1. Ni eha ntego ndungi eyi turi kubasa kweteraho oku turi kugenda nitukura?

KU TURI kukura nitubasa kutina ngu titurije kukorera Yehova byingi nk’oku twabire turi kumukorera tucari bato. Ni amazima nituba tutine amani nk’agu twabire twine kare, konka ku turi kukoresa obwenge bwitu n’ebyatubireho, nitubasa kukwasa abacari bato kwijuza ebiri kushabwa ngu batunge endijo mirimo. Omuzehe omwe akagamba ati: “Ku natandikire kukora bice ahabw’emyaka ya za bukuru, nkashemererwa ahakuba habire hariho benetata abacari bato ababire bari kubasa kukora emirimo eyi nabire ninkora.”

2. Ni enki eki twaza kushwijuma omuri eki kicweka?

² Omu kicweka ecahwire tukareba oku abacari bato bari kubasa kugasirwa bagira obunywani n’abakuzire. Omuri eki kicweka, twaza kureba emitwarize, harimu obucurezi, okweyorobya, okusima n’obufura eri kubasa kukwasa abakuzire kukorengana ge n’abacari bato kandi kikatuma ekibina cona cagasirwa.

3. Tukuratize ebiri omu Bafilipi 2:3, 4, obucurezi ni enki, kandi shi ni bata oku buri kugasira Omukristo?

³ Abakuzire bashemerire kuba abacurezi baba bari kwenda kukwasa abacari bato. Omuntu w’omucurezi nareba abandi nk’abari kumukira. (Shoma omu Bafilipi 2:3, 4.) Abakuzire abine ogo mutwarize nibamanya ku hariho oburyo obutari  kushushana bw’okukoramu ekintu bakuratize Ebyahandikirwe. Nibamanya ku omuntu atari kubasa kukora ebintu nk’oku yabire ari kubikora omu bwire bwa kare. (Mub 7:10) N’obu bine ebyokureberaho byingi ebi bari kubasa kugambira abacari bato, nibamanya ku omurembe gw’ensi egi guri kuhwaho, kandi ku nibaba bashemerire kugendana n’ebiri aha murembe.—1 Kor 7:31.

4. Ni bata oku abareberezi abari kutayayira ebibina bari kwereka omutwarize nk’ogu Abalevi babire bine?

⁴ Abantu b’abacurezi ku bari kukura, nibamanya ku batari kubasa kukora nk’ebi babire nibakora bacari bato. Tekateka aha biri kuba aha bareberezi abari kutayayira ebibina. Ku bari kuhisa emyaka 70, nibashabwa kwemereza ogo murimo, rero bahebwa endijo. Konka eco nikiba kitaborobire! Noshanga babire bine okushemererwa bari kukwasa benetata. Nambwenu bakaba nibakunda omurimo gwabo kandi bine ekihika c’amani c’okukora byingi omu murimo gwa Yehova. Konka nibamanya ku abacari bato bari kwetengwa ngu bakore ogo murimo. Konka nibereka omutwarize nk’ogw’Abalevi b’omuri Isirayeli ya kare. Ku babire nibahisya emyaka 50 bakaba nibemereza omurimo g’omu ihema, konka bakaba nibashemerererwa omurimo gona ogu babire nibahebwa. Bakaba nibakora n’amani ebi babire nibabasa kandi bakwasa n’abacari bato. (Kub 8:25, 26) N’obu abareberezi bamwe ababire bari kutayayira ebibina batacabitayayira, nibakwasa ab’omu kibina eki barimu.

