1. Ni enki eki Yehova yakorire buri omwe omuri itwe?

YEHOVA akeyihiriza hihi buri omwe omuri itwe. (Yoh 6:44) N’iwe kitekatekeho. Yehova ku yayetegerize abantu bingi abari omuri egi nsi, akareba ku ori ow’omuhendo kandi ku ori kubasa kumukunda. (1 Bus 28:9) Yehova nakumanya, nakuhurira kandi nakukunda. Eco ku nikituhumuriza!

2. Ni bata oku Yesu yayerekira oku Yehova ari kureba buri muhereza weye?

² Yehova nakufaho munonga kandi nafa n’ahari benetata na banyanyazi bona. Yesu akereka eco ari kugeranisa Yehova n’omurisa. Ni enki eki omurisa ari kukora entama 1 ku eri kuruga omu busyo bw’entama 100? ‘Nasiga ziri makumi mwenda na mwenda aha [mushozi], aza kusherura eyo erazire.’ Omurisa ku ari kugibona, tari kugitirwa ekiniga, ahobwe nashemererwa. Ebyo nibitwegesa ki? Buri muhereza wa Yehova wena ni ow’omuhendo ahari we. Yesu akagamba ati: ‘Ni ko na Tata ori omu iguru atari kwenda omwe ahari aba bato kuhwerecerera.’—Mat 18:12-14.

3. Ni enki eki twaza kushwijuma omuri eki kicweka?

³ Mazima nituba tutari kwenda ngu tukore ebintu ebiri kumaramu amani benetata na banyanyazi. Mbwenu shi nibata oku turi kubasa kwerinda kuteza abandi ensibo? Kandi shi ni enki turi kubasa kukora hagira owatugwisa kubi. Twaza kushwijuma ebyo bibuzo omuri eki kicweka. Konka, reka tubanze twege ebiri kukwata aha “bato” abari kugambwa omuri Matayo ekicweka ca 18.

4. “Abato” ni baha?

⁴ “Abato” ni abegi ba Yesu bona. Oku bakuba bari kwingana  kona bona ni ‘nk’abana bato’ ahakuba nibikiriza ngu Yesu abegese. (Mat 18:3) N’obu bari omu mbera ezitari kushushana, bine emicwe etari kushushana, kandi bari kureba ebintu omu buryo obutari kushushana bona nibikiriza Kristo. Na we nabakunda munonga.—Mat 18:6; Yoh 1:12.

5. Ni bata oku Yehova ari kwehurira hagira owateza ensibo omuhereza weye ninga shi akamushasha?

⁵ “Abato” bona ni ab’omuhendo ahari Yehova. Kugira ngu tumanye oku ari kutukunda, tekateka aha ku turi kukunda abana. Ni ab’omuhendo ahari itwe. Nituba turi kwenda ngu tubarinde ahakuba batine amani, batari kumanya byingi, kandi batine obwenge nk’obw’abantu abakuzire. Nitwehurira kubi twareba omuntu ari kubonabonesa ondijo, konka nitukizaho kwehurira kubi yaba ari kubonabonesa omwana. Yehova na we nayenda kuturinda kandi neyehurira kubi hagira owateza ensibo omuhereza weye ninga shi akamushasha!—Isa 63:9; Mak 9:42.

6. Tukuratize ebiri omu 1 Bakorinso 1:26-29, ni bata oku ensi eri kureba abegi ba Yesu?

⁶ Ni buha buryo obundi obu abegi ba Yehova bari nk’“abato”? Mbwenu shi, ni baha abu ensi eri kureba nk’ab’omugasho? Ni abagiga, ba ruranganwa, n’ab’obushoborozi. Konka, ensi nereba abegi ba Yesu nk’“abato,” abatine omugasho kandi nk’abashema. (Shoma omu 1 Bakorinso 1:26-29.) Konka Yehova we ti ko ari kubareba.

7. Ni bata oku Yehova ari kwenda ngu turebe benetata na banyanyazi?

⁷ Yehova nakunda abahereza beye bona, emyaka yona eyi bakuba bamazire omu mazima. Benetata na banyanyazi bona ni ab’omuhendo ahari Yehova, obwe rero bashemerire kuba ab’omuhendo ahari itwe. Nitwenda ‘kukunda benetata’ bona, batari bamwe omuri bo. (1 Pet 2:17) Tushemerire kukora cona eki turi kubasa kugira ngu tubarinde kandi tubafeho. Twamanya ku twakorera omuntu ekintu ekiri kumushasha, titushemerire kubyehuza turi kutekateka ku ashemerire kubyebwa akatusaasira. Ahabw’enki abamwe bari kubasa kwehurira kubi? Ahabw’okuba benetata na banyanyazi bari kuba bakurire omu mbera ezitari kushushana, hine obu abamwe bari kwehurira bari ab’ahaasi. Abandi nibaba bari basya omu mazima, obwe rero nibaba batakamanyire oku bashemerire kwehanganira okutahikirira kw’abandi. Oku byakuba biri kona, tushemerire kukora cona eki turi kubasa ngu tureteho obusinge. Nambwenu, omuntu ori kukira kugubwa kubi ahabw’abandi ashemerire kumanya ku gutari omutwarize murungi kandi ku ashemerire kugweyihamu. Ashemerire kukikora kugira ngu agire obusinge bw’omu mutima kandi agire obunywani burungi na benetata.

