Ezo nyiriri nizereka emitwarize mwenda eyi Omukristo ashemerire kwereka; ‘Ebyana by’omwika ni byo ebi: Okukunda, okushemererwa, obusinge, okugumisiriza, embabazi, oburungi, obwesigwa, obucurezi, n’okwerinda.’ Konka titushemerire kureba eyo mitwarize nk’eri kukirana ninga ngu tugire eyi twayehuzya.

Eco nitukimanya tuta? Yetegereze eki entumwa Paulo yagambire omu nyiriri ezabandize ezo ngu: ‘Emirimo y’obuzarwa bw’omubiri ni yo eyi: Obushambani, ebirikwisa enshoni, okurigira okubi, okuramya ebishushani, okuroga, obuzigu, okurwana, ihari, ekiniga, empaka, okwebaganisamu, okurwanira orubaju, okwangirana, obusinzi, okurara encera, n’ebindi nk’ebyo.’ (Gal 5:19-21) Paulo akahendera ari kugamba ngu ‘n’ebindi nk’ebyo,’ nk’ebiri kugambwa omu Bakolosai 3:5. Ni co kimwe ku yaherize kugamba emitwarize mwenda mirungi nabwe akagamba ngu: ‘Ebiri nk’ebyo tihariho kiragiro ekiri kubizibira.’ Obwe rero Paulo taragambire emitwarize yona emirungi eyi turi kubasa kwereka ahabw’obuyambi bw’omwika oguri kwera.

Ebyo nitubishoborocerwa twabigeranisa n’ebi yahandikire ekibina c’omuri Efeso ari kugira ngu: ‘Ebyana by’omushana bireberwa omu burungi bwona n’omu kuhikirira n’omu mazima.’ (Efe 5:8, 9) Buzima, “oburungi” otwariremu okuhikirira n’amazima, na byo ni bimwe omu ‘byana by’omushana,’ nambwenu “oburungi” ni kimwe omu byana by’omwika.

Ekiri kushushana n’eco Paulo akarabura Timoseo aha mitwarize mukaga ari kumugira ngu: ‘Oyetantare ebyo; okuratire okuhikirira n’okutina Ruhanga, okwikiriza, okukunda, okugumisiriza, n’obucurezi.’ (1 Tim 6:11) Ishatu kusha omuri eyo, ni okugamba okwikiriza, okukunda, n’obucurezi ni yo eri kugambwa omu byana by’omwika. Konka nambwenu Timoseo akaba ashemerire kwereka emitwarize nk’okuhikirira, okutina Ruhanga, n’okugumisiriza.—Kol 3:12; 2 Pet 1:5-7.

Obwe rero omu Bagalatia 5:22, 23 tihari kugamba emitwarize yona eyi Abakristo bashemerire kwereka. Omwika oguri kwera nigubasa kutukwasa kukizaho kwereka ebyo byana by’omwika mwenda. Konka hariho endijo mitwarize myingi eyi tushemerire kugira ngu tube Abakristo abakuzire omu by’omwika kandi ‘tujware omuntu ondijo omusya, owahangirwe omu nshusha ya Ruhanga omu kuhikirira n’okwera okw’amazima.’—Efe 4:23.