka ku nitusima ahabw’obu butungi obutari kurebwa. Kandi reka tugumizemu turi kusima Yehova ahabw’okuba omunywani witu ori kukira abandi bona.