1. Ahabw’enki Yehova atari kutugeranisa n’abandi?

YEHOVA nakunda ebintu by’emiringo myingi. Eco nikirebecera omu bi yahangire harimu n’abantu. Buri omwe natana n’ondijo. Obwe rero, Yehova tari kubasa kukugeranisa n’abandi. Nareba omu mutima gwawe. (1 Sam 16:7) Nambwenu namanya ahu oyine amani, ahu oyine obweremwa n’embera ezi wakuriremu. Kandi tari kubasa kukushaba ebi otari kubasa. N’itwe tushemerire kuguma kwereba nk’oku Yehova ari kutureba. Eco nikija kutuma tutayetekatekaho kurenza oku turi, turi kwetekatekaho munonga ninga turi kwereba nk’abatine mugasho.—Rom 12:3.

2. Ahabw’enki tutashemerire kwegeranisa n’abandi?

² Ni amazima nitubasa kwegera aha cokureberaho kirungi ca mwenetata ninga munyanyazi ori kukora ge omurimo g’okuburira. (Heb 13:7) Nitubasa kumwegeraho oku turi kubasa kukizaho kukora ge omurimo g’okuburira. (Fil 3:17) Konka hariho entanisa eri ahagati y’okutoreza ecokureberaho c’omuntu n’okukikoresa omu kwegeranisa na we. Twayegeranisa n’abandi nitubasa kubagirira ihari, tucweka entege kandi tuhurira tutine mugasho. Nk’oku twacegire omu kicweka ecahwire, twagira omwika g’okukizakizana n’abandi omu kibina nikibasa kutushisha omu by’omwika. Obwe rero, Yehova natuhabura na rukundo ati: ‘Ekirungi ni ko omuntu wena kugeza omurimo gweye, akaba ni go yayehimbisizamu, kutari kwehimbisiza omu gwa mutahi weye.’—Gal 6:4.

3. Ni ziha ntunguka z’omu buryo bw’omwika ezi wakozire zikatuma wakizaho kushemererwa?

³ Yehova nayenda ngu tushemerererwe ebi turi kuhikaho  omu murimo gweye. Ecokureberaho: Obu wabatizibwe nobasa kuba washemerirwe ahabw’okuhika ahari eyo ntego! Ni iwe owayekorire eyo nsharamu. Okagikora aha bwa rukundo eyi ori kukunda Ruhanga. Tekateka aha bi wakozire mbere y’okubatizibwa. Okakizaho kukunda kushoma Bibuli n’okugeyegesa. Okatandika kushaba eshara zirugire aha mutima. (Zab 141:2) Okakizaho kumanya oburyo burungi bw’okutandikisa ebiganiro omu murimo g’okuburira n’okukoresa ge ebikoreso ebi turi kukoresa. Kandi waba oyine eka, Yehova akakukwasa kuba omushija, omukazi ninga shi omuzire murungi. Mazima nohurira oshemerirwe kandi omazirwe ahabw’ezo mpindahinduka zona ezi wakozire.

4. Ni enki eki twaza kushwijuma omuri eki kicweka?

⁴ Nitubasa kukwasa abandi kushemerererwa entunguka ezi bari kuhikaho. Nitubasa n’okubakwasa kwerinda kwegeranisa n’abandi. Omuri eki kicweka, twaza kureba oku abazire bari kubasa kukwasa abana babo, oku abatasine bari kubasa kukwatanisa, n’oku abazehe n’abandi bari kubasa kukwasa benetata na banyanyazi. Nambwenu twaza kushwijuma emisinge ya Bibuli eri kubasa kutukwasa kweteraho entego eziri kubugana n’obushoborozi bwitu.

5. Tukuratize ebiri omu Baefeso 6:4, ni enki eki abazire bashemerire kwerinda?

⁵ Abazire bashemerire kwerinda kugeranisa abana babo n’abandi ninga shi kubashaba ebi batari kubasa. Abazire ku bari kukikora nikibasa kutuma abana babo bacweka entege. (Shoma omu Baefeso 6:4.) Omunyanyazi ori kwetwa Sachiko * akagamba ati: “Abegesa bange bakaba nibenda ngu nkore ge kusinga abandi begi bagenzi bange ah’ishomero. Kandi na mama akaba nayenda ngu nkore ge ah’ishomero, kugira ngu omwegesa wange na tata otari Omuhamya bandebe nk’ecokureberaho kirungi. Obwe rero, akaba nayenda ngu ngume nyijuze omu bizamu kandi eco nkareba kitari kubasika. N’obu hahwire emyaka myingi mazire kwega, hine obu ndi kureba Yehova atari kusima byona ebi ndi kumukorera.”

