EKICWEKA C’OKWEGA 23
Tori wenka ahakuba Yehova ari hamwe n’iwe
‘Yehova ari hihi na bona abari kumutakira.’—ZAB 145:18.
ECESHONGORO CA 28 Okuba Munywani wa Yehova
EMPINYE *
1. Ni biha bintu ebiri kubasa kutuma bamwe omu Bahamya ba Yehova bayehurira bari bonka?
ABINGI omuri itwe hine obu turi kwehurira turi twenka. Abamwe nibabasa kumara obwire buce bine ezo nyehurira. Abandi bo, nibabasa kumara obwire buringwa. Nitubasa kuhurira turi twenka n’obu twakuba turi hamwe n’abandi bantu. Abamwe nikibasa kubahikaho baza omu kibina kisya. Abandi nibabasa kuba barakurire omu ka erimu abantu abari kukwatanisa, konka bahurira bari bonka babaza hare. Kandi abandi nibabasa kuhurira basisire omuntu wabo owu bari kukunda owafire. Nambwenu Abakristo abegire amazima juba nibabasa kuhurira bari bonka, abanyabuzare babo n’abanywani babo abatari kuramya Yehova babanga kandi bakabahiganisa.
2. Ni biha bibuzo ebi twaza kutungira ebyokugarukamu?
2 Yehova namanya byona ebiri kutukwataho. Twayehurira turi twenka naba ari kukimanya kandi naba ari kwenda kutukwasa kwehanganira ezo nyehurira. Ni bata oku Yehova ari kutukwasa? Ni enki eki tushemerire kukora? Kandi shi ni enki tushemerire kukora kugira ngu tukwase abandi b’omu kibina abari kuhurira bari bonka? Reka turebe ebyokugarukamu by’ebyo bibuzo.
YEHOVA NATUFAHO MUNONGA
Yehova akatuma marayika ngu ahamize Eliya ku atari wenka (Reba paragurafu ya 3)
3. Ni bata oku Yehova yeyerekire ku nafa ahari Eliya?
3 Yehova nafa aha bahereza beye bona n’ebiri kubakwataho. Ari hihi ya buri omwe omuri itwe kandi twaba twine enyehurira eziri kubasa kutumaramu amani naba ari kubireba. (Zab 145:18, 19) Reba oku Yehova yafire aha muhanuzi weye Eliya. Ogo muhanuzi akabaho omu bwire bw’Abisirayeli obwabire bugumire. Abangi ba Yehova bakahiganisa abahereza beye kandi Eliya ni we owu babire bari kwenda munonga. (1 Bag 19:1, 2) Nambwenu ekiri kubasa kuba catumire Eliya yayehurira ari wenka, akaba natekateka ku ari we omuhanuzi wa Yehova owabire asigireho. (1 Bag 19:10) Ruhanga akahika ari kugira eki yakora yakwasa Eliya. Yehova akohereza marayika yahamiza ogo muhanuzi weye ku atari wenka, ahobwe ku hariho abandi Bisirayeli bingi ababire bari kutina Ruhanga!—1 Bag 19:5, 18.
4. Ni bata oku omuri Mako 10:29, 30 hari kwereka oku Yehova ari kufa aha bahereza beye abayefererize obuyambi bw’abanyabuzare babo n’abanywani babo abatari kuramya Yehova?
4 Yehova namanya ku abamwe omuri itwe abari kusharamu kumuhereza bari kweferereza ebintu byingi. Omuri ebyo harimu obuyambi bw’abanyabuzare bitu n’abanywani bitu abatari kuramya Yehova. Petero nabasa kuba yabire atinire, rero yabuza Yesu ngu: ‘Reba itwe tukasigayo byona twakukuratira; mbwenu turyatunga ki?’ (Mat 19:27) Yesu akahamiza abakurasi beye ku babire barije kutunga eka mpango y’eby’omwika. (Shoma omuri Mako 10:29, 30.) Kandi Yehova, ari we omwebembezi w’eka yeye y’eby’omwika, naraganisa ku arije kukwasa abari kumuhereza. (Zab 9:10) Reba ebi ori kubasa kukora waba ori kuhurira ori wenka.