5. Ni enki eki twayegera aha cokureberaho eki Dan na Katie batuterireho?

 ⁵ Reba ecokureberaho ca Dan owamazire emyaka 23 ari omureberezi ori kutayayira ebibina. Ku yahikize emyaka 70, we n’omukazi weye Katie bakaba abapayoniya b’omutano. Ni bata oku bamanyirire ogo murimo musya? Dan akagamba ku ayine byingi by’okukora n’omuri obu bwire! Hati nafa aha mirimo yeye y’omu kibina, akwasa benetata kwijuza ebiri kushabwa ngu babe abahereza b’ekibina kandi amanyiza abandi oku bari kubasa kuburira omu matawuni n’omu bihome. Imwe abakuzire, yaba muri omu murimo g’obwire bwona ninga shi mutagurimu, nimubasa kukwasa abandi. Ni bata oku muri kubasa kukikora? Mugume mwikirize empinduka, mwetereho entego nsya kandi mute omutima aha bi muri kubasa.

6. Ahabw’enki tushemerire kweyorobya? Gamba ecokureberaho.

⁶ Omuntu ori kweyorobya namanya ahu obushoborozi bweye buri kugarukira. (Enf 11:2) Ahakuba ari omuntu ori kweyorobya, tari kutekateka ngu nabasa kukora ebintu ebiri kukira ebi ari kubasa. Eco nikituma yatunga okushemererwa kandi agira eki yahikaho. Omuntu ori kweyorobya nitubasa kumugeranisa n’omuntu ori kuvuga igari, rero ahika aha rutindo. Nabanza yatemburuka aha igari kugira ngu abase kwambuka omugera. Ni amazima nikibasa kumushaba kugenda mpora, konka tarayemerere. Ni co kimwe omuntu okuzire nayikiriza empinduka, agumizamu ayine amani kandi agira eki yahikaho omu murimo gwa Yehova.—Fil 4:5.

7. Ni bata oku Baruzirayi yayerekire ku ari kweyorobya?

⁷ Tekateka aha cokureberaho ca Baruzirayi owabire ayine emyaka 80 obu Omugabe Dawudi yamwesire ngu abe omwe omu bakuru b’omu kikari c’omugabe. Ahakuba Baruzirayi yabire ari kweyorobya, akanga kwikiriza ebi omugabe yamugambira. Ahakuba yabire ari kumanya ahu obushoborozi bweye bwabire buri kugarukira ahabw’emyaka yeye, akagamba ku omwojo ocari muto ori kwetwa Kimuhamu aba ari we wazayo omu mwanya gweye. (2 Sam 19:35-37) Nka Baruzirayi, abashija abakuzire nibashemerererwa kuha abacari bato emirimo.

8. Ni bata oku Dawudi yayerekire ku ari kweyorobya obu yabire ari kwenda kombecera Yehova enju?

⁸ Omugabe Dawudi na we akaba nayeyorobya. Akaba nayenda kombecera Yehova enju n’omutima gweye gona, konka Yehova ku yamugambire ngu mutabani weye Solomoni ni we owabire arije kumwombecera, akorobera Yehova kandi yayamba ahari ogo murimo n’omutima gweye gona. (1 Bus 17:4; 22:5) Dawudi taratekatekire ngu ni we oshemerire kombeka enju ahakuba Solomoni yabire ‘acari muto kandi atakahamire.’ (1 Bus 29:1) Dawudi akaba namanya ku Yehova yabire arije kuha emigisha omuntu wena owabire arije kumwombecera enju atagendire aha myaka ninga shi obumanyi. Nk’oku Dawudi yakikozire, Abakristo abakuzire omuri obu bwire, nibagumizamu kukorera Yehova n’obu emirimo yabo yakuhinduka. Kandi nibamanya ku Yehova ari kuha emigisha abacari bato abari kukora emirimo eyi babire nibakora.

