EKICWEKA C’OKWEGA 2
Amashomo agu turi kwegera aha ‘mwegi owu Yesu yabire ari kukunda’
‘Tukundane, ahakuba okukunda kuruga ahari Ruhanga.’—1 YOH 4:7.
ECESHONGORO CA 105 ‘Ruhanga ni Rukundo’
EMPINYE *
1. Rukundo ya Ruhanga netuma wayehurira ota?
ENTUMWA Yohaana akahandika ngu: ‘Ruhanga ni rukundo.’ (1 Yoh 4:8) Ebyo bigambo nibitwijusya ku Ruhanga, oburugo bw’amagara, nambwenu ari we burugo bwa rukundo. Yehova natukunda! Rukundo yeye netuma twahurira turinzirwe, tushemerirwe, kandi tumazirwe.
2. Tukuratize ebiri omuri Matayo 22:37-40, ni biha biragiro bibiri bikuru, kandi ahabw’enki korobera ekiragiro ca kabiri kiri kubasa kutugumira?
2 Abakristo, kwereka rukundo ti ensharamu yabo. Ni ekiragiro. (Shoma omuri Matayo 22:37-40.) Ku turi kumanya Yehova ge, korobera ekiragiro c’okubanza nikitworobera. Obushangirwe Yehova ahikirire, kandi natutwariza ge. Konka, korobera ekiragiro ca kabiri nikibasa kutugumira. Ahabw’enki? Ni ahabw’okuba benetata na banyanyazi, ari bo banywani bitu ba hihi, tibahikirire. Hine obu bari kutugambira ninga batukorera ebintu bibi. Yehova akaba namanya ku eco kirije kutuhikaho, ni yo nshonga yatumire bamwe omu bahandiki ba Bibuli bahandikamu obuhabuzi bw’oku tushemerire kwerekana rukundo n’enshonga ahabw’enki tushemerire kugereka. Omwe omuri abo bahandiki akaba ari Yohaana.—1 Yoh 3:11, 12.
3. Ni enki eki Yohaana yagambire aha bikwatirine na rukundo?
3 Omu bi Yohaana yahandikire, akagamba ku Abakristo bashemerire kwerekana rukundo. Omu nkuru eziri kukwata ahari Yesu ezi Yohaana yahandikire, akakoresa munonga ekigambo “rukundo” kukira ebindi bitabo byona by’engiri byeterine hamwe. Yohaana nabasa kuba yabire ayine emyaka nka igana obu yahandikire ekitabo ceye c’Engiri n’amabaruha geye ashatu. Omu bi yahandikire byona, akereka ku Omukristo ashemerire kwereka rukundo omu bi ari kukora byona. (1 Yoh 4:10, 11) Konka, kikakwata Yohaana obwire buringwa kugira ngu ayege eryo shomo.
4. Mbehi Yohaana akaba nayereka rukundo burijo?
4 Obu Yohaana yabire acari muto akaba atari kukira kwereka rukundo. Ecokureberaho: Yesu n’abegi beye bakaza omu murimo g’okuburira, bari kuruga Yerusaalemu bari kuza Samariya. Ab’omu caro kimwe c’omuri Samariya bakanga kubakira ge. Yohaana akatwaza ata? Akashaba ngu omuriro guruge omu iguru gucwecereze abaturage bona b’eco caro! (Luk 9:52-56) Aha rindi izoba, Yohaana akaremwa kwereka rukundo ezindi ntumwa ngenzi zeye. We na murumuna weye Yakobo bakashaba mama wabo ngu abashabire ahari Yesu, ngu bije kushitama aha mwanya mukuru aha rubaju rweye omu Bukama. Ezindi ntumwa ku zamanyire eki Yakobo na Yohaana bakora, zikabitirwa ekiniga! (Mat 20:20, 21, 24) N’obu Yohaana yabire ari kukora ezo nshobe, Yesu akaba namukunda.—Yoh 21:7.