EBI ORI KUBASA KUKORA WABA ORI KUHURIRA ORI WENKA
5. Ni bata oku ori kugasirwa wagumizamu kutekateka aha ku Yehova ari kukukwasa?
5 Guma ote omutima aha ku Yehova ari kukukwasa. (Zab 55:22) Eco nikija kukukwasa kugira emitekatecere eringanire aha mbera ezi orimu. Omunyanyazi ocari wenka ori kwetwa Carol *, ori Omuhamya omwe omu ka yabo, akagira ati: “Ku ndi kugarura amisho enyima nkatekateka aha ku Yehova yanshagikire, mazima nimpurira ntari nyenka. Kandi nikimpamiza ku Yehova arije kunkwasa n’omu biro by’omu misho.”
6. Ni bata oku ebiri omuri 1 Petero 5:9, 10 biri kugumya abari kuhurira bari bonka?
6 Guma otekateke aha ku Yehova ari kukwasa Abakristo bagenzi bawe abari kuhurira bari bonka. (Shoma omuri 1 Petero 5:9, 10.) Mwenatata Hiroshi, owamazire emyaka myingi ari Omuhamya omwe omu ka yabo, akagira ati: “Waba ori omu kibina, noshangamu benetata na banyanyazi abari kuraba omu mbera zigumire. Okumanya ku twena turi kukora cona eki turi kubasa ngu tuhereze Yehova nikigumya abari bonka omu mazima.”
7. Ni bata oku eshara eri kukukwasa?
7 Guma oyine entebekanisa y’eby’omwika. Omuri ebyo harimu okugambira Yehova oku ori kwehurira otari kumushereka. (1 Pet 5:7) Omunyanyazi ori kwetwa Massiel akasharamu kuhereza Yehova, konka yayehurira ari wenka ahakuba ab’omu ka yeye bakaba batari kuhereza Yehova. Akagamba ati: “Ecankwasize kwehanganira enyehurira z’okuhurira ndi nyenka ni okushaba Yehova. Akambera Tata ow’amazima kandi nkaba nimushaba buri izoba ndi kumugambira oku ndi kwehurira.”
Okuhurira amaraka ga Bibuli n’ag’ebindi bitabo ebiri kwegesa Bibuli nikibasa kukwasa abari kuhurira bari bonka kutuza (Reba paragurafu ya 8) *
8. Ni bata oku okushoma Bibuli n’okugitekatekaho kiri kukukwasa?
8 Guma otekateke aha Kigambo ca Ruhanga kandi otekateke aha nkuru eziri kwereka ku Yehova ari kukukunda. Bianca, owu ab’omu ka yeye bari kugambira ebintu ebiri kumucwa entege, akagamba ati: “Okushoma Bibuli n’okutekateka aha nkuru z’abahereza ba Yehova ababugine ebizibu nk’ebyange kikankwasa.” Abakristo abamwe nibakwata omu mutwe ebyahandikirwe ebiri kuhumuriza, nka Zaaburi ya 27:10 na Isaaya 41:10. Abandi nibahurira ebikwasirwe amaraka baba bari kutebekanisa enterane ninga kushoma Bibuli, kandi kibakwasa kuhurira batari bonka.
9. Ni bata oku kwekwatanisa omu nterane kiri kukugasira?
9 Guma oyekwatanise omu nterane burijo. Noyija kugasirwa na toku eziri kombeka, kandi okizeho kumanyana na benetata na banyanyazi. (Heb 10:24, 25) Massiel, owu tugambireho, akagira ati: “N’obu nabire ninkira kugira enshoni, nkasharamu kwekwatanisa omu nterane zona n’okuhayo ebitekateko. Eco kikankwasa kuhurira nyine omwanya omu kibina.”
10. Ahabw’enki tushemerire kugira obunywani n’Abakristo b’abesigwa?
10 Gira obunywani burungi n’Abakristo bagenzi bawe. Ronda abanywani omu kibina abu ori kubasa kwegeraho, n’obu mwakuba mutari kwinganisa omu myaka ninga shi mutari kushushanisa omucwe. Bibuli netugambira ku ‘abahikize emyaka myingi’ bine obwenge. (Yob 12:12) Abakuzire na bo nibabasa kwegera byingi aha bacari bato. Dawudi akaba ari muto ahari Yonasani, konka tikirabazibire kugira obunywani buhamire. (1 Sam 18:1) Dawudi na Yonasani bakayambayambana omu kuhereza Yehova n’obu babire bari kubugana ebizibu bishambire. (1 Sam 23:16-18) Omunyanyazi ori kwetwa Irina ori Omuhamya omwe omu ka yabo, akagira ati: Benetata na banyanyazi nibabasa kuba abazire bitu n’abu turi kuzarwa na bo b’eby’omwika. Yehova nabasa kubakoresa omu kutuha ebi turi kwetenga.”
