1-2. Ni kuha kutengesa okwabire kwahanwirwe?

“OMU dakika nce, amaduka n’amaju bikatandika kugwa.” “Kikahahamura abantu bona. . . Abantu bingi bakagamba ku byamazire edakika nk’ibiri. Nyowe nimpurira gwamazire omwanya muringwa.” Ebyo bikagambwa na bamwe omu barokokire omusisa ogwatire omuri Nepali omu gwa 2015. N’iwe kuri wabire oriho omuri obwo bwire oburi kutinisa munonga, okaba otarije kubyebwa.

² Konka, turi omu bwire bw’okutengesa okutari kushushana n’okuri kuba omu tawuni emwe ninga ihanga rimwe kusha. Ahobwe oko kutengesa nikuba omu mahanga gona kandi kukamara emyaka myingi kuri kubaho. Omuhanuzi Hagayi akagamba ahari oko kutengesibwa. Akahandika ati: ‘Ahakuba oku ni ko [Yehova] ow’amahe ari kugamba nagira ati: Omu kanya kace ninyija kugaruka ntengese iguru n’ensi, enyanja n’itaka.’—Hag 2:6.

3. Ni bata oku okutengesa oku Hagayi yagambire kuri kutana n’omusisa?

³ Okutengesa oku Hagayi yabire ari kugamba, ti nk’ok’omusisa oguri kuhwerecereza kusha. Ahobwe oko kutengesa nikutuma habaho ebintu birungi. Yehova obweye natugambira ati: ‘Ndyatengesa amahanga gona, itungo ry’ago mahanga gona ryije, n’egi nju ngijuze ekitinisa.’ (Hag 2:7) Ebyo bikaba nibyija kukwata bita aha bantu b’omu bwire bwa Hagayi? Kandi shi itwe nibitukwataho bita? Twaza kushwijuma ebyokugarukamu by’ebyo bibuzo, kandi turebe n’oku turi kwekwatanisa omuri ogo murimo g’okutengesa amahanga omuri obu bwire.

4. Ahabw’enki Yehova yatumire omuhanuzi Hagayi aha bahereza beye?

⁴ Yehova akaha omuhanuzi Hagayi omurimo g’omugasho. Tekateka oku abantu babire bari atakatungire ogo murimo. Omu mwaka gwa 537 M.Y, obu Abayudaya barugire omu bukwatwa bw’omuri Babuloni bari kugaruka omuri Yerusalemu, Hagayi nabasa kuba yabire ari na bo. Bwanyima y’amezi mace bagarukire omuri Yerusalemu, bakatandika kombeka omusingi gw’enju ya Yehova ninga hekalu. (Ezr 3:8, 10) Konka bwanyima y’obwire buce hakabaho ekintu kibi. Bakacweka entege, bareka kombeka ahakuba abantu bakaba bari kubahiganisa. (Ezr 4:4; Hag 1:1, 2) Ni yo nshonga omu mwaka gwa 520 M.Y. Yehova yatumire Hagayi ngu abagaruremu amani kandi abahige kugumizamu bari kombeka hekalu. *—Ezr 6:14, 15.

5. Ahabw’enki obutumwa bwa Hagayi bwahumurize abahereza ba Ruhanga?

⁵ Obutumwa bwa Hagayi bukaba buri obw’okugumya Abayudaya. Ogo muhanuzi akagambira Abayudaya ababire bacwekire entege ati: ‘Imwe abantu b’omuri egi nsi mwena, mugume, kandi mukore; ahabw’okuba ndi hamwe n’imwe; ni ko [Yehova] ow’amahe ari kugira.’ (Hag 2:4) Ebigambo “[Yehova] ow’amahe” bikabagumya. Yehova nategeka amahe ga ba marayika, obwe rero Abayudaya bakaba bashemerire kumwesiga n’obushoborozi bweye.

6. Ni enki ecabire kirije kubaho omu kutengesa oku Hagayi yagambire?

⁶ Yehova akatuma Hagayi hamwe n’Abayudaya ku yabire arije kutengesa amahanga omu buryo bw’akamanyiso. Obwo butumwa bukagumya Abayudaya ababire bari kombeka hekalu ababire bacwekire entege, ku Yehova yabire arije kutengesa Buperesi, ihanga eryabire ryine amani omuri obwo bwire. Mbwenu shi ni enki ecabire kiraruge omuri oko kutengesa? Ec’okubanza: Abahereza beye bakaba barije kuheza kombeka hekalu. Nambwenu abanyamahanga na bo bakaba barije kwekwatanisa omu kuramya Yehova omuri eyo nju. Mazima obwo butumwa bushemerire kuba bwagumize abahereza ba Ruhanga!—Zek 8:9.