5. Ni enki eki twaza kushwijuma omuri eki kicweka?
5 Omuri eki kicweka, twaza kushwijuma ecokureberaho ca Yohaana n’ebintu bimwe ebi yahandikire ahari rukundo. Ku turabishwijume, nitwija kwega oku turi kubasa kwereka rukundo benetata na banyanyazi. Nambwenu, twaza kwega oburyo bw’oku omutwe gw’eka ari kubasa kwerekamu rukundo ab’omu ka yeye.
RUKUNDO NEREBEKERA OMU BIKORWA
Yehova akereka ku natukunda ari kohereza Omwana weye ngu atufire (Reba paragurafu ya 6-7)
6. Ni bata oku Yehova yatwerekire rukundo?
6 Nitubasa kutekateka ngu rukundo nerebekera omu bigambo birungi ebi omuntu ari kutugambira. Konka kugira ngu rukundo ebe eya buzima, eshemerire kwerekerwa omu bikorwa. (Geranisa n’ebiri omuri Yakobo 2:17, 26.) Ecokureberaho: Yehova natukunda. (1 Yoh 4:19) Kandi natwereka ku natukunda birabire omu bigambo birungi ebiri omuri Bibuli. (Zab 25:10; Rom 8:38, 39) Konka, nitwesiga ku Ruhanga ari kutukunda, hatari omu bigambo kusha, ahobwe nanabitwereka n’omu bikorwa. Yohaana akahandika ati: ‘Omuri eki ni mwo okukunda kwa Ruhanga kwayorekirwe ahari itwe, obu yatuma Omwana we omwe nyamunegere, ngu tube abahurire aha bweye.’ (1 Yoh 4:9) Yehova akikiriza ngu Omwana weye owu ari kukunda abonabone kandi afe aha bwitu. (Yoh 3:16) Mbehi mazima ebyo tibiri kwereka ku Yehova ari kutukunda?
7. Ni bata oku Yesu yatwerekire ku natukunda?
7 Yesu akahamiza abegi beye ku yabire nabakunda. (Yoh 13:1; 15:15) Akabereka ku yabire nabakunda, hatari omu bigambo kusha, ahobwe n’omu bikorwa. Yesu akagamba ati: ‘Tihariho rukundo eri kukira egi, omuntu okufera banywani beye.’ (Yoh 15:13) Twatekateka aha bi Yehova na Yesu batukorire, nikituma twayenda kukora ki?
8. Ebigambo ebiri omuri 1 Yohaana 3:18 nibitushaba kukora ki?
8 Nitwereka ku nitukunda Yehova na Yesu turi kuborobera. (Yoh 14:15; 1 Yoh 5:3) Kandi Yesu akaturagira kukundana. (Yoh 13:34, 35) Titushemerire kwereka rukundo benetata na banyanyazi omu bigambo kusha, ahobwe nambwenu tushemerire kwereka ku nitubakunda omu bikorwa. (Shoma omuri 1 Yohaana 3:18.) Ni enki eki turi kubasa kubakorera kugira ngu tubereke ku nitubakunda?
KUNDA BENETATA NA BANYANYAZI
9. Rukundo ekatuma Yohaana yakora ki?
9 Yohaana akaba nabasa kuguma n’ishe kugira ngu agumizemu kukora omurimo g’okuroba abone esente. Omu mwanya gw’eco, akakoresa obwire obu yabire ayine omu kukwasa abandi kwega ebiri kukwata ahari Yehova na Yesu. Ensharamu ya Yohaana mazima ekaba etorobi. Akahiganisibwa, kandi aha muheru gw’ekinyigana c’okubanza obu yabire akuzire, akasibwa. (Byak 3:1; 4:1-3; 5:18; Kush 1:9) N’obu Yohaana yasibirwe ahabw’okuburira ebiri kukwata ahari Yesu, akagumizamu kwereka ku natekateka aha bandi. Ecokureberaho: Obu yabire asibirwe aha kirwa ca Patimosi, akahandika ekitabo c’Okushuuruurwa kandi yacoherereza ab’omu bibina kugira ngu bamanye ebyabire biri ‘kwenda kubaho juba.’ (Kush 1:1) Bwanyima Yohaana ku yarekwirwe aha kirwa ca Patimosi, akahandika Engiri yeye eri kugamba aha magara ga Yesu n’omurimo gweye. Nambwenu akahandika amabaruha geye ashatu kugira ngu agumye Abakristo bagenzi beye. Ni bata oku turi kubasa kutoreza ecokureberaho ca Yohaana?
