EKICWEKA C’OKWEGA 35
Guma orebe abakuzire b’abesigwa nk’ab’omuhendo
‘Omutwe gujwengize enju n’ekirunga c’ekitinisa.’—ENF 16:31.
ECESHONGORO CA 138 Oburungi bw’Omutwe gw’Enju
EMPINYE *
1-2. (a) Tukuratize ebiri omu Nfumu 16:31, ni bata oku tushemerire kureba abakuzire b’abesigwa? (b) Ni biha bibuzo ebi twaza kutungira ebyokugarukamu?
ABAGENYI abari kuza kurambura ahu abantu bari kuhumurira omuri Arkansas, omuri Amerika, nibabonayo amabare g’obuguzi bwingi ahantu ahari kurebeka. Konka, ago mabare nigaba gatakakozirweho ngu bagihemu ebindi bintu. Eco nikituma abari kugareba bagarabaho batamanyire ku gine omugasho.
2 Ni co kimwe, Abakristo abakuzire b’abesigwa bari nk’ago mabare g’obuguzi bwingi; ni ebiconco by’omuhendo. Ekigambo ca Ruhanga nikigeranisa enju z’abantu bakuzire nk’ekirunga c’ekitinisa. (Shoma omu Nfumu 16:31; 20:29) Konka, nitubasa kwebwa ku hariho ebyo biconco. Abacari bato ku bari kureba abakuzire nk’ebiconco nibabegeraho byingi. Omuri eki kicweka, twaza kutunga ebyokugarukamu by’ebi bibuzo bishatu: Ahabw’enki Yehova ari kureba abakuzire nk’ab’omuhendo? Ni guha mwanya ogu bine omu kitongore ca Yehova? Ni enki eki turi kubasa kukora ngu tubegereho byingi?
ENSHONGA YEHOVA ARI KUREBA ABAKRISTO ABAKUZIRE B’ABESIGWA NK’AB’OMUHENDO
Abakuzire b’abesigwa ni ab’omuhendo ahari Yehova Ruhanga n’aha bahereza beye (Reba paragurafu ya 3)
3. Nk’oku biri kugambwa omuri Zaaburi ya 92:12-15, ahabw’enki Yehova ari kureba Abakristo abakuzire b’ab’esigwa nk’ab’omuhendo?
3 Abakristo abakuzire b’abesigwa ni ab’omuhendo ahari Yehova Ruhanga. Nabamanya ge kandi amanya emitwarize yabo mirungi. Abakuzire ku bari kugambira abacari bato ebi barabiremu bari kukorera Yehova nikimushemeza munonga. (Yob 12:12; 32:9; Enf 1:1-4) Nambwenu nashemererwa ahakuba bari kwehangana. (Mal 3:16) Bakabaho bari kubugana ebizibu, konka okwikiriza kwabo kwaguma kuhamire. Amasiko gabo g’ebiro by’omu misho gakakizaho kuhama kukiza obu babire bacamanya amazima. Kandi Yehova nabakunda ahakuba bagumizemu kutangaza izina ryeye n’omu bwire bw’emyaka ya za bukuru.—Shoma omuri Zaaburi ya 92:12-15.
4. Ni biha bigambo ebiri kubasa kuhumuriza benetata na banyanyazi abakuzire?
4 Waba wahikire omu myaka ya za bukuru, guma oyesige otari kubanganisa ku Yehova ari kwijuka ebi wamukorire omu bwire bwa kare. (Heb 6:10) Okakora omurimo g’okuburira n’amani kandi eco nikishemeza Tata witu w’omu iguru. Okehanganira ebizibu harimu n’ebiri kukushasha munonga, wayorobera emisinge y’omu Kigambo ca Ruhanga, wakora emirimo egumire y’omu kibina kandi wamanyiza n’abandi. Okikiriza empinduka ezabire omu kitongore ca Yehova. Okashagika abari kukora omurimo g’obwire bwona kandi wabagaruramu amani. Yehova Ruhanga nakukunda munonga ahakuba wagumire ori omwesigwa. Naraganisa ku ‘atarisigaho abari kwera beye’! (Zab 37:28) Nakuraganisa ari kugira ati: ‘Muryarugaho mumere enju nkibahekire.’ (Isa 46:4) Konka, otatekateka ku ahakuba ori omu myaka ya za bukuru, otine omugasho omu kitongore ca Yehova. Na hati ocari ow’omuhendo!
