HAKAHWA emyaka myingi Abisirayeli bari kushashura esente z’okushagika okuramya kw’amazima. Konka omu bwire bwa Yesu kikagumira Abayudaya kushashura emishoro ahakuba bakaba nibashashura myingi.

Kugira ngu haboneke esente z’okushagika okuramya okwabire nikukorerwa ah’ihema, Abayudaya bona b’abashija abakuzire bakaba nibashashura kimwe ca kabiri ca shekeli (dariki ibiri). Omu kinyigana c’okubanza, eyo mishoro ekaba nekoresibwa omu mirimo y’omuri hekalu eyi Herode yayombekire. Abayudaya bamwe bakabuza Petero oku Yesu yabire ari kureba ebikwatirine n’okushora, kandi Kristo tarabihakanisize. Ahobwe, akagambira Petero ahu yabire arabone esente z’okushashura omushoro.—Mat 17:24-27.

Nambwenu abahereza ba Ruhanga bakaba nibashashura ogundi mushoro oguri kwetwa kimwe c’ikumi c’ebi basharwire ninga shi c’esente zabo. (Lev 27:30-32; Kub 18:26-28) Abebembezi b’edini bakaba nibagema abantu kushashura eco ‘kimwe c’ikumi c’eshogi, anisi na kumino.’ Yesu taragambire kubi ahari kimwe c’ikumi, konka akagamba kubi aha buryo obu abahandiki n’Abafarisayo babire nibakishaba abantu.—Mat 23:23.

Nambwenu Abayudaya bakaba nibashashura emishoro myingi Abaroma ababire bari kubategeka omuri obwo bwire. Emwe omuri eyo mishoro ekaba eri ey’ebibanja byabo kandi bakaba nibayishashurira omu sente ninga omu bintu. Abantu bakaba nibashashura ebiri ahagati ya 20 kuhika ahari 25 ahari igana. Nambwenu hakaba hariho omushoro ogu buri Muyudaya yabire nashashura. Ni go omushoro ogu Abafarisayo babire bari kubuzaho Yesu. Akereka oku tushemerire kureba eby’okushashura emishoro ari kugamba ati: ‘Ebya Kayisari mubihe Kayisari, n’ebya Ruhanga mubihe Ruhanga.’—Mat 22:15-22.

Nambwenu hakaba hariho omushoro ogu babire nibaka ababire nibatasya ebintu omu mwanya gumwe ninga ababire nibabyihamu. Bakaba nibashabira ogo mushoro aha nyambukiro, orutindo, ahu emihanda eri kubuganira, ninga shi aha marembo g’etawuni ninga ag’obutare.

Omushoro ogu Abaroma babire nibashoresa abantu gukaba guri mwingi kandi guri kuremera. Omunyabwenge omu by’amateka w’Omuroma owabire ari kwetwa Tacitus, owabireho omu bwire bw’omutegeki Tiberiyo, omu bwire bwa Yesu akagamba ati: “Abantu b’omuri Siriya n’omuri Buyudaya bakashaba ngu bashashure omushoro muce ahakuba gukaba gubaremerire.”

Nambwenu oburyo obu babire nibashoresamu eyo mishoro bukatuma abantu babaho batashemerirwe. Omurimo g’okushoresa gukaba niguhebwa omuntu yabanza kushashura esente nyingi. Na we akaba nataho abandi bashoresa, kandi bona bakaba nibaka abantu esente nyingi. Zakayo na we nabasa kuba yabire ayine abandi bashoresa. (Luk 19:1, 2) Mazima abantu bakaba batamirwe kushora emishoro kandi bakaba nibanga abo bashoresa.