11. Ni enki eki oshemerire kukora kugira ngu ogire obunywani burungi na banywani bawe?
11 Okugira abanywani abasya nikibasa kuguma na munonga twaba twine enshoni. Ratna, omunyanyazi oyine enshoni owayegire amazima bari kumuhiganisa, akagamba ati: “Nkareba ku nabire nshemerire kukwasa benetata na banyanyazi b’omu kibina.” Nikiba kigumire kugambira omuntu oku ori kwehurira, konka ku ori kukikora nikituma mwagira obunywani burungi. Abanywani bawe nibaba bari kwenda kukukwasa n’okukugumya, konka nibenda ngu obagambire ekizibu eki oyine.
12. Ni bata oku omurimo g’okuburira guri kutuma wagira abanywani barungi?
12 Oburyo burungi bw’okugiramu abanywani ni okwekwatanisa n’Abakristo bagenzi bitu omu murimo g’okuburira. Carol, owu tugambireho, akagira ati: “Nkatunga abanywani bingi ahabw’okwekwatanisa n’abanyanyazi omu murimo g’okuburira n’omu bindi bikorwa bya kitowokurasi. Yehova akagumizamu kunkwasa akoresize abo banywani.” Okugira abanywani b’abesigwa b’Abakristo niharugamu ebirungi byingi. Yehova nakoresa abo banywani omu kukukwasa kwehanganira embera zigumire harimu nk’okuhurira ori wenka.—Enf 17:17.
KWASA ABANDI KUHURIRA BARI AB’OMU KIBINA
13. Ni guha murimo ogu buri omwe omu kibina ayine?
13 Twena omu kibina twine omurimo g’okuretaho rukundo n’obusinge ahu buri omwe ari kuhurira atasigirweho. (Yoh 13:35) Ebi turi kukora n’ebi turi kugamba nibibasa kugaruramu abandi amani! Omunyanyazi omwe akagamba ati: “Ku nayegire amazima, nkahurira ndi ow’omu kibina. Kuri batarankwasize, nkaba ntarije kuba Omuhamya wa Yehova.” Ni enki eki ori kubasa kukora kugira ngu okwase abari Abahamya bonka omu maka gabo kugira ngu bahurire bari ab’omu kibina?
14. Ni bata oku turi kubasa kuhamya obunywani bwitu n’abandi?
14 Ba ni iwe owaba omunywani w’okubanza. Nitubasa kutandika kukikora turi kwakira abacari basya omu kibina tushemerirwe. (Rom 15:7) Konka tushemerire kukora ekiri kukira aha kubakura kusha. Nituba turi kwenda ngu tuhamye obunywani bwitu na bo. Obwe rero, gezaho kubakira oshemerirwe kandi obereke ku nobafaho. Gezaho kumanya ebizibu ebi bari kurabamu, konka otari kubatahatahamu. Abamwe nikibagumira kugamba oku bari kwehurira, obwe rero otabagema ngu bakugarukemu. Omu mwanya gw’eco, babuze omu bwenge kandi obahurikize oyetonzire. Ecokureberaho: Nobasa kubabuza oku bamanyire amazima.
15. Ni bata oku Abakristo abakuzire omu by’omwika bari kukwasa abandi omu kibina?
15 Ab’omu kibina bona nibagira entunguka, Abakristo abakuzire omu by’omwika na munonga abazehe ku bari kubafaho. Melissa, owakurire omu mazima ayambirwe na nyina, akagira ati: “Tindi kubasa kubona oburyo bw’okusimamu benetata abayerekire ku nibanfaho omuri eyi myaka yona eyi namara. Hona ahu ndi kwendera kugamba, nimba nyine ow’okugamba na we.” Mwenetata ocari muto ori kwetwa Mauricio, owahurire ari wenka omwegesa weye wa Bibuli ku yafukirire, akagira ati: “Abazehe bakereka ku nibanfaho, kandi kikankwasa munonga. Bakaba nibagamba nanye burijo. Bakaba nibakora nanye omurimo g’okuburira, bangambira ebi bayegire omuri Bibuli kandi bazana nanye.” Melissa na Mauricio bombi bakahika bahereza Yehova omu murimo g’obwire bwona.