6. Ni enki eki abazire bari kwegera aha biri omuri Zaaburi ya 131:1, 2?

 ⁶ Ishomo ry’omugasho aha bazire niturishanga omuri Zaaburi ya 131:1, 2. (Hashome.) Omugabe Dawudi akagamba ku ‘atarayetengire eby’ah’iguru’ ninga shi ebintu ebi atari kubasa. Ahakuba yabire ari omucurezi kandi ari kutwaza ge kikatuma omutima gweye ‘gwacurera.’ Ni enki eki abazire bari kubasa kwegera aha bigambo bya Dawudi? Abazire ku bari kuba abacurezi tibari kushaba abana babo ebi batari kubasa kukora. Abazire bashemerire kumanya ahu abana babo bine amani n’ahu bine obweremwa baba bari kubakwasa kweteraho entego. Omunyanyazi ori kwetwa Marina akagamba ati: “Mama takangeranisa n’abandi bana bashatu abu turi kuzarwana ninga ngu angeranise n’abandi bana. Akangambira ku buri omwe ari ow’omutano kandi ku ari ow’omuhendo omu misho ga Yehova. Nimusima ahabw’okuba akankwasa kuguma ntari kwegeranisa n’abandi.”

7-8. Ni bata oku omushija ari kubasa kuha ekitinisa omukazi weye?

⁷ Omushija w’Omukristo ashemerire kuha ekitinisa omukazi weye. (1 Pet 3:7) Ecokureberaho: Omushija naha omukazi weye ekitinisa ari kumutwariza ge. Tari kumushaba ebi atari kubasa. Kandi tari kumugeranisa n’abandi bakazi. Ni enki ekiri kubasa kubaho omushija yageranisa omukazi weye n’abandi bakazi? Omushija otari Omuhamya w’omukazi ori kwetwa Rosa nakunda kumugeranisa n’abandi bakazi. Ebigambo byeye nibituma Rosa yayehurira kubi kandi ahurira abandi batari kumukunda. Rosa akagamba ati: ‘Burijo nimba ninyetenga ec’okunyijusya ku Yehova ari kundeba nk’ow’omuhendo.’ Konka omushija w’Omukristo we naha ekitinisa omukazi weye. Namanya ku eco kiri kukwata aha bunywani obu ayine n’omukazi weye n’aha bunywani bweye na Yehova. *

⁸ Omushija ori kuha omukazi weye ekitinisa namuhimbisa, amwereka ku ari kumukunda, kandi amusima. (Enf 31:28) Omushija wa Katerina owu tugambireho omu kicweka ecahwire, akamukwasa kuhurira ari ow’omugasho. Obu Katerina yabire acari omwana, nyina akaba namutwariza kubi kandi amugeranisa n’abandi bahara harimu na banywani beye. Eco kikatuma Katerina yatandika kwegeranisa n’abandi n’omu bwire obu yayegire amazima! Omushija weye akamukwasa kwehanganira eco kizibu, kandi yamukwasa kwereba omu buryo buhikire. Akagamba ngu: “Nankunda, nasima ebirungi ebi ndi kukora kandi nanshabira. Nambwenu nanyijusya emitwarize ya Yehova mirungi, kandi ankwasa kweyihamu emitekatekere mibi.”

9-10. Ni bata oku abazehe bakwasize omunyanyazi omwe kusingura ekizibu eki yabire ayine c’okwegeranisa n’abandi?

⁹ Ni bata oku abazehe bari kubasa kukwasa abari kukira kwegeranisa n’abandi? Reba ecokureberaho ca munyanyazi ori kwetwa Hanuni, owu babire batari kusima obu yabire acari omwana. Akagamba ati: “Nkaba ninkira kugira enshoni kandi ndi kureba abandi bana bari kunkira. Nkatandika kwegeranisa n’abandi kwiha omu bwire obu nabire ncari muto.” N’omu bwire obu Hanuni yayizire omu mazima na bwo akaba nayegeranisa n’abandi. Eco kikatuma yahurira atine omugasho omu kibina. Konka hati ni omupayoniya oshemerirwe. Ni enki ecamukwasize kuhindura oku yabire nayereba?