10. Ni bata oku ori kubasa kwereka ku nokunda abandi?
10 Nobasa kwereka ku nokunda abandi birabire omu ku ori kusharamu kukoresa amagara gawe. Ensi ya Sitaane neyenda ngu okorese obwire bwawe bwona n’amani gawe gona ori kwerondera esente n’ekitinisa. Konka omu mwanya gw’eco, ababurizi b’Obukama abari kweferereza b’omu nsi yona nibamara obwire bwabo bari kuburira obutumwa burungi kandi bari kukwasa abantu kuhika hihi ya Yehova. Abamwe bakabasa kumara obwire bwabo bwona bari kuburira n’okwegesa.
Nitwereka benetata na banyanyazi n’ab’omu ka yitu rukundo birabire omu bi turi kubakorera (Reba paragurafu ya 11, 17) *
11. Ni bata oku Abakristo b’abesigwa bari kwereka ku nibakunda Yehova na benetata na banyanyazi?
11 Abakristo bingi b’abesigwa nibakora emirimo obwire bwona kugira ngu babone eby’okubabisaho bo n’ab’omu maka gabo. Konka nabwo, abo baburizi b’abesigwa nibashagika ekitongore ca Ruhanga oku bari kubasa kona. Ecokureberaho: Abamwe nibayamba abahikirweho n’ebihikirizi, abandi bakora omu kombeka amaju g’Obukama, kandi bona bahayo esente kugira ngu bashagike omurimo oguri kukorerwa omu nsi yona. Ebyo byona nibabikora ahabwa rukundo eyi bari kukunda Ruhanga n’Abakristo bagenzi babo. Buri sande, nitwereka ku nitukunda benetata na banyanyazi turi kuza omu nterane kandi tuzekwatanisamu. N’obu twakuba turuhire, nituzizamu. Nituhayo ebitekateko n’obu twakuba twine obwoba. Kandi n’obu twakuba twine ebizibu, nitugaruramu abandi amani mbere y’enterane na bwanyima yazo. (Heb 10:24, 25) Ku nitusima munonga Abakristo bagenzi bitu ahabw’ebyo bikorwa birungi ebi bari kukora!
12. Ni buha buryo bundi obu Yohaana yayerekiremu rukundo bagenzi beye?
12 Yohaana akereka ku nakunda benetata na banyanyazi ari kubasima kandi akabaha obuhabuzi. Ecokureberaho: Omu mabaruha ga Yohaana akasima benetata na banyanyazi ahabw’okwikiriza kwabo n’emirimo mirungi, konka nambwenu akabaha obuhabuzi atarabire aha rubaju aha bicumuro ebi babire nibakora. (1 Yoh 1:8–2:1, 13, 14) N’itwe, tushemerire kusima benetata na banyanyazi ahabw’ebirungi ebi bari kukora. Konka omuntu yatandika kwereka emitwarize mibi, nobasa kumwereka ku nomukunda ori kumuha obuhabuzi omu bwenge. Kuha munywani wawe obuhabuzi nicetenga obumanzi konka Bibuli negamba ku omunywani owa buzima ari kuhabura mugenzi weye.—Enf 27:17.