9. Ni bata oku omwe omu b’omuri Komiti ya ofisi yayerekire ku ari kweyorobya?

⁹ Ecokureberaho c’omuri obu bwire ekiri kwereka ku tushemerire kweyorobya n’eca mwenetata ori kwetwa Shigeo. Obu yabire ayine emyaka 30, akaba omwe omu bagizire Komiti ya ofisi. Omu mwaka gwa 2004, akaba omubuganisa wa Komiti ya ofisi. Bwanyima, akareba ku atacayine  amani g’okukora nk’ebi yabire nakora kare. Akashaba, rero yatekateka aha birungi ebiri omu kutunga ondijo mwenetata ow’okukora emirimo eyi yabire nakora. N’obu Shigeo atacari omubuganisa wa Komiti ya ofisi, akagumizamu kukora n’abandi benetata abari omuri eyo Komiti. Ecokureberaho ca Baruzirayi, Omugabe Dawudi na Shigeo nicereka ku omuntu w’omucurezi kandi ori kweyorobya atari kuta omutima aha bumanyi obu abacari bato bine, ahobwe ku ari kuguta aha mani gabo. Tari kubareba nk’abari kusingasingana na we, ahobwe nabareba nk’abakozi bagenzi beye.—Enf 20:29.

10. Ni bata oku abakuzire bashemerire kureba abacari bato b’omu kibina?

¹⁰ Abakuzire nibareba abacari bato nk’ekiconco eki Yehova yabahire kandi bereka ku nibamusima. Amani g’abakuzire ku gari kugenda nigaba mace, nibashemererwa ku bari kureba abacari bato abine amani bari kwehayo, bakakorera ekibina.

11. Ni bata oku ebiri omuri Ruusi 4:13-16 biri kwereka emigisha eyi abakuzire bari kutunga bayikiriza obuyambi bw’abacari bato?

¹¹ Nawomi ni ecokureberaho kirungi c’omuri Bibuli ahakuba akaba akuzire, konka yayikiriza obuyambi bw’owabire acari muto. Nawomi akabanza yashaba omukamwana weye Rusi ngu agaruke owabo. Konka Rusi ku yabyangire akagenda na Nawomi omuri Betelehemu, Nawomi akikiriza obuyambi bwa Rusi. (Rus 1:7, 8, 18) Eco bona kikabagasira! (Shoma omuri Ruusi 4:13-16.) Abakuzire abari kwecureza na bo nibatoreza Nawomi bari kwikiriza obuyambi bw’abacari bato.

12. Ni bata oku entumwa Pawulo yayerekire ku nasima?

 ¹² Entumwa Pawulo akereka ku nasima ahabw’obuyambi obu abandi babire nibamuha. Ecokureberaho: Akasima Abakristo b’omuri Filipi ahabw’okumuha ebi yabire ari kwetenga. (Fil 4:16) Akereka ku nasima ahabw’obuyambi obu Timoteyo yamuhire. (Fil 2:19-22) Kandi Pawulo akasima Ruhanga aha bwa benetata abamubugine ngu bamugumye ari kuza kusibwa omuri Roma. (Byak 28:15) Pawulo akaba ari omushija w’amani kandi akatambura engendo ndingwa ari kuburira kandi ari kugaruramu amani ebibina. Konka, ahakuba yabire ari omucurezi, akikiriza obuyambi bwa benetata na banyanyazi.—Efe 1:15, 16.

13. Ni bata oku abakuzire bari kubasa kwereka ku nibasima ahabw’abacari bato?

¹³ Abakuzire, nimubasa kwereka ku nimusima abacari bato b’omu kibina omu buryo bwingi. Yaba bari kwenda kukukwasa omu by’entambura, kukuhahira ninga shi endijo mirimo, oyikirize obwo buyambi obu bari kukuha. Guma orebe obuyambi bwabo nk’oburyo bumwe obu Yehova ari kukwerekamu rukundo. Eco nikibasa kutuma obunywani obu oyine n’abo abacari bato bwakizaho kuhama. Nambwenu, kwasa abo banywani bawe abacari bato kukizaho kuba banywani ba Yehova kandi obagambire ku ori kushemererwa wabareba bari kwijuza ebiri kushabwa ngu bakore byingi omu kibina. Kandi ogume okwate obwire bw’okubagambira ebyakubireho. Ku orakikore basyoya, noba wayereka ku ‘nosima’ Yehova ahabw’abacari bato abu yaresire omu kibina ceye.—Kol 3:15; Yoh 6:44; 1 Tes 5:18.

