EKICWEKA C’OKWEGA 39
Ekiri kubasa kukuhumuriza omuntu owu ori kukunda yareka kuhereza Yehova
‘Ka ni kingi obu bamugwisize kubi ahataturwa bantu!’—ZAB 78:40.
ECESHONGORO CA 102 ‘Hwera Abataine Maani’
EMPINYE *
1. Ni bata oku omuntu ari kwehurira hagira ow’omu ka yeye owabingwa omu kibina?
MBEHI hine omuntu owu ori kukunda owabingirwe omu kibina? Mazima, eco nikishasha munonga! Omunyanyazi ori kwetwa Hilda * akagamba ati: “Omushija wange ku yafire tumarine emyaka 41, nkatekateka ku ni co kintu ekiri kushasha munonga omu bintu byona ebyarambireho. Konka mutabani wange ku yabingirwe omu kibina kandi akasigaho eka yeye, kikanshasha munonga.”
Yehova namanya obusaasi oburi kuretwa n’omuntu owareka kumuhereza (Reba paragurafu ya 2-3) *
2-3. Tukuratize ebiri omuri Zaaburi ya 78:40, 41, ni bata oku Yehova ari kwehurira abahereza beye bareka kumukorera?
2 Tekateka oku Yehova yayehurire obu bamwe omuri ba marayika basigireho eka yeye y’omu iguru! (Yud 6) Nambwenu tekateka oku yabire nashasha ku yabire nareba abahereza beye abu yabire nakunda, ni okugamba Abisirayeli bari kumugomera. (Shoma omuri Zaaburi ya 78:40, 41.) Obwe rero, yesige otari kubanganisa ku Tata witu w’omu iguru ari kushasha yareba omuntu owu ori kukunda yareka kumuhereza. Namanya obusaasi obu ori kurabamu. Nayija kukugumya kandi akuhe obuyambi obu ori kwetenga.
3 Omuri eki kicweka, twaza kureba eki turi kubasa kukora ngu tutunge obuyambi bwa Yehova, owu turi kukunda yareka kumuhereza. Nambwenu twaza kureba oku turi kubasa kukwasa ab’omu kibina abine ebizibu nk’ebyo. Konka, reka tubanze turebe emitekatecere mibi eyi tushemerire kwerinda.
YERINDE KWECWERA ORUBANJA
4. Ni bata oku abazire bari kwehurira omwana wabo yareka kukorera Yehova?
4 Omwana ku ari kureka kuhereza Yehova, abazire beye nibabasa kwebuza yaba hine eki batarakozire ngu bakwase ogo mwana wabo kuguma omu mazima. Mutabani wa mwenetata Luke ku yabingirwe omu kibina, Luke akagamba ati: “Nkecwera orubanja. Nkatandika kurota ebiroto bibi. Hine obu nabire nindira kandi ngira obusaasi omu mutima.” Munyanyazi Elizabeth, na we owahikirweho embera nk’ezo, akaba natekateka ku hine enshobe ezi yakozire nk’omuzire. Akagamba ati: “Nkatekateka ngu tindegesize ge omwana wange kukunda Yehova.”
5. Ni oha ori kuba ashobize hagira owareka kuhereza Yehova?
5 Tushemerire kwijuka ku twena Yehova yatuhire ekiconco c’okweshariramu. Eco nikimanyisa ku turi kubasa kusharamu kumworobera ninga tukamugomera. Abana bamwe ababire batine abazire b’ecokureberaho kirungi, bakasharamu kukorera Yehova kandi bagumizamu kuba abesigwa ahari we. Kandi abandi ababire bine abazire abari kubegesa emisinge ya Bibuli bakareka kukorera Yehova. Buri omwe ashemerire kusharamu kuhereza Yehova ninga shi kutamuhereza. (Yos 24:15) Obwe rero bazire mwe, mutariyecwera orubanja ngu ni ahabw’okuba abana banyu barekire kuhereza Yehova!
6. Ni bata oku abana bari kwehurira abazire babo ku bari kureka kuhereza Ruhanga?
6 Obumwe, abazire ku bari kuruga omu mazima, nibasigaho n’ab’omu maka gabo. (Zab 27:10) Eco nikishasha abana ababire nibareba abo bazire nk’ecokureberaho. Esther, owu ishe yabingirwe omu kibina, akagamba ati: “Nkaba nintura ndi kurira ahakuba nkaba nimanya ku yarecera kimwe kuhereza Yehova. Ninkunda munonga tata, obwe rero ku yabingirwe omu kibina nkaguma ndi kutekateka aha ku abireho. Nkaba nintura nyemerize omutima.”