Mbehi omu kibina cawe harimu omuntu ori kubasa kushemererwa wamukorera ebikorwa bya rukundo kandi okamara obwire na we? (Reba paragurafu ya 16-19) *
16-17. Ni buha buryo obu ori kubasa kukwasamu abandi omu bikorwa?
16 Kwasa abandi omu bikorwa. (Gal 6:10) Omumishonari ori kwetwa Leo, otwire hare y’owabo, akagira ati: “Hine obu ori kuba ori kwetenga kukorera omuntu ekikorwa kice ca rukundo. Ninyijuka izoba rimwe obu natungire butandu. Nkahika nataha, konka nkaba ndi kwehurira kubi. Konka bwanyima eka emwe ekanyeta ngu turye hamwe. Tindi kwijuka ebi twarire, konka tindiyebwa oku banfireho kandi bakampurikiza. Bwanyima y’ebyo, nkehurira ge!”
17 Nitukunda obwire obu turi kumara omu biterane ahakuba nitubumara turi kuganira n’abandi aha bi twayega. Konka, Carol, owu tugambireho akagira ati: “Naba ndi omu biterane, tindi kwehurira ge.” Ahabw’enki ari kwehurira basyoya? Akagamba ati: “N’obu hari kuba hariyo benetata na banyanyazi bingi, nibaba bari n’ab’omu maka gabo. Eco nikituma nakizaho kwehurira ndi nyenka.” Abandi baba bamazire obwire buce baferirwe omukundwa wabo, nikibagumira kuza omu kiterane. Mbehi hine owu ori kumanya ori kuraba omu mbera nk’ezo? Mbehi tori kubasa kumweta kugira ngu ayekwatanise n’eka yanyu omu kiterane?
18. Ni bata oku turi kubasa kuta omu nkora ebiri omu 2 Bakorinso 6:11-13 twayakira abantu omu maka gitu?
18 Guma omare obwire na benetata na banyanyazi. Gezaho kweta benetata na banyanyazi omu mirimo eri kubuganisa abantu, na munonga abari kuhurira bari bonka. Nitwenda kwigurira emitima abantu abari nkabo. (Shoma omu 2 Bakorinso 6:11-13.) Melissa owu tugambireho akagira ati: “Tukaba nitushemererwa benetata na banyanyazi ku babire nibatweta omu maka gabo ninga shi kuza kurambura hamwe.” Mbehi hine omuntu w’omu kibina canyu owu ori kubasa kwakira omu ka yawe?
19. Ni ryari obu okumara obwire n’Abakristo bagenzi bitu kiri kubakwasa?
19 Hine obwire obu Abakristo bari kubasa kukizaho kushemererwa twamara obwire na bo. Abamwe nikibagumira kuba hamwe n’ab’omu maka gabo abatari kuramya Yehova omu biro bikuru by’abapagani. Abandi nibehurira kubi munonga bahika aha biro by’okwijuka obwire obu batasine n’abakundwa babo abafire. Ku turi kumara obwire na benetata na banyanyazi abari kuraba omuri ebyo bizibu, nituba twayereka ku ‘nitubafaho.’—Fil 2:20.
20. Ni bata oku ebigambo bya Yesu ebiri omuri Matayo 12:48-50 biri kutukwasa twayehurira turi twenka?
20 Hariho ebintu byingi ebiri kubasa kutuma Omukristo yayehurira ari wenka. Konka, titushemerire kwebwa ku Yehova ari kumanya ge ezo nyehurira. Natuha ebi turi kwetenga akoresize Abakristo bagenzi bitu. (Shoma omuri Matayo 12:48-50.) N’itwe nitwereka ku nitusima Yehova ahabw’eyo ntebekanisa eri kwereka rukundo turi kukora cona eki turi kubasa ngu tukwase Abakristo bagenzi bitu. Oku twakuba turi kwehurira kona, tituri twenka ahakuba Yehova ari hamwe n’itwe!
ECESHONGORO CA 46 Nitukwebaza Yehova
^ par. 5 Mbehi hine obu ori kuhurira ori wenka? Caba ari ko kiri, yesige otari kubanganisa ku Yehova ari kumanya embera ezi orimu kandi ku ayetegwire kukukwasa. Omuri eki kicweka, twaza kushwijuma eki ori kubasa kukora kugira ngu oyehanganire enyehurira z’okuhurira ori wenka. Nambwenu, twaza kwega oku ori kubasa kukwasa Abakristo bagenzi bawe abari kuhurira bari bonka.
^ par. 5 Amazina agamwe gakahindurwa.