8. Ni guha mutwarize ogu abantu b’omu bwire bwa Yesu babire bine ogwakwasire n’aha begi beye?

⁸ Ahabw’enki Yesu yagambire aha biri kukwata aha “bato”? Abegi beye bakaba bamuburize ngu: ‘Omukuru omu Bukama bw’omu iguru ni oha?’ (Mat 18:1) Omuri obwo bwire Abayudaya bingi bakaba nibereba nk’abari kukira abandi. Omunyabwenge omwe akagamba ati: “Abantu bakaba nibenda ngu abandi babahe ekitinisa kandi ngu babe ba ruranganwa.”

9. Ni enki eki abegi ba Yesu babire bashemerire kukora?

⁹ Yesu akaba namanya ku abegi beye babire bashemerire kutaho amani mingi kugira ngu beyihemu omutwarize g’okwereba  n’abari kukira abandi ogu Abayudaya bingi babire bine. Akabagambira ati: ‘Omukuru omuri imwe abe nk’omuto; kandi ori kutegeka abe nk’ori kuhereza.’ (Luk 22:26) Nituba “nk’omuto,” ‘twasima mugenzi witu okukira oku turi kwesima.’ (Fil 2:3) Ku turi kugira ogo mutwarize, tituri kuteza abandi ensibo.

10. Ni buha buhabuzi bwa Pawulo obu tushemerire kuguma turi kwijuka?

¹⁰ Benetata na banyanyazi bona hine ahu bari kutukira. Eco kukireba nikitworobera twata omutima aha mitwarize yabo mirungi. Tushemerire kuguma turi kwijuka obuhabuzi obu entumwa Pawulo yahire Abakorinso ari kugira ati: ‘Ni oha ori kukuhindura ow’omutano aha bandi? Kandi oyine ki eki otarahirwe? Mbwenu ku orabe wakihirwe, ahabw’enki noyehimbisa nk’otarakihirwe?’ (1 Kor 4:7) Obwe rero, tushemerire kwerinda kwetekatekaho munonga ninga kuhurira turi kukira abandi. Mwenetata yaba ari kuhereza ge toku ninga shi omunyanyazi ayine ekiconco c’okwegesa abegi ba Bibuli bingi, bona bashemerire kuhimbisa Yehova omu mwanya g’okwehimbisa.

11. Ni enki eki Yesu yabire ari kwegesa obu yagambire ecokureberaho c’omugabe n’omugaragwa weye?

¹¹ Bwanyima y’obwire buce Yesu arabwire abakurasi beye kutateza abandi ensibo, akabagambira ecokureberaho c’omugabe n’omugaragwa weye. Ogo mugabe akasaasira omugaragwa weye ibanja eri yabire atari kubasa kushashura. Bwanyima, ogo mugaragwa akanga kusaasira omugaragwa mugenzi weye ibanja rice eri yabire amwinire. Eco kikatuma omugabe yata omu kihome ogo mugaragwa otine embabazi. Ebyo nibitwegesa ki? Yesu akagamba ati: ‘Ni ko Tata ow’omu iguru aribagira asyo, ku muriba mutasaasire bagenzi banyu, mwihire aha mutima.’—Mat 18:21-35.

12. Ni enki ekiri kubaho twaba tutasaasire omuntu?

¹² Ebi omugaragwa yakozire bikamushasha kandi byashasha n’abandi. Akanga kugirira embabazi mugenzi weye ari ‘kumuta omu kihome okuhisya obu [yabire] araheze ibanja.’ Nambwenu, akashasha abandi bagaragwa abarebire ebyabaho. ‘[Abagaragwa] bagenzi beye ku barebire ebyabaho, bakamugwerwa kubi munonga.’ Ni co kimwe, emitwarize yitu neshasha n’abandi. Ni enki ekiri kubaho twaba tutasaasire omuntu? Nitumushasha ahakuba hine n’obu turi kumwetantara, ninga twanga kumwereka rukundo. Nambwenu nikishisha obusinge bw’ab’omu kibina bareba tutine obusinge n’ogo muntu.

13. Ni enki eki ori kwegera aha byahikire aha mupayoniya omwe?

¹³ Ku turi kusaasira benetata na banyanyazi nikibagasira kandi kigasira n’abandi. Ni co ecahikire aha mupayoniya omwe ori kwetwa Crystal. * Hine omunyanyazi w’omu kibina owamugwisize kubi. Crystal akagamba ati: “Hine obu ebigambo byeye byabire nibincumita nk’omusyo. Nkaba ntari n’okwenda kugenda na we omu murimo g’okuburira. Kikatuma natandika kubura amani omu murimo g’okuburira kandi nabura n’okushemererwa.” Crystal akahurira ayine enshonga ndungi eziri kutuma yagubwa kubi. Konka tarehorire ninga ngu agume ari kwetekatekaho. Akata omu nkora obuhabuzi oburi omu Munara g’Omurinzi gw’aha kiro ca 15 Okwikumi, 1999, omu kicweka ekiri kugira ngu, “Saasira  obyihire aha mutima.” Akasaasira ogo munyanyazi. Crystal akagira ati: “Nkareba ku twena turi kutaho amani kugira ngu tujware omuntu omusya kandi ku Yehova ari kutusaasira buri izoba. Nkahurira naruhuka. Nkashuba natunga okushemererwa.”