7. Ni bata oku Yehova ari kwehurira yareba abana abine abazire ababingirwe omu kibina?
7 Imwe bana mwe, yaba abazire banyu babingirwe omu kibina, nitushasha n’imwe! Nyabura mwe mwesige mutari kubanganisa ku Yehova ari kumanya obusaasi bwanyu. Nabakunda kandi nabasima ahabw’okuguma muri abesigwa, kandi n’itwe benesho na banyanyazi banyu nitubakunda. Nambwenu, mwijuke ku atari imwe abine enshobi ahabw’ensharamu y’abazire banyu. Nk’oku tukirebire, Yehova akaha buri omwe obugabe bw’okweshariramu. Kandi buri muhereza weye owamwehire kandi akabatizibwa, ashemerire ‘kwekorera omutwaro gweye wenka.’—Gal 6:5.
8. Ni enki eki ab’omu ka bari kubasa kukora baba bategerize omuntu wabo owabingirwe omu kibina kugarukira Yehova? (Nambwenu reba akashanduku akari kugira ngu: “Garukira Yehova.”)
8 Omuntu owu ori kukunda ku ari kureka kuhereza Yehova, noguma oyine emasiko ku arije kumugarukira. Ni enki eki ori kubasa kukora obwo bwire butakahikire? Nobasa kukora cona eki ori kubasa ngu ogume oyine okwikiriza kuhamire. Ku orakikore basyoya, noyija kuteraho ecokureberaho kirungi agandi maka kandi okiteraho n’ababingirwe. Nambwenu noyija kutunga amani g’okwehanganira obusaasi. Reka turebe bimwe omu bintu ebi ori kubasa kukora okwikiriza kwawe kukakizaho kuhama.
EBI ORI KUBASA KUKORA NGU OGUME OYINE OKWIKIRIZA KUHAMIRE
9. Ni enki eki turi kubasa kukora ngu tugume twine okwikiriza kuhamire? (Nambwenu reba akashanduku akari kugira ngu: “Ebyahandikirwe ebiri kukuhumuriza omuntu owu ori kukunda yareka kuhereza Yehova.”)
9 Guma oyine entebekanisa ndungi y’eby’omwika. Ku oragumizemu kombeka okwikiriza kwawe n’okw’ab’omu ka yanyu nikija kukugasira. Ni bata oku ori kubasa kukikora? Guma oyine entebekanisa y’okweshomesa Ekigambo ca Ruhanga n’okukitekatekaho kandi oyekwatanise omu nterane. Joanna, owu mukuru weye hamwe n’ishe barugire omu mazima, akagamba ati: “Nimpurira nturize ku ndi kushoma enkuru z’omuri Bibuli nk’eya Abigayili, Esiteri, Yobu, Yosefu na Yesu. Ebyokureberaho byabo nibituma naguma nyine ebitekateko birungi ebiri kunkwasa kucendeza obusaasi bwange. Nambwenu, ebyeshongoro ebishangirwe by’aha rubuga rwitu nibingumya.”
10. Ni bata oku ebiri omuri Zaaburi ya 32:6-8 biri kutukwasa kwehanganira obusaasi obu twine?
10 Gambira Yehova obusaasi bwawe bwona. Waba ori kwehurira kubi otareka kumushaba. Shaba Ruhanga ori kukukunda akukwase kureba ebintu nk’oku ari kubireba kandi ‘akuhabure omuhanda ogu oritora.’ (Shoma omuri Zaaburi ya 32:6-8.) Ni amazima, kugambira Yehova oku ori kwehurira nikibasa kukugumira. Konka Yehova namanya ge oku ori kwehurira omu mutima. Nakukunda munonga kandi nakushaba ngu omugambire byona ebikuri aha mutima.—Kur 34:6; Zab 62:7, 8.
11. Tukuratize ebiri omu Baheburaayo 12:11, ahabw’enki tushemerire kwikiriza oku Yehova ari kuhana? (Nambwenu reba akashanduku akari kugira ngu: “Okubinga omuntu omu kibina nicereka rukundo eyi Yehova ari kutukunda.”)
11 Shagika ensharamu z’abazehe. Okubinga omuntu omu kibina ni entebekanisa ya Yehova. Oku ari kuhana nibigasira twena harimu n’abakozire ebibi. (Shoma omu Baheburaayo 12:11.) Abamwe nibabasa kugamba ku abazehe bakozire ensharamu mbi bari kuhana okozire ekibi; konka yijuka ku abo bantu batari kugamba ebibi ebi ogo muntu akozire. Nituba tutari kumanya amazima gijwire. Obwe rero, tushemerire kwesiga ku abazehe bari kuba bakuratize Ebyahandikirwe baba bari kuramurira ‘[Yehova].’—2 Bus 19:6.