7. Ni guha murimo oguri kutengesa amahanga ogu turi kukora omuri obu bwire? Shoborora.

⁷ Obuhanuzi bwa Hagayi bw’okutengesa amahanga nibutukwataho buta omuri obu bwire? Nambwenu omuri obu bwire Yehova natengesa amahanga kandi n’itwe nitumukwasa kukihikiriza. Tekateka ahari eki: Omu mwaka gwa 1914, Yehova akataho Yesu Kristo nk’Omugabe w’Obukama bweye. (Zab 2:6) Obukama bwa Ruhanga ku bwatandikire kutegeka, bukaba obutumwa bubi aha bebembezi b’omu nsi. Eco nikimanyisa ku obwire bw’abanyamahanga, ni okugamba obu Yehova yabire atine omugabe w’okumujwecera bwabire bwahwaho. (Luk 21:24) Ahabw’eyo nshonga na munonga kwiha omu mwaka gwa 1919, abahereza ba Yehova bakaguma bari kugamba ku Obukama bwa Ruhanga ari bwo oburije kwihaho ebizibu by’abantu. Ogo murimo g’okuburira obutumwa burungi bw’Obukama gukatengesa amahanga gona.—Mat 24:14.

8. Tukuratize ebiri omuri Zaaburi ya 2:1-3, ni bata oku amahanga mingi gari kwakira ebi turi kubaburira?

⁸ Ni bata oku abantu bari kwakira obutumwa obu turi kubagambira? Abingi nibabwanga. (Shoma omuri Zaaburi ya 2:1-3.)  Obwo butumwa nibutuma amahanga gona gagira obwoba. Nibanga kwikiriza Omugabe owu Yehova yatireho. Tibari kureba obutumwa bw’Obukama obu turi kubaburira nk’obutumwa burungi. Ahobwe obutegeki bumwe bukemereza omurimo g’okuburira! N’obu bingi omuri abo bategeki bari kugamba ku nibahereza Ruhanga tibari kubasa kuruga aha ngoma. Nk’oku abategeki b’omu bwire bwa Yesu bakikozire, ab’omuri obu bwire na bo nibahiganisa abahereza ba Yehova, bari kurwanisa abari kumushagika.—Byak 4:25-28.

9. Ni enki eki Yehova ari kukorera amahanga agatari kwikiriza ebi turi kubaburira?

⁹ Ni enki eki Yehova ari kukorera amahanga agatari kwakira obutumwa obu turi kubaburira? Omuri Zaaburi ya 2:10-12 nihagira ngu: ‘Ni ahabw’eco, imwe bagabe mwe, mugire obwenge, n’imwe abategeki b’ensi, mwikirize kuhaburwa. Muhereze [Yehova] n’okutina, mushemererwe n’okutetema. Munywegere Omwana, atakabagirira ekiniga, mukahwerecererera omu muhanda; ahakuba ekiniga ceye nikija kurahuka kwaka. Bona abamuhungiraho bine omugisha.’ Yehova nayenda ngu abari kumuhakanisa bamumanye. Nibabasa kuhinduka, rero bikiriza Obukama bwa Yehova. Konka obwire buri kuhwayo. Turi omu ‘biro by’emperu’ y’egi nsi mbi. (2 Tim 3:1; Isa 61:2) Obu ni bwo bwire obu abantu kugira eki bakora juba kugira ngu bege amazima kandi basharemu kukorera Yehova.

10. Ni biha birungi ebiri kuruga omu murimo g’okutengesa amahanga oguri kugambwa omuri Hagai 2:7-9?

¹⁰ Obutumwa bw’okutengesa amahanga obu Hagayi yagambireho bukagirira omugasho abantu abamwe. Akagamba ku omurimo g’okutengesa amahanga gwabire gurije kutuma, ‘itungo [ninga shi abantu b’emitima mirungi] b’omu mahanga gona’ bayija omu kuramya kw’amazima. * (Shoma omuri Hagai 2:7-9.) Nambwenu Isaya na Mika  bakaba bagambire ecabire kirije kubaho omu biro by’emperu.—Isa 2:2-4; Mik 4:1, 2.

11. Ni enki eki mwenetata omwe yakozire ku yahuririre obutumwa bw’Obukama aha murundi g’okubanza?

¹¹ Reba eki mwenetata Ken ori kukora ahari ofisi nkuru yitu yakozire ahabw’omurimo g’okutengesa amahanga. Acayijuka oku yayehurire obu yahurire obutumwa bw’Obukama aha murundi g’okubanza omu myaka 40 ehwire. Akagamba ati: “Ku nahurire amazima g’omu Kigambo ca Ruhanga aha murundi g’okubanza nkashemererwa ku nayegire ngu turi omu biro by’emperu. Nkashoborocerwa ku kugira ngu Yehova anyikirize kandi ampe amagara agatahwaho, nkaba nshemerire kwetanisa aha nsi kandi nkaguma aha rubaju rwa Yehova. Nkahika ndi kumushaba kandi nasharamu kumukorera. Nkareka kwekwatanisa n’ensi, rero nayekwatanisa n’Obukama bwa Ruhanga obutari kubasa kutengesibwa.”