13. Ni enki eki tushemerire kwerinda kukora?
13 Hine obu turi kwereka rukundo benetata na banyanyazi turi kwerinda omu bi turi kukora. Ecokureberaho: Tituri kwitwa ekiniga ahabw’ebi bari kugamba. Tekateka aha cabireho hasigireyo obwire buce Yesu akafa. Akagambira abegi beye ngu kugira ngu batunge amagara agatahwaho bashemerire kurya omubiri gweye bakanywa n’eshagama yeye. (Yoh 6:53-57) Ebyo bigambo bikatuma abingi omu begi beye bamusigaho, konka abanywani beye aba buzima bakamugumaho, harimu na Yohaana. Bakamubaho akaramata. Ebi Yesu yagambire tibarabicengire, kandi na bo bikabatangaza. Konka, abanywani ba Yesu b’abesigwa tibaratekatekire ngu ebi yagambire bigwire ngu kitume bamugirira ekiniga. Ahobwe bakamwesiga, ahabw’okuba bakaba nibamanya ku nagamba amazima. (Yoh 6:60, 66-69) Mbehi n’itwe titushemerire kubatoreza, tutikirize kwitwa ekiniga, ahabw’ebi banywani bitu bari kugamba! Omu mwanya gw’eco, tushemerire kubaha omwanya kugira ngu batushobororere.—Enf 18:13; Mub 7:9.
14. Ahabw’enki tutashemerire kwikiririza orwango ngu ruze omu mitima yitu?
14 Nambwenu, Yohaana akatwijusya ku tutashemerire kwanga benetata na banyanyazi. Twaremwa korobera obwo buhabuzi, nituba twaha Sitaane omwanya g’okutuhabisa. (1 Yoh 2:11; 3:15) Eco ni co ecabire ahari bamwe aha muheru gw’ekinyigana c’okubanza B.Y. Sitaane akagezaho kugira ngu atume abahereza ba Ruhanga bayangana kandi bacwekemu ebicweka. Omu bwire obu Yohaana yahandikiremu ebaruha zeye, abantu abine emitwarize nk’eya Sitaane bakaba barebekire omu kibina. Ecokureberaho: Diotorefe akakora ebintu by’okubaganisamu ekibina. (3 Yoh 9, 10) Akaba atari kuha ekitinisa entumwa z’akakiko k’abarisa. Nambwenu akaba nabinga omu kibina abantu ababire nibereka obufura abu yabire nayanga. Mazima eco kikaba kiri kibi munonga! Na hati Sitaane acagumizemu kugezaho kucwamu ebicweka abahereza ba Ruhanga. Konka tituriyikiriza kwecwamu ebicweka.
KUNDA AB’OMU KA YAWE
Yesu akashaba Yohaana ngu areberere nyina omu by’omubiri n’omu by’omwika. Omuri obu bwire, abakuru b’eka bashemerire kufa aha bi amaka gabo gari kwetenga (Reba paragurafu ya 15-16)
15. Ni enki eki omukuru w’eka ashemerire kwijuka?
15 Oburyo bumwe obu omukuru w’eka ari kwerekamu ku nakunda ab’omu ka yeye ni okubarondera eby’okubabisaho. (1 Tim 5:8) Konka ashemerire kwijuka ku ebi ari kubaha by’omubiri, bitari kuhaza ecetengo cabo c’eby’omwika. (Mat 5:3) Reba ecokureberaho eki Yesu yaterireho abakuru b’eka. Ekitabo c’engiri ya Yohaana nicereka ku obu Yesu yabire ari aha kiti c’obusaasi, yabire ari kutekateka ah’ab’omu ka yabo. Yohaana akaba ayemerire aha rubaju rwa Mariya nyina wa Yesu, obu babire bari kuhanika Yesu. N’obu Yesu yabire ari omu busaasi bwingi, akashaba Yohaana ngu areberere Mariya. (Yoh 19:26, 27) Yesu akaba ayine benenyina ababire bari kubasa kureberera Mariya omu by’omubiri, konka nibabasa kuba babire batakabire abegi beye. Obwe rero, Yesu akaba nayenda ngu hagire omuntu owaguma kufa ahari Mariya omu by’omubiri n’omu by’omwika.
