TWENA nitwesiga ku Yehova ari kwebembera abahereza beye kandi ku ari kubaha eki bari kwetenga cona ngu bagume bahamire omu by’omwika omuri ebi ‘biro by’emperu.’ (2 Tim 3:1) Konka tushemerire twena kuba turi korobera Yehova. Nitubasa kugeranisa embera ezi turimu n’ezi Abaisraeli babire barimo omu butayo. Bakaba bashemerire kugira eki bakora bahurira iraka ry’enzamba.

Yehova akashaba Musa kuhesha enzamba ibiri omu ifeza kugira ngu ‘agume azetese ihanga ry’Abaisraeli n’okuzimukisa abari omu rusisira’ ngu bagende. (Kub 10:2) Abatambi bakaba nibatera enzamba omu buryo obutari kushushana bari kwenda kwereka abantu eki Yehova ari kwenda ngu bakore. (Kub 10:3-8) Omuri obu bwire, abahereza ba Ruhanga nibatunga obuhabuzi omu miringo etari emwe. Yetegereze emiringo ishatu eri kutwijusya oku enzamba zabire niziterwa omuri Israeli ya kare. Abahereza ba Ruhanga omuri obu bwire nibetwa ngu bateranire hamwe, abareberezi abatorinwe nibamanyizibwa, kandi entebekanisa za kitewokurasi z’omu kibina nizigenda nizihinduka.

Yehova ku yabire ari kwenda ngu ihanga ryona riteranire hamwe aha muryango gw’ihema ry’okubuganiramu aha rubaju rw’oburugwizoba, abatambi bakaba nibatera enzamba zombi. (Kub 10:3) Enganda zona, ezabire zetorwire ihema ry’okubuganiramu omu bicweka bina, zikaba nizihurira eryo raka ry’enzamba. Ababire batwire hihi aho bakaba nibahika bari kwija omu dakika nce. Abandi ababire bari hare bakaba bari kubasa kukoresa obwire buringwa kandi bataho amani kugira ngu bahike aho. Ba kuba bari hare ninga bari hihi Yehova akaba ari kwenda ngu bona babuganire hamwe bagasirwe.

Omuri obu bwire, tituri kubuganira ah’ihema ry’okubuganiramu, konka nitwetwa ngu tubuganire hamwe nk’abahereza ba Ruhanga. Nitubuganira omu biterane n’ebiterane ebihango, n’omu zindi ntebekanisa z’omutano aho turi kutungira enyegesa n’obuhabuzi bw’omuhendo. Omu nsi yona abahereza ba Yehova nitushemerererwa kuba twine entebekanisa emwe. Obwe rero abo bona abari kwija omuri ezo ntebekanisa nibatunga okushemererwa. Abamwe nibaba bine kukora orugendo ruringwa. Konka, abo abari kwija tibari kwefuza ahabw’amani agu bari kutaho ngu bekwatanise omuri ezo ntebekanisa.

Mbwenu shi abo abatwire omu tucweka twa hare bo nibagasirwa bata? Ahabw’ebyoma bya karimagezi na bo nibagasirwa bari kukuratira puroguramu emwe kandi na bo bahurira bari hamwe n’abo benetata na banyanyazi. Ecokureberaho: omu bwire bw’okutayayirwa n’entumwa ya ofisi nkuru, puroguramu yabire eri omuri Benin, ekaba nekuratirwa na benetata b’omuri Arlit, Niger, n’ab’omu matawuni g’omu butayo bwa Sahara. Benetata na banyanyazi n’abandi bakagasirwa omu kwekwatanisa omuri eyo  ntebenkanisa. N’obu babire bari hare bakehurira ku bari hamwe na benetata na banyanyazi 44,131 ababire bari omuri eco kiterane. Mwenetata omwe akahandika ngu: “Ninsima mbyihire aha mutima ahabw’okutukwasa tukakuratira eyo puroguramu. Nambwenu kikatwereka oku benetata bari kutukunda.”

Abatambi b’omuri Israeli ku babire nibatera enzamba emwe, ‘abebembezi, n’abakuru b’enganda z’Abaisraeli’ kusha, bakaba nibahika bari kwija aha ihema ry’okubuganiramu. (Kub 10:4) Musa akaba nabahisyaho obutumwa kandi abamanyisa ebirugire ahari Yehova. Obwo buyambi bukaba nibubakwasa kuhikiriza omurimo gwabo omu nganda zabo. Mbehi kuri wabire ori omwe omuri abo bebembezi, okaba otari kubasa kukora ekiri kubasika cona ngu obe oriho otunge obwo buhabuzi?