12. Ni bata oku hekalu ya Yehova yahibwe ekitinisa omuri obu bwire bw’emperu?

¹² Mazima nikirebeka ge ku Yehova ari kuha emigisha abahereza beye. Omuri obu bwire bw’emperu abantu bingi nibija omu kuramya okw’amazima. Omu mwaka gwa 1914 tukaba turi abantu bace. Konka hati, hariho Abahamya ba Yehova abari kurenga omuri miliyoni munana, kandi n’abandi bingi abari kwekwatanisa omu kijusyo c’okwijuka okufa kwa Yesu nicereka ku turije kweyongera. Omuri obwo buryo, orugo rwa hekalu ya Yehova y’ebyomwika y’omu nsi, ni okugamba entebekanisa y’okuramya okw’amazima rukijura ‘itungo ry’amahanga.’ Nambwenu, izina rya Yehova rikahimbisibwa abantu ku bakozire empinduka, bakajwara omuntu omusya.—Efe 4:22-24.

13. Ni buha buhanuzi obwahikirire ahabw’okweyongera kw’abahereza ba Yehova? (Reba ekishushani c’aha kishembeso.)

¹³ Nambwenu oko kutunguka kukahikiriza obundi buhanuzi, nk’obw’omuri Isaaya ekicweka ca 60. Orunyiriri rwa 22 rw’eco kicweka nirugamba ngu: ‘Ori kukira bona obuto aryarugwamu oruganda, n’ori kukira bona obuce arugemu ihanga ry’amani. Ni inye [Yehova]; kandi ndyakirahusya omu bwire bwaco.’ Ahabw’okuba abantu  bingi bari kutandika kuramya Yehova, nibareta obwenge obutari bumwe kandi bija bari kwenda kwekwatanisa omu murimo g’okuburira obutumwa burungi bw’Obukama. Kandi eco nikituma abahereza ba Yehova ‘banywa amate g’amahanga.’ (Isa 60:5, 16) Obuyambi bw’abo bashija n’abakazi abari kwija omu mazima bukatuma omurimo g’okuburira gwakorwa omu mahanga 240 kandi ebitabo byitu byaboneka omu ndimi eziri kurenga 1,000.

14. Ni eha nsharamu eyi abantu bashemerire kukora hati?

¹⁴ Omuri obu bwire bw’emperu omurimo g’okutengesa amahanga gurimu kutuma abantu bakora ensharamu. Mbehi nibija kushagika Obukama bwa Ruhanga ninga nibija kwesiga obutegeki bw’omuri egi nsi? Egi ni ensharamu eyi buri omwe arije kwekorera. N’obu abahereza ba Yehova bari korobera ebiragiro by’omu ihanga eri bari kuba batwiremu, tibari kugwera orubaju omu by’obutegeki bw’ensi. (Rom 13:1-7) Nibamanya ku Obukama bwa Ruhanga ari bwo oburije kwihaho ebizibu byona by’abantu. Obwo Bukama ti obu egi nsi.—Yoh 18:36, 37.

15. Ni kuha kugezibwa okuri kugambwa omu kitabo c’Okushururwa?

¹⁵ Ekitabo c’Okushururwa nikishoborora okugezibwa kw’abahereza ba Ruhanga omu biro by’emperu. Oko kugezibwa nikwija kutuma twahiganisibwa munonga. Obutegeki nibwija kutugema kwemereza emirimo yitu kandi nibwija kuhiganisa abariyanga kubushagika. (Kush 13:12, 15) Nibija kugema ‘abantu bona, abato n’abakuru, abatungi n’aboro, ab’obusinge n’abahuku kutebwa akamanyiso aha mukono gwa buryo, ninga aha buso.’ (Kush 13:16) Abagaragwa b’omu bwire bwa kare bakaba nibatebwaho akamanyiso kugira ngu kereke owu bari kukorera. Ni co kimwe n’omuri obu bwire abantu nibija kwereka owu bari kushagika. Ebitekateko n’ebikorwa byabo nibyija kwereka ku bari kushagika obutegeki bw’egi nsi.