16. Ni eha mirimo eyi Yohaana yabire ayine?
16 Yohaana akaba ayine emirimo myingi y’okukora. Ahabw’okuba yabire ari entumwa ya Yesu, akaba ari ecokureberaho omu murimo g’okuburira. Nambwenu, nabasa kuba yabire ayine eka; obwe rero akaba nafa aha ka yeye omu by’omubiri n’omu by’omwika. (1 Kor 9:5) Ni enki eki abakuru b’eka bari kumwegeraho?
17. Ahabw’enki kiri ec’omugasho omukuru w’eka kufa aha ka yeye omu by’omwika?
17 Mwenetata oyine eka na we naba ayine emirimo myingi y’okukora. Ecokureberaho: Naba ashemerire kutwaza ge aha murimo gweye kugira ngu emitwarize yeye ehimbise Yehova. (Efe 6:5, 6; Tit 2:9, 10) Nabasa kuba ayine emirimo omu kibina, nk’okurisa n’okwebembera omurimo g’okuburira. Nambwenu naba ashemerire kwega Bibuli n’ab’eka yeye burijo. Ku ari kukikora basyoya, nikituma bamusima ahabw’amani agu ari kutamu kugira ngu abakwase omu by’omubiri, omu nyehurira n’omu by’omwika.—Efe 5:28, 29; 6:4.
‘MUGUME OMU KUKUNDA KWANGE’
18. Ni enki eki Yohaana yabire ari kumanya atari kubanganisa?
18 Yohaana akabaho obwire buringwa kandi yahika ahari byingi. Akabugana ebigezo byingi ebyabire biri kubasa kumumara amani. Konka burijo akaba natamu amani kugira ngu ayorobere ebiragiro bya Yesu, nk’ec’okukunda benetata na banyanyazi. Kandi eco kikaba nikituma yayesiga atari kubanganisa ku Yehova na Yesu bari kumukunda kandi ku babire nibamuha amani g’okwehanganira ebigezo byona. (Yoh 14:15-17; 15:10; 1 Yoh 4:16) Tihine eki Sitaane n’abahereza beye babire bari kubasa kukora kugira ngu baremese Yohaana kwereka rukundo benetata, omu bigambo n’omu bikorwa.
19. Tukuratize ebiri omuri 1 Yohaana 4:7 ni enki eki tumaririre kukora, kandi ahabw’enki?
19 Nka Yohaana, n’itwe tutwire omu nsi eri kutegekwa na Sitaane, otari kwereka abantu rukundo. (1 Yoh 3:1, 10) N’obu ari kwenda ngu tureke kwereka rukundo benetata na banyanyazi, tarije kukihikaho, ahabw’okuba tituramwikiririze kukikora. Nimureke tumaririre kukunda benetata na banyanyazi, turi kubereka rukundo omu bi turi kugamba n’omu bi turi kukora. Ku turakikore basyoya, nitwija kushemerererwa kuba omu ka ya Yehova, kandi nitwija kugira okushemererwa kwingi.—Shoma omuri 1 Yohaana 4:7.
ECESHONGORO CA 88 Ompabure Emihanda Yaawe
^ par. 5 Entumwa Yohaana ni we ‘mwegi owu Yesu yabire ari kukunda.’ (Yoh 21:7) N’obu yabire ari muto, akaba ayine emitwarize mirungi. Bwanyima y’obwire, Yehova akamukoresa omu kuhandika byingi ahari rukundo. Omuri eki kicweka, twaza kureba bimwe omu bi Yohaana yahandikire kandi tushwijume eki turi kubasa kumwegeraho.
^ par. 59 EKISHUSHANI: Omukuru w’eka ari kwekwatanisa omu kuyamba abahikirweho ebihikirizi, ari kuhayo esente z’okuyamba omurimo oguri kukorerwa omu nsi yona, kandi ari kweta abandi ngu bije kwekwatanisa n’eka yeye omu kuramya kw’eka.