12. Ni bata oku abamwe bagasirwe ahabw’okorobera entebekanisa ya Yehova y’okuhana?
12 Ku ori kushagika ensharamu y’abazehe y’okubinga omu kibina omuntu owu ori kukunda, nomukwasa kugarukira Yehova. Munyanyazi Elizabeth owu tugambireho, akagira ati: “Kikatugumira kureka kwekwatanisa n’omwojo witu owabingirwe. Konka ku yagarukire Yehova, akagamba ku cabire kihikire kumubinga. Ku hahwire obwire, akagamba ku yayegire amashomo g’omugasho. Nkija kumanya ku Yehova ari kutuhana aha bwa rukundo.” Omushija weye Mark, akongeraho ati: “Bwanyima, mutabani witu akangambira ku ari kwenda kugaruka omu ka ahakuba tutarayekwatanisize na we na kace. Mazima nitusima Yehova ahakuba yatukwasize kuguma turi kumworobera.”
13. Ni enki ekiri kubasa kukukwasa kwehanganira ebiri kukushasha?
13 Ganira n’omunywani ori kubasa kweta omu mwanya gwawe. Yekwatanise n’Abakristo abakuzire omu by’omwika abari kubasa kukukwasa kugira emitekatecere mirungi. (Enf 12:25; 17:17) Munyanyazi Joanna, owu tugambireho akagira ati: “Nkaba nimpurira ndi nyenka. Konka ku naganirire na banywani bange abu ndi kwesiga kikankwasa kwehangana.” Konka shi okakora ki ab’omu kibina ku bakukugambira ebintu ebiri kutuma wakizaho kwehurira kubi?
14. Ahabw’enki tushemerire ‘kugumisiririzana n’okusaasirana’?
14 Guma oyehanganire benetata na banyanyazi. Ti ko burijo buri omwe ari kubasa kutugambira ebigambo birungi. (Yak 3:2) Twena tituhikirire; obwe rero tikishemerire kukutangaza hagira owakugambira ebigambo bibi. Yijuka obuhabuzi obu entumwa Pawulo yatuhire ari kugira ati: ‘Nimugumisiririzana; kandi ku harabe hariho oyine eki ari kufa na mugenzi weye, musaasirane.’ (Kol 3:13) Omunyanyazi omwe owabire oyine omunyabuzare owabingirwe, akagamba ati: “Yehova akankwasa kusaasira benetata abangwisize kubi bari kutecereza ngu bari kungumya.” Ni bata oku ab’omu kibina bari kubasa kukwasa abine omuntu owabingirwe omu kibina?
OKU EKIBINA KIRI KUBASA KUTUKWASA
15. Ni enki turi kubasa kukorera abine omuntu owabingirwe omu kibina?
15 Guma oyakire abine omuntu owabingirwe omu kibina oshemerirwe. Omunyanyazi ori kwetwa Miriam akagamba ku yabire ayine obwoba bw’okuza omu nterane mwenenyina ku yabingirwe omu kibina. Akagamba ati: “Nkaba ntinire ebi abantu babire barije kungambira. Konka benetata na banyanyazi na bo bakashasha ahabw’ebyabireho, kandi tibaragambire kubi ahari mwenemawe owabire abingirwe. Mazima nimbasima ahabw’okuba bashashire nanye.” Ondijo munyanyazi akagamba ati: “Mutabani witu ku yabingirwe omu kibina, banywani bitu bakija kutuhumuriza. Abamwe bakagamba ku batine ebigambo. Bakarira nanye abandi bampandikira otubaruha. Ebi bakozire bikampumuriza munonga!”
Ab’omu kibina nibabasa kuhumuriza abine omuntu owabingirwe omu kibina (Reba paragurafu ya 17) *
16. Ni bata oku ab’omu kibina bari kubasa kugumizamu kukwasa abine omuntu owabingirwe omu kibina?
16 Gumizamu kukwasa abine omuntu owabingirwe omu kibina. Nibetenga rukundo yawe n’obuyambi bwawe kukira kare kona. (Heb 10:24, 25) Hine obu abine omuntu owabingirwe omu kibina bari kutecereza ngu nitubehuzya. Otariyikiriza ngu eco kibeho! Na munonga tushemerire kusima abacari bato abu abazire babo barugire omu mazima kandi tukabagumya. Maria, owu omushija weye yabingirwe omu kibina kandi akabasigaho, akagamba ngu: “Bamwe omuri banywani bitu bakaba nibatutayayira, batutecera ebyokurya kandi tukora hamwe okuramya kw’eka. Baketa omu mwanya gwange kandi barira nanye. Bakaba nibangambirira abandi ku babire nibangambaho ebishuba. Mazima bakangumya!”—Rom 12:13, 15.