 ¹⁰ Hanuni akagamba ku abazehe ari bo bamukwasize. Bakereka ku nibamwesiga kandi ku nibamusima ahabw’okuba ari ecokureberaho kirungi. Akahandika ngu: “Hariho obwire obu abazehe babire nibanshaba ngu ngaruremu amani abanyanyazi ababire bari kwetenga obuyambi. Ogo murimo gukaba nigutuma nareba ku ndi ow’omugasho. Ninyijuka obu abazehe bansimire ahabw’okugaruramu amani abanyanyazi abacari bato. Bakanshomera omu 1 Batesalonika 1:2, 3. Kikanshemeza munonga! Mazima ninsima abo barisa barungi ahakuba bakankwasa kwereba ku nyine omwanya omu kibina ca Yehova.”

11. Ni bata oku turi kubasa kukwasa ‘ab’emitima ehendekire kandi ab’omutima ogwetisize kimwe’ nk’oku biri kugambwa omuri Isaaya 57:15?

¹¹ Shoma omuri Isaaya 57:15. Yehova nafa ahari abo ‘ab’emitima ehendekire kandi ab’omutima ogwetisize kimwe.’ Twena nitubasa kugaruramu amani benetata na banyanyazi, batari abazehe kusha. Oburyo bumwe bw’okubagumyamu ni okwereka ku turi kubafaho. Yehova nayenda ngu tubereke ku ari kubakunda. (Enf 19:17) Nambwenu nitukwasa benetata na banyanyazi turi kuba abacurezi kandi turi kumanya ahu obushoborozi bwitu bugarukire. Nituba tutari kwenda kukora ekintu ekiri kubasa kutuma abandi batugirira ihari. Ahobwe nitukoresa obushoborozi bwitu n’obwenge bwitu turi kugumyana.—1 Pet 4:10, 11.

12. Ahabw’enki abantu b’ahaasi babire nibakunda kuba na Yesu? (Reba ekishushani c’aha kishembeso.)

¹² Nitubasa kwega oku turi kubasa kutwariza abandi, twashwijuma oku Yesu yabire natwariza abakurasi beye. Ni we muntu mukuru owabireho omu nsi. Konka akaba ‘natwaza ge kandi ari omucurezi omu mutima.’ (Mat 11:28-30) Taragerizeho kweyereka ku ayine obwenge bwingi. Akegesa akoresize orurimi rworobi, kandi akaba nakoresa ebyokureberaho byorobi, ebi abacurezi babire nibashoborocerwa. (Luk 10:21) Yesu akaba atari nk’abebembezi b’amadini abari kwetungura ahakuba akaba atari kutuma abandi bahurira batine omugasho. (Yoh 6:37) Omu mwanya gw’eco akaba naha ekitinisa abantu b’ahaasi.

13. Ni bata oku rukundo ya Yesu n’obufura byeye byarebekire omu ku yatwarize abegi beye?

¹³ Rukundo n’obufura bya Yesu bikaba nibirebecera omu ku yabire ari kutwariza abegi beye. Akaba namanya ku bari omu mbera ezitari kushushana kandi ku bine obushoborozi obutari kwingana. Obwe rero akaba atari kubashaba kukora omurimo g’okuburira omu buryo oburi kwingana. Ahobwe akaba nasima buri omwe aha bw’amani agu yakoresa. Yesu akereka ku ni ko yabire ari kwehurira omu nfumu y’etalanta. Omuri eyo nfumu, omwebembezi akaha buri mukozi omurimo ‘nk’oku yabire nabasa.’ Omwe omuri abo akagoba ebiri kukira eby’abandi. Konka ogo mwebembezi wabo akabasima ari kugira ngu: ‘Kazare, iwe omwambari omurungi ori kwesigwa!’—Mat 25:14-23.

14. Ni bata oku turi kubasa kutoreza oku Yesu yabire natwariza abandi?

¹⁴ Rukundo n’obufura bya Yesu nibirebecera omu ku ari kututwariza. Namanya obushoborozi bwitu n’embera ezi turimu kandi nashemererwa twakora byona ebi turi kubasa. N’itwe tushemerire kutwariza abandi nk’oku Yesu yakikozire. Titushemerire kukora ekintu cona ekiri kubasa kutuma Omukristo mugenzi witu yayehurira nk’otine mugasho, ninga ngu ashware ahakuba atari kukora ebintu nk’oku abandi bari kubikora. Omu mwanya gw’eco tushemerire kusima benetata na banyanyazi  ahabw’amani agu bari kutaho ngu bahereze Yehova ebirungi kukira ebindi.

15-16. Ni bata oku omunyanyazi yagasirwe n’okweteraho entego ezi ari kubasa kuhikaho?