16. Ahabw’enki obu ari bwo bwire bw’okukizaho kuba abesigwa ahari Yehova?

¹⁶ Mbwenu shi nitwija kwikiriza ako kamanyiso tushagike obutegeki bw’egi nsi? Abarije kwanga kutebwaho ako kamanyiso nibija kubonabona. Ekitabo c’okushururwa nikigumizamu kiri kugira kiti: ‘Hatabaho owagura ninga owatunda, kureka ogo oyine ako kamanyiso.’ (Kush 13:17) Konka abahereza ba Ruhanga nibamanya eki arije kukorera abantu bona abine ako kamanyiso abari kugambwa omu Kushuuruurwa 14:9, 10. Omu mwanya g’okwikiriza ako kamanyiso, nibija kuba nk’abahandika omu ngaro zabo ngu: ‘Ndi owa [Yehova].’ (Isa 44:5) Obu ni bwo bwire bw’okukizaho kuba abesigwa ahari Yehova. Ku turakikore tusyoya, Yehova nayija kushemererwa ari kugira ngu: ‘Muri abange!’

17. Ni enki eki tushemerire kwijuka aha kwehangana kwa Yehova?

¹⁷ Yehova akereka ku nayehangana omuri obu bwire obw’aha muheru. Tari kwenda ngu hagire owahwerecerera. (2 Pet 3:9) Akaha abantu bona omugisha g’okwehana kandi bakasharamu kumukorera. Konka okwehangana kweye kwine obugarukiro. Abariyanga ogo mugisha nibija kuhikwaho nk’ebyahikire ahari Faraho omu bwire bwa Musa. Yehova akagambira Faraho ati: ‘Ahabw’okuba hati nkabangire omukono gwange, nkuteza orufu n’abantu bawe, ohwerecerera, oruga omu nsi; konka buzima, eki nkurekireho n’okukoreka amani gange, ngu izina ryange ribone kugambwa omu nsi zona.’ (Kur 9:15, 16) Amahanga gona nigija kuhika aho gamanye ku Yehova  ari we Ruhanga ow’amazima. (Ezk 38:23) Konka shi ni bata oku eco kiribaho?

18. (a) Ni kuha kundi kutengesa okuri kugambwa omuri Hagai 2:6, 20-22? (b) Nitumanya tuta ku ebigambo bya Hagayi birije kuhikirira omu biro by’omu misho?

¹⁸ Hahwireho emyaka myingi Hagayi afire, entumwa Pawulo akahandikira Abakristo b’Abaheburayo ebigambo ebyayerekire ku ebiri omuri Hagai 2:6, 20-22 byabire birije kuhikirira omu biro by’omu misho. (Hashome.) Pawulo akahandika ati: ‘Hati araganise ati: “Ninyija kugaruka kutengesa ensi rimwe, kandi ti nsi yonka kureka n’iguru.” Ekigambo eki ngu, hasigire rimwe, nikimanyisa okwihwaho okw’ebiritengesibwa, ni byo byahangirwe, ngu ebyo ebitari kutengesibwa bibone kugumaho.’ (Heb 12:26, 27) Oko kutengesa nikutana n’okuri kugambwa omuri Hagai 2:7; nikumanyisa ku abari kwanga kwikiriza ku Yehova ari we ohikire kutegeka nk’oku Faraho yabyangire barije kucwecerezibwa.

19. Ni enki ekitarije kutengesibwa, kandi shi nitukimanya tuta?

¹⁹ Ni enki ekitarije kutengesibwa ninga shi kwihwaho? Pawulo akagumizamu ati: ‘Nk’oku twine Obukama obutari kubasa kutengesibwa, ka tusime Ruhanga, tumuhereze nk’oku akunda, nitumuha ekitinisa nitutina.’ (Heb 12:28) Okutengesa okw’aha muheru ku kurihendera, Obukama bwa Ruhanga ni bwo oburije kugumaho ebiro byona!—Zab 110:5, 6; Dan 2:44.

20. Ni eha nsharamu eyi abantu bashemerire kukora, kandi shi ni bata oku turi kubasa kubakwasa?

²⁰ Tihariho obwire bw’okufisa busha! Abantu bashemerire kweshariramu kushagika egi nsi eri hihi kuza kwecerezibwa ninga shi basharamu kukorera Yehova kandi babuganisa amagara gabo n’ebi ari kwenda, rero batunge amagara agatahwaho. (Heb 12:25) Ku turi kukora omurimo g’okuburira, nituba turi kukwasa abantu kusharamu owu barashagike. Nimureke tukwase abantu bingi kukora ensharamu y’okushagika Obukama bwa Ruhanga. Kandi nambwenu, nimureke tugume twijuke ebigambo bya Mukama witu Yesu ebiri kugira ngu: ‘Kandi engiri egi ey’Obukama eryagambwa omu nsi zona okuba ec’okuhamya aha mahanga gona; obwo ni bwo emperu erihika.’—Mat 24:14.