Omuri obu bwire abazehe b’omu kibina ti ‘abebembezi’ kandi tibari kutegekesa ikama obusyo bwa Ruhanga baba bari kubufaho. (1 Pet 5:1-3) Konka nibagezaho kukora eki bari kubasa ngu barise ge obusyo bwa Ruhanga. Kandi nibetwa kugira ngu batunge okumanyizibwa nk’okwetwa omu Ishomero ry’omurimo g’obukama. Omuri eryo shomero abazehe nibegeramu oku bari kubasa kufa aha mirimo y’omu kibina. Eco nikituma bona bakura omu by’omwika. N’obu wakuba otakegagaho ago mashomero abaryegire nibabasa kukuyamba.

Abatambi b’Abaisraeli obwo bwire bakaba nibatera enzamba omu iraka eriri kuhindahinduka. Eco kikaba nikimanyisa Abisraeli ku Yehova ari kwenda ngu bafuruke. (Kub 10:5, 6) bakaba nibagenda aha ntebekanisa kuruga omu rusisira, konka kikaba niketengesa amani ahari buri omwe. Obumwe abamwe bakaba batari kumanya n’enshonga babafurura. Ahabw’enki?

Abamwe ku babire nibahurira enzamba y’okufuruka kikaba nikibatungura ahabw’okuba bakaba batari kukimanya. Obumwe ekicu kikaba ‘nikigumaho okwiha omu mwebazo okuhisya omu kasheshe.’ Obundi bwire ‘ekicu kikaba nikimaraho ebiro bibiri, okwezi, nari omwaka’ kituma baguma omu rusisira bareka kugenda. (Kub 9:21, 22) Konka shi bakafurukira omu myanya ingahe? Omu kicweka ca 33 c’omu Kubara nihagambwamu emyanya 40 eyi Abaisraeli bafurukiremu.

Hariho obu abamwe babire bari kubasa kutunga omwanya g’okutahamu konka guri kutinisa. Kutura omuri ogo mwanya oguri kutinisa kikaba nikishaba okwerinda munonga. (Bir 1:19) Omu rugendo rwabo bakaba nibabuganamu ebizibu rero kituma batekateka ku kufuruka kiri kutuma babaho kubi.

Enganda ku zabire zitandika kufuruka ezindi zabire zishemerire kwehangana kugira ngu zibanze zimare kugenda. Bona bakaba nibahurira iraka ry’enzamba eriri kuhindahinduka konka bakaba batari kufurukira obwire bumwe. Eryo raka ry’enzamba eriri kuhindahinduka rikaba niryereka ku enganda ezitwire oburugwizoba harimu oruganda rwa Yuda, Isakaari, na Zebuluuni zikaba zishemerire kuhika nizigenda. (Kub 2:3-7; 10:5, 6) Abo ku babire nibaheza kufuruka, abatambi nambwenu bakaba nibatera enzamba omu iraka eriri kuhindahinduka omurundi gwa kabiri bari kumanyisa ku oruganda rwa kashatu orwabire ruri omu mashuma narwo rwaza kugenda. Abatambi bakaba nibagumizamu kukikora kuhisya enganda zona zaheza kugenda.

Nobasa kutacenga ge enshonga ahabw’enki ebintu omu kitongore byaza kuhinduka. Kandi nobasa kwehurira kubi wahurira ku hariho ebintu ebihindukire. Nangwa nobasa kuhurira washemererwa ahabw’okugira ngu ebintu tibyahinduka. Omuri ezo nshonga zona tihariho n’emwe eshemerire kutuma otayehanganira kukuratiza ezo mpinduka. Tushemerire kureba ku ezo mpinduka zitwinire omugasho kandi ku nizituma twahimbisa Yehova.

Omu bwire bwa Musa Yehova akebembera abantu bingi harimu abashija, abakazi, n’abana bari omu butayo. Kuri Yehova atarabafireho ngu abahabure bakaba batararokoke! N’itwe omuri obu bwire, obuhabuzi oburi kuruga ahari Yehova nibuturinda omu by’omwika. Mazima natwebembera omuri ebi biro by’aha mperu! Mbehi tituri kubasa kukora cona ekiri kubasika ngu twikirize empinduka eziri kubaho omu kitongore kitu nk’oku Abaisraeli ba kare b’abesigwa babire nibakikora!