14. Ni bata oku Omugabe Dawudi yayerekire obufura?

¹⁴ Nambwenu abakuzire nibabasa kutoreza Omugabe Dawudi bari kuba efura. Akahayo esente zeye nyingi n’ebi yabire atungire by’omugasho omu kukwasa omurimo g’okombeka hekalu. (1 Bus 22:11-16; 29:3, 4) Akakikora n’obu abantu babire barije kusima mutabani weye Solomoni. Twaba tutacayine amani g’okwekwatanisa omu kombeka amaju g’ekitongore, nitubasa kugumizamu kushagika eyo mirimo turi kuhayo ebiconco oku turi kubasa. Kandi nitubasa n’okukwasa benetata abacari bato turi kubagambira ebi twarabiremu.

15. Ni biha biconco by’omugasho ebi entumwa Pawulo yahire Timoteyo?

¹⁵ Nambwenu reba ecokureberaho c’entumwa Pawulo. Aketa Timoteyo ngu ayekwatanise na we omu bumishonari kandi yayereka ku ari efura ari kumumanyiza kuburira n’okwegesa. (Byak 16:1-3) Eco kikatuma Timoteyo yaba omuburizi murungi w’obutumwa. (1 Kor 4:17) Timoteyo na we akakoresa ebi Pawulo yamwegesize ari kubyegesa abandi.

16. Ahabw’enki Shigeo yayegesize abandi?

¹⁶ Nk’oku Pawulo yakikozire, abakuzire b’omuri obu bwire tibari kutina ngu nibija kubura ec’okukora bamanyiza abacari bato kukora emirimo eyi babire nibakora. Ecokureberaho: Shigeo, owu tugambireho akamanyiza ab’omuri Komiti ya ofisi abacari bato. Eco akakikora kugira ngu ashagike omurimo g’Obukama omu ihanga eri ari kukoreramu. Kikatuma bwanyima y’obwire haboneka mwenetata w’okuba omubuganisa omu mwanya gweye. Shigeo nagumizamu kukoresa ebi yayegire omu myaka 45 ari omuri Komiti ya ofisi ari kukwasa abacari bato. Ku nikitushemeza munonga kuba twine benetata nk’abo abari kutukwasa!

17. Tukuratize ebiri omuri Luka 6:38, ni enki eki abakuzire bari kubasa kuha abandi?

 ¹⁷ Imwe benetata na banyanyazi abakuzire, muri ekihamya ekiri kwereka ku kwesiga Yehova n’okumukorera omu bwesigwa ari co kintu kikuru omu kubaho kwitu. Ecokureberaho canyu nicereka ku twayega emisinge ya Bibuli kandi tukagikuratiza kirije kutuma twabaho twine amagara marungi. Nimumanya ebyabire nibibaho omu bwire bwa kare, konka mwikiriza kugenda n’empinduka. N’imwe abakuzire ababatizibwe juba, mwine eki muri kubasa kuhereza abandi, nk’okubagambira okushemererwa oku mwatungire ku mwamanyire Yehova. Abacari bato nibija kushemererwa mwabagambira ebi mwarabiremu n’ebi mwayegire. Ku ‘muriha’ abandi muri kubagambira ebi mwarabiremu, Yehova nayija kubaha emigisha myingi.—Shoma omuri Luka 6:38.

18. Ni bata oku abato n’abakuzire bari kubasa kuyambayambana?

¹⁸ Imwe abakuzire ku murigumizamu kugira obunywani n’abacari bato, nimwija kuyambayambana. (Rom 1:12) Buri omwe omuri imwe ayine ekintu kirungi eki ondijo ari kuba atine. Abakuzire bine obwenge n’obumanyi ebi batungire omu kubaho kwabo. Abato bine amani kandi nibabasa kukora byingi. Abato n’abakuzire ku bari kukorengana ge, nikishemeza Tata witu w’omu iguru kandi kituma ekibina cona catunga emigisha.