OMUGASHO OGU ABAKUZIRE BINE OMU KITONGORE CA YEHOVA
5. Ni enki eki abakuzire bashemerire kuguma bari kwijuka?
5 Abakuzire bine ebintu byingi ebi bari kubasa kukora. N’obu batine amani nk’agu babire bine, bine bintu byingi ebi bayegire omuri eyo myaka yona. Yehova nagumizamu kubakoresa omu buryo obutari bumwe kandi twaza kubirebera omu byokureberaho by’omu bwire bwa kare n’omuri obu bwire.
6-7. Gamba eby’okureberaho by’omuri Bibuli by’Abakristo abakuzire abatungire emigisha ahabw’obwesigwa bwabo.
6 Omuri Bibuli nitubonamu abantu abagumire bari abesigwa kandi bari kukorera Yehova omu myaka ya za bukuru. Ecokureberaho: Musa akaba ayine nk’emyaka 80 obu yabire omuhanuzi wa Yehova kandi ari omwebembezi w’ihanga rya Isirayeli. Daniyeli na we akaba ayine emyaka 90 konka Yehova akamukoresa nk’omuhanuzi. Kandi entumwa Yohana na we akaba ari omu myaka ya za 90 obu Yehova yamukoresize omu kuhandika ekitabo c’Okushuuruurwa.
7 Hariho n’abandi Bakristo bingi ababire batari kumanywa, kandi abantu bingi bakaba bari kubasa kwebwa ku bariho. Konka Yehova akaba nabamanya kandi akabahemba ahabw’okuguma bari abesigwa. Ecokureberaho: Simeyoni omushija owabire ohikirire nagambwaho kace omuri Bibuli, konka Yehova akaba namumanya kandi akamuha omugisha g’okureba Yesu ari omwana n’okuhanura ebiri kukwata ahari ogo mwana na mama weye. (Luk 2:22, 25-35) Nambwenu tekateka aha muhanuzi w’omufakazi owabire ari kwetwa Ana. Akaba ayine emyaka 84, konka akaba atakasiba kuza omu nju ya Ruhanga. Ahabw’okuguma ari kwija omuri hekalu, na we akatunga omugisha g’okureba Yesu ari omwana. Bombi Simeyoni na Ana bakaba bari ab’omuhendo ahari Yehova.—Luk 2:36-38.
Munyanyazi Didur, hati ari omu myaka eri kurenga ahari 80, konka nagumizamu kuhereza Yehova omu bwesigwa (Reba paragurafu ya 8)
8-9. Ni enki eki omunyanyazi w’omufakazi yakozire omu kitongore ca Yehova?
8 Omuri obu bwire, Abakristo bakuzire b’abesigwa nibateraho ecokureberaho kirungi abacari bato. Reba ebyahikire ahari munyanyazi ori kwetwa Lois Didur. Akaba ayine emyaka 21 obu yabire omupayoniya w’omutano omuri Kanada. Bwanyima we n’omushija weye John, bakamara emyaka myingi bari kutayayira ebibina. Ku hahwire obwire bakakora ahari Beteli y’omuri Kanada emyaka eri kurenga ahari 20. Lois ku yabire ayine emyaka 58, we n’omushija weye bakashabwa kukorera omuri Yukireyini. Mbwenu shi ni enki eki bakozire? Mbehi bakanga kukorera omu rindi ihanga ahakuba babire bakuzire? Bakikiriza ogo murimo kandi John akaba omu b’omuri Komiti ya ofisi. John ku yafire bwanyima y’emyaka mushanju, Lois akasharamu kuguma aha murimo ogu yabire ayine. Hati Lois ayine emyaka 81 kandi akagumizamu kukorera ahari ofisi y’omuri Yukireyini kandi nibamukunda munonga.