14. (a) Tukuratize ebiri omuri Matayo 18:21, 22, ni kiha kizibu eki entumwa Petero ari kubasa kuba yabire ayine? (b) Ni enki eki turi kubasa kukora twaba turi omu mbera nk’ezeye?

¹⁴ Nitumanya ku tushemerire kusaasira kandi ku kiri ekintu kirungi eki tushemerire kukora. Konka nikiba kitorobi. Nikibasa kuba cabire kitorobire n’entumwa Petero. (Shoma omuri Matayo 18:21, 22.) Mbwenu shi ni enki ekiri kubasa kutukwasa? Ec’okubanza, tekateka aha ku Yehova yakusaasire. (Mat 18:32, 33) Titushemerire okusaasire kweye, konka nakutuhera ahabwa busha. (Zab 103:8-10) Obwe rero ‘n’itwe tushemerire kukundana.’ Okusaasira ti ekintu eki turi kweshariramu. Twine ibanja rya benetata na banyanyazi ry’okubasaasira. (1 Yoh 4:11) Eca kabiri, tekateka aha biri kuruga omu kusaasira abandi. Nikikwasa otushobize, kiretaho obumwe omu kibina, kirinda obunywani bwitu na Yehova kandi kituma twaruhuka. (2 Kor 2:7; Kol 3:14) Nambwenu, shabira owakushaba embabazi. Otayikiriza ngu Sitaane ashishe obusinge obu oyine n’Abakristo bagenzi bawe. (Efe 4:26, 27) Nitwetenga obuyambi bwa Yehova kugira ngu tutagwa omu mutego gwa Sitaane.

15. Tukuratize ebiri omu Bakolosai 3:13, ni enki eki turi kubasa kukora mwenetata ninga munyanyazi yatutwariza kubi kikatushasha munonga?

¹⁵ Konka shi, nobasa kukora ki Omukristo mugenzi wawe yakutwariza kubi kikakushasha? Kora cona eki ori kubasa ngu oreteho obusinge. Gambira Yehova oku ori kwehurira omu kushaba. Mushabe ngu ahe omugisha ogo muntu okutwarize kubi kandi akukwase kumurebamu emitwarize  mirungi eyi ari kumurebamu. (Luk 6:28) Yaba otari kubasa kwebwa eki mwenetata yakukorire, ronda oburyo burungi obu ori kubasa kuganiramu na we. Nikiba kirungi waguma kutekateka ku mwenetata yaba atagenderire kukutwariza kubi. (Mat 5:23, 24; 1 Kor 13:7) Waganira na we, yeshushanirize ku ari kukwendeza ebirungi. Kandi shi ku yakuba atari kwenda kuretaho obusinge? Gumizamu kumwehanganira. Gumizamu otegerize obwire obu ariretaho obusinge. (Shoma omu Bakolosai 3:13.) Ekiri kukira byona otaribika enzika ahakuba nikibasa kushisha obunywani bwawe na Yehova. Otariyikiriza ekintu cona kukuteza ensibo. Ku orakikore basyoya, noba wayereka ku nokunda Yehova okukira ekindi kintu cona.—Zab 119:165.

16. Ni enki eki buri omwe omuri itwe ashemerire kukora?

¹⁶ Nikitushemeza kuba turi kuhereza Yehova turi “obusyo bumwe” kandi twine ‘omurisa omwe’! (Yoh 10:16) Omu kitabo Abari kukora ebi Yehova ari kukunda, ahari peji ya 165, nihagira ngu: “Ahakuba ori kushemerererwa obwo bumwe, oshemerire kutaho akawe ngu bugumeho.” Ni yo nshonga tushemerire “kwemanyiza kureba benetata na banyanyazi nk’oku Yehova ari kubareba.” Yehova nareba “abato” bona nk’ab’omuhendo. Mbehi ni ko ori kureba benetata na banyanyazi? Ebi ori kukora byona ngu obakwase Yehova nabireba kandi nabikusimira.—Mat 10:42.

17. Ni enki eki twamaririra kukora?

¹⁷ Nitukunda Abakristo bagenzi bitu. Obwe rero ‘nituhamiza kimwe okutateza [mwenetata] ensibo, ninga okukora ekiri kumugwisa.’ (Rom 14:13) Nitureba benetata na banyanyazi nk’abari kutukira kandi nituba twetegwire kubasaasira twihire aha mutima. Tutariyikiriza ngu abandi batuteze ensibo. Ahobwe, nimureke ‘tukuratire ebiri kureta obusinge n’okombekana.’—Rom 14:19.