¹⁵ Entego z’omu buryo bw’omwika nizituma twagira amagara agine ekigendererwa. Konka ekiri kubasa kutukwasa ni okweteraho entego eziri kubuganisa n’obushoborozi bwitu n’embera ezi turimu, tutarebire aha bandi. Twayeteraho entego ezi tutari kubasa nikibasa kutugwisa kubi kandi kitucwa entege. (Luk 14:28) Reba ecahikire aha munyanyazi w’omupayoniya omwe ori kwetwa Midori.

¹⁶ Ishe wa Midori otari Omuhamya wa Yehova, akaba namugwisa kubi ari kumugeranisa n’abandi abu bari kuzarwana n’abegi bagenzi beye. Midori akagamba ati: “Kikatuma nahurira ntine mugasho.” Konka ku yagenzire nakura akagenda nayeyongera kweyesiga. Akagamba ati: “Okushoma Bibuli buri izoba kikaba nikinkwasa kutunga obusinge bw’omu mutima, kandi mpurira Yehova ari kunkunda.” Aketeraho entego ezi ari kubasa kuhikaho kandi yashaba Ruhanga kugira ngu amukwase kuzihikaho. Eco kikatuma yaguma kushemerererwa ebi yabire nahikaho omu buryo bw’omwika.

17. Ni bata oku turi kubasa ‘kujwara omuntu omusya’ kandi shi ni enki ekiri kurugamu?

¹⁷ Kweyihamu ebitekateko bibi n’enyehurira mbi tikiri kufa kwereta. Ni yo nshonga Yehova ari kutugambira ngu: ‘Mujware omuntu ondijo omusya, owahangirwe omu nshusha ya Ruhanga omu kuhikirira n’okwera okw’amazima.’ (Efe 4:23, 24) Kugira ngu eco tukihikeho, tushemerire kushaba, tweyegesa Ekigambo ca Ruhanga kandi tukitekatekeho. Gezaho kukora ebyo bintu bishatu kandi oshabe Yehova amani. Omwika  gweye oguri kwera nigwija kukukwasa kwerinda kwegeranisa n’abandi. Nambwenu Yehova nayija kukukwasa kumanya ku watandikire kugira omutwarize g’okwetungura n’ihari, kandi akukwase kubyeyihamu.

18. Ni bata oku ebigambo ebiri omu 2 Busingye 6:29, 30 biri kukugumya?

¹⁸ Shoma omu 2 Busingye 6:29, 30. Yehova namanya ebi turi kutekateka. Nambwenu namanya oku turi kurwanisa omwika gw’ensi n’obutahikirira bwitu. Oku Yehova ari kureba amani agu turi kutaho ngu turwanise ebyo bintu ni ko ari kukizaho kutukunda.

19. Ni kiha cokureberaho eki Yehova ari kukoresa kugira ngu ayereke ku ari kutukunda?

¹⁹ Kugira ngu Yehova atwereke oku ari kutureba nakoresa rukundo eri ahagati y’omuzire n’omwana. (Isa 49:15) Reba ecokureberaho c’omukazi ori kwetwa Rachel. Akahandika ngu: “Muhara wange Stephanie akazarwa atahikire. Nkamuzara ari muce munonga. Konka abadokita bakanyikiriza kuguma ndi kumutora buri izoba omu kwezi k’okubanza. Obwire obu twabire nitumara hamwe bukatuma twakundana. Hati ayine emyaka mukaga, konka abari kwingana na we nibamukira obuhango. Nimukunda munonga ahakuba akaruga hare, kandi akatuma natunga okushemererwa kwingi omu kubaho kwange!” Nikitushemeza kumanya ku Yehova ari kutukunda rukundo nk’ey’ogo muzire, yareba amani agu turi kutaho ngu tumukorere n’amagara gitu gona!

20. Ni eha nshonga eri kutuma washemererwa nk’omuhereza wa Yehova?

²⁰ Itwe abahereza ba Yehova turi ab’omutano omu ka yeye. Yehova tarakweyirize hihi ngu ni ahakuba wabire ori kukira batahi bawe. Ahobwe akareba omu mutima gwawe yareba ori omucurezi kandi ori kwikiriza kwegesibwa okahinduka. (Zab 25:9) Yesige otari kubanganisa ku kiri kumushemeza wakora cona eki ori kubasa ngu omuhereze. Okwehangana n’okuguma ori omwesigwa ni ebihamya ebiri kwereka ku oyine ‘omutima ogushemire murungi.’ (Luk 8:15) Obwe rero, gumizamu kuha Yehova ebirungi kukira ebindi. Eco nikija kukukwasa kushemererwa ‘ori kwehimbisiza omu murimo gwawe.’