9 Abafakazi bingi abari nka Lois noshanga abantu bingi batari kubijuka nk’oku babire nibabijuka b’iba bacariho, konka na bwo nibaba bacari ab’omuhendo. Yehova nareba abanyanyazi nk’abo abagumire bari abesigwa ahari we nk’ab’omuhendo. (1 Tim 5:3) Nambwenu nibakwasa abacari bato bari kubagaruramu amani.
10. Ni kiha cokureberaho kirungi eki Tony yatuterireho?
10 Abakristo abakuzire abatwire ahu bari kureberera abakuzire na bo ni ab’omuhendo. Ecokureberaho: Mwenetata ori kwetwa Tony hati atwire ahu bari kureberera abakuzire. Akabatirizibwa omuri Pennsylvania, omuri Amerika, omu Kwamunana 1942, ayine emyaka 20. Bwanyima y’obwire buce, bakamuhiganisa ahabw’okutagwera orubaju omu by’obutegeki, rero yamara omu kihome emyaka ibiri n’ekicweka. We n’omukazi weye Hilda bakazara abana babiri, rero babegesa amazima. Bwanyima, akahereza emyaka ishatu ari omubuganisa w’akakiko k’abazehe kandi yashuba yaba omureberezi w’ekiterane. Akaba naza kwebembera enterane kandi ayegesa n’abegi ba Bibuli omu kihome. N’obu Tony ayine emyaka 98, nagumizamu kukorera Yehova. Nagumizamu kukorera Yehova cona eki ari kubasa ari hamwe n’ab’omu kibina!
11. Ni bata oku turi kubasa kwereka ku nituha ekitinisa abakuzire abatwire ahu bari kubareberera?
11 Ni bata oku turi kubasa kwereka ku nituha ekitinisa abakuzire abatwire ahu bari kubareberera? Caba kiri kubasika, abazehe nibabasa kubakwasa kuza omu nterane ninga kuzihurikiza n’okwekwatanisa omu murimo g’okuburira. Nitubasa kwereka ku nitubafaho turi kubatayayira kandi turi kuganira na bo tukoresize vidiyo ahari zoom. Namunonga tushemerire kufa aha bakuzire abatwire hare y’ebibina byabo. Twaba tutegendeserize, nitubasa kubebwa. Hine obu kiri kugumira abakuzire kugamba ebiri kubakwataho ninga shi bareba kitari kwetengesa. Konka nitubasa kugasirwa twababuza otubuzo kandi tukabahurikiza baba bari kutugambira emigisha eyi batungire omu kitongore ca Yehova.
12. Ni baha abu turi kubasa kubona omu kibina kitu?
12 Nikibasa kutushemeza twabona omu kibina kitu harimu abakuzire abu turi kubasa kwegeraho byingi. Omunyanyazi ori kwetwa Harriette akakorera Yehova omu bwesigwa omu kibina c’owabo omuri New Jersey, omuri Amerika. Bwanyima akafuruka yaza kutura na muhara weye. Benetata na banyanyazi b’omu kibina kisya eki yagiremu, bakagezaho kumumanya kandi bamwegeraho byingi. Akabagumya ari kubagambira oku yakozire omurimo g’okuburira omu myaka ya za 1920. Omuri obwo bwire akaba natwara oburoso bweye bw’amino yaza omu murimo g’okuburira kugira ngu bamukwata bakamusiba abe abwine. Omu mwaka gwa 1933, akamara esande omu kihome emirundi ibiri. Omuri obwo bwire, omushija weye otari Omuhamya wa Yehova akaba namukwasa kureberera abana babo bashatu. Mazima, tushemerire kuha ekitinisa abakuzire abari nka Harriette!
13. Ni enki eki twayegera aha mwanya ogu abakuzire bine omu kitongore ca Yehova?
13 Benetata na banyanyazi abakuzire bine omugasho ahari Yehova n’ekitongore ceye. Bakerebera oku Yehova yabahire emigisha n’oku yagihire ekitongore ceye. Bakegera ebintu byingi by’omugasho aha nshobe ezi bakozire. Tushemerire kubareba nk’oburugo ‘bw’obwenge’ kandi twegera aha cokureberaho cabo. (Enf 18:4) Twakwata obwire ngu tubamanye ge, nitwija kubegereho byingi kandi okwikiriza kwitu kukizeho kuhama!