17. Ni bata oku abazehe bari kubasa kukwasa abine omuntu owabingirwe omu kibina?
17 Imwe bazehe mwe, mukorese omugisha ogu mwine omu kugumya abine omuntu owabingirwe omu kibina. Mwine omurimo g’omutano g’okugumya benetata na banyanyazi abine omuntu owarugire omu amazima. (1 Tes 5:14) Nimubasa kubagumya muri kubaganirira mbere y’enterane na bwanyima yazo. Mubatayayire kandi mushabe na bo. Muburire na bo, ninga shi mubete bekwatanise n’imwe omu kuramya kw’eka. Abazehe bashemerire kufa aha bantu abari kuganya kandi babereka esaasi na rukundo.—1 Tes 2:7, 8.
GUMA OYINE AMASIKO KANDI OGUMIZEMU KWESIGA YEHOVA
18. Tukuratize ebiri omuri 2 Petero 3:9, ni enki eki Ruhanga ari kwendeza abakozire ebibi?
18 Yehova ‘tari kwenda muntu wena kuhwerecerera, kureka nayenda ngu bona bahike aha kwehana.’ (Shoma omuri 2 Petero 3:9.) N’obu omuntu yakukora ekibi c’amani, amagara geye nigaba gacari ag’omuhendo omu misho ga Ruhanga. Tekateka aha buguzi bwingi obu Yehova yahireyo, ni okugamba Omwana weye owu ari kukunda ngu afire abasiisi. Yehova nakwasa abo bantu ngu bamugarukire. Nitwesiga ku barije kumugarukira nk’oku turi kukirebera aha cokureberaho c’omwana w’ekirara. (Luk 15:11-32) Abantu bingi abarugire omu mazima bakahika aho bagarukira Tata witu ori kutukunda. Kandi ab’omu kibina bakabakira ge. Munyanyazi Elizabeth owu tugambireho akashemererwa munonga ku mutabani weye yagarwirwe omu kibina. Ku ari kugarura amisho enyima, nagamba ati: “Mazima ninsima bona abagumire bari kungumya kandi bakankwasa kuguma nyine emasiko.”
19. Ahabw’enki tushemerire kugumizamu kwesiga Yehova?
19 Tushemerire kuguma turi kwesiga Yehova. Tari kubasa kutuha obuhabuzi bw’okuturetera akabi. Ni omuzire oyine obufura kandi oyinire esaasi na rukundo nyingi abantu bona abari kumukunda kandi abari kumuramya. Guma oyesige otari kubanganisa ku Yehova atarikusigaho omu bwire bw’ebizibu. (Heb 13:5, 6) Mark owu tugambireho, akagamba ati: “Yehova taritusigaho. Nayija kugumizamu kutukwasa twaba turi omu mbera zigumire.” Yehova nayija kugumizamu kukuha ‘amani agarikukirira kimwe’ aga burijo. (2 Kor 4:7) Mazima, nobasa kuguma ori omwesigwa kandi oguma oyine amasiko, omuntu owu ori kukunda yaruga omu mazima.
ECESHONGORO CA 44 Okushaba kw’Omuntu Ohwairemu Amaani
^ par. 5 Mazima nikishasha munonga omuntu owu turi kukunda yareka kukorera Yehova! Omuri eki kicweka, twaza kureba oku Ruhanga ari kwehurira eco cabaho. Twaza kureba oku abine omuntu owabingirwe omu kibina bari kubasa kuhumurizibwa kandi bakaguma bine okwikiriza kuhamire. Nambwenu twaza kureba oku ab’omu kibina bona bari kubasa kuhumuriza ab’omu ka y’owareka kuhereza Yehova.
^ par. 1 Amazina agamwe omuri eki kicweka gakahindurwa.
^ par. 79 EKISHUSHANI: Mwenetata yasigaho eka yeye akareka kukorera Yehova, omukazi weye n’abana beye nibabonabona.
^ par. 81 EKISHUSHANI: Abazehe babiri bashura eka emwe ngu bahumurize abagirimu.