YEGERA AHA COKUREBERAHO KIRUNGI C’ABAKUZIRE
Nk’oku Elisa yagasirwe n’okuba na Eliya, benetata na banyanyazi na bo nibagasirwa n’ebyahikire aha bahereza ba Yehova abamukorire emyaka myingi (Reba paragurafu ya 14-15)
14. Ebiri omu Ky’Ebiragiro 32:7 nibihiga abacari bato kukora ki?
14 Ba ni iwe owaba ow’okubanza omu kuganira n’abakuzire. (Shoma omu Ky’Ebiragiro 32:7.) Nibabasa kuba batacareba ge, bari kucumbagira, kandi batari kugamba ge, konka bacayine eby’okukora kandi bakakora ‘izina rirungi’ na Yehova. (Mub 7:1) Yijuka ahabw’enki Yehova ari kubareba nk’ab’omuhendo. Gumizamu kubaha ekitinisa. Guma otoreze Elisa. Akaguma ahamire ahari Eliya omu biro bya bwanyima ebi bamazire bari hamwe. Elisa akamugambira emirundi ishatu ati: ‘Tindi kwija kukurugaho.’—2 Bag 2:2, 4, 6.
15. Ni biha bibuzo ebi turi kubasa kubuza abakuzire?
15 Yereka ku nofa aha bakuzire ori kubabuza ebibuzo omu muringo gwa rukundo. (Enf 1:5; 20:5; 1 Tim 5:1, 2) Nobasa kubabuza ebibuzo nk’ebi: “Obu wabire ocari muto, ni enki ecakuhamize ku wabwine amazima?” “Ni bata oku ebyakubireho byakukwasize kugira obunywani burungi na Yehova?” “Ni enki ecakukwasize kuguma oshemerirwe omu murimo gwa Yehova?” (1 Tim 6:6-8) Bwanyima obahurikize oyetonzire baba bari kukugarukamu ebyo bibuzo.
16. Ni bata oku abakuzire n’abacari bato baganira bona kiri kubagasira?
16 Abacari bato n’abakuzire baba bari kuganira, bona nibagasirwa. (Rom 1:12) Imwe abacari bato nimwerebera ku Yehova ari kufa aha bahereza beye b’abesigwa kandi n’abakuzire nibereba nk’abari kukundwa. Abakuzire nibashemererwa baba bari kugambira abacari bato emigisha eyi Yehova yabahire.
17. Ahabw’enki oku omuntu ari kukizaho kukura ari ko ari kukizaho kuba murungi omu misho ga Yehova?
17 Omuntu ku ari kugenda nakura oburungi bw’aha misho nibugenda nibuhwaho ahabw’enkanyari, konka abari kugumizamu kuba abesigwa ahari Yehova nagumizamu kubareba bari barungi. (1 Tes 1:2, 3) Ahabw’enki kiri kisyoya? Ni ahabw’okuba bakamara emyaka myingi bari kwikiriza ngu omwika oguri kwera gubegese kandi gubakwase kugira emitwarize mirungi. Oku turi kukizaho kumanya benetata abakuzire, tukabaha ekitinisa kandi tukabegeraho byingi, ni ko turi kukizaho kubareba nk’ebiconco by’omuhendo!
18. Ni enki eki turije kushwijuma omu kicweka ekiri kukurataho?
18 Ekibina nikihama abacari bato baha ekitinisa abakuzire, konka nambwenu nikihama n’abakuzire bakiha abacari bato. Omu kicweka ekiri kukurataho, turyareba oku abakuzire bari kubasa kwereka ku nibaha ekitinisa abacari bato b’omu kibina.
ECESHONGORO CA 144 Guma Nooreeba Ekiconco!
^ par. 5 Abakristo b’abesigwa abakuzire ni ebiconco by’omuhendo. Eki kicweka caza kutwereka oku turi kubasa kubasima kandi kitwereke oku turi kubasa kugasirwa n’obwenge bwabo n’ebintu byingi ebi barabiremu. Nambwenu caza kuhamiza abakuzire ku bine omwanya g’omugasho omu kitongore ca Ruhanga.
